पुणे, दि. ३: राज्य शासनाने गेल्या दोन वर्षात केलेल्या विकासकामे, राबविण्यात आलेल्या योजनांची माहिती सर्वसामान्य जनतेला व्हावी यासाठी आयोजित ‘दोन वर्षे जनसेवेची महाविकास आघाडीची’ या प्रदर्शनाला गावागावातील नागरिक आणि विशेष करून महिलांनी आवर्जून भेट द्यावी,असे आवाहन विधान परिषदेच्या उपसभापती डॉ. नीलम गोऱ्हे यांनी केले.डॉ. गोऱ्हे यांनी जिल्हाधिकारी कार्यालयात आयोजित प्रदर्शनाला भेट देऊन सर्व चित्रमय फलकांवरील माहिती जाणून घेतली. यावेळी उपविभागीय अधिकारी देशमुख, माहिती उपसंचालक डॉ. राजू पाटोदकर, जिल्हा माहिती अधिकारी डॉ. किरण मोघे, पोलीस निरीक्षक अश्विनी सातपुते उपस्थित होते.

डॉ.गोऱ्हे म्हणाल्या, कोरोना काळात शासनाने महत्वाचे निर्णय घेतले. डॉक्टर मंडळींचा टास्क फोर्स तयार करून वैद्यकीय सेव जलदगतीने देण्याचा प्रयत्न केला. कोरोना नियंत्रणासोबतच इतरही विकासकामे केलीत, तसेच नवनवीन योजना सुरू केल्या. माहिती व जनसंपर्क महासंचालनालयच्या या प्रदर्शनात सर्व योजनांची माहिती मिळते. सचित्र माहिती असल्याने ती सर्वसामान्यांना अतिशय उपयुक्त अशी आहे. त्यामुळे गावागावातील नागरिक, महिला,युवक यांनी या प्रदर्शनाला आवर्जून भेट द्यावी, असे आवाहनही त्यांनी केले.

माहिती व जनसंपर्क विभागाच्या प्रदर्शनाला महिलांनी स्वतः भेट देत माहिती घ्यावी व इतर महिलांनाही समाज माध्यमातून आवाहन करावे,
सर्वसामान्य नागरिकांनी या ठिकाणी भेट देऊन सरकारने केलेल्या कामांची माहिती घ्यावी. योजनांचा लाभ घेण्यासाठी ही माहिती उपयुक्त ठरेल,असे त्यांनी सांगितले.

यावेळी उपसभापती डॉ.गोऱ्हे यांनी राज्यातील जनतेला रमजान ईद आणि अक्षयतृतीयेच्या पार्श्वभूमीवर शुभेच्छाही दिल्या. श्रीमती गोऱ्हे यांनी यावेळी ३६० अंश सेल्फी घेतली.

तत्पूर्वी डॉ.गोऱ्हे यांनी महात्मा बसवेश्वर जयंतीनिमित्त जिल्हाधिकारी कार्यालयात महात्मा बसवेश्वर यांच्या प्रतिमेला अभिवादन केले.

दि. ५ मे रोजी उद्योजक डॉ. मिलिंद कांबळे यांना विशेष पुरस्कार

पुणे – छत्रपती राजर्षी शाहू महाराजांच्या स्मृतीशताब्दी वर्षाचा प्रारंभ, शुक्रवार  दि. ६ मे २०२२ पासून होत असून, त्याच्या पूर्वसंध्येला पुण्यात गुरुवार दि. ५ मे रोजी सायं. ५.३० वाजता, पत्रकार भवन हॉल (पहिला मजला) येथे आयोजित विशेष कार्यक्रमात दलित इंडियन चेंबर ऑफ कॉमर्स अँड इंडस्ट्रीजचे संस्थापक अध्यक्ष डॉ. मिलिंद कांबळे यांना विशेष पुरस्काराने गौरवले जाणार आहे.

