पुणे:पुणे महानगरपालिकेची प्रभागरचना रद्द करण्यात आली आहे. निवडणूक आयोगाच्या आदेशानुसार निवडणूक प्रक्रिया राबविण्यास सुरूवात झाली होती. यानुसार १ फेब्रुवारी रोजी प्रभाग रचना जाहीर देखील करण्यात आली होती.

मात्र आता प्रभागरचना रद्द करण्याचा निर्णय घेण्यात आलाय.ओबीसी आरक्षण निश्चित करण्याचा प्रश्न लांबला आहे. राज्य सरकारने नुकताच अध्यादेश काढून मुदत संपणाऱ्या स्थानिक स्वराज्य संस्थांच्या निवडणुकीचे सर्व अधिकार आपल्या ताब्यात घेतले आहेत. त्यामुळे पुण्यासह चौदा महापालिका निवडणुकीसाठी तयार करण्यात आलेली प्रभाग रचनाही रद्द करण्यात आली आहे, तसा आदेश नुकताच पालिका प्रशासनाला प्राप्त झाला आहे.

राज्य सरकारने मुंबई महानगरपालिका, महाराष्ट्र महानगरपालिका आणि महाराष्ट्र नगर परिषद, नगर पंचायत अधिनियमात सुधारणा केल्या आहेत. आता सर्व स्थानिक स्वराज्य संस्था, राज्य सरकारला निवडणुका, आरक्षण आणि निवडणूक प्रक्रियेचे नियोजन करण्याचे सर्व अधिकार आहेत. त्यामुळे राज्य निवडणूक आयोगाने आता महापालिका निवडणुकीसाठी केलेली प्रभाग रचना रद्द केली आहे. तसा अध्यादेश प्रसिद्ध करण्यात आला.

पुणे : जिल्ह्यातील हवेली तालुक्यात १६० गावांचा समावेश असून अंदाजे ४० लाख लोकसंख्येची वस्ती आहे.वाढते शहरीकरण व वाढत्या प्रशासकीय कामकाजामुळे लोणी काळभोर येथे अपर तहसिलदार कार्यालय स्थापन करण्याच्या प्रस्तावावर शासन सकारात्मक निर्णय घेईल, असे महसूल मंत्री बाळासाहेब थोरात यांनी विधानसभेत सांगितले.

विधानसभेत सदस्यभीमराव तापकीर आणि ॲड. अशोक पवार यांनी पुणे जिल्ह्यातील हवेली तालुक्याचे विस्तारीकरण, नागरिकीकरण, विकास पाहता प्रशासकीय यंत्रणा तोकडी पडत असल्यासंदर्भात लक्षवेधी मांडली. या लक्षवेधीस उत्तर देताना महसूल मंत्री बाळासाहेब थोरात म्हणाले, वाढती लोकसंख्या आणि शहरीकरणामुळे यापूर्वी पिंपरी -चिंचवड येथे अपर तहसिलदार कार्यालय स्थापन करण्यास मान्यता देण्यात आली आहे. त्यानुसार मूळ हवेली कार्यालय व अपर तहसिल कार्यालय पिंपरी-चिंचवड या कार्यालयांमार्फत सद्यस्थितीत कामकाज सुरू आहे. लोणी-काळभोर येथे अपर तहसिलदार कार्यालय स्थापन करण्याच्या प्रस्तावावर तातडीने निर्णय घेण्यात येणार आहे. १६० गावांमध्ये ४६ तलाठी कार्यरत आहेत. ३१६५ तलाठी पदे भरण्यासाठी शासनाने मंजुरी दिली असून, याअंतर्गत संबंधित भागातील तलाठ्यांची रिक्त पदे तातडीने भरण्यात येतील असेही महसूल मंत्री थोरात यांनी सांगितले.

मृतांच्या कुटुंबियांचे सांत्वन, कुटुंबियांना तातडीने मदत देण्याचे निर्देश

पुणे, दि. 14 –  कदमवाक वस्ती येथे  ड्रेनेज लाइनचे काम करत असताना 2 मार्च रोजी चार कामगारांच्या गुदमरून मृत्यू झाल्याच्या दुर्घटनेबाबत राष्ट्रीय सफाई कामगार आयोगाचे सदस्य डॉ. पी. पी. वावा यांनी आढावा घेतला. त्यांनी दुर्घटनेत मृत पावलेल्या व्यक्तींच्या कुटुंबियांशीही चर्चा करून सांत्वन केले. कुटुंबीयांना तात्काळ मदत देण्याचे निर्देशही त्यांनी यंत्रणेला दिले.

