पुणे,दि.17:- विधानपरिषदेची द्विवार्षिक पदवीधर व शिक्षक मतदारसंघाच्या निवडणूकीसाठी मतदान केंद्रावर मतदारांची ओळख पटविण्यासाठी मतदार ओळखपत्र (EPIC) सादर करू न शकणा-या मतदारांचे आधार कार्ड, वाहनचालक परवाना, पॅन कार्ड तसेच पारपत्र आदी नऊ कागदपत्रे मतदानासाठी ग्राह्य धरण्यात येतील, असे आदेश निवडणूक आयोगाने दिले आहेत.
या कागदपत्रांबरोबरच केंद्र/राज्य शासन/सार्वजनिक उपक्रम/स्थानिक स्वराज्य संस्था किंवा खाजगी औद्योगिक घराणे यांनी वितरीत केलेले सेवा ओळखपत्र, खासदार/आमदार यांचे अधिकृत ओळखपत्र, संबंधित पदवीधर/शिक्षण मतदार संघातील शिक्षण संस्थेत कार्यरत असलेल्या पदवीधर/शिक्षक मतदारांना वितरीत केलेले सेवा ओळखपत्र, विश्वविद्यालयाद्वारे वितरीत पदवी/पदविका मूळ प्रमाणपत्र तसेच सक्षम प्राधिकरणाद्वारे वितरीत केलेले अपंगत्वाचे मूळ प्रमाणपत्र ही कागदपत्रे मतदानासाठी ग्राह्य धरण्यात येतील.
छायाचित्रासह मतदार ओळखपत्रान्वये मतदाराची ओळख पटत असेल तर मतदार ओळखपत्रातील किरकोळ विसंगती दुर्लक्षित कराव्यात. तसेच, छायाचित्रासह मतदार ओळखपत्रावरील विसंगत छायाचित्रामुळे मतदाराची ओळख पटणे अथवा पटविणे शक्य नसल्यास मतदारास वरील पर्यायी कागदपत्रांपैकी एक ओळख कागदपत्र सादर करणे आवश्यक राहील, याची सर्व संबंधित अधिकारी व मतदान केंद्राध्यक्ष यांनी नोंद घ्यावी, असे उप जिल्हा निवडणूक अधिकारी, मृणालिनी सावंत यांनी पत्रकाद्वारे कळविले आहे.
00000

पुणे,दि.17: पुणे विभाग पदवीधर व शिक्षक मतदार संघ निवडणूक प्रक्रियेतील अधिकारी व कर्मचाऱ्यांनी निवडणूकीचे काम निःपक्षपातीपणे आणि आत्मविश्वासाने पार पाडावे, असे आवाहन विभागीय आयुक्त तथा निवडणूक निर्णय अधिकारी सौरभ राव यांनी केले.

पुणे विभाग पदवीधर व शिक्षक मतदार संघातून महाराष्ट्र विधानपरिषदेसाठी निवडणूक-2020 च्या अनुषंगाने पुणे विभागातील मतदान केंद्राध्यक्ष व मतदान अधिकारी यांच्यासाठी पुणे जिल्हाधिकारी कार्यालयात प्रशिक्षण कार्यशाळा आयोजित करण्यात आली, यावेळी ते बोलत होते. यावेळी निवडणूक निरीक्षक निलिमा केरकेटा, निवडणूक निरीक्षक श्रीकांत देशपांडे, जिल्हाधिकारी तथा सहाय्यक निवडणूक निर्णय अधिकारी डॉ. राजेश देशमुख उपस्थित होते.

विभागीय आयुक्त सौरभ राव म्हणाले, पदवीधर व शिक्षक मतदार संघ निवडणूक प्रक्रिया सुरळीत व शांततेत पार पाडण्यासाठी निवडणूक आयोगाच्या मार्गदर्शक सूचनांची अंमलबजावणी करावी. मतदान व मतमोजणी प्रक्रिया वेळेत पार पाडण्यासाठी योग्य नियोजन करा. कोविड-19 चा प्रादुर्भाव लक्षात घेऊन प्रत्येक मतदान केंद्रावर आवश्यक ती सर्व खबरदारी घ्यावी. सोशल डिस्टन्सिंग, मास्क, सॅनिटायझर आदी दक्षता बाळगावी. मतदान केंद्रावर गर्दी होवू नये यासाठी रांग लावणे, मतदारांना माहिती देणे यादृष्टीने मतदान केंद्र व्यवस्थापनासाठी कर्मचाऱ्यांची नियुक्ती करुन त्यांना जबाबदारी नेमून द्या. मतदान केंद्राच्या सुरक्षा व्यवस्थेसाठी पोलीस कर्मचाऱ्यांची मदत घ्या. मतदारांना माहिती देण्यासाठी मतदार सहाय्यता कक्ष स्थापन करा, असे सांगून निवडणूक कामकाजातील अधिकारी व कर्मचाऱ्यांनी संघभावनेने काम करुन आपापल्या जबाबदाऱ्या पूर्ण करावी, असेही श्री. राव यांनी सांगितले.

