पुणे : लेखक, प्रकाशक यांच्यासह ग्रंथालयांचा उत्तुंग सांस्कृतिक वारसा महापालिकेची सिटी लायब्ररी जपेल, असा विश्वास आमदार सिद्धार्थ शिरोळे यांनी व्यक्त केला.

शहराच्या मध्यवर्ती भागात असलेल्या घोले रस्त्यावर पुणे महापालिकेमार्फत राज्यातील पहिली सर्वात मोठी ‘सिटी लायब्ररी’ होणार आहे. या ‘सिटी लायब्ररी’ च्या प्रेझेंटेशनची पाहणी आमदार सिद्धार्थ शिरोळे यांनी केली.

स्वातंत्र्योत्तर काळात स्थापन झालेल्या तत्कालीन पुणे विद्यापीठातील जयकर ग्रंथालयानंतर पुण्याची ग्रंथालय परंपरा पुढे नेण्याचे काम करणारी राज्यातील पहिली ‘सिटी लायब्ररी’ घोले रस्त्यावर साकारत आहे. ५० हजारांहून अधिक ग्रंथसंपदा असणारे हे ग्रंथालय शहरातील मोठ्या सार्वजनिक ग्रंथालयांपैकी एक असेल. स्थानिक नागरिक, अभ्यासक, स्पर्धा परीक्षांची तयारी करणारे विद्यार्थी आदींसाठी महापालिकेचे हे सुसज्ज ग्रंथालय उपयुक्त ठरणार आहे.

शहराच्या मध्यवर्ती भागात असलेल्या घोले रस्त्यावर पुणे महापालिकेचे ‘मुद्रणमहर्षी मामाराव दाते मुद्रणालय’ आणि कोठी आहे. त्याभोवती महापौर निवास, ‘पं. जवाहरलाल नेहरू सांस्कृतिक भवन’, ‘राजा रवी वर्मा आर्ट गॅलरी’, क्षेत्रीय कार्यालय अशा वास्तू आहेत. या जागेचा पूर्ण क्षमतेने वापर होण्यासाठी एकत्रितपणे विकास करण्याचा प्रस्ताव महापालिकेने गेल्या अर्थसंकल्पादरम्यान मांडला होता. त्यातील मोडकळीस आलेल्या ‘मुद्रणमहर्षी मामाराव दाते मुद्रणालया’चा पुनर्विकास करून तेथील सुमारे ३५ हजार चौरस फूट जागेवर ‘सिटी लायब्ररी’ची उभारणी केली जाणार आहे.

नागरी सेवा परीक्षा, बॅंकिंग परीक्षा, लोकसेवा आयोग व अन्य स्पर्धा परीक्षांचा अभ्यास करण्यासाठी दरवर्षी हजारो विद्यार्थी पुण्यात येत असतात. या विद्यार्थ्यांसाठी ग्रंथालयात संदर्भसाहित्य उपलब्ध करून दिले जाणार आहे. तळमजला अधिक तीन मजले अशी रचना असलेल्या या इमारतीमध्ये सुरुवातीला एकाच वेळी किमान ४०० विद्यार्थ्यांना अभ्यास करता येणार आहे. भविष्यात ही संख्या आणखी वाढविण्याची तरतूदही इमारतीच्या आराखड्यात करून ठेवली आहे. येथे एकूण ५० हजार पुस्तके व नियतकालिके उपलब्ध असतील. ४० संगणक असलेली डिजिटल लायब्ररी हे या ‘सिटी लायब्ररी’चे वैशिष्ट्य असणार आहे.
‘मुद्रणमहर्षी मामाराव दाते मुद्रणालयाचे १५ जानेवारी पासून स्थलांतरीत करण्याची प्रक्रिया सुरु होईल व लवकरच या सिटी लायब्ररी चा भूमिपूजन सोहळा पार पडणार आहे.

”लेखक आणि प्रकाशक यांच्यासह ग्रंथालयांच्या रूपात पुण्याला उत्तुंग सांस्कृतिक वारसा लाभलेला आहे. अशा या शहराचे आपले स्वतःचे भव्य ग्रंथालय असावे, या हेतूनेच ‘सिटी लायब्ररी’ विकसित होते आहे. हे ग्रंथालय पुण्याच्या शिरपेचातील मानाचा तुरा ठरेल.” असा विश्वास आमदार शिरोळे यांनी व्यक्त केला.

यावेळी नगरसेविका ज्योत्स्ना एकबोटे, नगरसेविका निलीमा खाडे, सुनील पांडे,रवींद्र साळेगावकर, आनंद छाजेड, जय जोशी तसेच पुणे मनपाचे अधिकारी उपस्थित होते.

पुणे- कोंढव्यात एका उच्चभ्रु सोसायटीत चालणाऱ्या एका अवैध क्लबवर अखेर पोलिसांनी रेड मारली आणि येथून पोकर व विदेशी चलनासह विदेशी दारु मोठ्या प्रमाणावर हस्तगत केला आहे. सामाजिक सुरक्षा विभाग, अंमली पदार्थ विरोधी पथक व गुन्हे शाखा यांनी ही कारवाई केली .कोंढव्यात मोठ्या प्रमाणावर अवैध धंदे सर्रास सुरू असल्यामुळे यापुढे देखील हद्दीत मोठ्या कारवाया होणार असल्याबाबत पोलीस सांगत आहेत .

