पुणे- आज बाणेर येथील ॲार्किड टॅावर्स सोसायटी मध्ये MNGL गॅस बंद पाईप लाईनद्वारे पुरवठा करण्यास सुरुवात झाली. यावेळी आयोजित करण्यात आलेल्या कार्यक्रमात या योजनेचे उदघाटन खासदार गिरीश बापट यांच्या हस्ते करण्यात आले . आजपर्यंत प्रभागातील सुमारे १०८ सोसायटींमधील सुमारे ७००० कुटुंबांना गॅस कनेक्शन देण्यात आले असून येत्या दोन महिन्यात जवळपास ७० सोसायटींमध्ये हि सुविधा उपलब्ध होईल. यावेळी नगरसेवक अमोल बालवडकर, नगरसेविका स्वप्नाली सायकर, नगरसेविका ज्योती कळमकर, स्विकृत नगरसेवक सचिन पाषाणकर, भाजपा शहर उपाध्यक्ष गणेश कळमकर, प्रल्हाद सायकर, राहुल कोकाटे, MNGL चे एम.डी.सुप्रियो हलदार, संतोष सोनटक्के, चेअरमन सुबोध सायखेडकर, सेक्रेटरी आरती राव, गोविंद सुर्यवंशी, प्रविण कुलंगे, अमोद वाणी, लोकेंद्र सिंग, पलक शहा इतर पदाधिकारी उपस्थित होते.

पुणे विभागातील 5 लाख 25 हजार 749 कोरोना बाधित रुग्ण बरे होऊन घरी
विभागात कोरोना बाधित 5 लाख 52 हजार 747 रुग्ण
-विभागीय आयुक्त सौरभ राव
पुणे :- पुणे विभागातील 5 लाख 25 हजार 749 कोरोना बाधित रुग्ण बरे होऊन घरी गेले असून विभागात कोरोना बाधीत रुग्णांची संख्या 5 लाख 52 हजार 747 झाली आहे. तर ॲक्टीव रुग्ण संख्या 11 हजार 584 इतकी आहे. कोरोनाबाधीत एकुण 15 हजार 414 रुग्णांचा मृत्यू झाला असून मृत्यूचे प्रमाण 2.79 टक्के आहे. पुणे विभागामध्ये बऱ्या होणा-या रुग्णांचे प्रमाण 95.12 टक्के आहे, अशी माहिती विभागीय आयुक्त सौरभ राव यांनी दिली.
पुणे जिल्हा
पुणे जिल्हयातील कोरोना बाधीत एकूण 3 लाख 54 हजार 624 रुग्णांपैकी 3 लाख 37 हजार 184 रुग्ण बरे होवून घरी गेले आहेत. ॲक्टीव रुग्ण 8 हजार 865 आहे. कोरोनाबाधित एकूण 8 हजार 575 रुग्णांचा मृत्यू झाला आहे. मृत्यूचे प्रमाण 2.42 टक्के इतके आहे तर बरे होणा-या रुग्णांचे प्रमाण 95.08 टक्के आहे.
सातारा जिल्हा
सातारा जिल्हयातील कोरोना बाधीत एकूण 53 हजार 421 रुग्णांपैकी 50 हजार 641 रुग्ण बरे होवून घरी गेले आहेत. ॲक्टीव रुग्ण संख्या 1 हजार 36 आहे. कोरोनाबाधित एकूण 1 हजार 744 रुग्णांचा मृत्यू झाला आहे.
सोलापूर जिल्हा
सोलापूर जिल्हयातील कोरोना बाधीत एकूण 48 हजार 7 रुग्णांपैकी 45 हजार 76 रुग्ण बरे होवून घरी गेले आहेत. ॲक्टीव रुग्ण संख्या 1 हजार 257 आहे. कोरोनाबाधित एकूण 1 हजार 674 रुग्णांचा मृत्यू झाला आहे.
सांगली जिल्हा
सांगली जिल्हयातील कोरोना बाधीत एकूण 47 हजार 341 रुग्णांपैकी 45 हजार 316 रुग्ण बरे होवून घरी गेले आहेत. ॲक्टीव रुग्ण संख्या 300 आहे. कोरोनाबाधित एकूण 1 हजार 725 रुग्णांचा मृत्यू झाला आहे.
कोल्हापूर जिल्हा
कोल्हापूर जिल्हयातील कोरोना बाधीत एकूण 49 हजार 354 रुग्णांपैकी 47 हजार 532 रुग्ण बरे होवून घरी गेले आहेत. ॲक्टीव रुग्ण संख्या 126 आहे. कोरोनाबाधित एकूण 1 हजार 696 रुग्णांचा मृत्यू झाला आहे.
कालच्या रुग्णसंख्येच्या तुलनेत आज झालेली वाढ
कालच्या बाधीत रुग्ण संख्येच्या तुलनेत पुणे विभागात बाधीत रुग्णांच्या संख्येमध्ये 986 ने वाढ झाली आहे. यामध्ये पुणे जिल्ह्यात 740, सातारा जिल्ह्यात 89, सोलापूर जिल्ह्यात 99, सांगली जिल्ह्यात 38 तर कोल्हापूर जिल्ह्यात 20 अशी रुग्ण संख्येमध्ये वाढ झालेली आहे.
कालच्या रुग्णसंख्येमध्ये बऱ्या होणा-या रुग्णांचे प्रमाण –
पुणे विभागामध्ये बऱ्या होणाऱ्या एकूण 893 रुग्णांमध्ये पुणे जिल्हयात 627, सातारा जिल्हयामध्ये 100, सोलापूर जिल्हयामध्ये 139, सांगली जिल्हयामध्ये 27 व कोल्हापूर जिल्हयामध्ये ० रुग्णांचा समावेश आहे.
पुणे विभागातील सर्व्हेक्षण
आजपर्यत विभागामध्ये एकुण 31 लाख 30 हजार 493 नमून्यांचा तपासणी अहवाल प्राप्त झाला. प्राप्त अहवालांपैकी 5 लाख 52 हजार 747 नमून्यांचा अहवाल सकारात्मक (पॉझिटिव्ह) आहे.
( टिप :- दि. 17 डिसेंबर 2020 रोजी रात्री 9.00 वा. पर्यंतच्या आकडेवारीनुसार )