अपर जिल्हाधिकारी वर्षा लढ्ढा यांनी सादरीकरणाद्वारे सविस्तर माहिती दिली. त्या म्हणाल्या, मतदान अधिकाऱ्यांनी निवडणूक साहित्य ताब्यात घेताना तपासून घ्यावे, मतदानाच्या आदल्या दिवशी मतदान केंद्रावरील पूर्वतयारी करावी. कोविड-19 प्रादुर्भावामध्ये मतदान केंद्रावर खबरदारी घ्यावी. मतदानास सुरुवात होण्यापूर्वीची कामे वेळेत पार पाडावीत,असे सांगून मतदान केंद्राध्यक्षांची कर्तव्ये, फोटो ओळखपत्र नसणाऱ्या मतदाराची ओळख पटवण्यासाठी आवश्यक इतर पुरावे, मतदान प्रक्रियेमध्ये उद्भवणाऱ्या परिस्थिती, मतदान गुप्त राहण्यासाठी घ्यावयाची काळजी, दिव्यांग मतदारांसाठी मतदान, टपाली मतदान, मतदान झाल्यानंतरची कामे आदी बाबींची माहिती श्रीमती लढ्ढा यांनी दिली.

कार्यशाळेत उपस्थित मतदान अधिकाऱ्यांच्या शंकांचे विभागीय आयुक्त सौरभ राव व अपर जिल्हाधिकारी वर्षा लढ्ढा यांनी निरसन केले.

प्रस्ताविक उपविभागीय अधिकारी संतोषकुमार देशमुख यांनी तर सूत्रसंचालन तहसीलदार तृप्ती कोलते-पाटील यांनी केले. आभार उप जिल्हा निवडणूक अधिकारी मृणालिनी सावंत यांनी मानले.

पुणे विभागातील 4 लाख 89 हजार 128 कोरोना बाधित रुग्ण बरे होऊन घरी
विभागात कोरोना बाधित 5 लाख 18 हजार 757 रुग्ण-कालच्या बाधीत रुग्ण संख्येच्या तुलनेत पुणे विभागात बाधीत रुग्णांच्या संख्येमध्ये एकूण 523 ने वाढ
-विभागीय आयुक्त सौरभ राव

पुणे,दि.17 :- पुणे विभागातील 4 लाख 89 हजार 128 कोरोना बाधित रुग्ण बरे होऊन घरी गेले असून विभागात कोरोना बाधीत रुग्णांची संख्या 5 लाख 18 हजार 757 झाली आहे. तर ॲक्टीव रुग्ण संख्या 15 हजार 7 इतकी आहे. कोरोनाबाधीत एकुण 14 हजार 622 रुग्णांचा मृत्यू झाला असून मृत्यूचे प्रमाण 2.82 टक्के आहे. पुणे विभागामध्ये बऱ्या होणा-या रुग्णांचे प्रमाण 94.29 टक्के आहे, अशी माहिती विभागीय आयुक्त सौरभ राव यांनी दिली.कालच्या बाधीत रुग्ण संख्येच्या तुलनेत पुणे विभागात बाधीत रुग्णांच्या संख्येमध्ये एकूण 523 ने वाढ झाली आहे.

