शिरूर : गेल्या आठ महिन्यांपासूनचा पगार मिळावा या व इतर मागण्यांसाठी न्हावरे (ता. शिरूर) येथील रावसाहेबदादा पवार घोडगंगा सहकारी साखर कारखान्यातील कामगारांनी आज काम बंद ठेवून कारखान्यासमोर ठिय्या दिला. मागण्या मान्य झाल्याशिवाय आंदोलन मागे न घेण्याचा निर्धार यावेळी कामगारांनी केला.कामगार नेते महादेव मचाले, आत्माराम पवार, सुनिल जगताप, शिवाजी कोकडे, यशवंत शेंडगे, शिवाजी शेंडगे, कांतीलाल साळुंके आदींच्या नेतृत्वाखाली झालेल्या या आंदोलनात बहुतांश कामगार सहभागी झाले होते. त्यामुळे कारखान्याचे दैनंदीन कामकाजही काहीसे विस्कळीत झाले. पगार मिळण्याच्या मागणीसाठी कामगार सकाळीच कारखान्याच्या प्रवेशव्दाराजवळ आलेत्यानंतर तेथेच ठिय्या मारला. कारखाना प्रशासनाशी कामगार प्रतिनिधींची दोन वेळा चर्चा झाली, परंतू सायंकाळी उशिरापर्यंत त्यातून मार्ग निघू शकला नाही.

घोडगंगाचे अध्यक्ष व कार्यकारी संचालकांना कामगारांनी दिलेल्या निवेदनात, सात महिन्यांचा पगार मिळावा, पगारवाढीच्या १५ टक्के फरकाची रक्कम (माहे जुलै २०१५ ते मे २०१७) मिळावी, रिटेन्शन अलाऊंन्स मिळावा, भविष्य निर्वाह निधीची नोव्हेंबर २०१९ पासूनची व विमा पॉलिसीची पाच महिन्यांपासूनची़ तसेच कामगार सोसायटी कपातीची रक्कम भरावी, आदी मागण्या करण्यात आल्या आहेत.

कामगार नेते महादेव मचाले म्हणाले कि,’पगारासह अनेक प्रलंबित मागण्यांबाबत अनेकदा मागणी करूनही दखल घेतली न गेल्याने अखेर सर्वच कामगार एक होऊन आंदोलनात सहभागी झाले. कर्मचाऱयांना २०१५ पासून ओव्हर टाईमची रक्कम दिली नाही. ड्रेस कोड दिला तथापि चार वर्षापासून नवीन कपडेच मिळालेले नाहीत. कर्मचाऱयांच्या पगारातून कपात केलेली इतर बॅंकांच्या कर्जाची रक्कम वर्ग केली जात नाही. सामान्य कामगारांच्या मागण्यांबाबत कारखाना प्रशासनाने सहानुभूतीने विचार करावा’

रावसाहेबदादा पवार घोडगंगा सहकारी साखर कारखाण्याचे कार्यकारी संचालकप्रवीण शिंदे म्हणाले कि,’ कामगारांच्या पगाराबाबत कारखाना प्रशासन गंभीर आहे. त्यासाठी प्राधान्याने नियोजन केले जात आहे. तथापि, कोरोनाच्या प्रादूर्भावामुळे बॅंकांकडील कर्ज मिळण्यात उशिर झाला. शिवाय कारखाना प्रशासनातील दहा कर्मचाऱयांनाही कोरोनाची बाधा झाल्याने दैनंदीन कामकाज विस्कळीत झाले. या अचानकच्या अडचणींतूनही मार्ग काढला असून, आज – उद्याच पगाराचा प्रश्न मार्गी लागणार आहे’

कारखान्याच्या अध्यक्षांची भूमिका–

सद्यस्थितीत साखर कारखानदारी अडचणीत असून, याला यापूर्वीच्या भाजप सरकारची धोरणे कारणीभूत आहे. कारखानदारी समोरील अडचणीत रावसाहेबदादा पवार घोडगंगा सहकारी साखर कारखानाही अपवाद नाही. मात्र, उपमुख्यमंत्री अजित पवार यांच्या पुढाकारातून कारखान्यांचे प्रश्न मार्गी लागत असताना आणि कारखानदारी पुन्हा उभारी घेत असताना कामगारांनी संयमी भूमिका घ्यावी, असे आवाहन कारखान्याचे अध्यक्ष, आमदार ॲड. अशोक पवार यांनी केले.

