पुणे, दि. १२ : ‘शिक्षक अभियोग्यता व बुद्धीमत्ता चाचणी परीक्षा- २०२५’ उत्तीर्ण परंतु व्याहवसायिक अर्हता उत्तीर्ण झाल्याचे गुणपत्रक वा अन्य वैध कागदपत्रे मुदतीत सादर न केल्यामुळे २ हजार २०७ विद्यार्थ्यांचे निकाल रद्द करण्यात आले आहेत, असे महाराष्ट्र राज्य परीक्षा परिषदेच्या आयुक्त अनुराधा ओक यांनी कळविले आहे.

शिक्षक अभियोग्यता व बुद्धीमत्ता चाचणी परीक्षेचे अर्ज भरताना बी.एड. परीक्षेचे व डी.एल.एड. परीक्षेसाठी बसल्याचे (अपीअर्ड) अर्जात नमूद केले होते अशा विद्यार्थ्यांना या व्यावसायिक अर्हता त्याचवेळीच्या संधीत उत्तीर्ण झाल्याचे गुणपत्रक वा अन्य वैध प्रमाणपत्र सदर परीक्षा उत्तीर्ण झाल्याच्या दिनांकापासून एक महिन्याच्या आत सादर करणे अनिवार्य होते. या मुदतीत कागदपत्र सादर न केल्यामुळे निकाल राखून ठेवण्यात आलेल्या २ हजार ५३७ विद्यार्थ्यांना १५ सप्टेंबरपर्यंत व त्यानंतरही एसएमएसद्वारे कळवून २५ सप्टेंबरपर्यंत अंतिम मुदत देण्यात आली होती. यापैकी २ हजार २०७ विद्यार्थ्यांनी मुदतीत कागदपत्रे सादर केली नाहीत.

निकाल रद्द करण्यात आलेल्या उमेदवारांची यादी परीक्षा परिषदेच्या www.mscepune.in या संकेतस्थळावर प्रसिद्ध करण्यात आली असून याबाबतीत आलेल्या कोणत्याही प्रकारच्या विनंतीचा विचार सद्यस्थितीत केला जाणार नाही, असेही कळविण्यात आले आहे.
0000

पुण्यासाठी स्वतंत्र ट्रॅफिक प्लॅनर पद व समन्वय समिती स्थापनेचे आश्वासन

पुणे– शहराच्या उपनगरांमध्ये दिवसेंदिवस गंभीर होत चाललेल्या वाहतूक कोंडीचा मुद्दा आज महाराष्ट्र विधानसभेत खडकवासला मतदारसंघाचे आमदार भिमराव तापकीर यांनी लक्षवेधी सूचनेद्वारे उपस्थित केला.

सिंहगड रोड, वारजे, कोथरूड, नऱ्हे, धनकवडी, भारती विद्यापीठ परिसरात वाढती लोकसंख्या, वाहनांची झपाट्याने वाढ, डीपी व आरपी रस्त्यांचा अपूर्ण विकास तसेच चौकांवरील अतिक्रमण यामुळे वाहतूक व्यवस्थेवर मोठा ताण येत असल्याचे आमदार तापकीर यांनी सभागृहाच्या निदर्शनास आणून दिले.

या चर्चेदरम्यान त्यांनी पिंपरी–चिंचवड महापालिकेत ट्रॅफिक प्लॅनरचे पद असताना पुणे महानगरपालिकेत स्वतंत्र ट्रॅफिक प्लॅनर पद आकृतीबंधात का नाही, असा थेट प्रश्न उपस्थित केला.

यावर उत्तर देताना मंत्री महोदयांनी पुढील महत्त्वाचे निर्णय व आश्वासने दिली –

पुणे महानगरपालिकेत २४ फेब्रुवारी २०२५ रोजी वाहतूक नियंत्रणासाठी स्वतंत्र तांत्रिक सेल स्थापन करण्यात आला असून त्यात मुख्य अभियंता, अधीक्षक अभियंता, कार्यकारी अभियंता, कनिष्ठ अभियंता व ट्रान्सपोर्ट प्लॅनर यांचा समावेश आहे.

