पुणे विभाग पदवीधर व शिक्षक मतदार संघ निवडणूक
1202 मतदान केंद्रावर व्हिडीओग्राफी व लाइव वेबकास्टिंग
विभागीय आयुक्त सौरभ राव यांनी घेतला आढावा

पुणे, दि. ३०- भारत निवडणूक आयोगाच्या मार्गदर्शक सुचनांनुसार पुणे विभागातील पदवीधर व शिक्षक निवडणूक मतदान प्रक्रिया निर्भय, निपक्ष व पारदर्शी वातावरणात पार पडण्याच्या दृष्टिने निवडणूक निर्णय अधिकारी तथा विभागीय आयुक्त सौरभ राव यांच्या मार्गदर्शनाने पुणे विभागातील पुणे, सांगली, सातारा, सोलापूर व कोल्हापूर या पाचही जिल्ह्यातील सर्वच 1202 मतदान केंद्रावर व्हिडीओग्राफी व लाइव्ह वेबकास्टिंग करण्यात येणार आहे. विभागीय आयुक्त कार्यालयात त्यादृष्टिने वेबकास्टिंग कक्ष उभारण्यात आला असून या कक्षामध्ये मतदान केंद्रावरील कामकाज पाहता येणार आहे. विभागीय आयुक्त कार्यालयासोबतच पाचही जिल्ह्यातील जिल्हा मुख्यालयातही वेबकास्टिंग कक्ष उभारण्यात आला असून या कक्षातून पाचही जिल्ह्याचे जिल्हाधिकारीही मतदान केंद्रावरील कामकाज पाहू शकणार आहेत.

पुणे पदवीधर व शिक्षक निवडणुकीसाठी दिनांक 1 डिसेंबर 2020 रोजी मतदान होत आहेत. सकाळी 8 ते सायंकाळी पाच या वेळेत होणाऱ्या मतदान प्रक्रियेचे संपूर्ण लाइव्ह वेबकास्टिंग, सीसीटीव्ही चित्रीकरण तसेच व्हिडीओग्राफी करण्यात येणार आहे. 1202 मतदान केंद्रावर सुक्ष्म निरीक्षकांचीही नेमणूक करण्यात आली आहे. विभागीय आयुक्त सौरभ राव यांनी आज या कक्षास भेट देत पाहणी करून पाचही जिल्ह्यातील मतदान केंद्रावरील तयारीचा आढावा घेतला. विभागीय आयुक्त कार्यालयात उभारण्यात आलेल्या या वेबकास्टिंग कक्षाचे समन्वय अधिकारी म्हणून उपायुक्त त्रिगुण कुलकर्णी कामकाज पाहत आहेत. तसेच विभागीय गोदाम निरीक्षक संतोष सर्डे या कक्षासाठी कार्यरत आहेत. शिक्षक मतदार संघासाठी 367 व पदवीधर मतदार संघासाठी 835 मतदान केंद्र आहेत, या सर्वच मतदान केंद्रावर लाइव्ह वेबकास्टिंग करण्यात येणार आहे.

पुणे विभागातील 5 लाख 4 हजार 316 कोरोना बाधित रुग्ण बरे होऊन घरी
विभागात कोरोना बाधित 5 लाख 34 हजार 907 रुग्ण
-विभागीय आयुक्त सौरभ राव

पुणे,दि.30 :- पुणे विभागातील 5 लाख 4 हजार 316 कोरोना बाधित रुग्ण बरे होऊन घरी गेले असून विभागात कोरोना बाधीत रुग्णांची संख्या 5 लाख 34 हजार 907 झाली आहे. तर ॲक्टीव रुग्ण संख्या 15 हजार 609 इतकी आहे. कोरोनाबाधीत एकुण 14 हजार 982 रुग्णांचा मृत्यू झाला असून मृत्यूचे प्रमाण 2.80 टक्के आहे. पुणे विभागामध्ये बऱ्या होणा-या रुग्णांचे प्रमाण 94.28 टक्के आहे, अशी माहिती विभागीय आयुक्त सौरभ राव यांनी दिली.

