पुणे आयकॉन ग्रुप, पीवायसी हिंदू जिमखाना व पुणे मेट्रोपोलिटन जिल्हा टेनिस संघटना(पीएमडीटीए)तर्फे आयोजित चौथ्या अरुण साने मेमोरियल हौशी टेनिस लीग स्पर्धेत गटसाखळी फेरीत पीवायसी डायमंड्स, एमडब्लूटीए 1, लॉ कॉलेज लायन्स या संघांनी आपापल्या प्रतिस्पर्धी संघांचा पराभव करून विजयी सलामी दिली. 

पीवायसी हिंदू जिमखाना टेनिस कोर्टवर सुरु असलेल्या या स्पर्धेत गटसाखळी फेरीत पहिल्या गटात श्रवण हार्डीकर, अमित नाटेकर, योगेश पंतसचिव, मिहीर दिवेकर, सारंग देवी, अमित लाटे यांच्या विजयी कामगिरीच्या जोरावर पीवायसी डायमंड्स संघाने टेनिस हॉक्सचा 18-03 असा पराभव करून शानदार सुरुवात केली.  अन्य लढतीत एमडब्लूटीए 1 संघाने टीएफएलचा 16-12 असा तर, लॉ कॉलेज लायन्स संघाने सोलारिस गो गेटर्सचा 16-10 असा पराभव करून धडाकेबाज सुरुवात केली. 

पीएमडीटीएचे अध्यक्ष व टेनिसप्रेमी कै. अरुण साने यांच्या स्मरणार्थ ही स्पर्धा दरवर्षी आयोजित करण्यात येत असून या अनोख्या संकल्पनेवर आधारित असलेल्या या स्पर्धेत  सध्याचा खेळाडू, माजी खेळाडू अथवा मार्कर्स यांचा सहभाग नसून हौशी स्पर्धक आपले कौशल्य पणाला लावणार असल्याचे पीवायसी हिंदू जिमखानाचे अध्यक्ष कुमार ताम्हाणे यांनी सांगितले. 

स्पर्धेत एकुण  40हजार रूपयांची पारितोषिके देण्यात येणार आहेत. ही स्पर्धा साखळी व बाद पद्धतीने खेळविण्यात येणार आहे.  दोन्ही संघामध्ये होणाऱ्या लढतीत एकुण 3सामन्यांचा समावेश असून यात 2 सामने खुल्या दुहेरी गटात, तर उर्वरित एक सामना 80वर्षावरील(दोन्ही खेळाडूंचे मिळून वय 80वर्षवरील)गटात होणार आहे. शहरातील हौशी टेनिस खेळाडूंना खेळण्याची संधी मिळावी म्हणून हि स्पर्धा घेण्यात आल्याचे क्लबच्या टेनिस विभागाचे सचिव अभिषेक ताम्हाणे यांनी सांगितले.

स्पर्धेमध्ये पीवायसी डायमंड्स, एमडब्लूटीए 1, टेनिसनट्स, पीसीएलटीए, एफसी 2, डेक्कन 2, पीवायसी रुबी, पीवायसी पर्ल्स, डेक्कन 3, एफसी 1, डेक्कन 1, लॉ चार्जर्स, हॉक्स, टीएफएल, मॉँट व्हर्ट प्रीस्टाईन, द ईगल्स, लॉ कॉलेज लायन्स, एमडब्लूटीए 2, महाराष्ट्र मंडळ, एस डायमंड्स, पीवायसी सॅफायर, एसेस युनायटेड, एमडब्लूटीए 3, टी-20 महाराष्ट्र मंडळ, एफसी 3, सोलारिस गो गेटर्स, गोल्डन बॉईज, एमडब्लूटीए 4 हे 28 संघ झुंजणार आहेत. स्पर्धेचे उदघाटन नोंदणी महानिरीक्षक आणि नियंत्रक मुद्रांक शुल्क, महाराष्ट्रचे(आयजीआर) श्रावण हार्डीकर, पीवायसी हिंदू जिमखानाचे अध्यक्ष कुमार ताम्हाणे, एमएसएलटीएचे मानद सचिव सुंदर अय्यर, आशा साने यांच्या हस्ते करण्यात आले. यावेळी नमिता टेपण, नंदू रोकडे, अभिषेक ताम्हाणे आदी मान्यवर उपस्थित होते.  