पगार व इतर मागण्यांसाठी कामगारांनी चर्चेऐवजी आंदोलनाचा मार्ग स्विकारल्याबद्दल ॲड. पवार यांनी खेद व्यक्त केला. ते म्हणाले, “घोडगंगाने मोठी गुंतवणूक करून सहवीजनिर्मीती प्रकल्प उभारला. परंतू, यापूर्वीच्या सरकारने वीजखरेदीचा करार करण्यास उशीर केल्याने कारखान्याचे मोठे नूकसान झाले. कर्जाचे हप्ते वेळेत जाऊ शकले नाहीत आणि व्याजाचा मोठा भूर्दंड कारखान्याला सहन करावा लागला. आता अजितदादांनी पुढाकार घेतल्याने कारखानदारी पूर्वपदावर येत आहे. दादांच्या माध्यमातूनच राज्य सहकारी बॅंकांनी कारखान्याला कर्ज उपलब्ध करून दिले आहे. त्यातून कारखाना सुस्थितीत आणण्यासाठी चालू गळीत हंगाम सुरू करण्यासाठीच्या नियोजनाला प्राधान्य द्यावे लागणार आहे. त्यातून शेतकी खात्याला प्रथम निधी देताना उसतोड कामगारांना ॲडव्हान्स द्यावा लागणार आहे. कामगारांचे पगार देखील दिलेच पाहिजे. त्यात टप्प्याटप्प्याने मार्ग काढताना काही रक्कम लगेचच दिली जाईल. परंतू त्यासाठी आततायी भूमिका घेऊन आपली रोजीरोटी असलेल्या संस्थेसमोर ठिय्या देणे चूकीचे आहे. कामगारांनी संयम ठेवून प्रशासनाशी चर्चा करावी.”

पवार पुढे असेही म्हणाले की, कारखाना सुरू होणे, सुस्थितीत चालणे हे सर्वांच्याच हिताचे आहे. प्राधान्य कशाला द्यावे लागणार आहे, हे देखील सुजाण कामगार वर्गाला माहिती आहे. त्यामुळे प्राप्त परिस्थितीत कुणीही चूकीची भूमिका घेऊ नये. आपल्या घरातील प्रश्न आपण घरात बसून सोडवू. चव्हाट्यावर मांडून नव्हे़; तर आपापसातील समन्वयातून ते सुटणार आहेत.”

पुणे,  : पुणे महानगर प्रदेश विकास प्राधीकरणाकडून (पीएमआरडीए) सुरु असलेल्या नऱ्हेमधील अभिनव कॉलेज परिसरातील रस्त्याच्या खोदकामामध्ये गेल्या आठ दिवसांत महावितरणच्या उच्च व लघुदाबाच्या 15 ठिकाणी वीजवाहिन्या तोडण्यात आल्या आहेत. परिणामी या परिसरातील सुमारे 600 ते 700 वीजग्राहकांचा दररोज वीजपुरवठा खंडित होत आहे. त्यातच महावितरणची वीजयंत्रणा स्थलांतरीत न करता रस्त्याच्या कॉन्क्रिटीकरणासह रुंदीकरणाचे काम सुरु आहे.