सावित्री बाई फुले पुणे विद्यापीठाचे कुलगुरू मा. नितीन करमळकर यांच्या अध्यक्षते खाली हा समारंभ होईल. पगडी, मानपत्र, शाल व पुस्तक असे या पुरस्काराचे स्वरूप आहे. संवाद पुणे आणि समर्थ युवा फौंडेशन यांच्या संयुक्तविद्यमाने याचे आयोजन करण्यात आले आहे, अशी माहिती संवाद पुणेचे अध्यक्ष सुनील महाजन व समर्थ युवा फौंडेशनचे अध्यक्ष राजेश पांडे यांनी सांगितली.

छत्रपती राजर्षी शाहू महाराज (जून २६, इ.स. १८७४ – मे ६, इ.स. १९२२) कोल्हापूर संस्थांचे छत्रपती व थोर समाजसुधारक होते. ब्रिटिश राजसत्तेच्या काळामध्ये सामान्य जनतेला न्याय मिळवून देण्यासाठी व बहुजन समाजाच्या सामाजिक उन्नतीसाठी या काळामध्ये शाहू राजांनी प्रयत्न केले. सामाजिक परिवर्तनाला गती प्राप्त करून दिली. त्यांनी दलित व मागासवर्गीय समाजाच्या विकासासाठी महत्त्वाची भूमिका बजावली. त्यामुळेच यंदा दलित इंडियन चेंबर ऑफ कॉमर्स अँड इंडस्ट्रीजचे संस्थापक अध्यक्ष डॉ. मिलिंद कांबळे यांना छत्रपती राजर्षी शाहू महाराजांच्या स्मृती शताब्दी वर्ष प्रारंभ निमित्त गौरविले जाणार आहे असे सुनील महाजन व राजेश पांडे म्हणाले.

डॉ. मिलिंद कांबळे हे सिव्हील इंजिनियर व उद्योजक असून, दलित इंडियन चेंबर ऑफ कॉमर्स अँड इंडस्ट्रीजची स्थापना २००५ मध्ये त्यांनी पुण्यात केली. ते संस्थापक अध्यक्ष आहेत. सन २०१३ मध्ये त्यांना पद्मश्री पुरस्काराने गौरविण्यात आले. भारतरत्न डॉ बाबासाहेब आंबेडकर यांच्या विचाराने प्रेरित होऊन दलित समाजातील तरुणांना उद्योजक होण्यासाठी प्रेरणा देऊन त्यांची व समाजाची आर्थिक उन्नती व्हावी यासाठी ते प्रयत्न करतात. त्यांच्या प्रयत्नांमुळे संस्थेचा कारभार देशातील सर्व २९ राज्ये व ७ परदेशांमध्ये पसरला आहे.

पुणे : मोग-यासह सुवासिक फुलांचा श्री महालक्ष्मी देवीला घातलेला पोशाख… श्री महासरस्वती व श्री महाकाली देवीचे पुष्पाभिषेक केल्यानंतर दिसणारे विलोभनीय रुप… मंदिराचा गाभारा व सभामंडपातील विविधरंगी पुष्पांची आरास पाहण्याकरीता देवीभक्तींनी गर्दी केली. सारसबागेसमोरील श्री महालक्ष्मी मंदिराच्या परिसरात मोग-याच्या हजारो फुलांचा सुगंध दरवळत होता. यावेळी आंबा महोत्सव देखील साजरा करण्यात आला. 
निमित्त होते, श्री महालक्ष्मी मंदिर, श्री बन्सीलाल रामनाथ अग्रवाल धार्मिक व सांस्कृतिक ट्रस्ट च्यावतीने अक्षयतृतीयेच्या निमित्ताने वासंतिक मोगरा व आंबा महोत्सवाचे. यावेळी ट्रस्टचे संस्थापक विश्वस्त राजकुमार अग्रवाल, प्रमुख विश्वस्त अमिता अग्रवाल, विश्वस्त अ‍ॅड.प्रताप परदेशी, हेमंत अर्नाळकर, विश्वस्त नगरसेवक प्रविण चोरबेले आदी उपस्थित होते. 
मोग-याच्या फुलांनी मंदिराचा परिसर खुलून गेला होता. तब्बल १५१ किलो मोगरा, २५१ गुलाबाच्या फुलांच्या गड्डया, चाफा, जाई-जुई, गुलछडी, झेंडू यांसह अनेक फुलांची आरास करण्यात आली. तसेच मंदिरात आंबा महोत्सव देखील साजरा करण्यात आला. तब्बल २ हजार आंब्याचा महानैवेद्य देवीला दाखविण्यात आला होता. श्री महालक्ष्मी देवीसह श्री महासरस्वती व श्री महाकाली देवीसमोर आंब्याचा महानैवेद्य दाखविण्यात आला. फुलांची आरास आणि आंबा महोत्सव पाहण्याकरीता पुणेकरांनी मोठया संख्येने गर्दी केली. सामाजिक संस्थांना आंबे प्रसाद म्हणून देणार असल्याचे ट्रस्टतर्फे सांगण्यात आले.  