पुणे जिल्हा
पुणे जिल्हयातील कोरोना बाधीत एकूण 3 लाख 42 हजार 370 रुग्णांपैकी 3 लाख 22 हजार 477 रुग्ण बरे होवून घरी गेले आहेत. ॲक्टीव रुग्ण 11 हजार 595 आहे. कोरोनाबाधित एकूण 8 हजार 298 रुग्णांचा मृत्यू झाला आहे. मृत्यूचे प्रमाण 2.42 टक्के इतके आहे तर बरे होणा-या रुग्णांचे प्रमाण 94.19 टक्के आहे.
सातारा जिल्हा
सातारा जिल्हयातील कोरोना बाधीत एकूण 51 हजार 59 रुग्णांपैकी 48 हजार 380 रुग्ण बरे होवून घरी गेले आहेत. ॲक्टीव रुग्ण संख्या 966 आहे. कोरोनाबाधित एकूण 1 हजार 713 रुग्णांचा मृत्यू झाला आहे.
सोलापूर जिल्हा
सोलापूर जिल्हयातील कोरोना बाधीत एकूण 45 हजार 690 रुग्णांपैकी 41 हजार 938 रुग्ण बरे होवून घरी गेले आहेत. ॲक्टीव रुग्ण संख्या 2 हजार 155 आहे. कोरोनाबाधित एकूण 1 हजार 597 रुग्णांचा मृत्यू झाला आहे.
सांगली जिल्हा
सांगली जिल्हयातील कोरोना बाधीत एकूण 46 हजार 748 रुग्णांपैकी 44 हजार 593 रुग्ण बरे होवून घरी गेले आहेत. ॲक्टीव रुग्ण संख्या 459आहे. कोरोनाबाधित एकूण 1 हजार 696 रुग्णांचा मृत्यू झाला आहे
कोल्हापूर जिल्हा
कोल्हापूर जिल्हयातील कोरोना बाधीत एकूण 49 हजार 40 रुग्णांपैकी 46 हजार 928 रुग्ण बरे होवून घरी गेले आहेत. ॲक्टीव रुग्ण संख्या 434 आहे. कोरोनाबाधित एकूण 1 हजार 678 रुग्णांचा मृत्यू झाला आहे.
कालच्या रुग्णसंख्येच्या तुलनेत आज झालेली वाढ
कालच्या बाधीत रुग्ण संख्येच्या तुलनेत पुणे विभागात बाधीत रुग्णांच्या संख्येमध्ये 1 हजार 125 ने वाढ झाली आहे. यामध्ये पुणे जिल्ह्यात 830 , सातारा जिल्ह्यात 135, सोलापूर जिल्ह्यात 118, सांगली जिल्ह्यात 23 तर कोल्हापूर जिल्ह्यात 19 अशी रुग्ण संख्येमध्ये वाढ झालेली आहे.
कालच्या रुग्णसंख्येमध्ये बऱ्या होणा-या रुग्णांचे प्रमाण –
पुणे विभागामध्ये बऱ्या होणाऱ्या रुग्णांमध्ये एकूण 930 समावेश आहे. पुणे जिल्हयामध्ये 622, सातारा जिल्हयामध्ये 88, सोलापूर जिल्हयामध्ये 172, सांगली जिल्हयामध्ये 31 व कोल्हापूर जिल्हयामध्ये 17 रुग्णांचा समावेश आहे.
पुणे विभागातील सर्व्हेक्षण
आजपर्यत विभागामध्ये एकुण 28 लाख 55 हजार 725 नमून्यांचा तपासणी अहवाल प्राप्त झाला. प्राप्त अहवालांपैकी 5 लाख 34 हजार 907 नमून्यांचा अहवाल सकारात्मक (पॉझिटिव्ह) आहे.