याबाबत माहिती अशी, की महावितरणच्या पर्वती विभाग अंतर्गत नऱ्हे येथील अभिनव कॉलेज परिसरात पीएमआरडीएकडून रस्त्याच्या कॉन्क्रिटीकरणासाठी खोदकाम सुरु आहे. यामध्ये गेल्या आठ दिवसांमध्ये दररोज दोन ते तीन प्रमाणे आतापर्यंत एकूण 15 ठिकाणी महावितरणच्या भूमिगत उच्च व लघुदाबाच्या वीजवाहिन्या तोडण्यात आल्या आहेत. या परिसरात सुमारे 500 ते 600 निवासी सोसायट्या आहेत. परंतु खोदकामात वीजवाहिन्या तोडल्या जात असल्याने दररोज 3 ते 4 सोसायट्यांचा वीजपुरवठा खंडित होत आहे आणि त्याचा सुमारे 600 ते 700 वीजग्राहकांना फटका बसत आहे. भूमिगत वाहिन्या तोडल्यानंतर पर्यायी वीजपुरवठ्याची सोय उपलब्ध होऊ न शकल्यास महावितरणला वीजविक्रीमध्ये नुकसान तसेच वाहिनी दुरुस्तीचा खर्च सहन करावा लागत आहे. तसेच ग्राहकांना देखील खंडित वीजपुरवठ्याचा नाहक मनस्ताप सोसावा लागत आहे. यासोबतच वीजग्राहकांचा महवितरणला रोष सहन करावा लागत आहे.

वस्तुतः रस्त्याच्या कॉन्क्रिटीकरण व रुंदीकरणाच्या कामात मध्यभागी येणारे वीजखांब, वाहिन्या, रोहित्र आदी वीजयंत्रणा स्थलांतरीत करणे आवश्यक आहे. त्यासाठी नियमाप्रमाणे पीएमआरडीएकडून महावितरणकडे प्रस्ताव पाठविणे आणि महावितरणकडून देण्यात आलेल्या इस्टिमेटप्रमाणे कंत्राटदार नेमून वीजयंत्रणा स्थलांतरीत करण्याची जबाबदारी पीएमआरडीएची आहे. मात्र सद्यस्थितीत कोणत्याही प्रकारची पूर्वसूचना न देता किंवा वीजयंत्रणा स्थलांतरीत न करता रस्त्याचे कामे सुरु आहेत. त्यातच दररोज भूमिगत वीजवाहिन्या तोडल्या जात असल्याने वीजपुरवठ्याचा गंभीर प्रश्न निर्माण झाला आहे. याबाबत महावितरणकडून पीएमआरडीएला कळविण्यात आले आहे. खोदकामाची रितसर परवानगी घेतल्यानंतर संबंधीत कार्यालयास कळविल्यास वीजवाहिन्यांना खोदकामातून धोका होणार नाही याची काळजी महावितरणकडून घेण्यात येऊ शकते. मात्र कोणत्याही प्रकारची पूर्वमाहिती न देता खोदकाम होत असल्याची स्थिती अद्याप कायम आहे.

पुणे विभागातील 4 लाख 8 हजार 495 कोरोना बाधित रुग्ण बरे होऊन घरी
विभागात कोरोना बाधित 4 लाख 73 हजार 341 रुग्ण
-विभागीय आयुक्त सौरभ राव

