पुणे- पुणे मनपा हद्दीत नाल्यात पावसाळी लाईनचे पाणी सोडल्याने नाल्यांना पूर येऊन नागरिकांच्या घरात पाणी शिरले .कितीही उंच सीमाभिंत बांधली तरी हे पाणी नागरिकाच्या घरात शिरणारच त्यामुळे प्रशासनाने नाल्यात पावसाळी लाईनचे पाणी सोडू नये अशी सूचना काँग्रेसचे महापालिकेतील गटनेते आबा बागुल यांनी आयुतकांना पत्राद्वारे केली आहे.

याविषयी आज अतिरिक आयुक्त विशेष यांच्या दालनात पाणीपुरवठा, पथ, मलनिःसारण विभागाचे अधिकारी, पुणे महापालिकेचे ३ उप आयुक्त व आपत्ती व्यवस्थापन विभागाचे प्रमुख यांचे समवेत आबा बागुल यांनी बैठक घेतली. पुणे शहरात झालेल्या पावसाने नाल्याच्या कडेने असलेल्या घरात पाणी शिरून नागरिकांचे अतोनात हाल होऊन प्रचंड नुकसान झालेले आहे. याबाबत आम्ही माहिती घेतली असता कात्रज पासून आलेल्या नाल्यात शहरातील पावसाळी लाइन्सचे पाणी नाल्यात सोडले आहे. शास्त्रीय दृष्टीकोनातून सदर बाब अत्यंत चुकीची आहे. नाले हे पावसाचे पाणी वाहून जाण्यास निसर्गाने निर्माण केलेले स्त्रोत आहेत. नाल्याची क्षमता बघून त्यावरील पुलांची उंची याप्रमाणे त्यात पाणी सोडणे अपेक्षित असताना क्षमतेपेक्षा जास्त पाणी सोडल्यास कितीही उंच सीमाभिंत बांधल्यास पाणी हे नाल्याचे कडेने असलेल्या वसाहतीमध्ये शिरनारच आहे. मुळात ड्रेनेज व पावसाळी लाइन्स या नाल्यात सोडणे हे अत्यंत चुकीचे असून ड्रेनेज लाईन्स या मैलापाणी शुद्धीकरण केंद्राला जोडणे आवश्यक आहे. पावसाळी लाईन्स या नदीपर्यत आणून पावसाचे पाणी नदीमध्ये सोडले पाहिजे.
पूर्ण शहरातील पावसाळी लाईन्सचा डीपीआर करणे गरजेचे आहे. यामुळे कोणती पावसाळी लाईन्स कुठे आहे, याचा आढावा घेऊन सर्व पावसाळी लाईन्स नाल्याच्या कडेने नदीपात्रात आणल्यास नाल्याला पूर येणार नाही. तसेच हे पाणी नाल्यात सोडल्याने मैलापाणी शुद्धीकरण केंद्रावर विनाकारण खर्च वाढला जातोय. यावर प्रदीर्घ चर्चा होऊन अतिरिक आयुक्त विशेष यांनी क्षेत्रीय उप आयुक्त यांना मागील ५ वर्षात क्षेत्रीय स्तरावरून टाकण्यात आलेल्या ड्रेनेज लाईन्स व पावसाळी लाईन्सचा आराखडा तयार करणेचे आदेश दिले. त्यांनी केलेली कामांची एम.बी.बिले आणि सर्व रेकॉर्ड क्षेत्रीय स्तरावर उपलब्ध आहेच. तसेच आपत्ती व्यवस्थापन विभागाकडे सर्वप्रथम आपत्तीची माहिती प्राप्त होऊन त्यांनी सर्व विभागांना कळविणे अपेक्षित आहे. आपत्ती व्यवस्थापन विभागाकडे काम करणेस स्टाफ देखील नाही अशी माहिती मिळते. अश्या आशयाचे पत्र आबा बागुल यांनी आयुक्तांना दिले आहे.