स्पर्धेचा सविस्तर निकाल: साखळी फेरी: 

गट 1: पीवायसी डायमंड्स वि.वि.टेनिस हॉक्स 18-03(80अधिक गट: श्रवण हार्डीकर/अमित नाटेकर वि.वि.मंदार कापशीकर/निलेश नाफडे 6-1; खुला गट: योगेश पंतसचिव/मिहीर दिवेकर वि.वि.सचिन कुलकर्णी/सुनील आहिरे 6-0; खुला गट: सारंग देवी/अमित लाटे वि.वि.अविनाश पवार/अनिरुद्ध जाधव 6-2);  

गट 2: एमडब्लूटीए 1 वि.वि.टीएफएल 16-12(80अधिक गट: जयदीप वाकणकर/संजय आशेर वि.वि.केदार राजपाठक/दिपक होनकर 6-2; खुला गट: भूषण जोशी/प्रणिल बाडकर वि.वि.अजय भांजे/विक्रांत गुणे 6-4; खुला गट: संतोष शहा/आदित्य जोशी पराभूत वि.अजिंक्य पाटणकर/कौस्तुभ देशमुख 4-6); 

गट 5: लॉ कॉलेज लायन्स वि.वि.सोलारिस गो गेटर्स 16-10(80अधिक गट: अभिजीत मराठे/शिवाजी यादव वि.वि.अमोल गायकवाड/आशिष कुबेर 6-3; खुला गट: तारक पारेख/केतन जाठर पराभूत वि.सचिन खिलारे/सुबोध पेठे 4-6; खुला गट:संतोष जयभाई/राहुल पंढरपुरे वि.वि.आश्विन हळदणकर/महेंद्र गोडबोले 6-1). 

कै.श्रीमती लक्ष्मीबाई दगडूशेठ हलवाई दत्तमंदिर ट्रस्ट, पुणे तर्फे गुरुमहात्म्य आणि लक्ष्मीबाई स्मृती पुरस्कार वितरण सोहळा

पुणे : दिवसेंदिवस अधिक आत्मकेंद्री होत चाललेल्या आजच्या समाजामध्ये दुस-यांचा विचार करून त्यांचे दु:ख दूर करण्याची वृत्ती अतिशय कमी झाली आहे. अशावेळी सामाजिक काम करणा-या संस्था आणि व्यक्तींमुळे समाजाचा गाडा योग्य रितीने सुरू आहे, अशा समाजकार्य करणा-यांना बळ देण्याची गरज आहे, अशी भावना ज्येष्ठ साहित्यिक डॉ.सदानंद मोरे यांनी व्यक्त केले

कै.श्रीमती लक्ष्मीबाई दगडूशेठ हलवाई दत्तमंदिर ट्रस्टतर्फे दत्तजयंती उत्सवांतर्गत देण्यात येणा-या पुरस्कारांचे वितरण बालगंधर्व रंगमंदिरात आयोजित कार्यक्रमात झाले. यावेळी सावित्रीबाई फुले पुणे विद्यापीठाचे कुलगुरु डॉ.नितीन करमाळकर, ट्रस्टचे अध्यक्ष सुनिल रुकारी, डॉ.पराग काळकर, राजू बलकवडे, अक्षय हलवाई, अ‍ॅड.रजनी उकरंडे, युवराज गाडवे, अ‍ॅड.शिवराज कदम जहागिरदार, अ‍ॅड.प्रताप परदेशी, महेंद्र पिसाळ उपस्थित होते. ट्रस्टचे यंदा १२४ वे वर्ष आहे.

सामाजिक क्षेत्रात फासेपारधी समाजासाठी उल्लेखनीय कार्य करणारे पद्मश्री गिरीश प्रभुणे, शैक्षणिक क्षेत्रात मराठवाडा मित्र मंडळाच्या माध्यमातून कार्यरत असलेले डॉ.बी.जी. उर्फ भाऊसाहेब जाधव आणि धार्मिक क्षेत्रातील योगदानाबद्दल प.पू. सद्गुरु प्रेमल माताजी यांना गुरुमहात्म्य पुरस्कार प्रदान करण्यात आला. तसेच लक्ष्मीबाई स्मृती पुरस्कार बालकामगारांसाठी कार्यरत असलेल्या कोल्हापूरच्या अवनी संस्थेच्या अनुराधा भोसले यांना प्रदान करण्यात आला. रुपये २५ हजार, सन्मानचिन्ह, महावस्त्र असे पुरस्काराचे स्वरुप होते.