पुणे : पालिकेच्या हद्दीत २०१७ साली समावेश झालेल्या ११ गावांसाठी आधी ९ हजार कोटी द्या. मगच उर्वरित २३ गावांचा टप्प्याटप्प्याने पालिकेच्या हद्दीत समावेश करा अशी मागणी महापौर मुरलीधर मोहोळ यांनी केली आहे. गावे समाविष्ट करून घेण्यास आमचा विरोध नाही, पण आधीच्याच गावांमधील नागरी समस्या संपलेल्या नसल्याचे महापौर म्हणाले.

पालिकेच्या हद्दीत २३ गावे समाविस्ट करण्याच्या हालचाली राज्य शासन स्तरावर सुरू आहेत. याविषयी महापौर म्हणाले, पालिकेच्या हद्दीत २०१७ साली समावेश करण्यात आलेल्या ११ गावांमध्ये रस्ते, पाणी, घनकचरा व सांडपाणी व्यवस्थापनाच्या पायाभूत सुविधा नाहीत. तेथे टँकरने पाणी पुरवठा सुरू आहे. रस्त्यांची दुरावस्था आहे. त्यातच नव्याने २३ गावांचा समावेश झाल्यास आणखी अडचणी वाढतील. त्यामुळे सरसकट समावेश न करता टप्प्याटप्प्याने करावा.

११ गावांचा विकास आराखडा तयार करून पायाभूत विकास करण्यासाठी ९ हजार कोटी रुपये देण्याची मागणी केली. या गावांच्या पायाभूत सुविधा उभ्या करताना पालिकेवर आर्थिक ताण येत असल्याचे मोहोळ म्हणाले. त्यामुळे नवीन गावे समाविष्ट करताना राज्य सरकारने निधी द्यावा अशी आग्रही मागणी मोहोळ यांनी केली.