पुणे जिल्हा
पुणे जिल्हयातील कोरोना बाधीत एकूण 3 लाख 31 हजार 777 रुग्णांपैकी 3 लाख 14 हजार 447 रुग्ण बरे होवून घरी गेले आहेत. ॲक्टीव रुग्ण 9 हजार 242 आहे. कोरोनाबाधित एकूण 8 हजार 88 रुग्णांचा मृत्यू झाला आहे. मृत्यूचे प्रमाण 2.44 टक्के इतके आहे तर बरे होणा-या रुग्णांचे प्रमाण 94.78 टक्के आहे.
सातारा जिल्हा
सातारा जिल्हयातील कोरोना बाधीत एकूण 48 हजार 892 रुग्णांपैकी 44 हजार 743 रुग्ण बरे होवून घरी गेले आहेत. ॲक्टीव रुग्ण संख्या 2 हजार 506 आहे. कोरोनाबाधित एकूण 1 हजार 643 रुग्णांचा मृत्यू झाला आहे.
सोलापूर जिल्हा
सोलापूर जिल्हयातील कोरोना बाधीत एकूण 43 हजार 238 रुग्णांपैकी 39 हजार 441 रुग्ण बरे होवून घरी गेले आहेत. ॲक्टीव रुग्ण संख्या 2 हजार 255 आहे. कोरोनाबाधित एकूण 1 हजार 542 रुग्णांचा मृत्यू झाला आहे.
सांगली जिल्हा
सांगली जिल्हयातील कोरोना बाधीत एकूण 46 हजार 121 रुग्णांपैकी 44 हजार 42 रुग्ण बरे होवून घरी गेले आहेत. ॲक्टीव रुग्ण संख्या 397 आहे. कोरोनाबाधित एकूण 1 हजार 682 रुग्णांचा मृत्यू झाला आहे
कोल्हापूर जिल्हा
कोल्हापूर जिल्हयातील कोरोना बाधीत एकूण 48 हजार 729 रुग्णांपैकी 46 हजार 455 रुग्ण बरे होवून घरी गेले आहेत. ॲक्टीव रुग्ण संख्या 607 आहे. कोरोनाबाधित एकूण 1 हजार 667 रुग्णांचा मृत्यू झाला आहे.
कालच्या रुग्णसंख्येच्या तुलनेत आज झालेली वाढ
कालच्या बाधीत रुग्ण संख्येच्या तुलनेत पुणे विभागात बाधीत रुग्णांच्या संख्येमध्ये एकूण 523 ने वाढ झाली आहे. यामध्ये पुणे जिल्ह्यात 359 , सातारा जिल्ह्यात 42, सोलापूर जिल्ह्यात 83, सांगली जिल्ह्यात 28 तर कोल्हापूर जिल्ह्यात 11 अशी रुग्ण संख्येमध्ये वाढ झालेली आहे.
कालच्या रुग्णसंख्येमध्ये बऱ्या होणा-या रुग्णांचे प्रमाण –
पुणे विभागामध्ये बऱ्या होणाऱ्या एकूण 636 रुग्णांमध्ये पुणे जिल्हयामध्ये 375, सातारा जिल्हयामध्ये 57, सोलापूर जिल्हयामध्ये 126, सांगली जिल्हयामध्ये 64 व कोल्हापूर जिल्हयामध्ये 14 रुग्णांचा समावेश आहे.

पुणे विभागातील सर्व्हेक्षण
आजपर्यत विभागामध्ये एकुण 25 लाख 98 हजार 703 नमून्यांचा तपासणी अहवाल प्राप्त झाला. प्राप्त अहवालांपैकी 5 लाख 18 हजार 757 नमून्यांचा अहवाल सकारात्मक (पॉझिटिव्ह) आहे.

( टिप :- दि. 16 नोव्हेंबर 2020 रोजी रात्री 9.00 वा. पर्यंतच्या आकडेवारीनुसार )

• वंदेमातरम संघटनेचा अनोखा उपक्रम.

पुणे- गेल्या सात आठ महिन्यात कोरोनापासून बचावासाठी जे कोरोनायोध्दे ऑनफिल्ड लढत होते त्यातल्या काहींना मरण प्राप्त झाले. याच हुतात्म्यांप्रती कृतज्ञता व्यक्त करण्यासाठी वंदेमातरम् संघटना कृत युवा वाद्य पथक आणि युवा फिनिक्स सोसायटी यांच्या वतीने कृतज्ञता दिपावलीचे आयोजन करण्यात आले होते. त्या आरोग्य सेवकांच्या त्यागा बद्दल कृतज्ञता व्यक्त करुन दिवाळीची भेट म्हणून पुणेकरांनी सुपूर्द केलेला फराळ या कुटुंबियांना देण्याच्या उपक्रमाला आज पुण्याचे महापौर मुरलीधर मोहोळ यांच्या हस्ते सुरुवात करण्यात आली.