याबाबत अधिक माहिती अशी की, कोंढव्यातील क्लाऊड नाईन सोसायटीतील सैनिक विहार येथील बंगला नं.१६ येथे आरोपी जितेन जगदिप सिंग हा अवैध विदेशी दारु, जुगाराचे साहित्य व परकीय चलने बाळगत असल्याबाबत पुणे पोलिसांना माहिती मिळाली होती. मिळालेल्या माहितीच्या आधारावर सामाजिक सुरक्षा विभाग वरिष्ठ पो.निरीक्षक शिल्पा चव्हाण, पो.नि.विनायक गायकवाड अंमली पदार्थ विरोधी पथक-१ व गुन्हे शाखेकडील अधिकारी यांनी सदर ठिकाणी छापा टाकला असता लाखो रुपयांच्या विदेशी दारूच्या बाटल्या, लाखो रुपयांचे पोकर जुगाराचे साहित्य व रोख रक्कम जवळपास ४८ लाख रुपये तसेच परकीय चलन ऑस्ट्रेलियन डॉलर व अमेरिकन डॉलर जवळपास ८ लाख रुपये असा एकूण ५८ लाख रुपयांचा मुद्देमाल जप्त करण्यात आला. याबाबत कोंढवा पोलिस स्टेशन येथे गुन्हा नोंद करण्यात आला आहे.

गोपीनाथरावांच्या जयंती निमित्त मनपा शाळेतील विद्यार्थ्यांची आरोग्य व नेत्रतपासणी मोहीम – सौ. मंजुश्री खर्डेकर

पुणे-वंचित आणि बहुजनांसाठी कै.गोपीनाथराव मुंडे यांचे कार्य अविस्मरणीय असल्याचे मत भाजपा चे संघटन सरचिटणीस राजेश पांडे यांनी व्यक्त केले. गोपीनाथरावांनी भारतीय जनता पक्ष हा सामान्यांपर्यंत नेला आणि आज भाजपा सर्वत्र सत्तेवर आहे, पक्षाला स्वर्णिम दिवस बघायला मिळत आहेत त्यामागे मुंडे साहेबांचा मोठा वाटा असल्याचे ही त्यांनी सांगितले. कै. गोपीनाथराव मुंडे यांच्या जयंती निमित्ताने शिक्षण समिती अध्यक्ष, नगरसेविका मंजुश्री खर्डेकर यांनी महापालिका शाळेतील विद्यार्थ्यांसाठी मोफत आरोग्य तपासणी व नेत्र तपासणी मोहीम राबविण्याचा निर्धार केला आहे, या उपक्रमाच्या उदघाटन प्रसंगी ते बोलत होते. यावेळी शिक्षण समिती अध्यक्ष, नगरसेविका मंजुश्री खर्डेकर,भाजप चे शहर सरचिटणीस दीपक पोटे, शहर प्रवक्ता संदीप खर्डेकर, नगरसेवक जयंत भावे, शहर चिटणीस प्रशांत हरसुले,प्रभागातील सरचिटणीस निलेश गरुडकर, ऍड. प्राची बगाटे,महिला मोर्चा अध्यक्ष हर्षदा फरांदे, महिला मोर्चा सरचिटणीस केतकी कुलकर्णी, उपाध्यक्ष पल्लवी गाडगीळ,उपाध्यक्ष जयश्री तलेसरा,सहकार आघाडीचे सरचिटणीस शंतनू खिलारे, महिला मोर्चा आय टी प्रकोष्ठ च्या शहर संयोजिका कल्याणी खर्डेकर, उद्योग आघाडीचे उपाध्यक्ष रामदास गावडे, पंडित दीनदयाळ उपाध्याय शाळेच्या मुख्याध्यापक एलिझाबेथ काकडे,नयनतारा आय क्लिनिक च्या डॉ. मेधा परांजपे,युवा मोर्चा उपाध्यक्ष प्रतीक खर्डेकर,सहाय्य्क ज्योती पवार यांच्यासह शिक्षक, विद्यार्थी व कार्यकर्ते उपस्थित होते.

