पुणे, दि. 7: रासायनिक खतांच्या अंतिम खत विक्री दरामध्ये 1 एप्रिल 2022 पासून सुधारणा करण्यात आलेली असून निश्चित दरापेक्षा अधिक दराने विक्री करत असल्याचे आढळल्यास संबंधित विक्रेत्यावर कारवाई करण्यात येईल, असे जिल्हा अधीक्षक कृषी अधिकारी तथा परवाना अधिकारी ज्ञानेश्वर बोटे यांनी कळवले आहे.

युरिया खताची किंमत प्रतिबॅग 266.50 रुपये निश्चित असून डिएपी खताची प्रतिबॅग किंमत इफको, जीएसएफसी, आरसीएफ, कृभको, आयपीएल, झुआरी पीपीएल/एमसीएफएल, कारोमंडल, स्पीक, चंबळ या नाममुद्रेची 1 हजार 350 रुपये तर एनएफएल कंपनीच्या खताची किंमत प्रतिबॅग 1 हजार 200 रुपये निश्चित करण्यात आलेली आहे.

एमओपी खताची किंमत जीएसफसी, आरसीएफ, आयपीएल, चंबळ या कंपनीच्या प्रतिबॅगची विक्री किंमत 1 हजार 700, एनएफएल 1 हजार 100 तर कोरोमंडलची 1 हजार रुपये निश्चित करण्यात आली आहे.  दीपक फर्टिलायझर्सच्या 24:24:00 खताची किंमत 1 हजार 900 रुपये, कोरोमंडलच्या 24:24:0:85 खताची किंमत 1 हजार 900 रुपये निश्चित करण्यात आली आहे.

20:20:0:13 या खताची इफको कंपनीच्या खताची प्रतिबॅग किंमत 1 हजार 400, दीपक फर्टिलायझर्स, कोरोमंडल- 1 हजार 450 रुपये, जीएसएफसी- 1 हजार 325 रुपये, आरसीएफ 1 हजार 150 रुपये, कृभको- 1 हजार 300 रुपये, आयपीएल- 1 हजार 320, झुआरी पीपीएल/ एमसीएफएल, चंबळ, एनएफएल- 1 हजार 470 रुपये, स्पीक-1 हजार 475 रुपये यापेक्षा अधिक दराने एका बॅगेची विक्री करता येणार नाही.

झुआरी पीपीएल/ एमसीएफएल कंपनीच्या 19:19:19 या खताची प्रतिबॅग किंमत 1 हजार 575 रुपये, 10:26:26 या खताची इफको, दिपक फर्टिलायझर्स, कृभको, झुआरी पीपीएल/ एमसीएफएल, कोरोमंडल, चंबळ आणि एनएफएल कंपनीच्या खतांची किंमत प्रतिबॅग 1 हजार 470 रुपये तर जीएसएफसी- 1 हजार 440 रुपये प्रतिबॅग, 12:32:16 या रासायनिक खताची जीएसएफसी कंपनीच्या खताची 1 हजार 450 रुपये तर इफको, दीपक, कृभको, झुआरी पीपीएल/ एमसीएफएल, कोरोमंडल, चंबळ आणि एनएफएल- 1 हजार 470 रुपये, 14:35:14 या कोरोमंडल कंपनीच्या खताची किंमत प्रतिबॅग 1 हजार 900 रुपये निश्चित करण्यात आली आहे.

14:28:00 या दीपक फर्टिलायझर्सच्या खताची किंमत 1495 रुपये, 15:15:15 या आरसीएफच्या खताची किंमत 1 हजार 500 रुपये, 16:20:00:13 या खताची जीएसएफसी कंपनीच्या बॅगची किंमत 1 हजार 125, आयपीएल-1 हजार 250 रुपये, आणि कोरोमंडल 1 हजार 400 रुपये,  आयपीएल कंपनीच्या 16:16:16 खताची किंमत 1 हजार 475 रुपये, 28:28:00 या खताची झुआरी पीपीएल/ एमसीएफएल कंपनीच्या बॅगची किंमत 1 हजार 700, कोरोमंडल कंपनीच्या बॅगची किंमत 1 हजार 900 रुपये अशी निश्चित करण्यात आलेली आहे.

जीएसएफसी कंपनीच्या अमोनिअम सल्फेट खताची किंमत 1 हजार 100 रुपये, 15:15:15:09 या खताची आयपीएल कंपनीची बॅग- 1 हजार 450, कोरोमंडल- 1 हजार 375 रुपये, कोरोमंडलच्या 17:17:17 खताची किंमत 1 हजार 210 रुपये, दीपक फर्टिलायझर्सच्या 08:21:21 या 40 कि. ग्रॅ. च्या बॅगची किंमत 1 हजार 850 रुपये तर 09:24:24 या खताच्या 40 कि. ग्रॅ.च्या बॅगची किंमत 1 हजार 900 रुपये निश्चित करण्यात आलेली आहे.