पुणे-जितेंद्र भुरुक यांनी गायलेली गाणी मी ऐकली आहे आणि त्यांचा आवाज किती अद्भूत आहे हे त्यावेळी लक्षात आले. एक करिश्मा किशोर कुमार होते आणि एक करिश्मा जितेंद्र भुरुक आहेत. त्यांच्या सादरीकरणात जादू असते. त्यांचे नशीब किशोर कुमारांसारखे नसले तरीही आवाज त्यांच्यासारखा आहे. त्यांना कुणीही थांबवू शकत नाही. प्रगतीच्या दिशेने हा प्रवास असाच पुढे जात राहो, अशी भावना ज्येष्ठ अभिनेते जितेंद्र यांनी व्यक्त केली. गायक जितेंद्र भुरुक यांच्या सत्कारावेळी ते बोलत होते. गायक किशोर कुमार यांची ८९ गाणी सलग ११ तास गाऊन आणि एकाच दिवशी ५ वेगवेगळ्या थिएटरमध्ये १३५ गाणी सादर करून विश्वविक्रम केल्यानिमित्त ज्येष्ठ अभिनेते जितेंद्र कपूर यांच्या हस्ते गौरव करण्यात आला.

गणेश कला क्रीडा रंगमंच येथे रविवारी (१ मे) झालेल्या या कार्यक्रमात संगीतकार इनोक डॅनिअल, अभिनेता स्वप्नील जोशी, माजी महापौर मुरलीधर मोहोळ, माजी उपमहापौर दीपक मानकर, डी. वाय. पाटील विद्यापीठाचे कुलगुरू डॉ. पी. डी. पाटील, गिनीज फाउंडेशनचे अध्यक्ष पवन सोळंकी, तबलावादक पद्मश्री सुरेश तळवलकर, अभिनेता प्रवीण तरडे, समाजसेविका शोभा धारीवाल, मनिष साबडे आदी यावेळी उपस्थित होते. भुरुक यांना ‘गिनीज बूक ऑफ वर्ल्ड रेकॉर्ड’तर्फे यावेळी मानपत्र आणि मेडल प्रदान करण्यात आले व सत्कार समितीतर्फे शिंदेशाही पगडी आणि शेला देऊन सन्मान करण्यात आला. तसेच जनरल पोस्ट ऑफिसतर्फे जिंतेद्र भुरुक यांच्या नावे पोस्ट तिकीट काढण्यात आले असून त्याचे अनावरण याप्रसंगी करण्यात आले. गिनीज फाउंडेशनचे सोळंकी या रेकॉर्डबद्दल माहिती देताना म्हणाले, आतापर्यंत आमच्याकडे तीन हजारांहून अधिक रेकॉर्डची नोंद झालेली आहे. मात्र लाइव्ह बँडसह गाण्यांचा रेकॉर्ड करण्याचा हा पहिलाच प्रयोग होता. या प्रयोगाबद्दल एकून आम्ही आधी चक्रावलो. परंतु, जेव्हा तो यशस्वी झाला तेव्हा आम्हा सगळ्यांना आनंद झाला. पद्मश्री सुरेश तळवलकर म्हणाले, कलेतून भावनांपर्यंत पोहोचता येते. कला ही प्रत्येकाच्या मनावर राज्य करते आणि जितेंद्र भुरुक आपल्या कलेतून हेच काम करीत आहे. आपल्या भावना व्यक्त करताना जितेंद्र भुरुक म्हणाले, गाणे हा माझा श्वास आहे. किशोरदांची