• कोरोनाने आजारी रुग्णांना आराम पडण्यासाठी  मागितली  दुवा !
• आझम कॅम्पस ‘च्या  ‘फेसबुक लाईव्ह   ‘जुम्मा नमाज’ ला पुण्यात एकविसाव्या  आठवड्यात प्रतिसाद 

पुणे: कोरोना विषाणू साथीच्या पार्श्वभूमीवर सामूहिक नमाज पठण करू नये, या आवाहनाचे पालन करीत पुण्यातील आझम कॅम्पस मशिदीत जुम्मा नमाजचे ‘फेसबुक लाईव्ह’ द्वारे थेट प्रक्षेपण करण्यात  आले .  देशभरात कोरोनाने आजारी रुग्णांना आराम पडण्यासाठी    दुवा मागण्यात आली. 
सलग एकविसाव्या आठवडयात या उपक्रमाला प्रतिसाद मिळाला. 
आज ९ ऑकटोबर  रोजी  दुपारी दीड वाजता ‘फेसबुक लाईव्ह’ पठण  करण्यात आले .  मुस्लीम बांधवांनी या उपक्रमाला प्रतिसाद देत घरातून सहभाग घेतला.
आझम कॅम्पस शैक्षणिक,सामाजिक परिवाराचे अध्यक्ष डॉ.पी.ए.इनामदार यांनी पत्रकाद्वारे या उपक्रमाची माहिती दिली.  
येथे दर आठवड्यात   शुक्रवारी दुपारी दीड वाजता जुम्मा नमाझचे फेसबुक लाईव्ह द्वारे पठण करण्यात येते.आझम कॅम्पस मशिदीमध्ये पेश इमाम असलेले मौलाना नसीम अहमद,शराफत अली  यांनी या उपक्रमादरम्यान  नमाज पठण केले.तर  आझम कॅम्पस च्या माहिती तंत्रज्ञान विभागाचे प्रमुख अमीन शेख यांनी तांत्रिक बाजू सांभाळली. 
मशिदीच्या पेश इमाम यांच्या मार्गदर्शना खाली घरी  नमाज पठण करणे नव्या तंत्रज्ञानाच्या वापराने शक्य झाले असून २९ मे पासून हा उपक्रम दर शुक्रवारी  सुरु आहे. अशा स्वरूपाचा हा पहिलाच उपक्रम आहे.या तंत्रामुळे मशिदीत गर्दी होत नाही,फक्त पेश इमाम मशिदीतून नमाज पठण करतात आणि इतरांना घरातून त्यात सहभागी होणे शक्य होते.दर शुक्रवारी दुपारी दीड वाजता हा उपक्रम होतो.

एरवी शहराच्या विविध भागात मशिदींमध्ये शुक्रवार (जुम्मा) दिवशी सामूहिक नमाज पठण केले जाते.कोरोना संसर्गचा  धोका लक्षात घेऊन  शुक्रवारी मशिदीत जाता येत  नाही. त्या सर्वांना या फेसबुक लाईव्ह नमाज पठणाचा लाभ होत आहे.आझम कॅम्पस या फेसबुक पेज वर हे लाईव्ह प्रक्षेपण करण्यात येते.प्रशासनाने दिलेल्या सर्व सूचनांनुसार सोशल डिस्टन्स चे नियम पाळण्यात येतात.

पुणे विभागातील 3 लाख 95 हजार 123 कोरोना बाधित रुग्ण बरे होऊन घरी
विभागात कोरोना बाधित 4 लाख 64 हजार 774 रुग्ण
-विभागीय आयुक्त सौरभ राव