कोणी विक्रेता जादा दराने खत विक्री करताना आढळल्यास जिल्हा स्तरावरील सनियंत्रण कक्षाचा दूरध्वनी क्र. 020-25537718,25538310  भ्रमणध्वनी क्र. 9158479306, 9423874067, इमेल आयडी dsaopune@gmail.com, adozppune@gmail.com वर संपर्क साधावा, असे आवाहनही श्री. बोटे (भ्र. क्र. 9422384384) यांनी केले आहे.

पुणे, दि.7: कोरोनाबाधित रुग्णांची वाढती संख्या लक्षात घेता कोविड तपासणी, लसीकरण, सर्वेक्षण यावर विशेष भर देणे आवश्यक असून कोविड प्रतिबंधक लशीची दुसरी मात्रा डोस घेणे बाकी असलेल्या सर्व नागरिकांचे येत्या महिनाभरात लसीकरण पूर्ण करावे, असे निर्देश जिल्हाधिकारी डॉ. राजेश देशमुख यांनी दिले.

पुणे ग्रामीण कोविड व्यवस्थापनाबाबत जिल्हाधिकारी डॉ. देशमुख यांच्या अध्यक्षतेखाली दूरदृश्यप्रणालीद्वारे आढावा बैठक आयोजित करण्यात आली होती. त्यावेळी ते बोलत होते. बैठकीस जिल्हा परिषदेचे मुख्य कार्यकारी अधिकारी आयुष प्रसाद, शिरुरचे प्रांताधिकारी संतोष देशमुख, जिल्हा आरोग्य अधिकारी डॉ. भगवान पवार यांच्यासह जिल्ह्यातील तालुका आरोग्य अधिकारी उपस्थित होते.

कोविड रुग्णांच्या संख्येत ५ जूनअखेर संपलेल्या आठवड्यात आधीच्या आठवड्याच्या तुलनेत  ५० टक्क्यांची वाढ नोंदवली गेली आहे असे सांगून जिल्हाधिकारी डॉ. देशमुख म्हणाले, कोविड रुग्णांची वाढती संख्या लक्षात घेता प्रशासनाने राज्याच्या आरोग्य विभागाच्या सूचनांची गतीने अंमलबजावणी सुरू केली आहे. कोरोना तपासणी, लसीकरणाचे तालुक्यांनी केलेल्या नियोजनुसार प्रत्यक्षात अंमलबजावणी करण्यात यावी. कोविड प्रतिबंधासाठी ‘हर घर दस्तक’ मोहिमेच्या दुसऱ्या टप्प्याची प्रभावी अंमलबजावणी करण्यात यावी.

 कोविड लसीकरणाला गती देणे आवश्यक आहे. लसीची दुसरी मात्रा घेणे प्रलंबित असलेल्या साडेसहा लाख लाभार्थ्यांचे येत्या महिनाभरात संपूर्ण लसीकरण करण्यात यावे. १२ ते १४ वयोगट तसेच १५ ते १७ वयोगटातील सर्व मुलांचे लसीकरण पूर्ण करण्यात यावे. ६० वर्ष व त्यावरील ज्येष्ठ नागरिकांना वर्धक मात्रा (प्रिकॉशन डोस) देण्याचे काम पूर्ण करण्यात यावे. त्यासाठी लसीकरण प्रलंबित असलेल्या नागरिकांच्या यादीनुसार घरोघरी भेट देऊन लसीकरण करण्यात यावे, असे त्यांनी सांगितले.

आगामी वारीत मोठ्या संख्येने भाविक सहभागी होण्याची शक्यता लक्षात घेऊन वारीमार्गावर लसीकरणाची व्यवस्था करण्यात यावी, असे निर्देशही त्यांनी दिले.

कोविड रुग्णांच्या संख्येवर लक्ष ठेवण्यासाठी तपासणीवर अधिक भर देणे आवश्यक असून त्यासाठी नमुन्यांची संख्या वाढवणे; चाचणी सकारात्मक आलेल्या रुग्णांचे कॉन्टक्ट ट्रेसिंग करुन तपासण्या करणे; इन्फ्लुएंझा सदृश्य आजार (आयएलआय) तसेच अतीतीव्र श्वसनमार्ग आजार संसर्ग (सारी) याबाबतचे सर्वेक्षणाची व्यवस्था बळकट करणे याकडे आरोग्य विभागाने लक्ष द्यावे.