( टिप :- दि. 29 नोव्हेंबर 2020 रोजी रात्री 9.00 वा. पर्यंतच्या आकडेवारीनुसार )

पुणे : श्री गणेशाला फळ-भाज्यांसह मिठाई, फराळाच्या तिखट-गोड निवडक पदार्थांचा अन्नकोट आणि सभामंडपात व मंदिर परिसरात लावण्यात आलेल्या शेकडो दिव्यांच्या प्रकाशाने दगडूशेठ गणपती मंदिर उजळून निघाले. दरवर्षी मोठया प्रमाणात होणारा अन्नकोट यावर्षी साध्या पद्धतीने ठेवण्यात आला. त्रिपुरारी पौर्णिमेनिमित्त मंदिराच्या प्रवेशद्वारापासून ते कळसापर्यंत ५१ हजार दिव्यांची केलेली सजावट लक्षवेधी ठरली. 

श्रीमंत दगडूशेठ हलवाई सार्वजनिक गणपती ट्रस्ट, सुवर्णयुग तरुण मंडळाच्यावतीने ट्रस्टच्या १२८ व्या वर्षी त्रिपुरारी पौर्णिमेनिमित्त दगडूशेठ गणपती मंदिरामध्ये दीपोत्सव आणि साध्या पद्धतीने अन्नकोट आयोजित करण्यात आला होता. यावेळी ट्रस्टचे विश्वस्त, कार्यकर्ते उपस्थित होते. मंदिराच्या कळसासह संपूर्ण गाभा-यात लावलेल्या पणत्यांनी मंदिराचा परिसर उजळून निघाला होता. याशिवाय तोरण आणि फुले, रांगोळ्यांनी देखील मंदिराचा परिसर सजविण्यात आला. कार्यक्रमाचे यंदा २२ वे वर्ष आहे. 

ट्रस्टचे अध्यक्ष अशोक गोडसे म्हणाले, त्रिपुरारी पौर्णिमेनिमित्त दरवर्षी मोठया प्रमाणात अन्नकोटाचे आयोजन केले जाते. भाविकांना केलेल्या आवाहनाद्वारे दरवर्षी तब्बल ५०० हून अधिक पदार्थ गोळा होतात. यंदा भाविकांना कोणतेही आवाहन न करता अत्यंत साध्यापद्धतीने ट्रस्टने दीपोत्सव व अन्नकोट साजरा केला आहे. आरोग्यसंपन्न जगाकरीता गणरायाला आम्ही साकडे घातले आहे. लवकरात लवकर कोरोनाचे संकट दूर होऊन जनजीवन सुरळीत व प्रकाशमान व्हावे, अशी प्रार्थना आम्ही करीत आहोत.

पुणे- कात्रज देहूरोड मार्गावरील नवले पूल आणि परिसरात आजवर मोजता येणार नाही असे असंख्य विचित्र अपघात झाले असून सातत्याने सुरु असलेल्या अपघातांची मालिका थांबविण्यासाठी काही करावे असे मात्र कोणत्याही पोलीस, महापालिका वा राज्य शासनाच्या अधिकाऱ्याला अगर लोकप्रतिनिधी असलेल्या नगरसेवक, आमदार वा खासदाराला वाटेना ..त्यांना जाग येईना असे चित्र असताना आज पुन्हा अनेक गाड्या एकमेकंवर धडकून जीवघेणा अपघात झाल्याने पुन्हा भय इथले संपेना असे स्पष्ट झाले आहे.