पुणे,दि.09 :- पुणे विभागातील 3 लाख 95 हजार 123 कोरोना बाधित रुग्ण बरे होऊन घरी गेले असून विभागात कोरोना बाधीत रुग्णांची संख्या 4 लाख 64 हजार 774 झाली आहे. तर ॲक्टीव रुग्ण संख्या 57 हजार 160 इतकी आहे. कोरोनाबाधीत एकुण 12 हजार 491 रुग्णांचा मृत्यू झाला असून मृत्यूचे प्रमाण 2.69 टक्के आहे. पुणे विभागामध्ये बऱ्या होणा-या रुग्णांचे प्रमाण 85.01 टक्के आहे, अशी माहिती विभागीय आयुक्त सौरभ राव यांनी दिली.
पुणे जिल्हा
पुणे जिल्हयातील कोरोना बाधीत एकूण 3 लाख 1 हजार 392 रुग्णांपैकी 2 लाख 61 हजार 565 रुग्ण बरे होवून घरी गेले आहेत. ॲक्टीव रुग्ण 32 हजार 910 आहेत. कोरोनाबाधित एकूण 6 हजार 917 रुग्णांचा मृत्यू झाला आहे. मृत्यूचे प्रमाण 2.30 टक्के इतके आहे तर बरे होणा-या रुग्णांचे प्रमाण 86.79 टक्के आहे.
सातारा जिल्हा
सातारा जिल्हयातील कोरोना बाधीत एकूण 40 हजार 636 रुग्णांपैकी 32 हजार 195 रुग्ण बरे होवून घरी गेले आहेत. ॲक्टीव रुग्ण संख्या 7 हजार 122 आहे. कोरोनाबाधित एकूण 1 हजार 319 रुग्णांचा मृत्यू झाला आहे.
सोलापूर जिल्हा
सोलापूर जिल्हयातील कोरोना बाधीत एकूण 36 हजार 39 रुग्णांपैकी 29 हजार 57 रुग्ण बरे होवून घरी गेले आहेत. ॲक्टीव रुग्ण संख्या 5 हजार 739 आहे. कोरोनाबाधित एकूण 1 हजार 243 रुग्णांचा मृत्यू झाला आहे.
सांगली जिल्हा
सांगली जिल्हयातील कोरोना बाधीत एकूण 40 हजार 330 रुग्णांपैकी 33 हजार 784 रुग्ण बरे होवून घरी गेले आहेत. ॲक्टीव रुग्ण संख्या 5 हजार 59 आहे. कोरोनाबाधित एकूण 1 हजार 487 रुग्णांचा मृत्यू झाला आहे
कोल्हापूर जिल्हा
कोल्हापूर जिल्हयातील कोरोना बाधीत एकूण 46 हजार 377 रुग्णांपैकी 38 हजार 522 रुग्ण बरे होवून घरी गेले आहेत. ॲक्टीव रुग्ण संख्या 6 हजार 330 आहे. कोरोनाबाधित एकूण 1 हजार 525 रुग्णांचा मृत्यू झाला आहे
कालच्या रुग्णसंख्येच्या तुलनेत आज झालेली वाढ
कालच्या बाधीत रुग्ण संख्येच्या तुलनेत पुणे विभागात बाधीत रुग्णांच्या संख्येमध्ये एकूण 3 हजार 267 ने वाढ झाली आहे. यामध्ये पुणे जिल्ह्यात 2 हजार 39, सातारा जिल्ह्यात 441, सोलापूर जिल्ह्यात 314, सांगली जिल्ह्यात 361 तर कोल्हापूर जिल्ह्यात 112 अशी रुग्ण संख्येमध्ये वाढ झालेली आहे.
कालच्या रुग्णसंख्येमध्ये बऱ्या होणा-या रुग्णांचे प्रमाण –
पुणे विभागामध्ये बऱ्या होणाऱ्या एकूण 4 हजार 897 रुग्णांमध्ये पुणे जिल्हयामध्ये 2 हजार 707, सातारा जिल्हयामध्ये 455, सोलापूर जिल्हयामध्ये 382, सांगली जिल्हयामध्ये 424 व कोल्हापूर जिल्हयामध्ये 929 अशा रुग्णांचा समावेश आहे.
पुणे विभागातील सर्व्हेक्षण
आजपर्यत विभागामध्ये एकुण 20 लाख 66 हजार 170 नमून्याचा तपासणी अहवाल प्राप्त झाला. प्राप्त अहवालांपैकी 4 लाख 64 हजार 774 नमून्यांचा अहवाल सकारात्मक (पॉझिटिव्ह) आहे.