पुणे : ‘अंक नाद ‘  ऍप द्वारे गणिताची गोडी आता इंग्रजी मधूनही उपलब्ध झाली आहे. मॅप एपिक कम्युनिकेशन्स प्रा लि निर्मित ‘अंक नाद ‘ ऍप च्या इंग्रजी आवृत्तीचे  लोकार्पण सोमवारी पुण्यात ऑन लाईन पद्धतीने झाले . भारतीय गणित आणि  लोप पावत असलेले मराठी पावकी -निमकी सारखे पाढे या भारतीय गोष्टींचे कालानुरूप   पुनरुज्जीवन करून सर्व देशात आणि परदेशात प्रसार करण्यासाठी हा उपक्रम कार्यरत आहे . 
‘अंकनाद ‘ अॅपचे निर्माते मंदार नामजोशी यांनी उपक्रमांची माहिती दिली.’अंकनाद’ हे गणिताकडे बघण्याचा एक वेगळा दृष्टीकोन देणारं  अॅप   आहे. रोजच्या जगण्यात गणिताला पर्याय नाही . गणित विषय रंजक करुन सांगण्याचे विविध उपक्रम ‘ अंकनाद ‘ तर्फे केले जातात,गणिताची आवड निर्माण केली जाते ,असे त्यांनी सांगितले. ‘अंक नाद’चे संचालक पराग गाडगीळ यांच्यासह शिक्षण क्षेत्रातील मान्यवर या उपक्रमात सहभागी आहेत . 
या  ऍप च्या मार्गदर्शक समितीमध्ये  ज्येष्ठ शास्त्रज्ञ  डॉ रघुनाथ माशेलकर ,डॉ अनिल सहस्त्रबुद्धे ,(अध्यक्ष ,अखिल भारतीय तंत्र शिक्षण परिषद ),तालयोगी सुरेश तळवलकर ,संगीतकार अशोक पत्की , प्राजक्ती गोखले (बालभारती च्या अभ्यास मंडळाच्या सदस्य ),प्रसाद मणेरीकर (संस्थापक ,अनुभूती नॉलेज सेंटर ),प्राची साठे ,प्रा .अनघा ताम्हणकर ,साक्षी हिसवणकर,चारुदत्त आफळे ,शोभा नेने (अध्यक्ष ,बृहन्मुंबई गणित अध्यापक मंडळ ),मंदार नामजोशी ,निर्मिती नामजोशी ,समीर बापट  हे सन्माननीय सदस्य आहेत .
अंकनाद अॅपविषयी
दोन ते तीसचे पाढे घोकून पाठ करणं हे विद्यार्थ्यांना करावं लागतंच. पण या नव्या पिढीला पावकी, निमकी, पाऊणकी हे शब्दच माहीत नाहीत.  ही कोष्टकं म्हणजेच अपूर्णांकांचे पाढे पाठ केले, तर गणिताचा पाया पक्का होऊन जातो. ‘अंकनाद’ मध्ये पाढ्यांबरोबरच ही कोष्टकंसुद्धा साध्या सोप्या पद्धतीने शिकवली जातात.
गणित या विषयाची मुलांना एका नव्या, आकर्षक रुपात ओळख करून द्यावी आणि अवघड वाटणाऱ्या या विषयाशी सहजसोप्या रीतीने मैत्री व्हावी या उद्देशाने ‘अंकनाद’ ऍपची निर्मिती झाली. अल्पावधीतच मुलं आणि त्यांचे पालक यांनी या ऍपला भरघोस प्रतिसाद दिला. 
  विविध उपक्रम आणि कार्यशाळा यांच्या मार्फत  विद्यार्थी, शिक्षक, पालकांसाठी सतत काही नवीन देता यावे हाच अंकनादचा प्रयत्न आहे.