मागील काही दिवसांपासून नवले पुलाजवळ होणाऱ्या अपघातांचे सत्र काही केल्या थांबता थांबेना. ब्रेक निकामी झालेल्या भरधाव ट्रकने तब्बल आठ वाहनांना उडवीत झालेल्या भीषण अपघातामध्ये दोघांचा जागीच मृत्यू झाला. तर आठजण जखमी असून चौघांची प्रकृती चिंताजनक आहे. ही घटना पुणे-बंगळुरू बाह्यवळणावरील नऱ्हे येथील नवले पुलाजवळ रविवारी सायंकाळी सव्वा सहा वाजता घडली. अपघातानंतर ट्रकने पेट घेतल्याने अग्निशामक दलाच्या जवानांनी ट्रकला लागलेली आग विझविली.प्रशांत गोरे (वय 32, रा. उस्मानाबाद) व राजेंद्र मुरलीधर गाढवे (वय 65, रा. आंबेगाव खुर्द) असे अपघातात मृत्यू झालेल्यांची नावे आहेत. तर अपघातात आठजण जखमी असून त्यापैकी चौघेजण गंभीर जखमी आहेत. प्रेमराज राणाराम बिष्णोई (वय 25, खेडजडगी, जोधपूर, राजस्थान) असे अटक केलेल्या ट्रकचालकाचे नाव आहे.बिष्णोई हा त्याच्या ताब्यातील 22 चाकी ट्रकमध्ये (आरजे.19, जीएस 4673) बंगळुरू येथून तब्बल 41 टन इतक्‍या वजनाचे लोखंड भरुन ते गुजरातमधील अहमदाबादला घेऊन जात होता. हा ट्रक रविवारी सायंकाळी सव्वा सहा वाजता कात्रज येथील नवीन बोगद्याजवळ आला, तेथून स्वामी नारायण मंदिराजवळ पोचल्यानंतर ट्रकचा ब्रेक निकामी झाला. त्यातच तीव्र उतार लागल्याने ट्रकने समोरुन जात असलेल्या पाच कार, एक रिक्षा व दोन दुचाकींना उडविले. हा अपघात इतका भीषण होता, की त्यामध्ये तीन कार व रिक्षाचा अक्षरशः चक्काचूर झाला.

प्रवाशांना घेऊन जाणारा रिक्षाला ट्रकने धडक दिल्याने रिक्षाचे नुकसान झाले. त्यामध्ये रिक्षाचालक राजेंद्र गाढवे यांच्यासह रिक्षातील प्रवासी जखमी झाले. तर दुचाकी ट्रकच्या चाकाखाली आल्याने दुचाकीस्वार प्रशांत गोरे हे देखील गंभीर जखमी झाले होते. तर अन्य आठ नागरिक या अपघातात जखमी झाले. सात ते आठ वाहनांना जोरदार धडक दिल्यानंतर ट्रकच्या डिझेलच्या टाकीने पेट घेतला. त्यानंतर काही अंतरावर पुलावरच ट्रक थांबला. या घटनेची माहिती मिळताच सिंहगड पोलिस ठाणे, वाहतूक शाखेचे पोलिस व स्थानिक नागरिकांनी घटनास्थळी धाव घेतली. त्यांनी जखमींना अपघातग्रस्त वाहनांमधून बाहेर काढत उपचारांसाठी रुग्णालयात पाठवून दिले. रुग्णालयात दाखल केल्यानंतर प्रशांत गोरे, राजेंद्र गाढवे यांचा मृत्यू झाल्याचे डॉक्‍टरांनी घोषित केले.

पुणे विभागातील 5 लाख 3 हजार 386 कोरोना बाधित रुग्ण बरे होऊन घरी

विभागात कोरोना बाधित 5 लाख 33 हजार 782 रुग्ण

–विभागीय आयुक्त सौरभ राव

       पुणे,दि.29 :- पुणे विभागातील 5 लाख 3 हजार 386 कोरोना बाधित रुग्ण बरे होऊन घरी गेले असून विभागात कोरोना बाधीत रुग्णांची संख्या 5 लाख 33 हजार 782 झाली आहे. तर ॲक्टीव रुग्ण संख्या 15  हजार 432 इतकी आहे. कोरोनाबाधीत एकुण 14 हजार 964 रुग्णांचा मृत्यू झाला असून मृत्यूचे प्रमाण 2.80 टक्के आहे. पुणे विभागामध्ये बऱ्या होणा-या रुग्णांचे प्रमाण 94.31 टक्के आहे, अशी माहिती विभागीय आयुक्त सौरभ राव यांनी दिली.