( टिप :- दि. 8 ऑक्टोबर 2020 रोजी रात्री 9.00 वा. पर्यंतच्या आकडेवारीनुसार )

• कोरोनाबाधित रुग्णांच्या उपचारसुविधेत सातत्याने वाढ

पुणे, दि. 9 : कोरोनाबाधित रुग्णांची संख्या विचारात घेत उपचारसुविधा वाढविण्यात येत आहेत. कोरोनाबाधित रुग्णांना उपचारसुविधांची कमी पडणार नाही याची काळजी घेतली जात आहे. रुग्णालयाची स्वच्छता, रुग्णालयांना ऑक्सिजन, रेमिडिसिव्हिर पुरवठा सुरळीत ठेवण्याचे निर्देश प्रशासनाला देण्यात आले आहेत. नागरिकांनीही मास्कचा वापर, सुरक्षित अंतर व स्वच्छता राखून कोरोना संसर्ग रोखण्याबाबत दक्षता घ्यावी. ‘माझे कुटुंब, माझी जबाबदारी’ मोहिम यशस्वी करावी, असे आवाहन उपमुख्यमंत्री तथा जिल्ह्याचे पालकमंत्री अजित पवार यांनी केले. लोकप्रतिनिधींकडून येणाऱ्या सूचना विचारात घेवून त्यानुसार योग्य कार्यवाही करावी, असे निर्देशही त्यांनी अधिकाऱ्यांना दिले.
‘कोविड व्यवस्थापना’बाबत आज उपमुख्यमंत्री अजित पवार यांच्या अध्यक्षतेखाली पुण्यातील विधानभवन सभागृहात संबंधित वरिष्ठ अधिकाऱ्यांसोबत बैठक घेण्यात आली, राज्य उत्पादनशुल्क मंत्री दिलीप वळसे-पाटील यांच्यासह बैठकीला विधान परिषदेच्या उपसभापती डॉ. निलम गोऱ्हे, खा. सुप्रिया सुळे, (व्हिसीव्दारे), पुण्याचे महापौर मुरलीधर मोहोळ, पिंपरी चिंचवडच्या महापौर उषा उर्फ माई ढोरे, जिल्हा परिषदेच्या अध्यक्षा निर्मला पानसरे, खासदार गिरीष बापट, खासदार डॉ.अमोल कोल्हे, आमदार चेतन तुपे, आमदार माधुरी मिसाळ, आमदार सुनील कांबळे, आमदार अतुल बेनके, आमदार सिद्धार्थ शिराळे यांच्यासह विविध पदाधिकारी तसेच विभागीय आयुक्त सौरभ राव, ससून रुग्णालयाचे विशेष कार्य अधिकारी एस.चोक्कलिंगम, पुणे महानगरपालिका आयुक्त विक्रम कुमार, पिंपरी-चिंचवड महानगरपालिका आयुक्त श्रावण हर्डीकर, जिल्हाधिकारी डॉ. राजेश देशमुख, पुणे महापालिकेच्या अतिरिक्त आयुक्त रुबल अग्रवाल, पोलीस आयुक्त अमिताभ गुप्ता, पोलीस आयुक्त कृष्णप्रकाश, जिल्हा पोलीस अधीक्षक अभिनव देशमुख, आरोग्य विभागाचे सल्लागार डॉ. सुभाष साळुंखे, ससूनचे अधिष्ठाता डॉ. मुरलीधर तांबे, जिल्हा आरोग्य अधिकारी डॉ. भगवान पवार, जिल्हा टास्कफोर्सचे अध्यक्ष डॉ. डी.बी. कदम आदी वरिष्ठ अधिकारी, पदाधिकारी उपस्थित होते.
उपमुख्यमंत्र्यांनी यावेळी शासन, प्रशासन व जनतेच्या सहकार्यातून कोरोनासंकटावर मात करणे शक्य आहे, असा विश्वास व्यक्त केला. रुग्णालयांमध्ये स्वच्छता असावी, ऑक्सिजन, रेमडिसिव्हीर इंजेक्शन पुरवठा सुरळीत रहावा, अत्यावश्यक सुविधांची उपलब्धता कायम ठेवावी, गरजू रुग्णाला आरोग्यसुविधा वेळेत मिळाव्यात, याबाबत दक्षता घेण्याच्या सूचना केल्या.
उपमुख्यमंत्री अजित पवार म्हणाले की, कोरोना प्रतिबंध उपाययोजनांच्या अंमलबजावणीबाबत प्रशासनाने लोकप्रतिनिधींच्या सूचना विचारात घेऊन कार्यवाही करावी. ग्रामीण भागातील आरोग्य सुविधेबाबत प्रशासनाने दक्षता घ्यावी. ‘माझे कुटुंब माझी जबाबदारी’ मोहिमेला गती देण्यासोबतच बाधित रुग्णांवर वेळेत उपचार मिळवून देण्यासाठी नियोजन करा, अशा सूचनाही त्यांनी दिल्या.
विधानपरिषदेच्या उपसभापती डॉ. निलम गोऱ्हे यांनी माझे कुटुंब, माझी जबाबदारी मोहिमे अंतर्गत सुरू असलेल्या कामकाजाबाबत समाधान व्यक्त केले. डॉ.सुभाष साळुंखे म्हणाले, 14 ऑक्टोबर ते 25 ऑक्टोबर या कालावधीत पहिल्या पुण्याचा निर्धार, कोरोना हद्दपार अभियान राबविण्यात येत आहे.पुणे महानगरपालिका, पिंपरी चिंचवड महानगरपालिका व पुणे ग्रामीण क्षेत्रात राबविण्यात येणार आहे.
विभागीय आयुक्त सौरभ राव यांनी कोरोना स्थिती, उपाययोजनांची माहिती दिली. ‘माझे कुटुंब माझी जबाबदारी’ मोहीम प्रभावीपणे राबवून घरोघरी सर्व्हेक्षणावर भर देण्यात येत असल्याचे त्यांनी सांगितले.
पुणे महापालिका आयुक्त विक्रम कुमार यांनी पुणे महानगरपालिका क्षेत्रातील कोरोना संसर्गाबाबतची स्थिती, उपाययोजनांची माहिती दिली.
पुणे महानगरपालिका आयुक्त विक्रम कुमार व पिंपरी चिंचवड महानगरपालिका आयुक्त श्रावण हर्डीकर यांनी शहरी भागातील कोरोना प्रतिबंधासाठी करण्यात येत असलेल्या उपाययोजनांची माहिती दिली. यावेळी विविध यंत्रणांचे प्रमुख अधिकारी उपस्थित होते.