पुणे,दि.12 :- पुणे विभागातील 4 लाख 8 हजार 495 कोरोना बाधित रुग्ण बरे होऊन घरी गेले असून विभागात कोरोना बाधीत रुग्णांची संख्या 4 लाख 73 हजार 341 झाली आहे. तर ॲक्टीव रुग्ण संख्या 52 हजार 91 इतकी आहे. कोरोनाबाधीत एकुण 12 हजार 755 रुग्णांचा मृत्यू झाला असून मृत्यूचे प्रमाण 2.69 टक्के आहे. पुणे विभागामध्ये बऱ्या होणा-या रुग्णांचे प्रमाण 86.30 टक्के आहे, अशी माहिती विभागीय आयुक्त सौरभ राव यांनी दिली.
पुणे जिल्हा
पुणे जिल्हयातील कोरोना बाधीत एकूण 3 लाख 6 हजार 864 रुग्णांपैकी 2 लाख 68 हजार 526 रुग्ण बरे होवून घरी गेले आहेत. ॲक्टीव रुग्ण 31 हजार 282 आहेत. कोरोनाबाधित एकूण 7 हजार 56 रुग्णांचा मृत्यू झाला आहे. मृत्यूचे प्रमाण 2.30 टक्के इतके आहे तर बरे होणा-या रुग्णांचे प्रमाण 87.51 टक्के आहे.
सातारा जिल्हा
सातारा जिल्हयातील कोरोना बाधीत एकूण 41 हजार 611 रुग्णांपैकी 33 हजार 533 रुग्ण बरे होवून घरी गेले आहेत. ॲक्टीव रुग्ण संख्या 6 हजार 714 आहे. कोरोनाबाधित एकूण 1 हजार 364 रुग्णांचा मृत्यू झाला आहे.
सोलापूर जिल्हा
सोलापूर जिल्हयातील कोरोना बाधीत एकूण 36 हजार 847 रुग्णांपैकी 30 हजार 282 रुग्ण बरे होवून घरी गेले आहेत. ॲक्टीव रुग्ण संख्या 5 हजार 300 आहे. कोरोनाबाधित एकूण 1 हजार 265 रुग्णांचा मृत्यू झाला आहे.
सांगली जिल्हा
सांगली जिल्हयातील कोरोना बाधीत एकूण 41 हजार 171 रुग्णांपैकी 35 हजार 383 रुग्ण बरे होवून घरी गेले आहेत. ॲक्टीव रुग्ण संख्या 4 हजार 268 आहे. कोरोनाबाधित एकूण 1 हजार 520 रुग्णांचा मृत्यू झाला आहे
कोल्हापूर जिल्हा
कोल्हापूर जिल्हयातील कोरोना बाधीत एकूण 46 हजार 848 रुग्णांपैकी 40 हजार 771 रुग्ण बरे होवून घरी गेले आहेत. ॲक्टीव रुग्ण संख्या 4 हजार 527 आहे. कोरोनाबाधित एकूण 1 हजार 550 रुग्णांचा मृत्यू झाला आहे.
कालच्या रुग्णसंख्येच्या तुलनेत आज झालेली वाढ
कालच्या बाधीत रुग्ण संख्येच्या तुलनेत पुणे विभागात बाधीत रुग्णांच्या संख्येमध्ये एकूण 2 हजार 703 ने वाढ झाली आहे. यामध्ये पुणे जिल्ह्यात 1 हजार 720, सातारा जिल्ह्यात 316, सोलापूर जिल्ह्यात 256, सांगली जिल्ह्यात 277 तर कोल्हापूर जिल्ह्यात 134 अशी रुग्ण संख्येमध्ये वाढ झालेली आहे.
कालच्या रुग्णसंख्येमध्ये बऱ्या होणा-या रुग्णांचे प्रमाण –
पुणे विभागामध्ये बऱ्या होणाऱ्या एकूण 5 हजार 13 रुग्णांमध्ये पुणे जिल्हयामध्ये 2 हजार 790 ,सातारा जिल्हयामध्ये 422, सोलापूर जिल्हयामध्ये 260, सांगली जिल्हयामध्ये 546 व कोल्हापूर जिल्हयामध्ये 995 अशा रुग्णांचा समावेश आहे.
पुणे विभागातील सर्व्हेक्षण
आजपर्यत विभागामध्ये एकुण 21 लाख 20 हजार 294 नमून्याचा तपासणी अहवाल प्राप्त झाला. प्राप्त अहवालांपैकी 4 लाख 73 हजार 341 नमून्यांचा अहवाल सकारात्मक (पॉझिटिव्ह) आहे.

( टिप :- दि. 11 ऑक्टोबर 2020 रोजी रात्री 9.00 वा. पर्यंतच्या आकडेवारीनुसार )

पुणे-  काही दिवसांपूर्वीच पुण्यातील जिल्हाधिकारी कार्यालयाजवळ भरदिवसा गोळ्या घालून बिल्डरची हत्या केल्याचा प्रकार ताजा असतानाच वानवडी पोलीस स्टेशनच्या हद्दीत आणि पुन्हा एकदा भरदिवसा गोळीबार करण्यात आला आहे. या घटनेत एका व्यवसायिक जखमी झाला असून त्याच्यावर रुग्णालयात उपचार सुरू आहेत. गोळीबार केल्यानंतर हल्लेखोर घटनास्थळावरून पसार झाले आहेत. पोलीस घटनास्थळी दाखल झाले आहेत. या घटनेमुळे संपूर्ण पुणे शहरात एकच खळबळ माजली आहे.अगोदरच शहरात मटका बेकायदा दारू धंदे ,चोऱ्या माऱ्या यांनी थैमान घातले असताना आता बराच अवधी बंद पडलेला फायरिंग चा ट्रेंड पुन्हा सुरु झाल्याचे जाणवत आहे.