या बैठकीला उपविभागीय अधिकारी संजय आसवले,  सहायक पोलीस आयुक्त बजरंग देसाई, डॉ.सुधाकर पानीकर, समाजकल्याणच्या सहाय्यक आयुक्त संगिता डावखर, सरपंच श्रीमती गौरी गायकवाड,  दक्षता समितीचे सदस्य ॲड. सागर चरण, पोलीस निरीक्षक राजेंद्र मोकाशी, गट विकास अधिकारी प्रशांत शिर्के,  ग्रामसेवक अमोल घोळवे आदी उपस्थित होते.

श्री. वावा म्हणाले, कदमवाक वस्ती येथे घडलेली घटना अत्यंत दुर्दैवी आहे. घटनेतील मृत व्यक्तीच्या कुटुंबातील सदस्याला तातडीने मदत झाली पाहीजे. त्यांना आर्थिक मदतीसोबतच पक्के घर, रोजगार याबाबतही तातडीने कार्यवाही करण्यात यावी. यापुढे अशा घटना घडणार नाहीत, याबाबत दक्षता घेण्याची गरज असल्याचे ते म्हणाले.

ग्रामपंचायत कर्मचारी संख्या, कर्मचारी विमा योजना, एकूण कार्यरत सफाई कर्मचारी,तात्पुरते कर्मचारी,त्यांचे वेतन आदींचाही त्यांनी आढावा घेतला.

पोलीस निरीक्षक राजेंद्र मोकाशी यांनी घटनेबाबत सविस्तर माहिती दिली. तसेच कुटुंबियांना मदत करण्यासाठी सुरू असलेल्या कार्यवाहीबाबत गटविकास अधिकारी प्रशांत शिर्के यांनी माहिती दिली.

यावेळी पोलीस, ग्रामपंचायत तसेच महसूल यंत्रणेचे प्रमुख अधिकारी उपस्थित होते.

पुणे, दि. 14 : जिल्हाधिकारी कार्यालयाच्या प्रांगणात तसेच तालुका पातळीवर  मंगळवार 15 मार्च रोजी जागतिक ग्राहक दिनाचे आयोजन करण्यात येणार आहे, अशी माहिती जिल्हा पुरवठा अधिकारी सुरेखा माने यांनी दिली आहे.

जिल्ह्यातील विविध शासकीय कार्यालयातील योजना व तक्रार निवारणाबाबत प्रदर्शन आयोजित करण्यात येणार आहे. ग्राहकांमध्ये जागृतीच्यादृष्टीने वस्तू व सेवा खरेदी करताना दर्जा तसेच वजनमापांमध्ये होणाऱ्या फसवणूकीपासून सावधानता बाळगण्याबाबत संदेश तसेच ग्राहक हक्कांचे संरक्षण व संवर्धन करण्यासाठी, ग्राहकांच्या जबाबदाऱ्या, कर्तव्ये याबाबतचे संदेश व माहिती देणारे विविध शासकीय कार्यालयांचे स्टॉल्स यावेळी उभारण्यात येणार आहेत.  लोककला व पथनाट्याचे सादरीकरणही यावेळी करण्यात येणार आहेत.