मंजुश्री खर्डेकर यांनी हाती घेतलेला उपक्रम स्तुत्य असून पंडित दीनदयाळ उपाध्याय यांच्या शेवटच्या माणसापर्यंत पोहोचण्याच्या संकल्पाला अनुसरून आहे, असेच सेवा आणि त्यागाची परंपरा गोपीनाथरावांनी जोपासली व आपल्याकडे येणाऱ्या प्रत्येक व्यक्ती चे काम ते करत असत अश्या आठवणी ही राजेश पांडे यांनी जगविल्या व विद्यार्थ्यांच्या आरोग्य व नेत्र तपासणीच्या उपक्रमासाठी सी एस आर मधून निधी उपलब्ध करून देऊ असेही ते म्हणाले. गोपीनाथराव मुंडे यांचे सामान्यांसाठी चे कार्य अफाट होते व ते नेहमीच लोकांपर्यंत जे नाही ते पोहोचावे यासाठी आग्रही असत असे सांगतानाच मंजुश्री खर्डेकर यांनी कोरोना काळात शाळा बंद असल्याचा फटका विद्यार्थ्यांना बसल्याचे सांगितले.ऑनलाईन शाळेमुळे विद्यार्थी स्मार्टफोन चा अतिरेकी वापर करत असून त्याचा परिणाम मुलांच्या डोळ्यावरच नव्हे तर एकूण आरोग्यावर होतं असल्याचे वैद्यकीय तज्ज्ञ सांगतात, म्हणून आत्ता सातवी, आठवी नववी च्या विद्यार्थ्यांची आरोग्य तपासणी व शाळा सुरु झाल्यावर सर्व विद्यार्थ्यांच्या आरोग्य तपासणीवर भर देत असल्याचे शिक्षण समिती अध्यक्ष नगरसेविका मंजुश्री खर्डेकर म्हणाल्या. कै. मा. ग. आचवल ट्रस्ट, क्रिएटिव्ह फाउंडेशन व नयनतारा आय क्लिनिक च्या वतीने ही शिबीरे आयोजित करत असल्याचे संदीप खर्डेकर म्हणाले. गोपीनाथराव मुंडे साहेबांचा आणि माझा कौटुंबिक स्नेह होता व साहेब हे स्वभावाने अतिशय हळवे होते,ते सतत कार्यमग्न असत व सेवाकार्याला प्राधान्य देत असत म्हणून त्यांच्या प्रत्येक जयंती व पुण्यतिथीला सामान्यांना केंद्रबिंदू मानून विविध उपक्रम आयोजित करतो असे भाजप प्रवक्ता व क्रिएटिव्ह फाउंडेशन चे अध्यक्ष संदीप खर्डेकर यांनी सांगितले. यावेळी नगरसेवक जयंत भावे व महिला मोर्चा अध्यक्ष हर्षदा फरांदे यांनी देखील मनोगत व्यक्त केले. सौ. मंजुश्री खर्डेकर यांनी प्रास्ताविक केले, संदीप खर्डेकर यांनी सूत्रसंचालन व आभार प्रदर्शन केले.

प्रकरणे निकाली काढण्यासाठी १२५ पॅनल उपलब्ध–लोक अदालतीमध्ये  पुणे येथील ५३ हजारापेक्षा जास्त प्रलंबित प्रकरणे–ई-चलनाद्वारे तडजोडीची व दंडाची रक्कम भरून घेण्याची व्यवस्था

प्रमुख जिल्हा व सत्र न्यायधीश संजय देशमुख म्हणाले ,तडजोडीने वाद सोडविण्यासाठी लोक अदालत महत्वूपर्ण ठरेल

पुणे,दि.11: प्रलंबित प्रकरण सामंजस्याने व तडजोडीने आपसात मिटविण्यासाठी राष्ट्रीय लोकअदालत महत्वूपर्ण ठरेल, असे प्रतिपादन प्रमुख जिल्हा व सत्र न्यायधीश तथा विधी सेवा प्राधिकरण पुणेचे अध्यक्ष संजय देशमुख यांनी केले.   जिल्हा व सत्र न्यायालयात आज राष्ट्रीय विधी सेवा प्राधिकरण व महाराष्ट्र राज्य विधी सेवा प्राधिकरणाच्या सूचनेनुसार आयोजित राष्ट्रीय लोक  अदालतीच्या उदघाटन प्रसंगी ते बोलत होते. यावेळी जिल्हा न्यायधीश एस.एस.गोसावी, जिल्हा न्यायधीश के.पी.नांदेडकर, विधी सेवा प्राधिकरणाचे सचिव तथा दिवाणी न्यायाधीश वरिष्ठ स्तर प्रताप सावंत, जिल्हा सरकारी वकील एन.डी.पाटील, पुणे वकील बार आसोसियशनचे उपाध्यक्ष योगेश तुपे आदी उपस्थित होते.

            श्री. देशमुख म्हणाले, लोक अदालतीच्या माध्यमातून अधिकाधीक प्रलंबित प्रकरणे निकाली काढण्यात येतात. यापुर्वीही लोक अदालतीच्या माध्ममातून प्रकरणे निकाली काढण्यात पुणे जिल्हा अग्रेसर आहे. मतभेद असले तरी मनभेद नसावेत. त्यामुळे सामंजस्याने वाद मिटविण्यासाठी लोक अदालत अत्यंत महत्त्वाची ठरते, असे त्यांनी सांगितले. जिल्ह्यात  लोक अदालतीच्या माध्यमातून अधिकाधिक प्रकरणे निकाली निघतील, असा विश्वासही त्यांनी व्यक्त केला.

