मुंबई, दि. 11 : पुणे जिल्ह्यातील येवलेवाडी, पिसोळी येथील कुष्ठरोग्यांच्या वसाहतीत शिवभोजन थाळी मंजूर करण्यासंदर्भात विधानपरिषदेच्या उपसभापती डॉ.नीलम गोऱ्हे यांनी ग्रामस्थांच्या गरजा समजून घेऊन संबंधित यंत्रणांना निर्देश दिले. त्यानुसार येवलेवाडी पिसोळी येथील कुष्ठरोग्यांच्या वसाहतीत 1 नोव्हेंबरपासून शिवभोजन थाळी सुरू करण्यात आली आहे.

पुणे जिल्ह्यातील येवलेवाडी, पिसोळी येथे चार ते साडेचार हजार कुष्ठरोग्यांची वसाहत आहे.  याठिकाणी कुष्ठरोग्यांना शिवभोजन थाळी सुरू करण्यासंदर्भात माजी सरपंच मच्छिंद्र दगडे व  सामाजिक कार्यकर्ते  डेव्हिड वंगार हे वर्षभर प्रयत्न करत होते. कुष्ठरोग्यांना हाताने स्वयंपाक करता येत नसल्यामुळे त्यांना तयार जेवण उपलब्ध होणे आवश्यक होते. विधानपरिषदेच्या उपसभापती  डॉ. नीलम गोऱ्हे यांनी ग्रामस्थांच्या गरजा समजून घेऊन त्यानुसार मुख्यमंत्री उद्धव ठाकरे, उपमुख्यमंत्री अजित पवार, अन्न व नागरी पुरवठा मंत्री छगन भुजबळ यांना या वसाहतीत शिवभोजन थाळी मंजूर करण्यासंदर्भात कळविले. त्यानंतर येथील वसाहतीत शिवभोजन थाळी सुरु करण्यात आली. पुण्याचे  जिल्हा  पुरवठा अधिकारी यांनाही  यासंदर्भात निर्देश देण्यात आले.

शिवभोजन  थाळी  सुरू करण्यात आल्यामुळे कुष्ठरोग्यांची मोठी सोय झाल्याबद्दल सामाजिक कार्यकर्ते डेव्हिड वंगर यांनी मुख्यमंत्री उद्धव ठाकरे, उपमुख्यमंत्री तथा पुण्याचे पालकमंत्री अजित पवार, अन्न व नागरी पुरवठा मंत्री छगन भुजबळ, पर्यावरण मंत्री आदित्य ठाकरे व विधानपरिषदेच्या उपसभापती डॉ.नीलम गोऱ्हे यांचे आभार मानले आहेत.

मुंबई दि ११: दीपावलीच्या शुभेच्छा देताना सणाचा जरूर आनंद घ्या पण आरोग्याच्या जबाबदारीचे भान ठेवा असे आवाहन मुख्यमंत्री उद्धव ठाकरे यांनी राज्यातील नागरिकांना केले आहे. आपण स्वत: देखील केवळ सोशल मिडीया, ईमेलद्वारे शुभेच्छा स्वीकारणार असून भेटीगाठी न करता अतिशय सुरक्षितपणे , घरच्याघरी हा सण साजरा करणार आहोत असेही त्यांनी स्पष्ट केले आहे.