रुग्णांना सेवा देत असतांना कोरोना पॉझिटिव्ह झालेले व त्यात वीरमरण पत्करलेले पुणे महानगरपालिकेचे आरोग्य कर्मचारी हुतात्मा संतोष आदमाने यांच्या घरी भेट देण्यात आली. स्वत: संतोष आदमाने यांना ऑनड्युटी असतानाच ९ जुलै रोजी वीरमरण आले पण दुर्दैवाने साधारण एक महिना आगोदरच त्यांच्या मातोश्रींचे देखील कोरोनानेच निधन झाले होते. एकाच घरातील दोन व्यक्ती एका महिन्यात कोरोनाने गेल्या. त्यांच्या घरातील त्यांचा चिमुकला आणि कुटुंबियांचे अश्रू पाहून संपूर्ण वातावरण स्तब्ध झाले होते.

ज्यांच्या अकाली जाण्याने संपूर्ण महाराष्ट्र हळहळला, हजारो युवक युवतींना पोरके झाल्याची भावना निर्माण झाली असे पुणे शहरातील व्यक्तिमत्त्व हुतात्मा ज्ञानेश पुरंदरे यांच्या निवासस्थानी त्यांच्या कुटुंबियांची कृतज्ञता भेट घेण्यात आली. या वेळी उपस्थित प्रत्येकाच्याच मनात कै.ज्ञानेश पुरंदरेंच्या असंख्य आठवणी दाटून आल्या होत्या.
यावेळी ज्ञानेश पुरंदरे यांचे लहानभाऊ महेश पुरंदरे , लता पुरंदरे आणि कुटुंबिय उपस्थित होते. पुणेकरांच्या वतीने कै.पुरंदरेंच्या नावाच्या दीपस्तंभाच्या तसबीरीपुढे कृतज्ञता दिप लाऊन महापौर मुरलीधर मोहोळ यांनी आदरांजली वाहिली.

पुणे-दर प्रमाणे यावर्षी सुध्दा स्वराज्य प्रतिष्ठान तर्फे सहकारनगर पोलीस स्टेशन येथेे भाऊबीज च्या कार्यक्रमाचे आयोजन करण्यात आले होते .जे पोलीस आपले सणवार विसरून या कोरोना च्या महामारी मध्ये सुध्दा आपले कर्तव्य बजावत होते अशा पोलीस बांधवांसाठी भाऊबीज आयोजन करण्यात आले होते
यावेळी पोलीस निरीक्षक राजेंद्र कदम आणि पोलीस अधिकारी यांना औक्षण करण्यात आले
यावेळी औक्षण करणाऱ्या भगिनी संगीता चौरे, ज्योती कानेगावकर, उषा अवघडे, संगीता मोरे, मनीषा थनवाल, वनिता कदम,ज्योती भोंडे, अवंती धेडे, सुजाता लागू ,सारिका गायकवाड ,सारिका ठाकर, सुनीता भोसले, कविता साळुंखे, मंजिरी निवांगुणे, प्रगती शिंदे, पुष्पां शिंदे, प्रज्ञा उतेकर, दीपा शिताप यांचा समावेश होता. यावेळी कैलास मोरे अनील जाधव हे उपस्थित होते
प्रस्तावना शेखर कोरडे व भानुदास ढोबळे तसेच आभार हरिष परदेशी यांनी मानले .
यावेळी श्रीमती स्वात्ती दिवाण यांनी पोलीस कर्मचारी व सफाई कामगार यांच्या साठी कविता त्यांनी लिहिलेली कविता तेथे वाचून दाखविली.कार्यक्रमाचे आयोजन नगरसेवक महेश वाबळे आणि प्रतिष्ठानचे कार्यध्यक्ष मनीषा वाबळे यांनी केले होते

पुणे- आज पाडव्याच्या शुभ मुहूर्तावर राज्य शासनाने राज्यातील सर्व प्रार्थनास्थळ मंदिरे खुली करण्याचे करण्यास मान्यता दिली. या पार्श्वभूमीवर आठ महिन्यांनी पुणे आणि राज्यभर विविध मंदिरे भाविकांसाठी खुली झाली .