श्री.नांदेडकर म्हणाले, लोक अदालतीच्या माध्यमातून जास्तीत जास्त प्रकरणे निकाली कसे निघतील व न्याय कसा पोहचेल यासाठीच प्रयत्न असावेत. लोक अदालतीमध्ये पुणे जिल्हा राज्यात अग्रस्थानी आहे, देशातही अग्रस्थानी कसा राहील, यासाठी सर्व मिळून प्रयत्न करावे.

श्री. सावंत म्हणाले,लोक अदालतीमध्ये  पुणे येथील ५३ हजारापेक्षा जास्त प्रलंबित प्रकरणे तडजोडीसाठी ठेवण्यात आली आहेत. राष्ट्रीय लोकअदालतमध्ये ई-चलनाद्वारे तडजोडीची व दंडाची रक्कम भरून घेण्याची व्यवस्था करण्यात आली आहे. राष्ट्रीय अदालतीसाठी ८ लाख गाडी मालकांना ई-चलनाच्या नोटिसा पाठविण्यात आल्या असून त्यांच्यावर २५ लाखांची अनपेड चलन आहेत. याशिवाय ग्रामपंचायत, बँक, पुणे महानगरपालिका, पिंपरी चिंचवड महानगरपालिकाच्या वादपुर्व कर वसुलीचे एक लाखापेक्षा जास्त प्रकरणे ठेवली आहेत. या लोक अदालतीच्या माध्यमातून प्रकरणे निकाली काढण्यासाठी १२५ पॅनल उपलब्ध असल्याची माहिती त्यांनी दिली.

‘प्लॅनेट मराठी ओटीटी’वर झळकली ‘अनुराधा’

काही दिवसांपासून सोशल मीडियावर ‘मी लिपस्टिकचे समर्थन करत नाही’ असे म्हणत अभिनेत्री आपली लिपस्टिक पुसत ‘बॅन लिपस्टिक’चा संदेश देत होत्या. हे नक्की काय प्रकरण आहे, याची सर्वत्र चर्चा रंगली होती. अभिनेत्रींच्या या अशा व्हिडीओमुळे लोकांच्या मनात संभ्रम आणि उत्सुकता निर्माण झाली होती. लोकांच्या मनात अनेक प्रश्न होते. अखेर या प्रश्नाचा उलगडा झाला असून त्याचे कारण आपल्या समोर आले आहे. संजय जाधव दिग्दर्शित ‘अनुराधा’ ही ७ भागांची वेबसिरीज ‘प्लॅनेट मराठी ओटीटी’, व्हिस्टास मीडिया कॅपिटलवर प्रेक्षकांच्या भेटीला आली आहे आणि त्याच्याच प्रमोशनचा हा एक भाग होता. या वेबसीरिजमध्ये तेजस्विनी पंडित, सोनाली खरे, सुकन्या कुलकर्णी मोने, सचित पाटील, सुशांत शेलार, विद्याधर जोशी, स्नेहलता वसईकर, संजय खापरे, आस्ताद काळे, विजय आंदळकर, चिन्मय शिंत्रे, वृषाली चव्हाण यांच्या प्रमुख भूमिका आहेत. आता या सर्व अभिनेत्री लिपस्टिकचे समर्थन का करत नाही, लिपस्टिकचा आणि या वेबसिरीजचा काय संबंध, या आणि अशा अनेक प्रश्नांची उत्तरे या वेबसिरीजमध्ये दडलेली आहेत. नुकताच या वेबसिरीजच्या पोस्टर आणि टिझर प्रदर्शनाचा कार्यक्रम पार पडला. टिझरमध्ये तेजस्विनीचा बोल्ड अंदाज दिसत असून तिच्या वेगवेगळ्या व्यक्तिरेखा दिसत आहेत. हे रहस्य काय आहे, हे लवकरच आपल्या समोर येईल.‘अनुराधा’च्या निमित्ताने संजय जाधव वेबसीरिजच्या विश्वात पदार्पण करत असून हिरालाल दाफडा आणि आकाश दाफडा यांनी निर्मितीची धुरा सांभाळली आहे. या वेबसीरिजचे लेखन संजय जाधव, वैभव चिंचळकर यांचे असून पंकज पडघम यांचे संगीत लाभले आहे. तर संकलनाचे काम अपूर्वा मोतीवाले सहाय यांनी पाहिले असून कला दिग्दर्शक सतीश चिपकर आहेत.

आपल्या या पहिल्या प्रोजेक्टबाबत दिग्दर्शक संजय जाधव म्हणतात, ‘’ आजवर अनेक चित्रपट केले आहेत प्रथमच वेबसीरिज करत आहे. त्यामुळे प्रेक्षकांचा प्रतिसाद कसा मिळतो, यासाठी उत्सुकही आहे. एकंदरच संमिश्र मनःस्थिती आहे. आनंद या गोष्टीचा आहे की माझ्या आवडत्या टीमसोबत मी नवीन प्रोजेक्ट करतोय. आशा आहे प्रेक्षकांना माझा हा नवा प्रयत्न नक्कीच आवडेल.’’