गाणी न गाता जगणे माझ्यासाठी कठीण आहे. या रेकॉर्डसाठी माझे सहकारी, मित्र, वाद्यवृंद, आर्टिस्ट या सगळ्यांचा पाठिंबा मिळाला आणि त्यांचामुळेच हे शक्य झाले. त्या सगळ्यांचा मी आभारी आहे. या सोहळ्यामुळे मला प्रोत्साहन मिळाले आहे आणि यापुढे काम करण्याची ऊर्जा मिळाली आहे. कार्यक्रमाचे प्रास्ताविक दीपक मानकर यांनी केले तर सूत्रसंचालन मिलिंद कुलकर्णी यांनी केले. सत्कार सोहळ्यानंतर जितेंद्र भुरुक यांच्या ‘गीत गाता हूँ मैं’ या कार्यक्रमाचे सादरीकरण झाले. या कार्यक्रमाला प्रेक्षकांची मोठ्या प्रमाणात उपस्थिती लाभली.

‘कामगार अस्तित्व रॅली’त राज्यभरातून लाखो कामगार सहभागी

पिंपरी, 2 मे – ” महाराष्ट्राच्या स्थापनेनंतर अनेक सरकारे आली, गेली पण कामगारांचे प्रश्न सुटले नाहीत. कामगारांना न्याय मिळाला नाही. ही देशाची मोठी शोकांतिका आहे. कामगार दारात आला की मंत्र्यांच्या कपाळावर अट्या पडतात. पण, कंपनीचा मालक आला की त्यांच्यापुढे पायघड्या घातल्या जातात. सहा-सहा महिने आंदोलने करुनही कामगारांना न्याय मिळत नाही. मालकांना मात्र न्याय मिळतो. अधिका-यांच्या हातात देश गेला आहे. मंत्री त्यांना पाहिजे ते काम अधिका-यांकडून करुन घेतात. त्यांना समाजाचे काही घेणेदेणे नाही”, असा घणाघात राष्ट्रीय श्रमिक आघाडीचे संस्थापक अध्यक्ष, कामगार नेते यशवंत भोसले कामगारदिनी केला.

धार्मिक आरोप-प्रत्यारोप, राजकीय दंगा थांबवून श्रमिकांच्या प्रश्नांकडे लक्ष वेधण्यासाठी राष्ट्रीय श्रमिक आघाडीतर्फे कामगारदिनानिमित्त पिंपरी-चिंचवड शहरात भव्य ‘कामगार अस्तित्व रॅली’ काढली. राज्यभरातून हजारो कामगार या रॅलीत सहभागी झाले होते. संत तुकारामगर येथे झालेल्या सभेला राष्ट्रीय श्रमिक आघाडीचे पुणे जिल्हाध्यक्ष रमेश जेधे, अनिल कोंडे, उद्योजकांचे अध्यक्ष दिपक पाटील, राहुल शितोळे, अनिकेत भोसले, एकनाथ गायकवाड, साहेबराव भोसले, अमोल कार्ले, सिद्धार्थ कारखे, स्वानंद राजपाठक, उत्तमराव वाघमारे, दत्ता गायकवाड, सतिश एरंडे, नंदू खैरे, विलास ठोंबरे, हनुंमत जाधव, संजय साळुंखे, विठ्ठल ओझरकर, आबा खराडे, शंकर गावडे, दिपक पलंगे, संतोष टाकळे, यांच्यासह विविध कंपन्यांचे प्रतिनिधी उपस्थित होते.