उपमुख्यमंत्री अजित पवार यांच्या पुढाकारातून गावे समाविष्ट करण्याचा निर्णय…

पुणे महापालिका हद्दीत 23 गावे समाविष्ट करण्यासाठी देण्यात आलेल्या प्रस्तावाला नगरविकासमंत्री एकनाथ शिंदे यांनी मंजुरी दिली आहे. त्यामुळे 23 गावं पुणे महापालिकेत समाविष्ट होण्याचा मार्ग आता मोकळा झाला आहे. यासंदर्भात अध्यादेश काढण्याची प्रक्रिया काही दिवसांत पूर्ण होणार आहे. त्यानंतर ही गावे महापालिकेत समाविष्ट होतील, अशी माहिती आमदार चेतन तुपे यांनी दिली आहे. उपमुख्यमंत्री अजित पवार यांच्या पुढाकारातून ही गावे महापालिकेत समाविष्ट करण्याचा निर्णय झाला आहे.

पुणे- कोरोना ने मृत्युमुखी पडलेल्यांची स्मृती जपून त्यापासून आगामी वाटचालीस प्रेरणा मिळावी या हेतूने पुण्यात ‘कोरोना स्मारक ‘ उभारावे असा प्रस्ताव कॉंग्रेसचे गटनेते आबा बागुल यांनी महापालिकेच्या मुख्य सभेपुढे ठेवला आहे. मात्र दुर्दैवाने महापालिकेच्या मुख्य सभा कोरोना आल्या पासून आजतागायत चालविल्या गेलेल्या नाहीत . सातत्याने ओंन लाईन झालेल्या कोणत्याही मुख्य सभेत काहीही कामकाज होऊ शकलेले नाही

दरम्यान या संदर्भात आबा बागुल यांनी म्हटले आहे कि,’ गेल्या सुमारे ०९ (नऊ) महिन्यापासून जग, देश, महाराष्ट्र आणि पुण्यातही कोरोना विषाणूचा प्रादुर्भाव प्रचंड मोठ्या प्रमाणात वाढला त्यात लाखो नागरिक बळी पडले आहेत. ही अत्यंत दुखद व वेदना देणारी बाब आहे. पुणे शहरातही कोरोन विषाणूचा प्रादुर्भाव होऊन हजारो पुणेकर मृत्युमुखी पडले. या सर्वाना चांगली वैद्यकीय सेवा द्यावी. या कोरोना विषाणूवर उपचार व्हावे. यासाठी पुणे महानगरपालिकेच्यावतीने त्यांचे डॉक्टर, नर्सेस, स्टाफ यांनी शर्तीचे प्रयत्न केले तसेच खाजगी हॉस्पिटल मधील व राज्यसरकारच्या हॉस्पिटलमधील डॉक्टर, नर्सेस, स्टाफ व प्रशासनाने देखील खूप प्रयत्न केले, त्यामुळे अनेक जीव वाचले हे देखील सत्य आहे.
मात्र जे रुग्ण कोरोना व्याधीमुळे त्रस्त होऊन त्या व्याधीवर मात करू शकले नाहीत, त्यांना दुर्दैवाने मृत्युला सामोरे जावे लागले हि दुर्दैवी बाब आहे. आता जसा जसा काळ जाईल तसा तसा कोरोना विषाणूचा प्रादुर्भाव देखील आटोक्यात येण्याची अपेक्षा आहे. त्याच्यावर औषध आल्यानंतर मृत्युमुखी पडणाऱ्यांची संख्या देखील कमी येईल अशी आशा आहे. कोरोना कायमचा नष्ट होईल असे नसले तरी त्याचा प्रभाव अगदी एक – दोन वर्षात खूपच कमी होईल असा तज्ञांचा अंदाज आहे. या पार्श्वभूमीवरती युद्धात धारातीर्थ पडलेल्या सैनिकांचे जसे आपण स्मारक तयार करतो व श्रद्धांजली वाहतो त्याप्रमाणे कोरोना विषाणूच्या प्रादुर्भावात मृत्युमुखी पडलेल्या पुणेकरांची आठवण राहावी व त्यांना श्रद्धांजली वाहता यावी, यासाठी स्मारक उभारण्यात यावे. पुण्यात पहिला कोरोना रुग्ण ज्या दिवशी सापडला तो दिवस पुण्याच्या दृष्टीने ‘कोरोना दिवस’ म्हणून पाळला तर औचित्यपूर्ण होईल असे आम्हास वाटते.
हे स्मारक केल्यास त्यापासून प्रेरणा घेऊन पुण्याची सार्वजनिक आरोग्यसेवा व संसर्गजन्य रोगांना तोंड देण्यासाठी सक्षम यंत्रणा कशी उभी करता येईल. यासाठी कश्या पद्धतीने योजना अमलात आणण्यात येईल. त्याचाही संकल्प वेळोवेळी करता येईल. याविषयी मुख्य सभेने मान्यता द्यावी.
असा ठराव मुख्य सभेस .आबा बागुल व सभासद रफिक शेख यांनी दिला आहे.