पुणे जिल्हा

            पुणे जिल्हयातील  कोरोना बाधीत एकूण 3 लाख 41 हजार 540 रुग्णांपैकी 3  लाख 21 हजार 855 रुग्ण बरे होवून घरी गेले आहेत. ॲक्टीव रुग्ण 11  हजार 397 आहे. कोरोनाबाधित एकूण 8 हजार 288  रुग्णांचा मृत्यू झाला आहे. मृत्यूचे प्रमाण  2.43 टक्के इतके आहे तर बरे  होणा-या रुग्णांचे प्रमाण  94.24 टक्के आहे.

सातारा जिल्हा

              सातारा जिल्हयातील कोरोना बाधीत एकूण 50 हजार 924 रुग्णांपैकी 48 हजार 292 रुग्ण बरे होवून घरी गेले आहेत. ॲक्टीव रुग्ण संख्या  922 आहे. कोरोनाबाधित एकूण 1  हजार 710 रुग्णांचा मृत्यू झाला आहे.

सोलापूर जिल्हा

              सोलापूर जिल्हयातील कोरोना बाधीत एकूण 45 हजार 572 रुग्णांपैकी 41 हजार 766 रुग्ण बरे होवून घरी गेले आहेत. ॲक्टीव रुग्ण संख्या 2  हजार 212 आहे. कोरोनाबाधित एकूण 1  हजार 594  रुग्णांचा मृत्यू झाला आहे. 

  सांगली जिल्हा

               सांगली  जिल्हयातील  कोरोना बाधीत एकूण 46  हजार 725 रुग्णांपैकी 44 हजार 562 रुग्ण बरे होवून घरी गेले आहेत. ॲक्टीव रुग्ण संख्या 467 आहे.  कोरोनाबाधित एकूण 1  हजार 696 रुग्णांचा मृत्यू झाला आहे

कोल्हापूर जिल्हा

            कोल्हापूर जिल्हयातील  कोरोना बाधीत एकूण 49 हजार 21 रुग्णांपैकी 46  हजार 911 रुग्ण  बरे होवून घरी गेले आहेत. ॲक्टीव रुग्ण संख्या  434 आहे. कोरोनाबाधित एकूण 1 हजार  676  रुग्णांचा मृत्यू झाला आहे.

कालच्या रुग्णसंख्येच्या तुलनेत आज झालेली वाढ

कालच्या बाधीत रुग्ण संख्येच्या तुलनेत पुणे विभागात बाधीत रुग्णांच्या संख्येमध्ये 1 हजार 460  ने वाढ झाली आहे. यामध्ये पुणे जिल्ह्यात 1 हजार 80 , सातारा जिल्ह्यात 169, सोलापूर जिल्ह्यात 171, सांगली जिल्ह्यात 21 तर कोल्हापूर जिल्ह्यात 19 अशी रुग्ण संख्येमध्ये वाढ झालेली आहे.

कालच्या रुग्णसंख्येमध्ये बऱ्या होणा–या रुग्णांचे प्रमाण – 

पुणे विभागामध्ये बऱ्या होणाऱ्या रुग्णांमध्ये एकूण 1 हजार 164 आहे. पुणे जिल्हयामध्ये 763, सातारा जिल्हयामध्ये 120, सोलापूर जिल्हयामध्ये 211, सांगली जिल्हयामध्ये 35 व कोल्हापूर जिल्हयामध्ये 35 रुग्णांचा समावेश आहे.

पुणे विभागातील सर्व्हेक्षण

आजपर्यत विभागामध्ये एकुण 28 लाख 38 हजार 538 नमून्यांचा तपासणी अहवाल प्राप्त झाला. प्राप्त अहवालांपैकी  5 लाख  33 हजार 782  नमून्यांचा अहवाल सकारात्मक (पॉझिटिव्ह) आहे.