पुणे –नियमित पाणी पुरवठा करण्याची मागणी करत महापालिकेच्या पाणी पुरवठा खात्यातील कार्यकारी अभियंत्याची जबरदस्तीने पूजा करून कार्यालयाच्या साहित्याची नासधूस व टाळा ठोकण्याच्या प्रकरणात भाजपचे माजी आमदार योगेश टिळेकर आणि चार नगरसेवकांसह 41 जणांना आज न्यायालयाने जामीन मंजूर केला आहे.यातील नगरसेविकांची महिला कारागृहातून तर माजी आमदार टिळेकर व आदींची बार्टी शेजारील कोरोंटाइन सेंटर मधून सुटका करण्यात आली आहे.

याप्रकरणी संबंधितांना 14 दिवस न्यायालयीन कोठडी सुनावण्यात आली होती. बुधवारी त्यांनी जामीनासाठी अर्ज केला होता. त्या अर्जावर आज सुनावणी झाली.माजी आमदार टिळेकर यांच्यासह सर्वांवर सरकारी कामात अडथळा आणल्याप्रकरणी विविध कलमांनुसार स्वारगेट पोलिस ठाण्यात गुन्हा दाखल करण्यात आला आहे.नगरसेविका रंजना टिळेकर, राणी भोसले, ऋषाली कामठे, वीरसेन जगताप अशी अटक झालेल्या नगरसेवकांची नावे आहेत. याप्रकरणी कार्यकारी अभियंता अषित देवप्रकाश जाधव यांनी फिर्याद दिली आहे. आरोपीतर्फे ऍड. प्रसाद कुलकर्णी, ऍड. सुधीर शहा, ऍड. के. टी. आरु, ऍड. शैलेश म्हस्के,, ऍड. रवी लाढाणे, ऍड. ऋषिकेश घोरपडे, ऍड. सिद्धार्थ राठोड यांनी कोर्टात कामकाज पाहिले. या प्रकरणात संबंधितांना जामिनावर सोडण्याचा आदेश न्यायालयाने दिला.कात्रज- कोंढवा रस्ता, बालाजीनगर, धनकवडी परिसरात पाणी पुरवठा सुरळीत करण्यासाठी टिळेकर यांनी पाणी पुरवठा विभागाच्या स्वारगेट येथील कार्यालयात आंदोलन केले. पोलिसांनी दिलेल्या माहितीनुसार, टिळेकर यांनी फिर्यादी यांच्या टेबलावरील काच फोडली व कार्यालयातील फाइल फेकून दिल्या. तर कार्यकर्त्यांनी कार्यालयातील खुर्च्यांची नुकसान करून काचा फोडल्या. त्यानंतर टिळेकर यांनी फिर्यादीच्या अंगावर धावून येत त्यांना दमदाटी करून ढकलत कार्यालयाबाहेर काढत सरकारी कामात अडथळा आणला होता.