मयुर हांडे (वय 32) असे या गोळीबारात जखमी झालेल्या तरुणाचे नाव आहे. वानवडी पोलीस घटनास्थळी दाखल झाले असून या प्रकरणी गुन्हा दाखल करण्याची प्रक्रिया सुरू आहे.प्राथमिक माहितीनुसार जखमी मयुर हांडे हे वाळू व्यावसायिक आहेत. बांधकामासाठी लागणारी वाळू पुरवण्याचा त्यांचा व्यवसाय आहे. आज दुपारच्या सुमारास ते वानवडी पोलीस स्टेशनच्या हद्दीतील श्रीराम चौकातून जात असताना अज्ञात व्यक्तीने त्यांच्यावर गोळीबार केला. यामध्ये जखमी झाल्याने त्यांना जवळच्या खासगी रुग्णालयात दाखल करण्यात आले असून त्यांच्यावर उपचार सुरू आहेत. घटनेची माहिती मिळताच वानवडी पोलिस आणि गुन्हे शाखेचे एक पथक घटनास्थळी पोहोचले आहे. परिसरात असणाऱ्या सीसीटीव्हीच्या माध्यमातून आरोपींचा शोध घेतला जात आहे.

लॉकआउटनंतरची शाळा व्यवस्थापन प्रणाली’वर आयोजित चर्चासत्रात तज्ज्ञांचा सूर 
पुणे : “वेगाने संसर्ग होणाऱ्या कोरोनामुळे आपले नियमित जीवन विस्कळीत झाले. जीवनशैलीत अनेक बदल झाले आहेत. ‘अनलॉक’च्या प्रक्रियेत सुधारित जीवन क्रम स्वीकारताना आपली दमछाक होते आहे. जूनमध्ये सुरु होणाऱ्या शाळा ऑक्टोबर उलटला तरी कधी सुरु होतील, याबाबत स्पष्टता नाही. पण शाळा सुरु झाल्या, तर सॅनिटाझर, मास्कचा वापर, सोशल डिस्टेनसिंग (एसएमएस) आणि शाळा परिसर,वर्गखोल्या, स्वच्छतागृहे, संबंधित सर्व घटकांची स्वच्छता याचे काटेकोरपणे पालन करणे अधिक गरजेचे असणार आहे,” असा सूर ‘लॉकआउटनंतरची शाळा व्यवस्थापन प्रणाली’वर आयोजित कार्यशाळेत निघाला.

मराठी विज्ञान परिषद पुणे विभाग, पिंपरी चिंचवड सायन्स पार्क आणि पुणे जिल्हा प्राथमिक शिक्षक संघ शिक्षण प्रसारक मंडळ यांच्या संयुक्त विद्यमाने व प्राथमिक आणि माध्यमिक शिक्षण विभाग पुणे महानगरपालिका यांच्या सहकार्याने या चर्चासत्राचे आयोजन केले होते. यामध्ये मराठी विज्ञान परिषदेचे अध्यक्ष व ‘मार्गदर्शक पुस्तिका कोविड लॉक आउट नंतर मंदिर व्यवस्थापनाची नवीन प्रणाली’ या पुस्तकाचे लेखक प्रा.राजेंद्रकुमार सराफ, आपत्ती व्यवस्थापन तज्ञ सुजाता कोडग, वैद्य प्रशांत सुरु,शिक्षणतज्ज्ञ डॉ. मिलिंद नाईक यांनी मार्गदर्शन केले. शाळा उघडल्यानंतर व्यवस्थापन, पालक, विद्यार्थी,शिक्षक-शिक्षकेतर कर्मचारी यांच्या मनातील भीती,दडपण यासह त्यांच्या आरोग्याचा धोका, कोविड संक्रमणाचे केंद्र शाळा होऊ नये, शाळा ते घर या प्रवासातील सुरक्षितता अशा विविध मुद्यांवर चर्चा झाली.