पुणे विभागातील 4 लाख 37 हजार 984 कोरोना बाधित रुग्ण बरे होऊन घरी
विभागात कोरोना बाधित 4 लाख 86 हजार 388 रुग्ण
-विभागीय आयुक्त सौरभ राव

पुणे,दि.19 :- पुणे विभागातील 4 लाख 37 हजार 984 कोरोना बाधित रुग्ण बरे होऊन घरी गेले असून विभागात कोरोना बाधीत रुग्णांची संख्या 4 लाख 86 हजार 388 झाली आहे. तर ॲक्टीव रुग्ण संख्या 35 हजार 128 इतकी आहे. कोरोनाबाधित एकुण 13 हजार 276 रुग्णांचा मृत्यू झाला असून मृत्यूचे प्रमाण 2.73 टक्के आहे. पुणे विभागामध्ये बऱ्या होणा-या रुग्णांचे प्रमाण 90.05 टक्के आहे, अशी माहिती विभागीय आयुक्त सौरभ राव यांनी दिली.

पुणे जिल्हा-
पुणे जिल्हयातील कोरोना बाधीत एकूण 3 लाख 14 हजार 462 रुग्णांपैकी 2 लाख 86 हजार 737 रुग्ण बरे होवून घरी गेले आहेत. ॲक्टीव रुग्ण 20 हजार 387 आहेत. कोरोनाबाधित एकूण 7 हजार 338 रुग्णांचा मृत्यू झाला आहे. मृत्यूचे प्रमाण 2.33 टक्के इतके आहे तर बरे होणा-या रुग्णांचे प्रमाण 91.18 टक्के आहे.
सातारा जिल्हा-
सातारा जिल्हयातील कोरोना बाधीत एकूण 43 हजार 511 रुग्णांपैकी 36 हजार 582 रुग्ण बरे होवून घरी गेले आहेत. ॲक्टीव रुग्ण संख्या 5 हजार 499 आहे. कोरोनाबाधित एकूण 1 हजार 430 रुग्णांचा मृत्यू झाला आहे.
सोलापूर जिल्हा-
सोलापूर जिल्हयातील कोरोना बाधीत एकूण 38 हजार 181 रुग्णांपैकी 32 हजार 492 रुग्ण बरे होवून घरी गेले आहेत. ॲक्टीव रुग्ण संख्या 4 हजार 353 आहे. कोरोनाबाधित एकूण 1 हजार 336 रुग्णांचा मृत्यू झाला आहे.
सांगली जिल्हा-
सांगली जिल्हयातील कोरोना बाधीत एकूण 42 हजार 858 रुग्णांपैकी 38 हजार 545 रुग्ण बरे होवून घरी गेले आहेत. ॲक्टीव रुग्ण संख्या 2 हजार 737 आहे. कोरोनाबाधित एकूण 1 हजार 576 रुग्णांचा मृत्यू झाला आहे
कोल्हापूर जिल्हा-
कोल्हापूर जिल्हयातील कोरोना बाधीत एकूण 47 हजार 376 रुग्णांपैकी 43 हजार 628 रुग्ण बरे होवून घरी गेले आहेत. ॲक्टीव रुग्ण संख्या 2 हजार 152 आहे. कोरोनाबाधित एकूण 1 हजार 596 रुग्णांचा मृत्यू झाला आहे.

कालच्या रुग्णसंख्येच्या तुलनेत आज झालेली वाढ
कालच्या बाधीत रुग्ण संख्येच्या तुलनेत पुणे विभागात बाधीत रुग्णांच्या संख्येमध्ये एकूण 1 हजार 461 ने वाढ झाली आहे. यामध्ये पुणे जिल्ह्यात 817, सातारा जिल्ह्यात 278, सोलापूर जिल्ह्यात 154, सांगली जिल्ह्यात 126 तर कोल्हापूर जिल्ह्यात 86 अशी रुग्ण संख्येमध्ये वाढ झालेली आहे.