पाण्याच्या राजकारणापायी त्यांनी पाहिल्या कारागृहाच्या उत्तुंग भिंती …

महिला नगरसेविकांना याप्रकरणी 2 रात्री ३ दिवस कारागृहात काढाव्या लागल्याचे समजते . टिळेकर आणि काही कार्यकर्ते मात्र बार्टी शेजारील कोरोंटाईन सेंटर मध्ये ठेवण्यात आले होते .या सर्वांना आज संध्याकाळी उशिरा सोडण्यात आले. यावेळी त्यांचे मोजके कार्यकर्ते बाहेर त्यांच्या प्रतीक्षेत होते . पोलीस उपायुक्त यांच्या उपस्थितीत येथे यावेळी मोठा बंदोबस्त लावण्यात आला होता . कार्यकर्त्यांसह माध्यम प्रतिनिधींना दूरवर राहण्याची सूचना देण्यात आली होती. कोणतेही बडे नेते,पदाधिकारी यावेळी इकडे फिरकले नाहीत .पाण्याच्या प्रश्नावरून आंदोलनास गेलेल्या महिला नगरसेविकांनी कारागृहाचा अनुभव घेतल्याने बाहेर पडताच त्यांना रडू कोसळले होते . पण त्यांचे नातलग ,’तुम्हीलोकांच्या पिण्याच्या पाण्यासाठी हे भोगलेत ‘ असे सांगून त्यांची समजूत काढताना दिसत होते.

पुणे – शहरात कायदा सुव्यवस्था राखण्यासह नागरिकांच्या सुरक्षिततेसाठी शहरातील सीसीटीव्ही कॅमेराचे जाळे अधिक मजबूत करण्यात येणार आहे. त्यासाठी काही दिवसांमध्ये संपूर्ण शहरात उच्च क्षमतेचे 1500 कॅमेरा पूर्ण क्षमतेने कार्यान्वित करण्यास प्राधान्य दिले आहे. पुणेकरांच्या सुरक्षितेसाठी विशेष प्राधान्यक्रम दिला जाणार असल्याची ग्वाही पोलीस आयुक्त अमिताभ गुप्ता यांनी दिली आहे. आयुक्तालयात पत्रकारांनी वार्तालापात ते बोलत होते.

पुणेकरांना सुरक्षितपणे घराबाहेर पडता यावे यासाठी नवीन योजना कार्यान्वित केल्या जाणार आहेत. विविध रस्त्यांसह प्रमुख चौकांमध्ये सीसीटीव्ही कॅमेरे बसविण्यात आले आहेत. मात्र, त्यामध्ये आणखी वाढ करून सीसीटीव्हींची संख्या 1 हजार 500 पर्यंत नेण्याचा आमचा प्रयत्न आहे. त्यामुळे कायदा व सुव्यवस्था भक्कम होण्यास मदत होणार आहे. यापुर्वी लावण्यात आलेल्या नादुरुस्त खॅमेऱ्यांचीही दुरुस्ती केली जाणार आहे. प्रत्येक सीसीटीव्ही कॅमेऱ्याची क्षमता काळानुरूप बदलत चालली आहे. त्या पार्श्वभूमीवर शहरातील सर्वच सीसीटीव्ही अपग्रेड करण्यावर भर दिला जाणार आहे. नवीन सीसीटीव्ही कॅमेरे बसविण्यासंदर्भात आठ दिवसात प्रस्ताव तयार करण्यात येणार आहे. त्यानंतर त्याची तातडीने अंमलबजावणी केली जाणार असल्याचे गुप्ता यांनी सांगितले.