डॉ.सदानंद मोरे म्हणाले, लोकमान्य टिळक त्यांच्या कार्यामागे दगडूशेठ हलवाई यांनी आपले बळ उभे केले. हाच वसा पुढे नेत लक्ष्मीबाई दगडूशेठ हलवाई दत्तमंदिर ट्रस्ट समाजातील चांगल्या लोकांच्या पाठीशी उभे राहत आहे. या ट्रस्टचा आदर्श इतर व्यक्ती आणि संस्थांनी घेतला पाहिजे.

डॉ.नितीन करमाळकर म्हणाले, विद्यापीठ समाजाच्या सर्व स्तरापर्यंत पोहोचू शकत नाही. विद्यापीठ जे काम करू शकत नाही, ते काम या सामाजिक संस्था अतिशय प्रामाणिकपणे आणि पोटतिडकीने करत आहे. अशा संस्थांमुळे ख-या अर्थाने समाज आणि आपला देश पुढे जात आहे.

पुरस्काराला उत्तर देताना गिरीश प्रभुणे म्हणाले, मला पद्मश्री पुरस्कार मिळाला तेव्हा माझ्या कार्याला राजमान्यता मिळाली. तर लक्ष्मीबाई दगडूशेठ हलवाई दत्तमंदिर तर्फे पुरस्कार मिळाल्यामुळे एक प्रकारे माझ्या कार्याला धर्माची देखील मान्यता मिळाली असल्याची भावना त्यांनी व्यक्त केली. प्रेमल माताजी म्हणाल्या, समाजामध्ये सद््भावना आणि माणुसकी कायम जागृत राहावी, या उद्देशाने मी काम करत आहे. ट्रस्टच्या पुरस्कारामुळे मला काम करण्यासाठी ऊर्जा मिळाली आहे.

भाऊसाहेब जाधव म्हणाले, गरीब आणि गुणवंत विद्यार्थ्यांना शिक्षण सर्वप्रथम देणे, हा आमच्या संस्थेचा उद्देश आहे. यामुळे शिक्षण हे आयुष्यात अतिशय महत्त्वाचे आह,े हा विचार आम्ही अनेक मुलांमध्ये रुजवू शकलो याचा मला आनंद आहे, असेही ते म्हणाले. अनुराधा भोसले म्हणाल्या, उसतोड कामगार आणि वीट भट्टी कामगारांच्या मुलांची अवस्था पाहिली, तर देश आजही ख-या अर्थाने स्वतंत्र झाला आहे का? असा प्रश्न निर्माण होतो. या मुलांपर्यंत शिक्षण पोहोचले नाही तर आपला देश भविष्यात विकसित होऊ शकेल का? याचा विचार प्रत्येकाने गांभीर्याने करायला हवा, असेही त्यांनी सांगितले.

स्वरतीर्थ स्व.सुधीर फडके यांच्या चिरस्मरणीय श्रवणीय गीतांचा बहारदार कार्यक्रम असलेला बाबूजी व मी हा ज्येष्ठ गायक व संगीतकार श्रीधर फडके आणि सहका-यांनी सादरीकरण केले. प्रज्ञा देशपांडे यांनी पुरस्कार वितरण सोहळ्याचे सूत्रसंचालन केले

एकाच दिवसात ४९ हजारावर प्रकरणांचा निपटारा

पुणे, दि.१४: पुणे जिल्हा विधी सेवा प्राधिकरणातर्फे चालू वर्षात घेण्यात आलेल्या राष्ट्रीय लोक अदालतीमध्ये तब्बल १ लाख ६६ हजार ९५७ एवढी दाखल व दाखलपूर्व प्रकरणे निकाली काढण्यात आली आहेत. राष्ट्रीय लोकअदालतीमध्ये प्रकरणे निकाली काढण्यात पुणे जिल्ह्याने तीन वेळा पहिले स्थान कायम ठेवले आहे.