‘अनुराधा’ वेबसिरीजबाबत ‘प्लॅनेट मराठी ओटीटी’चे प्रमुख, संस्थापक अक्षय बर्दापूरकर म्हणतात, ” ही वेबसिरीज थोडीशी वेगळी आहे. याचा जॉनर सस्पेंस आणि थ्रिलर असून संजय जाधव सारख्या कसलेल्या दिग्दर्शकाने याचे दिग्दर्शन केले आहे. यातील नाट्यथरार प्रेक्षकांना स्तब्ध करणारा असून अतिशय वेगळ्या पद्धतीने याचे प्रमोशन करण्यात आले आहे. त्यामुळे प्रेक्षकांना या वेबसिरीजमध्ये नक्की काय पाहायला मिळणार याची उत्सुकता निर्माण झाली. या वेबसिरीजमध्ये लिपस्टिकची नक्की काय भूमिका आहे, यासाठी प्रेक्षकांना प्लॅनेट मराठी ओटीटीवर ही वेबसिरीज पाहावी लागेल. अशा अनेक नवनवीन आणि उत्तमोत्तम वेबसिरीज आम्ही प्रेक्षकांसाठी आगामी काळात घेऊन येणार आहोत.”

पुणे-मध्यवर्ती पेठांतील महत्त्वाचे रस्ते २० जानेवारीपर्यंत पूर्ववत होतील अशी ग्वाही स्थायी समितीचे अध्यक्ष आणि स्थानिक नगरसेवक हेमंत रासने यांनी दिली.

केळकर रस्ता आणि टिळक रस्त्याच्या डांबरीकरणाचा शुभारंभ आज रासने यांच्या हस्ते करण्यात आला. या वेळी ते बोलत होते. नगरसेविका गायत्री खडके, माजी नगरसेवक दीलीप काळोखे, कसबा मतदारसंघाचे भाजपचे अध्यक्ष प्रमोद कोंढरे, उदय लेले, किरण जगदाळे, दीलीप पवार, निलेश कदम, मनिष जाधव, सौरभ रायकर, अनिल बेलकर, विनायक रासने, संकेत थोपटे, परेश मेहेंदळे, योगिता गोगावले, रीना सपकाळ यांची प्रमुख उपस्थिती होती.

रासने म्हणाले, मध्यवर्ती पेठांच्या भागात मुख्य बाजारपेठ असल्याने, तेथे दररोज मोठ्या प्रमाणात रहदारी असते. त्यामुळे गेली पंचेचाळीस वर्षे या भागातील पाणीपुरवठा आणि मैलापाण्याचे वहन करणार्या वाहिन्या बदलताना मर्यादा येत होत्या. कोविडमुळे निर्माण झालेल्या टाळेबंदीत अत्यावश्यक सेवा वगळता सर्वच बाजारपेठ बंद होती. त्या काळात समान पाणीपुरवठा, मैलापाणी वहन, एमएनजीएल पुरवठा, इंटरनेट कंपन्या यांच्या वाहिन्या आणि केबल्स टाकण्याची विकासकामे तातडीने पूर्ण करण्यात आली. त्यामुळे या भागात मोठ्या प्रमाणात खोदाई करावी लागल्याने रस्त्यांची दुरावस्था झाली होती. या पूर्वी निकृष्ट कामांमुळे रस्त्यांची दुरावस्था होत होती. आता सर्व प्रमुख रस्ते पूर्ववत करण्यासाठी नियोजनबद्ध काम सुरू करण्यात आले आहे.

रासने म्हणाले, गेल्या महिन्यात आयुक्त विक्रम कुमार आणि महापालिका अधिकार्यांसोबत या भागातील विविध विकासकामांची पाहाणी करण्यात आली होती. त्यानुसार विकासकामांचे कालबद्ध नियोजन करण्यात आले आहे. महात्मा फुले मंडईसमोरील मेट्रोचे काम, दक्षिणमुखी मारूती मंदिर चौकातील रस्त्याची कामे, शनिवारवाड्याच्या पिछाडीचा भाग, शुक्रवार पेठ, सुभाष नगर, बाजीराव रस्ता परिसरातील समान पाणीपुरवठा योजनेसंदर्भातील विकासकामे, हिराबाग चौकातील वर्षानुवर्षे पडलेली बेवारस वाहने उचलणे आदी कामे पूर्ण करण्यात आली आहेत. सदाशिव पेठ, शिवाजी रस्ता, बाजीराव रस्ता, लक्ष्मी रस्ता, केळकर रस्ता, टिळक रस्ता परिसरातील रस्ता डांबरीकरणाची कामे टप्प्‌याटप्प्याने हाती घेण्यात आली असून, ती २० जानेवारीपर्यंत पूर्ण होतील.