कालच्या रुग्णसंख्येमध्ये बऱ्या होणा-या रुग्णांचे प्रमाण –
पुणे विभागामध्ये बऱ्या होणाऱ्या एकूण 3 हजार 46 रुग्णांमध्ये पुणे जिल्हयामध्ये 1 हजार 830, सातारा जिल्हयामध्ये 185, सोलापूर जिल्हयामध्ये 283, सांगली जिल्हयामध्ये 429 व कोल्हापूर जिल्हयामध्ये 319 रुग्णांचा समावेश आहे.
पुणे विभागातील सर्व्हेक्षण
आजपर्यत विभागामध्ये एकुण 22 लाख 19 हजार 967 नमून्यांचा तपासणी अहवाल प्राप्त झाला. प्राप्त अहवालांपैकी 4 लाख 86 हजार 388 नमून्यांचा अहवाल सकारात्मक (पॉझिटिव्ह) आहे.

( टिप :- दि. 18 ऑक्टोबर 2020 रोजी रात्री 9.00 वा. पर्यंतच्या आकडेवारीनुसार )

पुणे- जम्बो कोविड सेंटर मधील आरोग्य सेवकांचा पगार योग्य आणि वेळेवर होत नसल्याचा आरोप करून मनसेच्या पुणे शहर अध्यक्षांनी याबाबत महापालिका प्रशासनाला ..खबरदार … असा इशारा दिला आहे. मनसे ला आपली पावले उचलण्यास भाग पाडू नका .. असे सांगण्यात आले आहे.

या संदर्भात मनसे शहर अध्यक्ष अजय शिंदे यांनी सांगितले कि , कोट्यवधी रुपये खर्च करून मोठा गाजावाजा करून सुरू केलेले जम्बो कोविड सेंटर चा गोंधळ अजूनही संपायचे नाव घेत नाही. पीएम आर डी ए आणि मनपा त्याच वेळेला राज्यसरकार आणि मनपा हा सुरवातीच्या काळातला गोंधळ आणि भोंगळ कारभार व त्यांच्या मुळे निष्कारण बळी गेलेले रुग्ण त्यातले पांडुरंग रायकर हे दुर्देवी उदाहरण त्यामुळेच निर्माण झालेला रोष कमी करण्यासाठी सदर जम्बो कोविड सेंटर संचालन करणारी लाईफ लाईन ही कंपनी काढून टाकण्यात आली मात्र हे कदाचित अर्धसत्य होते की काय अशी शंका यावी अशी परिस्थिती दिसत आहे कारण लाईफ लाईन बदलली हे कागदपत्रांच्या वर दाखवण्यात आले वास्तवात त्यावेळी कार्यरत असणारीच मंडळी आत्ता ही जम्बो कोविड सेंटर संचलित करत आहे त्या वेळेस असणारे सर्व स्तरावरील वैद्यकीय कर्मचारी व तंत्रज्ञ व डॉक्टर व काही प्रमाणात नव्याने भरती केलेले कर्मचारी यांच्या माध्यमातूनच जम्बो कोविड सेंटर चालवले जाते या ठिकाणी काम करणाऱ्या बहुतांश कर्मचाऱ्यांना आज पर्यन्त पगार मिळाला नाही या संदर्भात या ठिकाणच्या कर्मचाऱ्यांनी मनसे कडे काल दुपारी लेखी तक्रार केली व प्रश्न सोडवण्याची मागणी केली असता मनसे कडून संबंधित अधिकाऱ्यांना सम्पर्क केला असता नव्याने असलेला गोंधळ समोर आला सुरवाती पासून करोना म्हणजे आपल्याला मिळालेल कुरण आहे या मानसिकतेतून सत्ताधारी आणि अधिकारी काम करत आहेत हे प्रत्येक ठिकाणी दिसून येते
लाईफ लाईन ला दिलेले काम काढून नवीन कंपनीला देते वेळी या नवीन कंपन्यांची पात्रता
तपासणे किंवा बंधने घालणे जुने व्यवहार पूर्ण करणे या गोष्टीची पूर्तता करण्यात आली नाही कारण लाईफ लाईन मध्ये कार्यरत असणारे कामगारांच आजही तिथेच काम करीत आहेत नाव बदलून तीच कंपनी कार्यरत करण्यात यावी अशीच परिस्थिती या ठिकाणी आहे कर्मचारी ही तेच आहेत ज्याचे पगार ऑगस्ट पासून थकवले गेले आहेत आणिसिक्युअरटी ,आणि जे हाऊसकिपीगच काम बघते.मेलबारो जे टेनिशीयन फार्मसिस्ट व डॉक्टर पुरवण्या संदर्भातील काम बघते त्या कंपन्या नी देखील नव्याने कामाला आलेल्या कर्मचाऱ्यांचे पगार थकवले आहेत मनसे ने या विरोधात आवाज उठवताच काही अत्यंत थोडक्या मंडळींना काल पगार दिले तर काही कर्मचारी मंडळींना दमदाटी करण्यात आली हा सगळा प्रकार अत्यंत गंभीर असल्याने मनसे चे पदाधिकारी जम्बो कोविड सेंटरला गेले होते व कर्मचार्यांना दमदाटी न करण्याची सूचना देऊन आले व थकीत पगार त्वरित करण्याच्या बाबत योग्य त्या समजतील आशा सूचना सबधितांना दिल्याउदया महानगरपालिका प्रशास ना बरोबर चर्चा करून वरील प्रश्न त्वरित सोडवण्यात साठी योग्य प्रयत्न करण्यात येतील
आज रणजित शिरोळे, प्रल्हाद गवळी,सचिन काटकर,उदय गडकरी, आकाश धोत्रे सहित अनेक महाराष्ट्र सैनिक उपस्थित होते