पुणे महानगरपालिकेसाठी ट्रॅफिक प्लॅनरचे पद आकृतीबंधात निर्माण करण्याबाबत सकारात्मक निर्णय घेण्याच्या सूचना देण्यात येतील, तसेच तोपर्यंत तज्ज्ञ ट्रॅफिक प्लॅनर आऊटसोर्स पद्धतीने नेमण्याचे निर्देश दिले जातील.

पुणे महानगरपालिका, पिंपरी–चिंचवड महानगरपालिका व PMRDA या तिन्ही प्राधिकरणांमध्ये समन्वय साधण्यासाठी विभागीय आयुक्त यांच्या अध्यक्षतेखाली स्वतंत्र वाहतूक समन्वय समिती स्थापन करण्यात येईल, आणि त्यामध्ये पुणे शहरातील सर्व आमदारांचा समावेश करण्यात येईल.

मान्य विकास आराखड्यातील रस्त्यांचे भूसंपादन, खर्च व रस्ता-निहाय माहिती तसेच रद्द करण्यात आलेल्या निविदांबाबतची सविस्तर माहिती अधिवेशन संपण्यापूर्वी सभागृहाच्या पटलावर ठेवण्यात येईल, असे आश्वासन मंत्री महोदयांनी दिले.

अतिवृष्टीमुळे सिंहगड रोड परिसरातील एकतानगर, विठ्ठलनगर, निंबज नगर भागात होणाऱ्या पूरस्थिती व त्याचा वाहतुकीवर होणाऱ्या परिणामाबाबतही आमदार तापकीर यांनी लक्ष वेधले. या संदर्भातील ₹३०० कोटींच्या रद्द निविदेबाबतची सविस्तर माहितीही पटलावर मांडण्यात येणार असल्याचे मंत्री महोदयांनी स्पष्ट केले.

पुणे शहर व उपनगरांतील वाहतूक समस्येवर दीर्घकालीन, तांत्रिक आणि समन्वयात्मक उपाययोजना राबविण्याची प्रक्रिया या लक्षवेधीमुळे सुरू झाली असून, हा मुद्दा शासनाने गांभीर्याने घेतल्याचे स्पष्ट झाले आहे, असे आमदार भिमराव तापकीर यांनी यावेळी सांगितले.

कोथरुड मतदारसंघातील वाचकांसाठी विशेष सवलत योजना

पुणे-तिसऱ्या पुणे पुस्तक महोत्सवाच्या पार्श्वभूमीवर कोथरुडचे आमदार आणि राज्याचे उच्च व तंत्रशिक्षण मंत्री चंद्रकांतदादा पाटील यांनी कोथरुडकर वाचनप्रेमींसाठी आनंदाची भेट देऊ केली आहे. कोथरुडकर वाचकांसाठी विशेष सवलत योजना घोषित केली असून, त्याचा कोथरुडकरांनी आवश्य लाभ घेण्याचे आवाहन ना. पाटील यांनी केले आहे.

राष्ट्रीय पुस्तक ट्रस्ट, शिक्षण मंत्रालय, भारत सरकार आणि महाराष्ट्र शासन यांच्या संयुक्त विद्यमाने ‘पुणे पुस्तक महोत्सव २०२५’ १३ ते २१ डिसेंबर २०२५ दरम्यान फर्गुसन कॉलेज येथे आयोजन करण्यात आले आहे. या महोत्सवात जास्तीत जास्त वाचकांनी भेट देऊन; आपल्या आवडत्या पुस्तकांचा मनमुराद आनंद लुटावा; यासाठी राज्याचे उच्च व तंत्रशिक्षण मंत्री आणि कोथरुडचे आमदार चंद्रकांतदादा पाटील यांनी विशेष पुढाकार घेतला आहे.

ना. पाटील यांनी कोथरुड मतदारसंघातील वाचकांनी पुस्तक खरेदी करावी; यासाठी विशेष सवलत योजना राबविली असून, एकूण पुस्तक खरेदीवर १०० रुपयांची विशेष सवलत देऊ केली आहे. यासाठी ना. चंद्रकांतदादा पाटील यांनी विशेष कुपन उपलब्ध करुन दिले असून, दिनांक १२ डिसेंबर ते २० डिसेंबर २०२५ दरम्यान, ना. पाटील यांच्या सर्व जनसंपर्क कार्यालयात सायंकाळी ४ ते ७ यावेळेत उपलब्ध करुन देण्यात आले आहेत. नागरिकांनी याचा लाभ घ्यावा, असे आवाहन ना. पाटील यांनी यानिमित्ताने केले आहे.