सदाशिव पेठ-शनिवार पेठ या प्रभागाला एक एकक मानून विविध प्रकारची विकासकामे खात्यांतर्गत समन्वयातून पूर्ण करण्यात यावीत यासाठी १३ नोव्हेंबर रोजी आयुक्त विक्रम कुमार यांच्या समवेत या भागातील समस्या आणि विकासकामांची माहिती घेण्यासाठी दौरा आयोजित करण्यात आला होता. जशा समस्या या प्रभागात आहेत तशाच त्या अन्य ४१ प्रभागांमध्ये आहेत. या दौर्यातून विकासाचा आराखडा तयार करण्यात आला असून, त्याची नियोजनबद्ध अंमलबजावणी सुरू केली आहे. पुणेकरांना गुणवत्तापूर्ण, दर्जेदार मूलभूत सुविधा उपलब्ध व्हाव्यात यासाठी अन्य प्रभागांमध्ये या आराखड्याची अंमलबजावणी करावी असे आदेश प्रशासनाला दिल्या असल्याचे रासने यांनी सांगितले.

जायकासाठी दिरंगाईचा कारभार करणाऱ्या महापालिका अधिकाऱ्यांची चौकशी होईल – खासदार बापट

पुणे-. १० :जायका प्रकरणी दिल्लीत होणाऱ्या बैठकीस ऑन लाइन उपस्थित राहण्याचे आदेश देऊनही महापालिकेचे आयुक्त विक्रम कुमार यांनी या बैठकीला विनापरवानगी दांडी मारण्याचा प्रयत्न केल्याचे उघड झाल्याने राज्यातील उपमुख्यमंत्र्यांना फोन करून विक्रम कुमारांना बोलावून घेऊन केंद्रीय मंत्र्यांनी झापल्याचे प्रकरण आज समोर आले आहे .आयत्या वेळी विभागीय आयुक्त सौरव राव यांच्या कार्यालयातून विक्रम कुमार या ऑनलाइन बैठकीस हजर झाले तोवर केंद्रीय मंत्री त्यांची प्रतीक्षा करत थांबले होते, विक्रम कुमारांनी दिलगिरी व्यक्त केल्यावर मंत्री महोदयांनी बैठक सुरू केली.

आज दिल्लीतून पुण्यात आल्यावर जायका महापालिका प्रशासनाच्या दिरंगाई मुळे लांबल्याचा आरोप करत वेळेवर अशा अधिकाऱ्यांची चौकशी केली जाईल असे सांगत पुण्याचे खासदार गिरीश बापट म्हणाले कि,’पुण्यातील मुळा-मुठा नदीसुधार प्रकल्पाला विलंब झाला असला, तरी तो लवकरच पूर्ण होणार आहे. त्यासाठी मिळणारा कोणताही निधी परत केंद्राला जाणार नाही, अशी स्पष्टोक्ती बापट यांनी केली आहे

पुण्यातील मुळा-मुठा नदीसुधार प्रकल्पाला विलंब झाला असला, तरी तो लवकरच पूर्ण होणार आहे. त्यासाठी मिळणारा कोणताही निधी परत केंद्राला जाणार नाही, अशी स्पष्टोक्ती पुण्याचे खासदार गिरीश बापट यांनी केली आहे. खासदार बापट यांची या प्रश्नीे जलशक्तीमंत्री गजेंद्रसिंह शेखावत यांच्याबरोबर आज बैठक झाली. त्यात अधिकारी ऑनलाइन पद्धतीने उपस्थित होते. शेखावत यांनी या प्रकल्पाची एक महिन्यात वर्क ऑर्डर काढण्याचा आदेश अधिकाऱ्यांना दिल्याचे बापट यांनी सांगितले.
पुणेकरांसाठी महत्त्वाचा असलेला हा जायका प्रकल्प पूर्ण करण्यासाठी दिलेली मुदत पुढील महिन्यात संपत आहे. प्रकल्प ३१ जानेवारी २०२२ पर्यंत महापालिकेने पूर्ण करायला पाहिजे. परंतु महापालिका अद्यापही निविदा प्रक्रियेत अडकली आहे. त्यामुळे नियोजित तारखेस हा प्रकल्प पूर्ण होणे शक्य नाही. हा प्रकल्प पूर्ण व्हावा यासाठी खासदार गिरीश बापट सुरवातीपासून प्रयत्नशील आहेत. त्यांनी यापूर्वी देखील शेखावत यांची वारंवार भेट घेऊन चर्चा केली होती. आजही शेखावत आणि बापट यांच्यात अधिकाऱ्यांसह बैठक झाली.
खासदार बापट यांच्यासह पर्यावरण सचिव आर. पी. गुप्ता, राष्ट्रीय नदीसुधार संचालनालयाचे संचालक आर. आर. मिश्रा, जायकाचे प्रमुख साइतो मित्सुनोरी आणि महापालिकेचे आयुक्त विक्रम कुमार उपस्थित होते. खासदार गिरीश बापट यांनी याबाबत सांगितले की पुणेकरांसाठी हा प्रकल्प महत्वाचा असून या प्रकल्पासाठी आवश्येक असलेल्या जागा तातडीने ताब्यात घेऊन या प्रकल्पाचे काम लवकरच सुरू करा अशी आग्रहाची विनंती केली. त्यावर या प्रकल्पासाठी आवश्य्क जमीन सात दिवसांत ताब्यात घ्या. तसेच या प्रकल्पाची वर्क ऑर्डर एक महिन्यात काढा, असे शेखावत यांनी संबंधितांना सांगितले आहे. तसेच हा प्रकल्प पूर्ण करण्याची मुदत संपत असली, तरी त्यास मुदतवाढ मिळेल. त्यामुळे या प्रकल्पाचा निधी केंद्राकडून परत घेतला जाणार नाही, अशी ग्वाही शेखावत यांनी दिली आहे.
महापालिकेला या प्रकल्पासाठी जायकाकडून मिळणाऱ्या ८५० कोटी रूपयांच्या निधीवर पाणी सोडावे लागते की काय अशी स्थिती निर्माण झाल्याचे मानले जात होते. परंतु शेखावत आणि बापट यांच्या आजच्या बैठकीमुळे कुठलाही निधी परत न जाता, हा प्रकल्प पूर्ण होणार यावर शिक्कामोर्तब झाले आहे. महिनाभरात या प्रकल्पाच्या कामाला सुरवात होईल, हेही या बैठकीमुळे स्पष्ट झाले आहे. आता महापालिका प्रशासनास वेगाने सर्व सरकारी प्रक्रिया पूर्ण करावी लागणार आहे.
पुणे महापालिका, केंद्र सरकार आणि जायका यांच्यात त्रिपक्षीय करार फेब्रुवारी २०१५ मध्ये करण्यात आला होता. त्यानुसार पुणे शहरात अकरा ठिकाणी सांडपाणी प्रक्रिया प्रकल्प आणि सांडपाणी वितरण व्यवस्था उभी करण्यासाठी नियोजित ९९० कोटी रुपये खर्चापैकी ८५ टक्के अनुदान म्हणजेच ८४१ कोटी रुपये पुणे महापालिकाला मिळणार आहेत. शहरातील शंभर टक्के सांडपाण्यावर प्रक्रिया करण्यासाठी केंद्र सरकारच्या राष्ट्रीय नदी संवर्धन मंत्रालय (एनआरसीडी) आणि जपान सरकारच्या मदतीने महापालिकेने जायका प्रकल्पाचे काम हाती घेतले आहे. या प्रकल्पातंर्गत शहरात अकरा ठिकाणी सांडपाण्यावर प्रक्रिया करणारे प्रकल्प उभे करण्यात येणार आहेत. पण प्रकल्पासाठी आवश्य्क 11 पैकी पाच जागा महापालिकेच्या ताब्यात आलेल्या नाहीत. त्यात महापालिकेची निविदा प्रक्रिया देखील रखडली आहे.