पुणे- पुणे पोलीस आयुक्तालयातंर्गत दाखल झालेल्या फायलींचा लवकर निपटारा करण्यासाठी पोलीस आयुक्त अमिताभ गुप्ता यांनी ‘एसओपी’ (स्टँडर्ड ऑफ फॉरमॅट) तयार केली असून,. त्यानुसार फाईल इतरत्र कोठेही न फिरवता थेट संबंधित अधिकाऱ्य़ांच्या टेबलावर ठेवली जाणार आहे. त्यामुळे नागरिकांच्या विविध कार्यक्रमांच्या परवानग्यासह, पोलीस कर्मचाऱ्य़ांच्या फायलींचा तीन ते चार आठवड्यांचा लागणारा कालावधी संपणार आहे. पोलीस आयुक्त अमिताभ गुप्ता यांच्या सूचनेनुसार फायलींचा वेग आता सुपरफास्ट होणार आहे.

शहरातील नागरिकांकडून विविध कार्यक्रमांसह वाहतूकीच्या संदर्भातील वेगवेगळ्या परवानगीसाठीच्या अर्ज आणि फाईल पोलीस आयुक्तालयात जमा करण्यात येतात. मात्र, विविध कारणास्तव फाईल संबंधित नसलेल्या अधिकाऱ्य़ांकडे पाठविण्यात येत होती. त्यामुळे किरकोळ परवानगीसाठी अनेकांना महिन्याभराची वाट पाहावी लागत होती. फायलींचा विनाकारण प्रवास वाढल्यामुळे नागरिकांना मनस्ताप सहन करावा लागत होता. आता मात्र, पोलीस आयुक्तांच्या सूचनेनुसार फाईल क्लेअर करण्यासाठी संबंधित अधिकाऱ्य़ांकडे थेट पाठविली जाणार आहे. त्यामुळे वेळ वाचण्यास मदत होणार असून नागरिकांचे हेलफाटे वाचणार आहेत. विशेषतः गणेशोत्सव, नवरात्रोत्सव, दिवाळी, विविध मिरवणूका, राजकीय सभांच्या परवानगीसाठी पोलीस आयुक्तालयात दाखल केलेल्या फाईलींचा प्रवास कासवगतीने होत होता. मात्र, आता फायलींचा प्रवास थांबणार आहे. त्याशिवाय पोलीस कर्मचाऱ्य़ांच्या भविष्य निर्वाह निधी, मेडीक्लेम, सेवानिवृत्ती फंड संदर्भातील सर्व फायलींना तातडीने क्लेअर करण्यासाठी अधिकाऱ्य़ांना सूचित करण्यात आले आहे.