मुख्यमंत्री आपल्या आवाहनात म्हणतात की, कोरोनाला सणवार -दिवाळी कळत नाही. लस जेव्हा येईल आणि आपल्यापर्यंत पोहचेल तोपर्यंत स्वत:ला सुरक्षित ठेवणे आणि घरातले-बाहेरचे यांनाही संसर्ग होऊ न देणे हे आपले प्राधान्य असले पाहिजे. गेल्या सात आठ महिन्यात आपण सर्व धर्मियांचे सण, उत्सव अतिशय सावधपणे आणि नियमांचे पालन करून साजरे केले आहेत. आपण जो संयम पाळला आहे त्याचाच परिणाम म्हणून आपण या महामारीला इतक्या महिन्यानंतरही रोखून धरण्यात यशस्वी झालो आहे हे विसरू नका.
युरोपमधील देशांमध्ये कोरोनाच्या दुसऱ्या आणि तिसऱ्या लाटेमुळे गंभीर परिस्थिती निर्माण होते आहे. त्याठिकाणी रुग्ण झपाट्याने वाढत असून त्यांच्यासाठी रुग्णालयांची साधन सामुग्री, वैद्यकीय कर्मचारी, डॉक्टर्स कमी पडताहेत. दिवाळीत आपण बेसावध राहिलो तर तर पुढच्या काळात आपल्याकडेही रुग्णसंख्या बेसुमार वाढून खूप कठीण आव्हान बनेल हे ध्यानी घ्या असे सांगून मुख्यमंत्री म्हणाले की, एकीकडे दिवाळीचा आनंद आपण घेणार असलो तरी दुसरीकडे हजारो डॉक्टर्स, नर्सेस, वैद्यकीय कर्मचारी , पोलीस हे सणवार विसरून कोरोनाशी लढताहेत, तुमचा -आपला सर्वांचा जीव कसा सुरक्षित ठेवायचा ते पाहताहेत हे कृपया विसरू नका एवढीच विनंती. त्यांची दिवाळी रुग्णालयांमध्ये आणि कर्तव्य बजावताना जाणार आहे. या कर्मचाऱ्यांत आपली आई , वडील, भाऊ बहिण, नातेवाईक, मित्र कुणीही असू शकते. त्यांच्यावरचा ताण न वाढू देणे आणि घरातच राहून सुरक्षितरीत्या दिवाळी साजरे करणे याला प्राधान्य द्या.

हा सण मोठा असला तरी आपल्या परिसरात, आपल्या जवळचे, मित्रमंडळी- नातेवाईक यांच्या घरात कोरोनामुळे दु:खद घटना घडलेली असेल. त्यांना या दिवाळीचा आनंद घेता येणार नाही त्यामुळे उत्साह दाखवतांना त्यांचाही विचार मनात राहू द्या असेही मुख्यमंत्री म्हणतात.
आपल्याला दिवाळीनंतर शाळा, महाविद्यालये सुरु करायचे आहेत. पूर्ववत आयुष्य जगायचे आहे. त्यामुळे या दिवाळीतही मास्क घालणे- हात धुणे- अंतर पाळणे ही त्रिसूत्री पाळा आणि आता या हिवाळा असल्याने श्वसन रोगाला आमंत्रण देऊ नका, आपले आई वडील, ज्येष्ठ मंडळी घरात आहेत याची जाणीव ठेवा. फटाके वाजविणे आणि बाहेरच्या भेटीगाठी यापेक्षा घरातच कुटुंब एकत्रितरीत्या हा सण साजरा करू शकते. हा दीपोत्सव असल्याने दिव्यांची आरास, रांगोळ्या,ज्यांना शक्य आहे त्यांना अंगणात किल्ले करणे, या काळात सुट्या असल्याने वाचन करणे, संगीत तसेच इतर आवड पूर्ण करा. तुमच्या घराचे दरवाजे मंगलमय शांती, समृद्धी, लक्ष्मी यांच्यासाठी उघडा , कोरोनासारख्या रोगासाठी नव्हे असे देखील मुख्यमंत्री म्हणतात.