पुणे जिल्हा विधी सेवा प्राधिकरणातर्फे नुकतेच ११ डिसेंबर रोजीच्या लोकअदालतमध्ये दिवाणी, फौजदारी, मोटार अपघात नुकसान भरपाई कलम १३८ निगोशिएबल इन्स्ट्रुमेंट्स अॅक्ट, भूसंपादन, कौटुंबिक प्रकरणे, औद्योगिक, कामगार व सहकार न्यायालयातील प्रकरणे ठेवण्यात आली होती. त्यामध्ये दिवाणी- ३३४ फौजदारी- ७ हजार ६०१ मोटार अपघात नुकसान भरपाईची ११९ कलम १३८ अंतर्गत १ हजार १००, भूमीसंपादनाची १४९, तसेच पुणे जिल्हयातील विविध बँका, वित्तीय संस्था तसेच विविध ग्रामपंचायतीकडील व पुणे मनपा आणि पिंपरी चिंचवड मनपा यांचेकडील घरपट्टी, पाणीपट्टीची एकुण ४० हजार ४७५ दाखलपूर्व प्रकरणे निकाली काढण्यात आली आहेत.

तडजोड झालेल्या प्रकरणांपैकी दाखल प्रकरणांमध्ये ६२ कोटी ३० लाख ७८ हजार ६६२ रूपये आणि दाखलपूर्व प्रकरणांमध्ये ११० कोटी ९३ लाख ५० हजार ७८ रूपये अशी एकुण १७३ कोटी २४ लाख २८ हजार ७४० रूपये इतकी प्रकरणामधील तडजोड रक्कम झाली आहे.

पुणे जिल्हा विधी सेवा प्राधिकरणामार्फत २०२१ या वर्षात १ ऑगस्ट, २५ सप्टेंबर आणि ११ डिसेंबर २०२१ रोजी पुणे जिल्हयातील सर्व न्यायालयांमध्ये राष्ट्रीय लोकअदालत घेण्यात आली. तीन लोकअदालतीमध्ये प्रकरणे निकाली काढण्यात पुणे जिल्ह्याने कायम आघाडी घेतली आहे.

९२८ कायदेविषयक शिबीरांचे आयोजन
भारताच्या स्वातंत्र्यास ७५ वर्षानिमित्त आयोजित ‘पॅन इंडिया आउटरिच अॅन्ड अवेरनेस प्रोग्रॅम अंतर्गत २ ऑक्टोबर ते १४ नोव्हेंबर या कालावधीत विधी साक्षरता शिबीरे जनजागृती कार्यक्रमाचे आयोजन करण्यात आले. या माध्यमातून ९२८ विविध विषयांवर पुणे जिल्ह्यातील विविध ठिकाणी कायदेविषयक शिबीरांचे आयोजन केले. विधी साक्षरता कार्यक्रमाद्वारे कायदेविषयक मार्गदर्शन करण्यात आले. ३३ हजार २०० पेक्षा जास्त लोकांना लाभ झाला.

पॅन इंडिया कार्यक्रमांतर्गत महाशिबीराद्वारे मार्गदर्शन
पॅन इंडिया कार्यक्रमांतर्गत वडगाव मावळ व बारामती येथे दोन महाशिबीरांचे आयोजन करण्यात आले. वडगाव येथील कार्यक्रम मुंबई उच्च न्यायालयाचे वरिष्ठ न्यायमूर्ती ए. ए. सैयद, न्यायमूर्ती एस. पी. तावडे तसेच बारामती येथे न्यायमूर्ती नितीन जामदार, न्यायमूर्ती एस. पी. तावडे यांनी मार्गदर्शन केले. शासनाच्या विविध शासकीय योजना सर्वसामान्य जनतेपर्यंत पोहोचण्यासाठी, त्या योजनांचा प्रचार व प्रसार होण्यासाठी ठेवण्यात आल्या. महाशिबीराद्वारे ४० हजारावर नागरिकांना लाभ झाला.

प्रमुख जिल्हा न्यायाधिश तथा विधी सेवा प्राधिकरणाचे अध्यक्ष संजय देशमुख यांच्या नियोजनाखाली जिल्ह्यात झालेल्या उपक्रमाला चांगला प्रतिसाद मिळाला अशी माहिती विधी सेवा प्राधिकरणाचे सचिव पी. डी. सावंत यांनी दिली.