पुणे, 14 मार्च: कोविडच्या साथीमुळे सुमारे दोन वर्षांसाठी टेनिसचा सराव आणि स्पर्धांना मुकल्यानंतर पीएमडीटीए यांच्या वतीने व एमएसएलटीए यांच्या सहकार्याने सुमारे डझनभर राष्ट्रीय मानांकन टेनिस स्पर्धांचे आयोजन करण्यात येणार असून यामुळे पुन्हा एकदा एका व्यस्त वेळापत्रकाचा आनंद घेता येणार आहे.    पीएमडीटीएचे मानद सचिव अभिषेक ताम्हाणे म्हणाले की, भारतीय टेनिसचा केंद्रबिंदू असलेल्या पुणे जिल्ह्यात 8 चॅम्पियन सिरीज(7 दिवसीय) टेनिस स्पर्धा, 4 सुपर सिरीज टेनिस स्पर्धा आणि 1 आयटीएफ वरिष्ठ टेनिस स्पर्धेचे आयोजन करण्यात आले आहे. याशिवाय एप्रिलमध्ये पीवायसी हिंदू जिमखानाच्या वतीने लेव्हल 4 आयटीएफ कोचिंग स्कुल आणि एसपी गोसावी मेमोरियल आंतरक्लब टेनिस स्पर्धेचे आयोजन करण्यात येणार आहे.  याचबरोबर 10 वर्षाखालील पीएमडीटीए राज्य मानांकन टेनिस स्पर्धा व याच कालावधीत वरिष्ठ टेनिस स्पर्धांचेदेखील आयोजन करण्यात येणार आहे.   
एमएसएलटीएचे मानद सचिव सुंदर अय्यर म्हणाले की, टेनिस विश्वाच्या पुनरागमनामुळे आम्हाला अत्यंत आनंद होत असून पुणे आणि महाराष्ट्रात येत्या काही महिन्यात पावसाळ्यापूर्वीपर्यंत पार पडणाऱ्या सलग स्पर्धांमुळे आमच्या खेळाडूंना लय गवसण्यासाठी व त्याचबरोबर लागोपाठच्या स्पर्धांमुळे खेळाडूंना आपले मानांकन सुधारण्यासाठी निश्चितच मदत होणार आहे. 
स्पर्धेची यादी खालीलप्रमाणे: सोमवार, 18 एप्रिल, 2022 या आठवड्यात: 12 वर्षाखालील चॅम्पियन सिरीज( 7दिवसीय) टेनिस स्पर्धा; 16 वर्षाखालील चॅम्पियन सिरीज( 7दिवसीय) टेनिस स्पर्धा; 
सोमवार, 25 एप्रिल, 2022 या आठवड्यात 
18 वर्षाखालील सुपर सिरीज टेनिस स्पर्धा; 
सोमवार, 2 मे 2022 या आठवड्यात आयटीएफ वरिष्ठ टेनिस स्पर्धा; 12 वर्षाखालील सुपर सिरीज टेनिस स्पर्धा; 
18 वर्षाखालील  चॅम्पियन सिरीज( 7दिवसीय) टेनिस स्पर्धा; 
सोमवार, 9 मे, 2022 या आठवड्यात 
14  वर्षाखालील सुपर सिरीज टेनिस स्पर्धा; 
सोमवार, 23 मे, 2022 या आठवड्यात 
16वर्षाखालील सुपर सिरीज टेनिस स्पर्धा; 
सोमवार, 30 मे, 2022 या आठवड्यात 14वर्षाखालील चॅम्पियन सिरीज( 7दिवसीय) टेनिस स्पर्धा; 

सोमवार, 6 जुन, 2022 या आठवड्यात 
12 वर्षाखालील चॅम्पियन सिरीज( 7दिवसीय) टेनिस स्पर्धा; 
16 वर्षाखालील चॅम्पियन सिरीज( 7दिवसीय) टेनिस स्पर्धा. 

पुणे : वंचित विकास संस्थेतर्फे विपरीत परिस्थितीवर मात करून ‘पुनश्च हरिओम’ करणाऱ्या छोट्या व्यावसायिकांच्या विविध उत्पादनांचे प्रदर्शन बालगंधर्व रंगमंदिर येथे सुरु झाले. मंगळवारपर्यंत (दि. १५) सकाळी ९ ते रात्री ८ या वेळेत हे प्रदर्शन सर्वांसाठी विनामूल्य खुले असणार आहे. नगरसेविका ऍड. गायत्री खडके व माधुरी सहस्त्रबुद्धे यांच्या उपस्थितीत या प्रदर्शनाचे उद्घाटन झाले. प्रसंगी वंचित विकास संस्थेच्या मीना कुर्लेकर, सुनीता जोगळेकर, मीनाक्षी नवले, देवयानी गोंगले आदी उपस्थित होते.
कोरोनाच्या काळात छोट्या व्यावसायिकांना वंचित विकास संस्थेकडून त्यांचा व्यवसाय पुन्हा सुरु करण्यासाठी अर्थसाह्य केले होते, त्यांचे तसेच छोट्या व्यावसायिकांच्या (प्राधान्याने स्त्री व्यावसायिकांची) उत्पादनांचे प्रदर्शन भरविले आहे. एकूण २५ स्टॉल असून यामध्ये खाद्यपदार्थ, कपडे, कलाकुसरीच्या वस्तू, ज्वेलरी, पर्स, बॅग्ज, हार्बल कॉस्मेटिक्स, सेंद्रिय भाजी, धान्य, गिर गाईचे तूप, मेंदी इ. चा समावेश आहे. तसेच ई-वेस्ट व सामाजिक संस्थेची माहिती देणारे स्टॉल आहेत.

व्यावसायिकांच्या पाठीशी खंबीरपणे उभे राहत वंचित विकास संस्थेने त्यांना आधार दिला आहे. आता कोरोनाचे संकट कमी झाल्यानंतर हे व्यावसायिक जिद्दीने उभे राहताहेत, ही आनंदाची बाब आहे. पुणेकर नागरिकांनी अशा छोट्या व्यावसायिकांच्या प्रदर्शनाला प्रतिसाद देऊन, त्यांच्याकडून उत्पादने खरेदी करावीत व त्यांना हातभार लावावा, असे आवाहन ऍड. गायत्री खडके व माधुरी सहस्रबुद्धे यांनी केले.