सरकारने जर कोणाला लक्ष्य केले तर आम्ही त्याच्या संरक्षणासाठी आहोत; सर्वोच्च न्यायालयाने उद्धव सरकारला फटकारले

रिपब्लिक टीव्हीचे संपादक अर्णब गोस्वामी यांना सर्वोच्च न्यायालयाने अंतरिम जामीन मंजूर केला आहे. मुंबई उच्च न्यायालयाने त्यांचा जामीन फेटाळून लावल्यानंतर त्यांनी सर्वोच्च न्यायालयात धाव घेतली होती. जस्टिस चंद्रचूड़ यांच्या बेंचने अर्णब आणि इतर दोघांना 50 हजार रुपयांच्या बॉण्डवर अंतरिम जामी मंजूर केला. तसेच, कोर्टाने पोलिस आयुक्तांना जामीन आदेश तत्काळ कार्यान्वित करण्यास सांगितले.

यासोबतच, कोर्टाने उद्धव सरकारला फटकारले की, जर राज्य सरकारांनी एखाद्या व्यक्तीला लक्ष्य केले तर त्यांना असे वाटले पाहिले की, आम्ही (सर्वोच्च न्यायालय) त्यांचे रक्षण करू.

दरम्यान, ‘अन्वय नाईक यांची कंपनी सात वर्षांपासून आर्थिक अडचणीत होती. त्यामुळे अन्वय नाईक यांनी आपल्या आईची हत्या करुन मग आत्महत्या केली असावी,’ असा युक्तिवाद गोस्वामी यांचे वकील हरिश साळवे यांनी सर्वोच्च न्यायालयात केला आहे.

मुंबई उच्च न्यायालयाने अर्णब गोस्वामी यांना तातडीचा दिलासा देण्यास नकार दिल्याने त्यांनी सर्वोच्च न्यायालयात आव्हान दिले. त्यावर न्यायमूर्ती चंद्रचूड यांच्यासमोर सुनावणी झाली. सर्वोच्च न्यायालयातील सुनावणीदरम्यान अर्णब गोस्वामी यांच्या वतीने युक्तिवाद करताना हरिश साळवे म्हणाले की, ‘अन्वय नाईक यांची कंपनी सात वर्षांपासून आर्थिक अडचणीत होती. त्यामुळे, त्यांनी आपल्या आईची हत्या करुन मग आत्महत्या केली, अशीही शंका आहे,’ असे हरीश साळवे म्हणाले.

या अटींवर मिळाला जामीन

सुप्रीम कोर्टाने म्हटले की, अर्णब गोस्वामी आणि इतर दोघे पुराव्यांशी छेडछाड करू शकणार नाहीत. यासोबतच त्यांना या प्रकरणातील तपासात पूर्ण सहयोग करावा लागेल.

कोर्टाच्या 5 कडक टिप्पण्या

> आपली लोकशाही कमालीची लवचिक आहे. महाराष्ट्र सरकारने या सर्वांकडे दुर्लक्ष करायला हवे.

> एखाद्या व्यक्तीच्या वैयक्तिक स्वातंत्र्यावर अंकुश ठेवल्यास ते न्यायाचे दडपण असेल.

> महाराष्ट्र सरकारला या प्रकरणात कस्टडीत घेऊन चौकशी करण्यात गरज आहे काय?

> आपण वैयक्तिक स्वातंत्र्याच्या मुद्द्याशी झगडत आहोत.

> जर घटनात्मक न्यायालयांनी हस्तक्षेप केला नाही तर आपण विनाशाच्या मार्गावर आहोत.

मुख्यमंत्र्यांना अटक करणार का ?

युक्तिवादादरम्यान अर्णब आणि अन्वय नाईक यांचा थेट काहीही संबंध नव्हता, असे साळवे यांनी म्हटले आहे. ‘मागच्या महिन्यात महाराष्ट्रामधील एका व्यक्तीने आत्महत्या केली. यावेळी त्याने मुख्यमंत्र्यांमुळे आपल्याला वेळेत पगार मिळाला नाही असे म्हटले होते. मग तुम्ही काय मुख्यमंत्र्यांना अटक करणार?,’ असा प्रश्न साळवे यांनी उपस्थित केला. यासोबतच, साळवे यांनी अर्णब आणि अन्वय यांच्यामध्ये कोणतेही खासगी संबंध नसल्याचेही सांगितले आहे. एखाद्या कराराच्या आधारावर आत्महत्येला प्रोत्साहन दिले असे म्हणता येणार नाही, असा युक्तीवादही त्यांनी यावेळी केला.