तीनही लोकअदालतीमधील प्रकरणांची माहिती
१ऑगस्ट २०२१ रोजी झालेल्या लोकअदालतीमध्ये प्रलंबित ३२ हजार ५२० व दाखलपूर्व ४८ हजार ६८० प्रकरणे ठेवण्यात आली, प्रलंबित प्रकरणांपैकी १५ हजार ५६२ तर दाखलपूर्व १७ हजार ४९९ अशी एकूण ३३ हजार ६१ प्रकरणे निकाली काढण्यात आली.

*२५ सप्टेंबर २०२१ रोजीच्या लोकअदालतीमध्ये प्रलंबित ४९ हजार ७७ व दाखलपूर्व १ लाख १६ हजार ५५ प्रकरणे ठेवण्यात आली, प्रलंबित प्रकरणापैकी ८ हजार ७९७ तर दाखलपूर्व ७५ हजार ८५२ अशी एकूण ८४ हजार ६५० प्रकरणे निकाली काढण्यात आली.

*११ डिसेंबर २०२१ रोजीच्या लोकअदालतीमध्ये प्रलंबित ५३ हजार ७०६ व दाखलपूर्व २ लाख २४ हजार ५४७ प्रकरणे ठेवण्यात आली. प्रलंबित प्रकरणापैकी ८ हजार ७७१ तर दाखलपूर्व ४० हजार ४७५ अशी एकूण ४९ हजार २४६ प्रकरणे निकाली काढण्यात आली.

*२०२१ या वर्षात झालेल्या तीन्ही लोकअदालतीमध्ये १ लाख ३५ हजार ३०३ प्रलंबित तर ३ लाख ८९ हजार २८२ दाखलपूर्व प्रकरणे ठेवण्यात आली. त्यापैकी ३३ हजार १३० प्रलंबित तर १ लाख ३३ हजार ८२६ दाखलपूर्व प्रकरणे निकाली काढण्यात आली. एकूण १ लाख ६६ हजार ९५७ प्रकरणे तीन्ही लोक अदालतीमध्ये निकाली काढण्यात आली.

पुणे दि. 13: पर्यटनवृद्धीला चालना तसेच स्थानिक युवकांना रोजगार अशा दुहेरी हेतूने राज्यातील 14 प्रसिद्ध पर्यटन स्थळी पर्यटन सुलभ मार्गदर्शक (ट्रॅव्हल गाईड) प्रशिक्षण कार्यक्रम महाराष्ट्र पर्यटन संचालनालयाच्यावतीने राबवण्यात येणार आहे. जिल्ह्यातील जुन्नर तालुक्याचा या 14 पर्यटन स्थळांमध्ये समावेश आहे. या प्रशिक्षणासाठी भाग घेऊ इच्छिणाऱ्या युवक- युवतींनी 31 डिसेंबरपर्यंत ऑनलाईन अर्ज करावा असे आवाहन करण्यात आले आहे.

आपल्या गावचे किल्ले, डोंगर, दऱ्या, मंदिरे, एखादे ऐतिहासिक संग्रहालय किंवा सामाजिक, सांस्कृतिक, नैसर्गिक वरदान लाभलेल्या कोणत्याही स्थळाची माहिती संकलित करण्याच्या आवडीला करिअर मध्ये रूपांतरित करण्याची चांगली संधी महाराष्ट्र पर्यटन संचालनालय (डीओटी) घेऊन आले आहे. स्थानिक प्रसिद्ध पर्यटन स्थळी पर्यटकांसाठी टूर गाईडची व्यवस्था करून या माध्यमातून स्थानिक युवकांना रोजगार मिळवून देण्याच्या दुहेरी हेतूने राज्यातील तब्बल 14 प्रसिद्ध पर्यटन स्थळी पर्यटन सुलभ मार्गदर्शक (ट्रॅव्हल गाईड) प्रशिक्षण कार्यक्रम राबवण्यात येणार आहे. यामध्ये जुन्नर (पुणे) ठिकाणाचा समावेश असणार आहे.