कामगारांना मार्गदर्शन करताना यशवंतभाऊ भोसले म्हणाले की, ”अनेक कारखान्यांमध्ये कामगारांवर अन्याय झाला. कामगारांच्या मागण्यासाठी आंदोलनासह न्यायालयीन लढाई देखील लढलो. सर्वोच्च न्यायालयाने निकाल दिला. तरी, त्याच्या अमंलबजावणीस कंपन्यांकडून टाळाटाळ केली जाते. आंदोलन करायचे म्हटले तर उद्योजक कंपनीच्या गेटवर आंदोलन करुन देत नाहीत. न्यायालयात कामगारांच्या बाजूने निकाल लागला. तर, वरच्या न्यायालयात पाठविले जाते. पोलीस सहकार्य करत नाहीत. कामगारांच्या याचिकांवर न्यायालयात 25 -25 वर्षे तारखा पडतात. निकाल लागायला मोठा विलंब होतो. निकाल लागल्यानंतर प्रशासकीय यंत्रणा अंमलबजवणी करत नाहीत, हे कामागरांचे दुर्देव आहे. रॅलीला कामगारांनी मोठा प्रतिसाद देऊन कामगारअभी जिंदा है, कामगार एक तळपती तलवार असल्याचे सरकारला दाखवून दिले”.

”या देशाला क्रातिकांराचा मोठा इतिहास आहे. स्वातंत्र्यापूर्वी देशभक्त जन्मले. पण, स्वातंत्र्यानंतर देशाच्या 75 वर्षानंतर एकही नेता श्रमिकांसाठी जन्माला आला नाही, ही मोठी शोकांतिका आहे. राजकारण्यांनी समाजाचे प्रश्न सोडविणे, त्यांना न्याय देण्याऐवजी लोकांना धर्मांत गुंतवूण ठेवले जात आहे. मृत्यू हा अढळ, अटळ आहे. मृत्यूनंतर आपण कोणत्या धर्मात जातोल, याची कल्पना नाही. धर्मा-धर्माच्या नावाखाली द्वेष पसरुन मतांचे राजकारण केले जात आहे. त्यामुळे नागरिकांनी धार्मिक वादात गुंतून राहू नये. मतासाठी पैसे, दारु घेणे बंद करावे. त्याशिवाय नागिरकांना स्वातंत्र्याचा अर्थ कळणार नाही. समाजाने त्यागाची मूर्ती व्हावी. राजकाण्यांपुढे लोटांगण घालू नका, एकत्रित, एकजुट रहावे” अशी अपेक्षाही यशवंत भोसले यांनी केली. तसेच ”कोरोनामुळे आंदोलने थांबली होती. येत्या 15 दिवसात पोलिसांची परवानगी घेऊन कामगारांवर अन्याय करणा-या कंपन्यांच्या गेटवर आंदोलन करण्याचा इशाराही त्यांनी दिला.