काय आहे प्रकरण?

2018 मध्ये इंटेरियर डिझायनर अन्वय नाईक आणि त्याच्या आईला आत्महत्येला प्रवृत्त केल्याच्या आरोपात अर्णब आणि इतर दोन जणांना रायगड पोलिसांनी 4 नोव्हेंबर रोजी अटक केली होती. नंतर कोर्टाने त्यांना 18 नोव्हेंबर पर्यंत न्यायालयीन कोठडी सुनावली. अर्णब सध्या तळोजा कारागृहात बंद आहे.

अर्णबप्रकरणी राम कदम गृहमंत्र्यांना भेटले

भाजप आमदार राम कदम यांनी मंगळवारी अर्णबच्या अटकेवरून महाराष्ट्राचे गृहमंत्री अनिल देशमुख यांची भेट घेतली. त्यांनी गृहमंत्र्यांना एक पत्र लिहून, अर्णब प्रकरणी पोलिसांना योग्य तपास करण्याचे निर्देश देण्याचा विनंती केली.

पत्रात लिहीले, ‘अटकेदरम्यान अर्णब यांच्यासोबत गैरवर्तन करण्यात आले आणि त्यांना मारहाणही झाली. ज्या पोलिसांनी त्यांना मारहाण केली, ते सूड बुद्धीने कारवाई करत आहेत. अर्णबसोबत केलेल्या गैरवर्तनामुळे जनतेच्या मनात रोष आहे.’

हलगर्जीपणा करणाऱ्या अधिकाऱ्यांवर कारवाई होणार

कोकण रीजनचे पोलिस महासंचालक संजय मोहिते यांनी मीरा भायंदर वसई विरार पोलिस आयुक्त सदानंद दाते यांना पत्र लिहून आत्महत्या प्रकरणाचा घाईने तपास करणाऱ्या इंस्पेक्टर सुरेश वराडेवर कार्रवाई करण्याची शिफारस केली. कमिश्नर म्हणाले, पत्र मिळाल्यानंतर वराडे यांच्यावर कारवाई सुरू केली आहे. वराडे यांनीच अलीबाग पोलिस स्टेशनमध्ये आत्महत्या प्रकरणाची क्लोजर रिपोर्ट फाइल केली होती.

फेक टीआरपी प्रकरणी घनश्याम सिंह अटक

यादरम्यान, मुंबई टीआरपीमध्ये फेरफार केल्याप्रकरणी रिपब्लिक टीव्हीचे डिस्ट्रीब्यूशन हेड घनश्याम सिंहला मंगळवारी अटक करण्यात आले. सिंह रिपब्लिक मीडिया नेटवर्कचे सहायक असिस्टेंट वाइस प्रेसिडेंटदेखील आहेत. सिंह यांच्या अटकेसोबतच आतापर्यंत याप्रकरणी 12 जणांना अटक झाली आहे.

मुंबई, दि. 10 : प्रत्यक्ष कार्यस्थळावर काम करत असताना येणाऱ्या अडचणी तसेच वीज कंपनीच्या हिताच्या दृष्टीने सबऑर्डीनेट इंजिनिअर्स असोसिएशनने सादरीकरणात केलेल्या सूचनांचे ऊर्जामंत्री डॉ. नितीन राऊत यांनी स्वागत केले. भरती प्रक्रिया व फील्डस्तरावर काम करताना येणाऱ्या अडचणी सोडविण्याच्या असोसिएशनच्या मागणीवर सकारात्मक निर्णय घेतला जाईल, अशी ग्वाही डॉ. राऊत यांनी दिली.