पुणे-

केंद्र सरकारच्या वतीने अटल मिशन अंतर्गत देशातील सर्व सरकारी शाळांसाठी मोठी मदत मिळते. याचा सविस्तर अभ्यास करुन आपापल्या प्रभागातील मनपा शाळांचे अत्याधुनिकीकरण करावे, अशा सूचना भाजपा प्रदेशाध्यक्ष आ. चंद्रकांतदादा पाटील यांनी केल्या. कोथरूड मतदारसंघातील एरंडवणे मधील पुणे मनपा संचालित श्रीमती अनुसयाबाई खिलारे माध्यमिक विद्यालयातील नव्याने सुरू करण्यात आलेल्या प्रयोगशाळेचे लोकार्पण श्री. पाटील यांच्या हस्ते करण्यात आले. यावेळी ते बोलत होते.

या कार्यक्रमावेळी पुणे मनपा महिला व बालकल्याण समितीच्या सभापती माधुरी सहस्रबुद्धे, नगरसेवक जयंत भावे, दीपक पोटे, नगरसेविका मंजूश्री खर्डेकर, प्रभाग समितीच्या स्विकृत सदस्या मिताली सावळेकर, कोथरूड मंडल भाजपा अध्यक्ष पुनित जोशी, भाजप सरचिटणीस गिरीश भेलके, कोथरुड मंडल महिला मोर्चा अध्यक्षा हर्षदा फरांदे, पुणे शहर भाजपा प्रवक्ता संदीप खर्डेकर, प्रभाग अध्यक्ष राजेंद्र येडे, सरचिटणीस प्राची बागटे, बाळासाहेब धानवे, मंडल सरचिटणीस अनुराधा एडके, उपाध्यक्ष राज तांबोळी यांच्यासह शाळेतल्या मुख्याध्यापिका सौ. नाईक आणि शाळेचे शिक्षक उपस्थित होते.

श्री. पाटील म्हणाले की, “शाळा, क्रीडांगण, प्रयोगशाळा यांच्या माध्यमातून मुलांची सृजनशीलता वाढते. प्रयोगशाळा यातील अतिशय महत्त्वाचे माध्यम आहे. त्यामुळे केंद्र सरकारच्या अटल मिशनचा सर्व नगरसेवकांनी सखोल अभ्यास करुन, आपापल्या प्रभागातील शाळांचे अत्याधुनिकीकरण करावे.”

ते पुढे म्हणाले की, “केवळ महापालिका आणि जिल्हा परिषदेच्या शाळा चांगल्या नाहीत, त्यामुळे अनेकजण आपल्या पाल्याचा प्रवेश खासगी शाळांमध्ये करतात. हे चित्र बदलण्यासाठी आपण आपल्या सरकारच्या काळात अनेक महत्त्वपूर्ण निर्णय घेतले. यामुळे जिल्हा परिषदेच्या शाळांचा पट सव्वा लाखाने वाढवला. त्याचबरोबर राज्यातील सर्व जिल्हा परिषदेच्या शाळांचे स्वरुप बदललं. असेच अनेक प्रयोग महानगरपालिका शाळांसाठी करावे लागतील. यासाठी शिक्षकांना प्रोत्साहन दिले पाहिजे.” असेही ते यावेळी म्हणाले.