पोलीस ठाण्यांच्या पुर्नरचनेसाठी प्राधान्य

वाढत्या लोकसंख्येमुळे पोलिस ठाण्यांच्या हद्दीची पुनर्रचना करावी लागणार आहे. त्यासाठी यापूर्वी रचना केलेल्या उपायुक्त (झोन) कार्यालयांना राज्य सरकारची मान्यता घेणे बाकी आहे. त्याचा प्रस्ताव तयार करून पोलिस महासंचालक कार्यालयाकडे पाठविला जाणार आहे. त्यांच्या मान्यतेनंतर नव्याने सर्वेक्षण करून पोलिस ठाण्यांसह झोन तयार केले जाणार आहेत. विशेषतः हडपसर, चतुःशृंगी पोलीस ठाण्याची पुर्नरचना करण्यावर भर दिला जाणार आहे. त्यासाठी आवश्यक मनुष्यबळाची गरज भासणार आहे.

इंटेलियन्ट ट्रॅफिक मॅनेजमेंट सिस्टिम’ होणार वापर

वाहतूकोंडीवर उपाय म्हणून इंटेलियन्ट ट्रॅफिक मॅनेजमेंट सिस्टिम’चा (आयटीएमएस) वापर प्रभावीपणे केला जाणार आहे. शहरात पुढील 25 ते 30 वर्षांच्या वाहतुकीचा विचार करून त्यासाठीचे नियोजन करावे लागणार आहे. वाहतुकीचा प्रश्न सोडविण्यासाठी अनेक निर्णय घ्यावे लागणार आहे. त्यासाठी पुरेसे अधिकारी, कर्मचारी देण्याचे नियोजन करण्यात येत असल्याचे गुप्ता यांनी सांगितले.

पुणे- आगामी नवरात्री आणि दिवाळी या सणांच्या पार्श्वभूमीवर नागरिकांना खरेदीसाठी वेळ मिळावा, तसेच दुकानदारांना देखील पुरेसा वेळ मिळावा यासाठी शासनाने दुकाने रात्री नऊ वाजेपर्यंत उघडी ठेवण्यास परवानगी द्यावी, अशी मागणी फेडरेशन ऑफ ट्रेड असोसिएशन्स पुणे (पुणे व्यापारी महासंघ) यांच्यातर्फे करण्यात आली आहे. याबाबतचे निवेदन उपमुख्यमंत्री अजित पवार आणि महापालिका आयुक्त विक्रम कुमार यांना देण्यात आले आहे.

निवेदनात म्हटले आहे की, सध्या अधिक मास सुरु आहे. या महिन्यात सौभाग्याचे वाण खरेदी करण्याला पसंती दिली जाते. दागिने, भांडी, पूजेचे साहित्य नागरिक मोठ्या प्रमाणात खरेदी करतात.

17 ऑक्टोबर पासून हिंदू बांधवांचे नवरात्री आणि दिवाळी हे सण सुरु होत आहेत. या उत्सवात खरेदी होत असल्याने खरेदी-विक्री देखील मोठ्या प्रमाणात होते.

दिवाळी नंतर लगेच लग्न सराई सुरु होत आहे. त्यासाठी देखील खरेदीची अनेकांची लगभग सुरु असते. सध्या दुकाने सायंकाळी सात वाजेपर्यंत उघडी ठेवण्यास शासनाची परवानगी आहे.

शहरातील नोकरवर्ग कामावरून घरी आल्यानंतर त्यांना खरेदीसाठी फार कमी वेळ मिळतो. अनेकदा दुकाने बंद झाल्याने ग्राहकांना रिकाम्या हाताने परत जावे लागते.

राज्य सरकारने हॉटेल्स आणि बार रात्री दहा वाजेपर्यंत सुरु ठेवण्यासाठी परवानगी दिली आहे. त्याच प्रमाणे दुकानांना देखील 17 ऑक्टोबर पासून रात्री नऊ वाजेपर्यंत उघडी ठेवण्यासाठी परवानगी द्यावी, असेही निवेदनात म्हटले आहे.