सुलभ मार्गदर्शक प्रशिक्षण उपक्रमाच्या अंतर्गत इंडियन इन्स्टिट्यूट ऑफ टुरिझम व ट्रॅव्हल मॅनेजमेंट, ग्वाल्हेर तसेच महाराष्ट्र पर्यटन संचालनालयातील तज्ज्ञ प्रशिक्षणार्थीना मार्गदर्शन करतील. ज्यात मुख्यतः स्थानिक पर्यटनाची माहिती, नियम व सुरक्षा उपाययोजना पाळून पर्यटकांचा अनुभव परिपूर्ण कसा करावा तसेच पर्यटकांशी संवाद साधताना आपल्याकडील माहिती गोष्टीरूपाने कशी मांडावी याविषयी सविस्तर प्रशिक्षण दिले जाईल. यासाठी स्थानिक पर्यटन स्थळांच्या ठिकाणी हे तज्ञ प्रात्यक्षिक मार्गदर्शन करतील. पाच दिवसांचा प्रशिक्षण कालावधी पूर्ण केल्यावर प्रशिक्षणार्थीना महाराष्ट्र पर्यटन संचालनालयातर्फे प्रमाणपत्र व पुढे टूर गाईड म्हणून काम करण्यासाठी ओळखपत्र देण्यात येईल.

या प्रशिक्षणात भाग घेण्यासाठी उमेदवाराचे वय 18 वर्ष वा त्यापेक्षा अधिक असावे. शिक्षण 40 वर्षापेक्षा कमी वय असल्यास किमान 12 वी उत्तीर्ण आणि 40 वर्षापेक्षा अधिक वय असल्यास किमान 10 वी उत्तीर्ण असणे आवश्यक आहे. अधिक माहितीसाठी https://www.maharashtratourism.gov.in या संकेतस्थळाला भेट द्यावी. पात्र आणि इच्छुक उमेदवारांनी https://www.maharashtratourism.gov.in/web/mh-tourism/certified-guide-training या संकेतस्थळावर 31 डिसेंबर 2021 पूर्वी ऑनलाईन अर्ज करावा, असे आवाहन पर्यटन संचालनालयाने केले आहे.

पुणे, दि.13 : राज्य शासनाच्या सामाजिक न्याय विभागांतर्गत गोलेगाव रोड शिरूर येथील मागासवर्गीय मुलींच्या शासकीय वसतिगृहात 2021-2022 साठी अनुसूचित जाती, अनुसूचित जमाती, विजाभज, इतर मागासवर्गीय, विशेष मागास प्रवर्ग, अनाथ,अपंग आदी प्रवर्गाच्या विद्यार्थीनींना प्रवेश देण्याची प्रकिया सुरू करण्यात आली आहे.

प्रवेशासाठी विद्यार्थींनी ही बाहेरगावची परंतु शिरूरमध्ये शिक्षण घेणारी असावी. मागील वर्षी उत्तीर्ण झाल्याची गुणपत्रिका, सक्षम प्राधिकाऱ्याच्या सहीचे जातीचे प्रमाणपत्र, तहसीलदारांच्या स्वाक्षरीचे वडिलांचे उत्पन्नाचे प्रमाणपत्र, महाराष्ट्र निवासाचे प्रमाणपत्र, तसेच महाविद्यालयाचे बोनाफाईड प्रमाणपत्र, मुलीचे आणि वडिलांचे आधारकार्ड, शिधापत्रिकेची सत्यप्रत अर्जासोबत जोडावी. कोविड-19 आजाराबाबत वडिलांचे व विद्यार्थींनीचे लेखी संमतीपत्रक असावे. शाळा अथवा महाविद्यालय प्रत्यक्ष सुरू असल्याबाबत मुख्याध्यापक किंवा प्राचार्यांचे लेखी हमीपत्र देखील अर्जासोबत असणे आवश्यक आहे.

शासकिय वसतिगृहात विनामुल्य निवास व भोजनाची सुविधा आहे. शासनाने ठरवून दिलेल्या दराने पुस्तके, शैक्षणिक साहित्य, निर्वाह भत्ता आदीकरिता रक्कम आधार क्रमांक जोडलेल्या विद्यार्थ्याच्या बचत खात्यावर जमा होते.

कोविड-१९ महामारीमुळे रिक्त जागेच्या ५० टक्केच जागा भरल्या जाणार आहेत. बाहेरगावाकडील परंतु शिरूर जि. पुणे परिसरात शिक्षण घेणाऱ्या गरीब होतकरू विद्यार्थ्यांनी अर्ज भरण्याकरिता वसतिगृहात येऊन नोंदणी करावी, असे आवाहन गृहपाल श्रीमती आर.व्ही.साखरे यांनी केले आहे.