ऊर्जामंत्री डॉ नितीन राऊत, ऊर्जा विभागाचे प्रधान सचिव असीम गुप्ता व तीनही कंपन्यांचे व्यवस्थापकीय संचालक, संचालक यांची फोर्ट येथील एमएसईबी सुत्रधारी कंपनीच्या कार्यालयात बैठक घेतली.

प्रत्यक्ष मैदानात काम करणारे अधिकारी व कर्मचाऱ्यांना नेमक्या कोणत्या अडचणी येत आहेत, वीज कंपन्यांची कार्यक्षमता वाढविण्यासाठी त्यांच्या काय सूचना आहेत, थकीत वीज बिल वसुलीसाठी कोणते उपाय करायला हवेत, याबद्दल प्रत्यक्ष मैदानावर काम करणाऱ्यांना काय वाटते, हे सादर करण्याची संधी मंत्री डॉ.राऊत यांनी सबऑर्डीनेट इंजिनिअर्स असोसिएशनला आज दिली.

असोसिएशनने कंपनीच्या हिताच्या दृष्टीने सादर केलेल्या सूचनांचा विचार करून कार्यवाही केली जाईल, असे डॉ. राऊत यांनी सादरीकरणानंतर सांगितले. तसेच कंपनीचा महसूल वाढविण्यासाठी व ग्राहकांकडून थकीत बिल कशाप्रकारे वसुल करता येईल यासाठी केलेल्या सूचना विशेष आवडल्याचे डॉ. राऊत यांनी असोसिएशनच्या पदाधिकाऱ्यांना सांगितले.

कोरोनामुळे लागू झालेल्या लॉकडाऊन कालावधीत महावितरण कंपनीने वीज जोडणी न तोडणे व हप्त्यांत वीज बिल भरणा करण्याची सुविधा ग्राहकांना दिली आहे. लॉकडाऊनमुळे वीज वसुली न झाल्यामुळे महावितरणला आर्थिक फटका बसला आहे. अनेक ठिकाणी ग्रामीण भागात महावितरणच्या ग्राहकांना वीज बिल भरणा सुविधा नसल्यामुळे अडचण होते. ग्राहकांची ही अडचण सोडवण्यासाठी गाव पातळीवर एटीएम सेंटर उभारण्यात यावे. ‘माझी कंपनी, माझी जबाबदारी’, ही संकल्पना राबवून प्रथम महावितरण कंपनीच्या कर्मचाऱ्यांनी आपले वीज बिल बँकेच्या माध्यमातून भरणा करावे आदी सूचना यावेळी असोसिएशनकडून मांडण्यात आल्या.

“आम्हाला आजवर केवळ आलेल्या सिस्टीममध्ये आमच्या सूचना देण्यास सांगण्यात येत होते. एखाद्या वेळेस संचालकांपर्यंत आमच्या सूचना लेखी स्वरूपात सादर करू शकलो होतो. मात्र डॉ. राऊत हे ऊर्जा क्षेत्रात सुधारणा करण्यासाठी सकारात्मक आणि सक्रिय आहेत. त्यांनी स्वतः आम्हाला ऊर्जा क्षेत्रात अपेक्षित सुधारणा आणि उत्पादन खर्च कसे कमी करता येईल याबद्दल सादरीकरण करायला सांगितले. असे पहिल्यांदाच घडतेय की मंत्री स्वतःहून आम्हाला सूचना मागतात,” अशा शब्दात सबऑर्डीनेट इंजिनिअर्स असोसिएशनचे सरचिटणीस संजय ठाकूर यांनी आपल्या भावना व्यक्त केल्या.

अभियंत्यांकडून आलेल्या सूचनांचे सादरीकरण झाल्यावर प्रधान सचिव असीम गुप्ता यांनी असोसिएशनचे विचार कंपनीच्या हितवर्धनाचे असून ही कंपनीच्या उज्ज्वल भविष्यासाठी चांगली बाब असल्याची प्रतिक्रिया व्यक्त केली.