पुणे- महानगरपालिकेतील बोगस इंजिनियर पदोन्नती घोटाळ्याने संपूर्ण शहराचे लक्ष वेधले आहे. या प्रकरणाचे धागेदोरे महापौर कार्यालयापर्यंत पोहोचल्यामुळे याचं गांभीर्य अजून जास्त वाढले आहे. दरम्यान या प्रकरणावर पुण्याचे महापौर मुरलीधर मोहोळ यांनी चौकशीची मागणी केली आहे. त्याची आम्ही स्वागत करतो परंतु महापौरांना केवळ एवढी मागणी करून स्वतःची जबाबदारी झटकता येणार नाही कारण संशयाची सुई त्यांच्या कार्यालयाकडे आहे. अद्यापही या प्रकरणातील 18 बोगस इंजिनियरवर बडतर्फीची कारवाई झालेली नाही किंवा ही यादी रद्द केलेली नाही आणि यातील 18 बोगस अभियंत्यांवर महानगरपालिकेने कोणतीही फौजदारी कारवाई केली नाही. चौकशी करण्याचा आभास निर्माण करणे ही अनेक घोटाळ्यांवरची सहज सोपी युक्ती पालिकेतील प्रस्थापित राजकीय नेतृत्व वापरत आहे. सदर प्रकरण अतिशय सुस्पष्ट आहे. यामध्ये चौकशीचा आभास करत हे प्रकरण रेंगाळत ठेवण्याचं कोणतही कारण नाही. महापौर याबाबत स्वच्छ असतील तर त्यांनी आयुक्तांकडे आग्रह धरुन या 18 बोगस अभियंत्यांच्या बडतर्फीचे आदेश तातडीने काढावेत आणि पालिकेच्यावतीने फौजदारी गुन्हा नोंद करावा. विद्येचे माहेरघर समजल्या जाणाऱ्या पुण्याला काळिमा फासणारे हे प्रकरण आहे. याची गंभीरता लक्षात घेऊन महापौरांकडून तात्काळ कृती अपेक्षित आहे. जर महापौरांच्या प्रयत्नानंतर देखील याबाबत कारवाई करण्यास आयुक्त नकार देत असतील तर महापौरांनी आयुक्तांच्या कार्यालयात ठिय्या आंदोलन करावे. आम आदमी पक्षाचे कार्यकर्ते देखील त्यात सामील होतील.असे प्रतिपादन आज पुणे महापालिकेतील पत्रकार कक्षात पत्रकार परिषद घेऊन आम आदमी पार्टीचे प्रवक्ते डॉ.डॉ अभिजीत मोरे व सुजीत अगरवाल यांनी केले आहे .