आज (दि.१६) सकाळी सहा वाजल्यापासून तीर्थक्षेत्र आळंदीतील माऊलींचे समाधी मंदिर भाविकांच्या दर्शनासाठी खुले करण्यात आले आहे. दरम्यान, तमाम भाविकांना माऊलींच्या दर्शनाची ओढ लागलेली आहे. त्यातच मंदिर उघडण्यावेळी दिवाळीपाडवा मुहूर्त असल्याने भाविकांची उसळणारी गर्दी लक्षात घेता मंदिरात पोलिसांचा बंदोबस्त तैनात करण्यात आला आहे.

कोविडच्या पार्श्वभूमीवर शासनाच्या आदेशानुसार मागील आठ महिन्यांपासून मंदिर बंद होते. मात्र यादरम्यान देवाचे उपचार नैमित्तिक परंपरा अखंड सुरु होते. सोशल मीडियावर दैनंदिन माउलींचे समाधी दर्शन सुरू होते. मात्र राज्य सरकारने सोमवारपासून धार्मिक स्थळे उघडण्यास परवानगी दिली आहे. यापार्श्वभूमीवर माऊलींचे समाधी मंदिर सकाळी सहापासून ते रात्री आठ वाजेपर्यंत भाविकांच्या दर्शनासाठी खुले करण्यात येणार आहे. दरम्यान पहाटे प्रमुख विश्वस्त अभय टिळक यांच्या हस्ते माऊलींची विधिवत महापूजा होईल.

भाजप आणि साधू संतांच्या संघर्षाला यश येउन धार्मिक स्थळ उघडण्याच्या निर्णय झाल्याचा दावा करत भाजपच्या प्रवक्त्यांनी पुण्यातील उपलक्ष कर्वेनगर येथील विठ्ठल मंदिरात गणरायाच्या,पांडूरंगरखमाईच्या च्या,गुरुदेव दत्ताच्या,शनीदेवाच्या आणि पालवबाबा समाधीचे दर्शन घेतले .यावेळी आमदार चंद्रकांतदादा पाटील यांच्या वतीने नगरसेविका मंजुश्री खर्डेकर यांच्या हस्ते मंदिरास भाविकांच्या सुरक्षेसाठी हॅंडस् फ्री सॅनिटायझर यंत्र भेट देण्यात आले .

भाजपचे नगरसेवक आदित्य माळवे म्हणाले राज्य सरकारने सोमवारपासून मंदिर उघडे करण्याचा अध्यदेश काढला यानिमित्त मॉडेल कॉलनीतील केदारनाथ मंदिर भाविकांसाठी दर्शनासाठी खुले करण्यात आले यानिमित्त केदारनाथची आरती माझ्या हस्ते करण्याचा बहुमान विश्वस्तांनी दिला . हा माझा भाविकांनी केलेला सन्मान आहे.

करवीर निवासिनी अंबाबाई मंदिर आकर्षक विद्युत रोषणाई व फुलांची सजावट आकर्षक रांगोळीच्या मांडणीसह सोमवारी सकाळी नऊ वाजता सर्व भाविकांसाठी खुले झाले. अंबाबाई दर्शनाचा पहिला मान कोव्हिड योध्यांना देण्यात आला. यावेळी पश्र्चिम महाराष्ट्र देवस्थान समितीचे अध्यक्ष महेश जाधव व पदाधिकाऱ्यांनी दर्शनासाठी आलेल्यांचे स्वागत केले. तसेच आठवडाभरात अंबाबाईचे दर्शन देखील ऑनलाईन बुकींग द्वारे करण्यात येणार असल्याचे सांगितले.

मंदिर खुले झाले असले तरी भाविकांना केवळ सहा तासात दर्शन घेता येणार आहे. देवस्थान समितीने दर्शनासाठी सकाळी ९ ते दुपारी १२ व दुपारी 4 ते सायंकाळी ७ वाजेपर्यंत दर्शन वेळ निश्चित केली आहे. सध्या भाविकांना मंदिरात पूर्व दरवाजातून प्रवेश करता येणार आहे. तसेच गाभाऱ्यात थेट प्रवेश न देता कासव चौकातून दर्शन घेऊन दक्षिण दरवाजामधून बाहेर पडण्याची सोय केली आहे. कोरनाच्या पार्श्वभूमीवर मंदिरात प्रवेश करताना भक्तांना ऑटोमॅटिक सॅनिटायझर दिले जाते तसेच तापमान तपासणी ,आवारात मास्क नसल्यास प्रवेश बंदी करण्यात आलेली आहे.