उस्मानाबादच्या जिल्हाधिका-यां विरोधात न्यायालयात अवमान याचिका

”तुळजापूर येथील आई तुळजाभवानी देवीची सुरक्षा करणा-या कामगारांना किमान वेतन, साप्ताहिक सुट्टी मिळत नाहीत. याबाबत मी औरंगाबाद खंडपीठात याचिका दाखल केली होती. त्यावर न्यायालयाने कामगारांना किमान वेतन, साप्ताहिक सु्टटी देण्याचे आदेश दिले. पण, देवस्थानचे अध्यक्ष असलेले उस्मानाबादचे जिल्हाधिकारी त्याची अंमलबजावणी करत नाहीत. सनदी अधिका-यांना ठेकेदांरासोबत बैठका घ्यायला वेळ आहे. पण, श्रमिकांबाबत न्यायालयाने दिलेल्या निकालाची अंमलबजावणी करायला वेळ नाही. न्यायालयाच्या निकालाला केराची टोपली दाखविली जाते. न्यायालयाच्या आदेशाचा अवमान केल्याप्रकरणी जिल्हाधिका-यां विरोधात औरंगाबाद खंडपीठात अवमान याचिका दाखल केली आहे. आई तुळजाभवानीच्या आर्शिवार्दाने कामगारांना नक्की न्याय मिळेल”, असा विश्वास यशवंत भोसले यांनी व्यक्त केला.

राज्यभरातून 3 हजार कामगार रॅलीत झाले सहभागी

राष्ट्रीय श्रमिक आघाडीच्या संत तुकारामनगर येथील कार्यालयापासून सकाळी 10 वाजता भव्य रॅलीला सुरुवात झाली. हजारो कामगार रॅलीत सहभागी झाले होते. कै. यशवंतराव चव्हाण यांच्या पुतळ्याला अभिवादन केले. संत तुकारामगर पोलीस चौकी समोरुन -नेहरुनगर चौक-कामगारनगर-डॉ. बाबासाहेब आंबेडकर यांचा पुतळा परिसरात रॅली आली. बाबासाहेबांच्या पुतळ्याला पुष्पहार अर्पण करुन अभिवादन केले. तेथून पिंपरी चौक-कामगारनगर-नेहरुनगर-संत तुकाराम महाराज पोलीस चौकीसमोरुन संत तुकाराम महाराज प्रतिष्ठान येथे रॅलीची सांगता झाली. सुमारे 300 दुचाकी, टेम्पो, ट्रक, कार, अॅटो या वाहनांच्या माध्यमातून 3 हजार कामगार या रॅलीत सहभागी झाले होते. सुमारे अडीच तास ही रॅली चालली. संत तुकारामनगर येथे रॅलीचे सभेत रुपांतर झाले.

पुणे, दि.२: समाज माध्यमाचा निवडणूक जनजागृती कामकाजात प्रभावीपणे वापर  करण्याचा सूचना मुख्य निवडणूक अधिकारी श्रीकांत देशपांडे यांनी केल्या.

जिल्हाधिकारी कार्यालयातील बहुउद्देशीय सभागृहात जिल्ह्यातील २१ विधानसभा मतदार संघाच्या अधिकारी, कर्मचाऱ्यांसाठी आयोजित समाज माध्यम कार्यशाळेच्या प्रसंगी ते बोलत होते. यावेळी जिल्हाधिकारी डॉ. राजेश देशमुख, उपजिल्हा निवडणूक अधिकारी श्रीमती मृणालिनी सावंत आदी उपस्थित होते.

मुख्य निवडणूक अधिकारी श्री. देशपांडे म्हणाले, समाज माध्यमाच्या माध्यमातून नागरिकांना पर्यंत वस्तुनिष्ठ माहिती पोहचविण्यात यावी. संदेश अधिक प्रभावी ठरण्यासाठी ट्विटर वर कमी शब्दात आकर्षक मजकूर पोस्ट करा. समाज माध्यमे दैनंदिन वापर करुन अद्यावत ठेवा. समाज माध्यमे काळजीपूर्वक हाताळा. जिल्हानिहाय समाज माध्यमांचे गट करुन माहितीचे आदान प्रदान करत रहा, अशा सूचना त्यांनी दिल्या.

माध्यम कार्यशाळेत फेसबुक, ट्विटर, इन्स्टाग्राम आणि युट्यूबवर पोस्ट करण्याविषयी प्रात्यक्षिकाच्या माध्यमातून प्रशिक्षण देण्यात आले.