या पत्रकार परिषदेत ते म्हणाले,’ आम आदमी पक्षाच्या वतीने पुणे शहराचे पोलीस कमिशनर अमिताभ गुप्ता यांची भेट घेऊन त्यांना निवेदन देण्यात आले आहे तसेच लाचलुचपत प्रतिबंधक विभागाकडे देखील आम आदमी पक्षाच्या वतीने तक्रार दाखल करण्यात आली आहे. आज आम आदमी पक्षाच्या वतीने सदर पदोन्नती प्रक्रिया वर लिखित आक्षेप महानगरपालिकेमध्ये सादर करण्यात आले आहेत. त्यावेळी आम आदमी पक्षाने खालील मागण्या केलेल्या आहेत.

१) या यादीवर आणि प्रक्रियेवर वर व्यक्त केलेल्या आक्षेपांची गंभीर नोंद घेऊन शासकीय लाभ मिळवण्यासाठी AICTE ची मान्यता नसलेल्या जेआरएन राजस्थान विद्यापीठ येथील अभियंता पदविका प्रमाणपत्र सादर करणाऱ्या 18 मनपा कर्मचाऱ्यांना महापालिकेची फसवणूक केल्याप्रकरणी तातडीने बडतर्फ करावे आणि त्यांच्यावर महापालिकेने फसवणूक, संघटीत कटाचे फौजदारी गुन्हे दाखल करावेत.२) या प्रक्रियेत लबाडी, बोगस प्रमाणपत्रांचे सादरीकरण व त्यास मान्यता, प्रचंड घोळ, अपारदर्शकता, मनपाची व नागरिकांची फसवणूक इ. झालेली असल्याने ही संपूर्ण प्रक्रिया व यादी रद्द करावी.३) या सगळ्या रॅकेटची उच्चस्तरीय चौकशी करावी.४) ही यादी तपासून त्याला मान्यता देणाऱ्या सर्व अधिकाऱ्यांची चौकशी करुन दोषींना बडतर्फ करावे आणि त्यांच्यावर फौजदारी गुन्हे दाखल करावेत.५) नव्याने पदोन्नती प्रक्रिया सुरु करावी आणि अर्ज मागवावेत. AAICTE ची मान्यता असणाऱ्याच विद्यापीठ/ कॉलेज मधून अभियंता पदवी/ पदविका प्रमाणपत्र ग्राह्य धरण्यात यावे. छाननी करताना कोणत्या महाविद्यालातून अभियंता पदवी/ पदविका प्रमाणपत्र मिळवले आहे, ते पुण्यात आहे की पुण्याबाहेर, पुण्याबाहेर महाविद्यालय असेल तर अभियंता कोर्स आणि मनपा नोकरी एकाच वेळी केली कशी याची चौकशी व्हावी.६) या अगोदरही अशा पद्धतीने इंजिनीयर पदासाठी अनेक बोगस जणांना प्रमोशन दिले गेले आहेत. पुणे महानगरपालिका विधी विभाग जावक क्रमांक 2702 दिनांक 15 डिसेंबर 2017 नुसार मनपात कार्यरत एकूण 11 कर्मचारी यांनी आसाम युनिव्हर्सिटी, कंस्ट्रक्शन डेव्हलपमेंट कौन्सिल, कर्नाटक स्टेट ओपन यूनिवर्सिटी, आयएमई गांधी विद्यामंदिर सदासागर, राजस्थान यूनिवर्सिटी आणि जनार्दन राय नगर राजस्थान विद्यापीठ यांच्याकडून डिप्लोमा सिव्हिल इंजिनिअर, डिप्लोमा इलेक्ट्रिकल इंजिनियर अशा पदविका प्राप्त करून घेतल्यानंतर त्यांना पंचवीस टक्के पदोन्नतीने कनिष्ठ अभियंता पदावर नेमणुका दिल्या. सदर कर्मचाऱ्यांच्या पदविका या सर्वोच्च न्यायालयाच्या निर्णयानुसार विधीग्राह्य आहे असे म्हणता येणार नाही असे स्पष्ट मत तत्कालीन विधी अधिकारी निशा चव्हाण यांनी नोंदवले होते. तरीदेखील त्याच्याकडे साफ दुर्लक्ष करण्यात आले आणि कोणत्याही ठोस कायदेशीर पुराव्या अभावी 11 इंजिनिअरच्या बोगस नियुक्त्या करण्यात आल्या. पुणे महानगरपालिका विधी विभाग जावक क्रमांक 2702 दिनांक 15 डिसेंबर 2017 या पत्रात अभिप्रेत असलेल्या 11 मनपा कर्मचाऱ्यांना महापालिकेची फसवणूक केल्याप्रकरणी तातडीने बडतर्फ करावे आणि त्यांच्यावर महापालिकेने फसवणूक, भ्रष्टाचार, संघटीत कटाचे फौजदारी गुन्हे दाखल करावेत.