दरम्यान, नगरसेविका आणि पुणे मनपा महिला व बालकल्याण समितीच्या सभापती माधुरी सहस्रबुद्धे यांच्या पुढाकारातून एरंडवणे येथील सर्वतीर्थ सुधीर फडके भूयारी मार्गाच्या नुतनीकरण कामाचे लोकार्पण श्री‌. पाटील यांनी केले.

पुणे- कोरोनाने मृत पावलेल्या महापालिकेच्या सेवकांच्या वारसांना केंद्र सरकारकडून ५० लाख आणि महापालिकेकडून ५० लाख रुपयांची मदत जाहीर करून प्रत्यक्षात अशी कोणतीही मदत न केल्याने हि घोषणा फसवी ठरली आहे म्हणून असे सुरक्षा कवच योजना जाहिर करणा-यांवर फसवणूकीचा गुन्हा दाखल करावा अशी मागणी महापालिकेतील विरोधी पक्षनेत्या दिपाली धुमाळ यांनी महापालिका आयुक्तांकडे केली आहे.

या संदर्भात महापालिका आयुक्तांना धुमाळ यांनी दिलेल्या पत्रात म्हटले आहे कि , मार्च २०२० पासून शहरात कोरोनाची परिस्थिती अत्यंत भितीदायक होती. शासनाकडून माहे एप्रिल व माहे मे २०२० मध्ये संचारबंदी लागू करण्यात आली होती. यावेळी महापालिकेचे सेवक कोरोना प्रतिबंधात्मक उपाय योजना अंतर्गत नेमणूकीने कोविड सेंटर्स, विलगीकरण कक्ष व इतर कामे करत होते. तसेच शहरातील कचरा उलचणे व विविध समस्यांचे काम देखील महापालिकेच्या सेवकांकडून करण्यात येत होते. कोरोना प्रतिबंधात्मक उपाय योजना अंतर्गत कामे करताना कोरोनाने आजपर्यंत ४६ महापालिकेच्या सेवकांचा मृत्यु झालेला आहे. अशा मृत पावलेल्या कुटुंबियांवर अचानक हा एक प्रकारचा अपघात असल्याने सत्ताधारी पक्षाकडून सुरक्षा कवच योजनेची घोषणा करण्यात आली. यामध्ये केंद्र शासनाकडून ५० लाखाची आर्थिक मदत व मनपाकडून ५० लाखाची आर्थिक मदत देण्यात येणार होती. तसेच कोरोनाने मृत पावलेल्या सेवकांच्या वारसाने नोकरीची मागणी केल्यास त्यास २५ लाखाची मदत देण्यात येणार असे घोषित केले होते. या घोषणांची अंमलबजावणी अदयापपर्यंत करण्यात आली नाही. सदर विषयी मुख्य सभेपुढे विषयपत्र ठेवण्यात आले आहे, त्यास मान्यता नाही असे कारण प्रशासनाकडून सांगण्यात येते. प्रशासनाकडून तातडीच्या कामासाठी महाराष्ट्र महापालिका अधिनियम कलम ६७ (३) (क) अन्वये कार्यवाही करण्यात आली, अशा कामांना कायदयातून पळवाट काढण्यात प्रशासन व सत्ताधारी आग्रही दिसतात. परंतू कोरोनाने मृत पावलेल्या महापालिकेच्या सेवकांच्या वारसांना लाभ देताना कायदा दाखविला जातो, यावेळी मुख्य सभा मान्यता देईल या भरवश्यावर कार्यवाही केली जात नाही, ही बाब खेदाने नमूद करत आहोत.
पुणे महापालिकेच्या कोरोनाने मृत पावलेल्या सेवकांना वेळेत मदत न देणे हा त्यांच्या कुटुंबियांवर अन्याय असून ही त्यांची फसवणूक आहे. आम्ही सदर प्रकरणी वारंवार पत्रव्यवहार करत आहोत, परंतू प्रशासनाकडून याची दखल घेतली जात नाही, ही दुर्देवी बाब आहे. एक प्रकारे सत्ताधारी व प्रशासन कोरोनाने मृत पावलेल्या सेवकांच्या कुटुंबियांची फसवणूक करत असल्याने मनपा सेवकांसाठी सुरक्षा कवच योजना जाहिर करणा-यांवर फसवणूकीचा गुन्हा दाखल करण्यात यावा.