पुणे,दि.१३: उच्च व तंत्र शिक्षण विभागाच्या माध्यमातून तंत्रज्ञानाची किमया ग्रामीण भागापर्यंत पोहोचविण्यात येत आहे. शिक्षणसंस्थांनी विद्यार्थी केंद्रबिंदू मानून उच्च व तंत्रशिक्षण विभागाच्या माध्यमातून तंत्रज्ञानाने सक्षम पिढी घडविण्यासाठी काम करावे, असे आवाहन उच्च व तंत्र शिक्षण मंत्री उदय सामंत यांनी केले.

शासकीय अभियांत्रिकी महाविद्यालयातील सभागृहात आयोजित शासकीय अभियांत्रिकी पदविका संस्थांच्या प्रायार्य व सहसंचालकांच्या कार्यशाळेत ते बोलत होते. यावेळी उच्च व तंत्र शिक्षण विभागाचे संचालक अभय वाघ, उपसचिव सतिष तिडके, महाराष्ट्र राज्य तंत्र शिक्षण मंडळाचे (एमएसबीटीई) संचालक डॉ. विनोद मोहितकर, सहसंचालक प्रमोद नाईक, दत्तात्रय जाधव उपस्थित होते.

श्री. सामंत म्हणाले, तंत्रशिक्षणाच्या माध्यमातून महाराष्ट्राला प्रगतीच्या दिशेने नेणारी पिढी घडविण्यावर भर देण्यात येत आहे. विद्यार्थ्यांना शासकीय महाविद्यालयात सर्व सोईसुविधा मिळाल्या पाहीजेत, यासाठीचा आराखडा तयार करावा. महाविद्यालयाचा परिसर स्वच्छ आणि आवश्यक सुविधांनीयुक्त राहील यासाठी प्रयत्न करावे. विद्यार्थी आणि पालक आकर्षित होतील असा परिसर असाव. त्यासोबतच नवे ज्ञान आणि नव्या कल्पनादेखील विद्यार्थ्यांपर्यंत पोहोचवाव्यात, असेही त्यांनी सांगितले.

कोरोना कालावधीत उच्च व तंत्र शिक्षण विभागातील प्राचार्यांच्या नियोजनाने ऑक्सीजन ऑडीटचे अत्यंत चांगले काम केले आहे. त्यामुळे कोरोना कालावधीत ऑक्सीजनचे नियोजन सुलभ झाल्याचा उल्लेख करून मंत्री सामंत म्हणाले, महाविद्यालयाचा परिसर सुसज्ज असला पाहीजे. विद्यार्थ्यांच्या सुरक्षेला शासनाचे सर्वाधिक प्राधान्य आहे. विद्यार्थी व पालकांना बरोबर घेत शैक्षणिक वातावरण अधीक चांगले करण्यासाठी प्राचार्यांनी भूमिका महत्त्वपूर्ण ठरेल. कार्यशाळेत भविष्यातील शैक्षणिक प्रगती कशी असावी, तसेच शैक्षणिक क्षेत्रातील महत्त्वाच्या विषयावर मंथन व्हावे, अशी अपेक्षाही त्यांनी व्यक्त केली.

महाविद्यालयीन विद्यार्थ्यांना नियमित शिक्षणासोबतच कौशल्य आधारित शिक्षण मिळावे आणि नवीन कौशल्य आधारित तांत्रिक शिक्षणाचा विद्यार्थ्यांना रोजगार उपलब्धीसाठी उपयोग व्हावा म्हणून उच्च व तंत्रशिक्षण विभागाने इन्फोसिस कंपनीसोबत सामंजस्य करार केला असल्याचेही मंत्री सामंत म्हणाले.

उच्च व तंत्र शिक्षण विभागाचे संचालक अभय वाघ यांनी प्रास्ताविक करताना उच्च व तंत्र शिक्षण विभागाच्या उपक्रमाबाबत माहिती दिली. उच्च व तंत्र शिक्षण विभागातर्फे रोजगारावर आधारीत अभ्यासक्रम सुरू करण्यात येणार असल्याचे त्यांनी सांगितले.

यावेळी राज्यातील अभियांत्रिकी पदविका संस्थांचे प्राचार्य, सहसंचालक तसेच ‘एमएसबीटीई’चे अधिकारी उपस्थित होते.