( टिप :- दि.  28 नोव्हेंबर 2020 रोजी रात्री 9.00 वा. पर्यंतच्या आकडेवारीनुसार )

पुणे- काल महात्मा ज्योतिबा फुले यांच्या स्मृतिदिनानिमित्त भाजपाचे प्रदेशाध्यक्ष चंद्रकांतदादा पाटील यांनी त्यांच्या स्मृतीस अभिवादन करून जनतेला संबोधित केले. यावेळी त्यांनी महात्मा फुले आणि सावित्रीबाई फुले या दोन्ही महान व्यक्तिमत्वांनी जे मिशन सुरू केलं होतं, ते अद्यापही पूर्ण झालेलं नाही, असं चंद्रकांत पाटील म्हणाले. मात्र ते मिशन आगामी काळात आपण पूर्ण करू, अशी हमी त्यांनी दिली. महात्मा फुले यांनी दाखवलेली दिशा पूर्ण करण्याचा आपण संकल्प करू, हिच त्यांना खरी आदरांजली ठरेल, असे चंद्रकांत पाटील म्हणाले.

महात्मा फुले हे सदैव शेतकऱ्यांना न्याय देण्यासाठी आणि महिलांना शिक्षण देण्यासाठी झटले. मात्र स्वातंत्र्यानंतरही या दोन्ही विषयांबाबत आजही चांगली स्थिती नाही. त्यामुळे हे दोन्ही मिशन पूर्ण करण्याचा संकल्प भारतीय जनता पक्षाच्या पदाधिकाऱ्यांनी आणि कार्यकर्त्यांनी करावा, असे त्यांनी आवाहन केले. शेतकरी सुखी झाल्याशिवाय देश सुखी होणार नाही, हे महात्मा फुले यांचे धोरण होते आणि हेच धोरण कायम ठेवून आम्ही कार्य करू, असे चंद्रकांत पाटील यांनी नमूद केले.

यावेळी आमदार मुक्तताई टिळक, माधुरी ताई मिसाळ, ओबीसी मोर्चाचे प्रदेशाध्यक्ष योगेश टिळेकर, पुणे शहर संघटन सरचिटणीस राजेश पांडे, पुणे प्रभारी गणेश बिडकर, भाजपा पुणे शहर प्रवक्ते संदीप खर्डेकर यांच्या सह भाजपाचे पदाधिकारी कार्यकर्ते उपस्थित होते.

मेधा जोशी या महाराष्ट्राच्या सौभाग्यवतीच्या विजेत्या ; अनामिका ओव्हाळ द्वितीय तर गौरी पांडे तृतिय क्रमांक विजेत्या.

पुणे: आपले आरोग्य ही फक्त आपली संपत्तीच नसुन आरोग्यातच सौंदर्य ही दडलेले आहे ! म्हणुनच आपल्या स्वास्थ्यावर लक्ष देण्याची गरज आहे. कोरोनाच्या या संकटात “स्वास्थ्य” किती महत्त्वाचे आहे याची जाणीव प्रत्येक कुटुंबाला झालेली आहे. स्वास्थ आणि सौंदर्य जपण्याचा महाराष्ट्राच्या सौभाग्यवतींनी ‘संकल्प’ केला आहे. महाराष्ट्रातील प्रत्येक गृहिणीला तिची आवड जोपासण्यासाठी हक्काचं व्यासपीठ मिळावं, तसेच लॉकडाउन काळात पडद्यामागील अनेक तंत्रज्ञ आणि कलाकार यांच्या जगण्याला नवीन उमेद देण्यासाठी “महाराष्ट्राची सौभाग्यवती” स्पर्धेचे आयोजन करण्यात आले होते. यामध्ये पुण्याच्या मेधा जोशी प्रथम आल्या तर अनामिका ओव्हाळ द्वितीय आणि गौरी पांडे तृतिय क्रमांकाच्या विजेत्या झाल्या.