चापेकरवाडा पुनर्विकास प्रकल्प; जलनिस्सारण प्रकल्प, जकात अभय योजनेबाबत मांडल्या पुरवणी मागण्या
पिंपरी : शहरातील वाहतूक व्यवस्था सक्षम आणि वेगवान व्हावी यासाठी शहरांमध्ये मेट्रो सुविधा उपलब्ध झाली. सार्वजनिक वाहतुकीमध्ये वेगवान व्यवस्था उपलब्ध झाल्याने नागरिकांकडून विस्तारित मार्गांची मागणी वाढू लागली यामुळे निगडी ते चाकण हा महत्त्वाकांक्षी विस्तारित मार्ग मेट्रोसाठी प्रस्तावित केला गेला. मात्र सुधारित डीपीआर अद्यापही प्रलंबित आहे. तातडीने यासाठी मंजुरी घेतली जावी जेणेकरून पिंपरी चिंचवड शहरातील वाहतूक व्यवस्था अधिक वेगवान होईल अशी मागणी आमदार शंकर जगताप यांनी पुरवणी मागण्यांच्या आधारे केली आहे.आमदार शंकर जगताप यांनी पिंपरी चिंचवड शहरातील अनेक महत्त्वाच्या विषयांना पुरवणी मागण्यांच्या आधारे नागपुर हिवाळी अधिवेशनात शासनासमोर मांडले आहेत. यामध्ये चाफेकर पुनर्विकास प्रकल्प, जलनिसारण प्रकल्प, जकात अभय योजना यांसारख्या महत्त्वाच्या विषयांचा देखील समावेश होता.

याबाबत आमदार शंकर जगताप म्हणाले, पिंपरी चिंचवड शहराचे नागरिकरण प्रचंड प्रमाणात वाढत आहे या भागातील आयटी सेक्टर, कारखानदारी,औद्योगिक आस्थापना लक्षात घेऊन या शहरांमधील वाहतूक व्यवस्था सक्षम करण्याचा प्रयत्न केला जात आहे. याच माध्यमातून शहरातील सार्वजनिक वाहतूक व्यवस्था सक्षम आणि वेगवान असेल तर शहरातील वाहतूक कोंडी कमी करण्यासाठी ते उपयुक्त ठरेल दुसऱ्या टप्प्यामध्ये पिंपरी ते निगडीचे विस्तारीकरण करण्यात आले. पिंपरी ते निगडी हे विस्तारीकरण साधारण साडेचार किलोमीटर इतके आहे. यासाठी 950 कोटी रुपयांचा खर्चाचा प्रस्ताव तयार होऊन कामाला सुरुवात देखील करण्यात आलेली आहे. निगडी ते मुकाई चौक, मुकाई चौक ते वाकड आणि वाकड ते मानकर चौक, कोकणे चौक ते पिंपळे गुरव या मार्गे संत तुकाराम नगर ते चाकण आणि चाकण ते वाकड आणि वाकड ते निगडी असा हा चाळीस किलोमीटरचा मार्ग आहे. यासाठी 10 हजार 383 कोटीचा डीपीआर पिंपरी चिंचवड महापालिकेने केंद्र सरकारकडे प्रस्तावित केला आहे. या डीपीआरसाठी राज्य शासनाने मंजूरी दिल्यास पिंपरी चिंचवड शहराच्या सार्वजनिक वाहतुकीला बळकटी मिळेल असे त्यांनी सांगितले.