तीन दिवसांचा फायलींचा होणार निपटारा पोलीस आयुक्तालयात दाखल करण्यात येणारे अर्ज आणि फाईलींची तपासणी करुन तीन ते चार दिवसांत पुर्णत्वात नेली जाणार आहे. त्यासाठी फाईल थेट संबंधित अधिकाऱ्य़ांच्या टेबलवर ठेवली जाणार असून सही झाल्यानंतर तातडीने नागरिकांना माहिती दिली जाणार आहे. विविध कामकाजासंदर्भातील फायलींचा प्रवास कमी होणार असल्यामुळे नागरिकांसह पोलीस कर्मचाऱ्य़ांनी समाधान व्यक्त केले आहे.

फायलींचा निपटारा करण्यासाठी तीन ते चार दिवसांचा कालावधी निश्चित करण्यात आला आहे. त्यानुसार संबंधित अधिकाऱ्य़ांकडे फाईल पाठविली जाणार असून तातडीने कारवाई केली जाणार आहे. त्यामुळे आता विविध परवानग्या सोपस्कररित्या पुर्ण होणार आहेत.

पुणे- परतीचा पाउस अद्याप थांबण्याची चिन्हे दिसत नाही. पुढील आठवड्यात २०,२१,२२ ऑक्टोबरला मुसळधार पाउस पडण्याची शक्यता पुणे वेधशाळेने वर्तवली आहे.पश्चिम बंगाल च्या उपसागरात कमी दाबाचे क्षेत्र निर्माण झाले असून त्यामुळे राज्याच्या अनेक भागात पुन्हा एकदा अतिवृष्टीचे सावट निर्माण झाले आहे . परतीच्या पावसाने शेतकऱ्यांचे आतोनात नुकसान झाले.मुख्यमंत्री उद्धव ठाकरे सोमवारी सोलापूर दौऱ्यावर असून शरद पवार यांच्या सह अनेक मंत्री राज्यभरात पाहणी दौऱ्यावर गेले आहेत.१७ तारखे पर्यंत राज्यभरात परतीच्या पावसाची अतिवृष्टी होण्याची शक्यता भारतीय हवामान खात्याने वर्तवली होती हा अंदाज अचूक ठरला त्या मुळे पुणे वेधशाळेच्या अंदाजाकडे शेतकऱ्यांचे लक्ष लागले आहे.

राज्यात या जिल्ह्यात पावसाची शक्यता
सोमवार- ठाणे, पालघर, रायगड, रत्नागिरी, धुळे, नंदुरबार, जळगाव, नाशिक, नगर, पुणे, सातारा, सांगली, सोलापूर, औरंगाबाद, बीड, जालना, परभणी, हिंगोली, नांदेड, लातूर, उस्मानाबाद.

मंगळवार- ठाणे, पालघर, रायगड, रत्नागिरी, सिंधुदुर्ग, मुंबई, धुळे, नंदुरबार, जळगाव, नाशिक, नगर, पुणे, सातारा, सांगली, सोलापूर, औरंगाबाद, बीड, जालना, परभणी, हिंगोली, नांदेड, लातूर, उस्मानाबाद, संपूर्ण विदर्भ.

बुधवार- ठाणे, पालघर, रायगड, रत्नागिरी, धुळे, नंदुरबार, नाशिक, नगर, पुणे, सातारा, सांगली, सोलापूर, औरंगाबाद, बीड, जालना, परभणी,लातूर, उस्मानाबाद, संपूर्ण विदर्भ