पश्चिम महाराष्ट्र देवस्थान व्यवस्थापन समितीच्या अख्त्यारीतील प्रमुख अंबाबाई मंदिर, जोतिबा मंदिर यासह सिंधुदुर्ग , सांगली, कोल्हापूर जिल्ह्यातील 3042 मंदिरे आज खुली झाली.

श्रीमंत दगडूशेठ हलवाई मंदिर पहाटे पाच वाजल्यापासून खुलं करण्यात आलं. दर्शनासाठी भाविकांची मोठी रांग पाहायला मिळत आहे. सोशल डिस्टन्सिंग पाळून दर्शन घेतलं जात आहे. तसेच सोशल डिस्टन्स ठेवत सारसबागेतीळ मंदिरामध्ये भाविकांना दर्शन देण्यात येत आहे.

सकाळपासून सिद्धिविनायक मंदिर चार वाजल्यापासून मंदिर खुले करण्यात आले. क्यूआर कोडच्या असलेल्या भाविकांनाच मंदिरात प्रवेश दिला जात आहे. कोरोनाचे नियम पालन करुनच भाविकांना प्रवेश दिला जात आहे. सिद्धिविनायक मंदिरात प्रवेश घेण्यासाठी ऑनलाईन बुकिंग करणे गरजेचे असल्याचे सिद्धिविनायक मंदिर न्यासाचे अध्यक्ष आदेश बांदेकर यांनी सांगितले आहे.

आजपासून राज्याचे मुख्यमंत्री उद्धव ठाकरे यांच्या सूचनेनुसार जेजुरीगड भाविकांसाठी देव दर्शनासाठी खुले करण्यात आला आहे. शासनाने घालून दिलेल्या नियम व अटींचे पालन करीतच भाविकांना देव दर्शन घ्यावे लागणार असल्याचे मुख्य विश्वस्त प्रसाद शिंदे यांनी सांगितले. पहाटे साडे पाच वाजता पुरंदर हवेलीचे आमदार संजय जगताप यांच्या हस्ते सपत्नीक कुलदैवत खंडोबाची महापूजा करून मंदिर भाविकांसाठी खुले करण्यात आले आहे.

शिर्डीचे साई मंदिर आजपासून पुन्हा उघडण्यात आले आहे. काकड आरतीनंतर साई दर्शनाला सुरुवात झाली. आठ महिन्यांनंतर मंदिंर खुले झाले आहे. मंदिराला आकर्षक विद्युत रोषणाई करण्यात आली असून आकर्षक रांगोळी सुद्धा काढण्यात आली आहे. पहाटेपासून भाविकांची दर्शनाला गर्दी होत असून पहिलाच दिवस असल्याने आलेल्या भक्तांना आयडी कार्ड पाहून दर्शनाला सोडत आहे. प्रवेश क्रमांक दोनवर मोठी रांग बाहेर लागली आहे.

कोरोनामुळे मागच्या आठ महिन्यापासून बंद असलेले मंदिरे आज पाडव्याच्या मुहूर्तावर उघडले. बारा ज्योतिर्लिंगापैकी एक असलेले बीडमधील परळीचे प्रभू वैद्यनाथाचे मंदिर सकाळी पाच वाजताच उघडले. नेहमीप्रमाणे पहाटेपासूनच भाविक दर्शनासाठी गर्दी करायचे. आज पुन्हा आठ महिन्यानंतर पहिल्यांदा दर्शन घेण्यासाठी भाविक पहाटेच पोहोचले होते. शासनाने घालून दिलेल्या नियम अटी पाळून या वेळी भाविकांना मंदिर खुले करण्यात आले. आज थेट गाभाऱ्यात भाविकांना प्रवेश देण्यात आला नाही मात्र मुखदर्शन खुले करण्यात आले आहे.

आज दिवाळी पाडव्यानिमित्त आज मंदिर विठ्ठल मंदिरात आकर्षक फुलांची सजावट करण्यात आली असून भाविकांच्या स्वागतासाठी मंदिर सज्ज झाले आहे. आठ महिन्यांनी विठुराया आणि भाविकांची भेट झाली आहे. पहिल्या भाविकाने सकाळी सहा वाजता दर्शन घेतलं. तापमान तपासून भाविकांना आत सोडलं जात आहे. तर तीन वेळा सॅनिटाईज केलं जात आहे.