चापेकरवाडा पुनर्विकासासाठी 41 कोटींचा निधी द्या
चापेकर बंधूंनी स्वातंत्र्य लढ्यात हिरीरीने सहभाग घेत आपल्या प्राणाची आहुती दिली एकाच घरातील तीन युवक देशाच्या स्वातंत्र्यसम्राट धारातीर्थी पडले. स्वातंत्र्याचा हाच आदर्श पुरस्कृत व्हावा, स्वातंत्र्याची महती वर्षानुवर्ष गायली जावी यासाठी या चापेकर वाड्याचे पुनरुज्जीवन आणि जतन करण्याचा निर्णय घेण्यात आला. क्रांतीतिर्थ स्मारकात ऐतिहासिक वास्तू, छायाचित्र आणि शस्त्रांचे संग्रहालय उभारण्यासाठी राज्य शासनाने विकास आराखडयाच्या अंमलबजावणीसाठी जुन, २०२३ मध्ये. मुख्यमंत्री यांच्या अध्यक्षतेखाली झालेल्या बैठकीत ४१ कोटींच्या निधीचा प्रस्ताव मंजुर करुनही अद्यापही निधी प्राप्त झालेला नाही. शासनाने चाफेकर वाडा तिर्थस्थळाच्या विकास आराखडयाची अंमलबजावणी करण्याकरिता क्रांतीतिर्थ स्मारकासाठी तातडीने निधी उपलब्ध करुन देण्याबाबत कार्यवाही करावी अशी मागणी आमदार शंकर जगताप यांनी केली आहे.

अभय योजना तात्काळ मंजूर करा
पिंपरी चिंचवड महापालिका हद्दीतील जकात बंद झाली आहे. मात्र जकात बंद झाल्यानंतरही कर न भरलेले 45 हजार 483 व्यापारी स्थानिक कर 2800 कोटी अधिक 6 हजार 557 रुपयांचा कर थकीत आहे. हा थकितकर वसूल करण्यासाठी व्याज व दंड शंभर टक्के माफ करण्यासाठी पिंपरी चिंचवड महापालिकेने अभय योजना लागू केली. या अभयो योजनेचा प्रस्ताव शासनाकडे प्रलंबित आहे. हा प्रस्ताव मंजूर झाल्यास महापालिकेला 2800 कोटी रुपयांचा निधी शहर विकास कामांसाठी उपलब्ध होणार आहे. अभय योजना तात्काळ मंजूर करून 2015 पासून प्रलंबित असलेला हा निर्णय तातडीने मंजूर व्हावा.

पुरवणी मागण्यांच्या आधारे शहरातील प्रलंबित प्रश्नांकडे शासनाचे लक्ष वेधले आहे. या पुरवणी मागण्यांच्या आधारे प्रलंबित प्रश्नांना न्याय मिळेल असा विश्वास आहे . अशी मागणी पुरवण्याच्या आधारे  आमदार शंकर जगताप यांनी केली आहे

पुणे दि. 12 : जिल्हा कौशल्य विकास, रोजगार, उद्योजकता मार्गदर्शन केंद्र, पुणे येथे विद्यमाने 16 डिसेंबर 2025 रोजी सकाळी 10 वाजता, “प्लेसमेंट ड्राइव्ह”चे आयोजन करण्यात आले आहे.

पुणे शहर परिसरातील बी.ए.सी.एस एनर्जि प्रा.लि. कल्याणी नगर, पुणे, एच.डि.एफ.सी लाईफ इन्शोरन्स हडपसर, पुणे, एफ.एफ सर्व्हिसेस प्रा.लि. अतुर हाऊस, कॅम्प, पुणे, सिध्दी सिक्युरिटी सर्व्हिसेस जुनी सांगवी, पुणे व टि.के.आय.एल इंडस्ट्रिज प्रा.लि. पुणे या उद्योजकांनी सदर प्लेसमेंट ड्राईव्ह मध्ये सहभाग दर्शविलेला असून, त्यांच्याकडून ३०० पेक्षा जास्त रिक्तपदे कळविण्यात आलेली आहेत. ही सर्व रिक्तपदे किमान १०वी,१२ वी, पदवीधर, आयटीआय,पदविका या शैक्षणिक पात्रतेसाठी ट्रेनी,टेक्निशियन,स्टोअर हेल्पर ,स्टोअर असिटंट , बिझनेस डेव्हलोपमेंट मॅनेजर,फायनॅन्शल कन्सल्टंट,टिंग वेल्डर,पाइप फिटर, एचआर,हाऊसर्किपीग,सिक्युरिटी गार्ड, फिटर, गॅस वेल्डर अशा विविध पात्रताधारक उमेदवारांसाठी या प्लेसमेंट ड्राईव्हच्या माध्यमातून नोकरीच्या विविध संधी उपलब्ध करुन देण्यात येत आहेत.