डॉ. मिलिंद नाईक म्हणाले, “हळूहळू एकेक गोष्टी पूर्वपदावर येत आहेत. मात्र, शाळा सुरु करण्याबाबत अद्यापही स्पष्टता नाही. काही देशांनी आधी शाळा सुरु केल्या व मग इतर गोष्टी सुरु करण्यावर भर दिला. विद्यार्थ्यांच्या माध्यमातून कोरोनाबाबत काळजी घेण्यासाठी जागृती केली. परंतु, आपल्याकडील परिस्थिती वेगळी आहे. वेगवेगळ्या पार्श्वभूमीतील विद्यार्थी आपल्याकडे शिकतात. तेव्हा त्याला लक्षात घेऊन आपल्याला शाळा सुरु करताना सुविधांची निर्मिती करावी लागेल. व्यवस्थापन, शिक्षक आणि पालक यांच्या समन्वयातून विद्यार्थ्यांना चांगले आणि सुरक्षित शिक्षण देण्यासाठी प्रयत्न व्हावेत. त्यादृष्टीने अनेक शाळा प्रयत्नही करत आहेत. पालकांनी मनातील नाहक भीती काढून काळजीपूर्वक आपल्या पाल्याना शाळेत पाठवले, तर शाळादेखील सर्व प्रकारची काळजी घेऊन शिक्षण पुन्हा सुरु करण्यास तयार आहेत.”

प्रा. राजेंद्रकुमार सराफ म्हणाले, “प्रवेशद्वाराजवळ नोंदणी, तपासणी कक्ष उभारावे लागतील. स्पर्शविरहित हातपाय धुण्यासाठी व्यवस्था,दफ्तरविरहित शाळा, विलगीकरणाची सोय उभारावी लागेल. मास्कचा वापर अनिवार्य करावा लागेल. चक्राकार उपस्थिती, मोकळ्या जागेतील वर्ग सुरु करण्यासह सणवार, सामूहिक प्रार्थना, खेळ याविषयी नियोजन करावे लागेल. वर्गात गुंतवून ठेवावे लागेल. पुस्तकविरहित आधुनिक शिक्षण तंत्राचा वापर वाढवावा लागेल. शुद्ध हवा, पाणी, स्वच्छ परिसर,उपयुक्त औषधी, स्वच्छतेच्या सोयी उपलब्ध कराव्या लागतील. ग्रामीण व छोट्या शाळेचे प्रश्न हे वेगळे आहेत व त्याकरता विशेष विचार करावा लागेल. शिक्षक हे समाजाला आदरणीय आहेत व ते नवीन व्यवस्थापन प्रणाली सर्व भागधारकांच्या सहकार्याने सहज अमलात आणू शकतील ” 
“कोरोनाच्या या महामारीत शाळा अधिक जोखीम असणाऱ्या आहेत. शाळा सुरु होण्यापुर्वी आपत्ती व्यवस्थापन योग्यरीत्या करण्याची गरज आहे. त्यासाठी विविध पायाभूत सुविधा उभाराव्या लागतील. स्पर्शविरहित पाण्याचा वापर, सॅनिटायझर स्टॅन्ड, अंतर राखण्यासाठी बैठक व्यवस्था करावी लागेल. मोकळ्या जागेत शाळेचे वर्ग भरविण्याचा चांगला पर्याय आहे. त्यासाठी शाळेकडे मोकळी जागा हवी. शाळेशी संबंधित सर्व घटकांच्या आरोग्यावर लक्ष ठेवण्यासाठी ‘कोविड समिती’ची स्थापना हवी. विद्यार्थी-शिक्षक वेगवेगळ्या भागात राहतात. त्यांची मानसिकता तयार करणेही तितकेच गरजेचे आहे,”असे मत सुजाता कोडग यांनी मांडले.

वैद्य प्रशांत सुरु म्हणाले, “शिक्षकांना शाळा व्यवस्थापनाशी समन्वय ठेवून स्वतःची काळजी घेत विद्यार्थ्यांना ज्ञानदान करायचे आहे. सोबतच त्यांना या धोक्यापासून दूर ठेवायचे आहे. शाळेचे नियमित निर्जंतुकीकरण करावे लागेल. वर्गातील बसण्याची व्यवस्था वर्तुळाकार करावी लागेल. विद्यार्थ्यांना वर्गात बसताना  एकमेकां पासून अंतर ठेवावे लागेल. मुलांच्या हाता पायाची स्वच्छता, वापरण्याचे व पिण्याचे स्वच्छ पाणी, परिसरात चिखल होणार नाही,याची काळजी घेणे आदी गोष्टी कराव्या लागतील.”