‘संकल्प’ मानवसंसाधन विकास संस्था प्रायोजित सह कुसमवत्सल्य फांउडेशनतर्फे स्पर्धेचे आयोजन करण्यात आले. या स्पर्धेत संपुर्ण महाराष्ट्रातील महिलांनी सहभाग घेतला होता. सुमारे २८ महिलांनी अंतिम फेरी पर्यंत धडक मारली. स्पर्धेची अंतिम फेरी महाबळेश्वर येथे आयोजित करण्यात आली होती. यावेळी महिला सक्षमीकरणासाठी अव्याहतपणे कार्यरत असणाऱ्या सामाजिक कार्यकर्त्या भारती चंगेडिया कार्यक्रमाच्या प्रमुख पाहुण्या होत्या, ‘संकल्प’ मानवसंसाधन विकास संस्थेच्या संचालिका डॉ. अपूर्वा अहिरराव, संशोधन आणि विकास प्रमुख शर्वरी डोंबे, कुसमवत्सल्य फांउडेशनच्या वैशाली पाटील, सहारा प्रोडक्शनचे डॉ. राजेंद्र भवाळकर उपस्थित होते.

कार्यक्रमाच्या प्रमुख पाहुण्या भारती चंगेडिया म्हणाल्या कि, डॉ. पी. एन. कदम यांच्या 30 वर्षांच्या सखोल संशोधन आणि प्रयोगाद्वारे “आहार आणि आरोग्य” या क्षेत्रात आपला वेगळा ठसा उमटविणाऱ्या ‘संकल्प™’ने लॉकडाऊनच्या 3 महिन्यात आपल्या संशोधनाचा वापर करुन “आरोग्य आणि आहार” क्षेत्रात मोलाची कामगिरी केली आहे. लॉकडाउन दरम्यान प्रत्येक घरातील स्त्रीला मोठ्या प्रमाणात जबाबदारी पार पाडावी लागली. या सर्व जबाबदारीतून थोडा विरंगुळा मिळण्याबरोबर स्वत:चे स्वास्थ आणि सौंदर्य जोपासण्याची गोडी लागली पाहिजे. या उद्देशाने संकल्पतर्फे नैसर्गिक संसाधनांचा वापर करुन स्त्रियांच्या स्वास्थ आणि सौंदर्य अबाधीत ठेवण्यासाठी तज्ञ डॉक्टर्सकडून रिसर्च करुन याबाबतील सौंदर्य प्रसाधने उपलब्ध केली आहेत. विशेषत: महिलावर्गाला कमीत कमी गुंतवणुकीत जास्तीत जास्त लाभ मिळवून देणारी आणि ज्यांची ज्ञान घेण्याची, कष्ट करण्याची तयारी आहे अशा प्रत्येकासाठी संकल्पने एक सक्षम योजना तयार केली आहे. त्यामुळे गृहिणींना आपल्या स्थास्थ, सौंदर्यांबरोबरच व्यवसायकरुन एक परिपुर्ण आत्मनिर्भर स्त्री बनण्याची संधी ‘संकल्प’च्या वतीने देण्यात आली आहे.

 ‘संकल्प’च्या सौंदर्य प्रसाधनांचे अनावरण

स्त्रियांचे स्वास्थ आणि सौंदर्य अबाधित राहण्याकरिता ‘संकल्प’तर्फे तज्ञ डॉक्टरांच्या मार्गदर्शनाखाली नैसर्गिक घटकांचा वापर करून सौंदर्य प्रसाधने तयार करण्यात आली आहे. रसायन विरहीत, त्वचेसाठी आवश्यक अशा सर्व नैसर्गिक घटकांचा वापर या प्रसाधनांमध्ये करण्यात आला आहे. यामध्ये फेशिअल किट, फेस वॉश, शॅम्पू, ग्लिसरिन सोप, मॉइश्यूचरायझर, ऑल पर्पज क्रिम यांचा समावेश आहे. याच प्रसाधनांचे अनावरण यावेळी मान्यवरांच्या हस्ते करण्यात आले.