पुणे, दि. १८ डिसेंबर: माय अर्थ फाउंडेशन आणि सहयोगी संस्थांच्या मार्फत जागतिक युवा दिनानिमित्त माझी वसुंधरा अभियानांतर्गत राज्यस्तरीय पर्यावरण शॉर्टफिल्म फेस्टिव्हलचे पुण्यात आयोजन करण्यात आले आहे. स्वच्छता, जैवविविधता, कचरा विलगीकरण, अर्बन फॉरेस्ट, नदी पुनरुज्जीवन अशा विविध विषयांवरील लघुपटांचा या महोत्सवात समावेश असेल. 11 आणि 12 जानेवारी रोजी पुण्यातील स्व. बाळासाहेब ठाकरे कलादालन, सारसबागजवळ पुणे येथे आयोजित करण्यात आला असल्याची माहिती माय अर्थ फाउंडेशनचे अध्यक्ष अनंत घरत यांनी पत्रकार परिषदेत दिली. हे फेस्टिवल माय अर्थ फौंडेशन,सस्टेनाबिलीटी इनिशीएटीव्हज, एन्व्हार्मेंट क्ल्वब ऑफ इंडीया व ध्यास प्रतिष्ठान यांच्या संयुक्त विद्यमाने आयोजित केले आहे.

यावेळी एन्व्हार्मेंट क्ल्वब ऑफ इंडीयाचे ललित राठी, सस्टेनेबल इनिशिएटिव्हचे अमोल उंबरजे, ध्यास प्रतिष्ठानचे सोमनाथ पाटील यावेळी पत्रकार परिषदेत उपस्थित होते.

अनंत घरत म्हणाले कि, हवामानातील बदलामुळे अनियमीत पाऊस, निसर्गसारखी वादळे अशी संकटे निर्माण झालेली आहेत. त्यामुळे पर्यावरण रक्षणाशिवाय दुसरा पर्याय नाही म्हणूनच सर्वांच्या एकत्रित सहभागातून माझी वसुंधरा अभियान प्रभावीपणे राबवण्याचे आवाहन राज्याचे पर्यावरण मंत्री आदित्य ठाकरे यांनी केले होते, या आवाहनाला प्रतिसाद म्हणून या अभियानाला प्रबोधनात्मक जनजागृतीसाठी पर्यावरण विषयावरिल लघूपट महोत्सवाचे आयोजन करण्यात आले आहे. राज्यातील जास्तीत जास्त युवकांनी या लघुपट महोत्सवात सहभाग नोंदवावा असे आवाहन अनंत घरत यांनी केले आहे.

राज्यस्तरीय पुणे पर्यावरण शॉर्टफिल्म फेस्टिव्हलमध्ये सहभागी होण्यासाठी 5 जानेवारीपर्यंत myearththree@gmail.com यावर मेल करावा किंवा 9561792055 यावर संपर्क साधण्याचे आवाहन सोमनाथ पाटील यांनी केले.

महाराष्ट्रातील जास्तीत जास्त पर्यावरणप्रेमी व संस्थांनी या उपक्रमात सहभाग नोंदवावा आणि हे अभियान प्रभावीपणे राबविण्यात योगदान देण्याचे आवाहन सस्टेनेबल इनिशिएटिव्हचे अमोल उंबरजे यांनी केले.