मेळाव्यामध्ये सहभागी होण्याकरिता इच्छुक उमेदवारांनी कौशल्य विकास विभागाच्या www.rojgar.mahaswayam.gov.in या वेबसाईटला भेट देऊन रिक्त पदांना ऑनलाइन अॅप्लाय करणे आवश्यक आहे. नोकरीइच्छूक उमेदवारांनी विहीत दिनांकास प्लेसमेंट ड्राइव्हच्या ठिकाणी उपस्थित राहणे तसेच मुलाखतीस येताना आपल्या सर्व शैक्षणिक कागदपत्रांच्या छायांकित प्रती, पासपोर्ट साईज फोटो, आवश्यकतेनुसार बायोडाटा अर्जाच्या (Resume) प्रती सोबत आणणे गरजेचे आहे.

अधिक माहितीकरिता जिल्हा कौशल्य विकास, रोजगार व उद्योजकता मार्गदर्शन केंद्र पुणे, ४८१ रास्ता पेठ, पुणे येथे कार्यालयीन वेळेमध्ये प्रत्यक्ष अथवा ०२० २६१३३६०६ या दूरध्वनीवर संपर्क साधावा, असे आवाहन सु. रा. वराडे, सहायक आयुक्त, जिल्हा कौशल्य विकास, रोजगार व उद्योजकता मार्गदर्शन केंद्र, पुणे यांनी केले आहे.

पुणे: बोपोडी येथील संजय गांधी हॉस्पिटल नव्याने बांधले गेले. ते पूर्ण तयार असूनही सुरू झालेले नाही. याबाबत आम आदमी पार्टी तर्फे अनेकदा पाठपुरावा करूनही अजून ते सुरू न झाल्यामुळे काल बोपोडी येथे हॉस्पिटलजवळ स्थानिक महिला व पक्षातर्फे तीव्र आंदोलन करण्यात आले.

पुण्यामध्ये आणि मुख्यत्वे खडकी बोपोडी औंध भागांमध्ये गरीब महिलांसाठी अतितातडीच्या प्रसूतीसाठी सोयी उपलब्ध नाहीत. अशावेळी महिलांना पिंपरी चिंचवड भागात किंवा पुणे शहरात कमला नेहरू किंवा ससून हॉस्पिटल येथे पाठवले जाते. या भागात सुसज्ज बांधलेली बिल्डिंग असताना येथेच ही तातडीची व अडचणीच्या वेळी प्रसूती सुविधा उपलब्ध करावी अशी मागणी यावेळेस करण्यात आली. तसेच हे हॉस्पिटल महामार्गावर/ हायवेवर असल्यामुळे येथे एक्सीडेंट म्हणजे अपघातग्रस्तांसाठी सुद्धा अनेक सुविधा देता येतील आणि त्यामुळे गोल्डन आवर मध्ये रुग्णाला जीवदान मिळू शकते.

पुणे महानगरपालिका बांधकामावरती खर्च करते परंतु इस्पितळ चालवण्यामध्ये रस न घेता ते खाजगी व्यवस्थापनासाठी दिले जाते हा अनुभव आहे. मध्यमवर्गीय आणि गरीब महिला व रुग्णांसाठी मोफत इस्पितळ ही मोठी गरज आहे असे यावेळी आप चे मुकुंद किर्दत यांनी सांगितले.

या आंदोलनामध्ये आम आदमी पार्टीचे मुकुंद किर्दत, महिला उपाध्यक्ष अँनी अनिश, संघटक विकास चव्हाण तसेच शितल कांडेलकर,श्रद्धा शेट्टी,अक्षय शिंदे,नौशाद अन्सारी,सतीश यादव, सुरेखा भोसले,श्रीकांत भिसे, राहुल तिवारी,शंकर थोरात,पूजा वाघमारे, मनोज थोरात,मिलिंद सरोदे,वाहिद शेख, संजय कोणे, मनोज शेट्टी, विल्सन अलेक्स, मिलींद ओव्हळ, खैरून शेख, माया जाधव आदींनी भाग घेतला.