प्रा सराफ यांनी लवकरच या कार्यशाळेच्या आधारावर मार्गदर्शक पुस्तिका कोविड लॉक आउट नंतर शाळा व्यवस्थापनाची नवीन प्रणाली लिहूण प्रकाशित करण्यात येईल असे सांगितले. या कार्यशाळेत १०० च्यावर शिक्षकांनी सहभाग घेतला होता. सहभागी शिक्षक शाम धुमाळ, श्रीमती मीनाक्षी पवार, श्रीमती अश्विनी भुजबळ, राजेश तायडे, अभयकुमार वनकर, श्रीमती सुनिता थोरात व श्रीमती शामला देसाई इत्यादिनी आपली मते सूचना व प्रश्न सांगितलेत व त्यावर चर्चा झाली. प्रा. विनय र र यांनी समारोप केला.

भाजप प्रदेशाध्यक्ष आमदार चंद्रकांत पाटील, खासदार गिरीष बापट, आमदार माधुरी मिसाळ यांच्या उपस्थितीत उद्घाटन

पुणे – शहरातील ग्राहकांना थेट शेतातून ताजी भाजी स्वस्त दरात मिळावी. तसेच कोणत्याही दलाल आणि अडत्याशिवाय शेतकऱ्यांना माल विकता यावा, शेतकऱ्यांचा माल मध्यस्थांविना थेट ग्राहकांपर्यंत पोहोचावा, या उद्देशाने नगरसेवक महेश वाबळे यांनी सहकारनगर, शिंदे हायस्कूल शेजारी, तळजाई रस्ता येथे सुरू केलेल्या आठवडे बाजाराला ग्राहकांचा उत्स्फूर्त प्रतिसाद मिळाला.

या आठवडे बाजाराचे उद्घाटन भारतीय जनता पक्षाचे पुणे शहर सरचिटणीस व एमएनजीएल चे संचालक राजेश पांडे याच्या हास्ते झाले कार्यक्रमासाठी प्रमुख पाहुणे म्हणून भारतीय जनता पक्षाचे उपाध्यक्ष श्रीपादजी ढेकणे उपस्थित होते. तसेच भारतीय जनता पक्षाचे पर्वती विधानसभा अध्यक्ष जितेंद्र पोळेकर ,हरिष परदेशी, संगिता चौरे,गणेश लगस,राजेश चिटणीस ,कैलास मोरे ,नितीन लगस,भानुदास ढोबळे ,अशोक ओमबासे हे उपस्थित होते.

या बाजारांमध्ये पुणे जिल्ह्यातील वेगवेगळ्या भागांतील शेतकरी मालाची विक्री करण्यासाठी आले होते. या शेतकऱ्यांनी भाजीपाल्यासोबतच धान्य, कडधान्य आणि फळेही विक्रीसाठी आणली होती यामुळे शहरातील नागरिकांना त्यांचा घराजवळ ताजा शेतमाल मिळू लागला. त्याशिवाय कोणीही मध्यस्थी नसल्याने भाजीपाला आणि धान्याचे दरही कमी होते. त्यामुळे शहरातील नागरिक या बाजारांमध्ये खरेदीसाठी गर्दी केली होती. ग्राहकांची गर्दी लक्षात घेता दर शनिवारी सकाळी सात ते सायंकाळी सात हा बाजार सुरू राहील असे नगरसेवक महेश वाबळे यांनी सांगितले.

आठवडी बाजार हा केवळ बाजार नसून ही एक चळवळ आहे. या बाजाराला प्रभागातील नागरिकांबरोबरच परिसरातील अनेक ग्राहकांचा उत्तम प्रतिसाद मिळत असून या बाजारामुळे ग्राहकांना रास्त दरात भाजीपाला व शेतकऱ्यांना रास्त भाव मिळण्यास मदत होईल.