कचरा व्यवस्थापन आणि स्वच्छता हा विषयावर जास्तीत जास्त प्रबोधनात्मक फिल्म्स व्हाव्यात असे मत ललित राठी यांनी व्यक्त केले.

पुणे- तळजाई टेकडी येथे राष्ट्रवादी चे नेते खासदार शरद पवार यांच्या 80 व्या वाढदिवसानिमित्त 80 देशी रोपे लागवड उपक्रम खासदार सौ.वंदना चव्हाण यांच्या उपस्थितीत पार पडला. यावेळी वृक्ष मित्रांचा सन्मान खा.चव्हाण यांच्या हस्ते करण्यात आला . शहर राष्ट्रवादी अर्बन सेलचे समन्वयक नितीन कदम यांनी या कार्यक्रमाचे आयोजन केले होते.
या वेळी खा. चव्हाण यांनी पर्यावरणाचे संतुलित कसे राखले पाहिजे याविषयी मार्गदर्शन केले.पुण्यातील तळजाई टेकडी, हनुमान टेकडी, वेताळ टेकडी, शाहू कॉलेज टेकडी या परिसरामध्ये वृक्ष लागवडीस शरद पवार हे मुख्यमंत्री व संरक्षण मंत्री असताना चालना दिली होती याची आठवणही त्यांनी करून दिली. तसेच झाडे रुजली तरचं माणसाचे जगणं फुलेले हाच ध्यास ठेऊन प्रत्येक व्यक्तीने रोपे लागवडीस हातभार लावावा तसेच या सर्व रोपांची जपणूक करून त्यांची विशेष काळजी घेण्याची हमी ही घेण्यात आली.येणाऱ्या काळात प्रत्येकाने एक तरी रोप लावून त्यांचे संवर्धन करून पर्यावरण संतुलित राखण्यासाठी प्रयत्न केले पाहिजेत.कोरोना काळामध्ये ज्यांचा घरामध्ये मृत्यू झाला त्यांच्या स्मृतिप्रीत्यर्थ जवळच्या नातेवाईकांकडून एक वृक्ष लावण्यात आले. याशिवाय आलेल्या प्रत्येकाने एक वृक्ष लावले व अर्बन सेल च्या वतीने त्यांना वृक्षमित्र” म्हणून खासदार वंदना चव्हाण यांच्या हस्ते सन्मानपत्र देण्यात आले.
शहरी प्रश्नांसाठी राष्ट्रवादी काँग्रेस पक्षाच्या वतीने अर्बन सेलची निर्मिती करण्यात आली असून येणाऱ्या काळामध्ये शहरी प्रश्नांवर प्रभावीपणे काम करणार असल्याचे पुणे शहर राष्ट्रवादी अर्बन सेलचे समन्वयक नितीन कदम यांनी आपल्या प्रास्ताविकामध्ये सांगितले.
या उपक्रमास राष्ट्रवादी काँग्रेस पक्षाचे आजी-माजी नगरसेवक, पदाधिकारी व कार्यकर्ते यांच्यासह विरोधी पक्षनेत्या दीपाली ताई धुमाळ,अश्विनी कदम (नगरसेविका), डाॅ.सुनील जगताप,विजय बापू टाकले,संतोष नांगरे, इकबाल भाई शेख, समीर पवार,शिल्पा भोसले,राजाभाऊ राजपूत, स्वाती दिवान,राजेश परदेशी,दिपक रासकर, वसंत बारटक्के,विजय गुजर,दीपक भाई शहा,रमेश आवळे,शंकरराव शहाळे, डॉ.शरद कांबळे, संजय शिंदे, दिगंबर कांबळे, हरिभाऊ धुमाळ, स्वागत शेंडगे,नाना चौधरी,सत्यजित जगदाळे,डॉ.सुहास शितोळे,ज्योतिबा उबाळे,डॉ. सुनिता काळे, माऊली कराळे,सुयोग पाटोळे, नानासाहेब ननावरे,चौरे काका इत्यादी मोठ्या संख्येने उपस्थित होते.