प्रत्येक तालुक्यात किमान एक कोविड काळजी केंद्र (सीसीसी) उभे करण्याचे नियोजन करण्यात यावे. ऑक्सिजन पुरवठ्याचे नियोजन चांगले  असून भविष्यातही तो पुरेसा राहील याकडे लक्ष द्यावे, असेही जिल्हाधिकारी यांनी तालुका आरोग्य अधिकाऱ्यांना दिल्या.

यावेळी सर्व तालुका आरोग्य अधिकाऱ्यांकडून तालुक्यातील लसीकरण, कोरोना तपासण्या, ऑक्सिजन पुरवठा आदींबाबत आढावा घेण्यात आला.

डॉ. पवार यांनी तालुका आरोग्य अधिकाऱ्यांना लसीकरण, तपासण्या वाढवण्यावर भर देण्याच्या सूचना दिल्या. सर्व तालुक्यात किमान एक कोविड केअर सेंटरचे नियोजन करावे असेही निर्देश बैठकीत देण्यात आले.

पूना गेस्ट हाऊस स्नेह मंचच्यावीतने कवयित्री शांताबाई शेळके यांच्या स्मृतीदिनानिमित्त सांगीतिक कार्यक्रमाचे आयोजन
पुणेः मागे उभा मंगेश… हे शाम सुंदरा… तोच चंद्रमा नभात… अशा प्रेम गीतांपासून ते विरहगीतांपर्यंत आणि लावणीपासून ते परमेश्वराच्या आराधनेत निखळ आनंद देणाऱ्या व रसिकांच्या मनात रुणझुणत ठेवणाऱ्या चौफेर गीतांचा आस्वाद पुणेकरांनी घेतला. यावेळी सुरेश राऊत यांनी शांताबाईंच्या गीतांप्रमाणेच त्यांचे सुंदर शिल्प साकारले.

पूना गेस्ट हाऊस स्नेह मंचच्यावतीने कवयित्री शांताबाई शेळके यांच्या स्मृती दिनानिमित्त ‘शांताबाई – एक शब्द लेणे’ या सांगितिक कार्यक्रमाचे आयोजन लक्ष्मी रस्त्यावरील पूना गेस्ट हाऊस येथे करण्यात आले. यावेळी जयंत भीमसेन जोशी, उर्मिला कराड, मीरा शिंदे, राजन लाखे, डॉ.न.म.जोशी आनंद सराफ, अनुराधा मराठे, गीतांजली हट्टंगणी, नितीन दलाल, दिपक कुलकर्णी, गोपाळ शिंर्गे, उल्हास कुलकर्णी आदी उपस्थित होते. कार्यक्रमाचे आयोजन पूना गेस्ट हाऊसचे किशोर सरपोतदार व समन्वयक अजित कुमठेकर यांनी केले. यावेळी सुरेश राऊत यांनी शांताबाई शेळके आणि लता मंगेशकर यांचे लाईव्ह शिल्प साकारले.  
कार्यक्रमाची सुरूवात मागे उभा मंगेश या अभंगाने झाली. त्यानंतर तोच चंद्रमा नभात… मीही अशी भोळी कशी ग…या प्रेम गीतांनी रसिकांना पुन्हा भुरळ पाडली. तर घण रानी… माझ्या सारंग राजा सारंग, माजे रानी माजे मोगा अशा विविध गीतांनी रसिकांची मने जिंकली. यावेळी स्वाती पेंडसे, रेवती सुपेकर व अभिजित वाडेकर यांनी गायन केले. पराग पांडव (तबला), अदिती गराडे (हार्मोनियम), सुहास गाडगीळ (बासरी व व्हायोलिन) यांनी साथसंगत केली. प्राजक्ता वैद्य यांनी निवेदन केले. 
उर्मिला कराड म्हणाल्या, इतक्या प्रतिभावंत व्यक्तीचा सहवास मला लाभला हे मी माझे भाग्य समजते. त्यांच्या सहवासातील साधेपणा खूप काही शिकवणारा होता. शांताबाईंच्या सहज सुंदर व्यक्तीमत्वाप्रमाणे त्यांच्या निर्मळ गीतांनी प्रत्येकाच्या मनातील गाभारा आजही तेवत ठेवला आहे, असेही त्यांनी सांगितले.    

एमआयटी डब्ल्यूपीयूत अर्थ शास्त्र -२०२२ 

पुणे,  ७ जून : “काळी माती आपली आई आहे. तिचा र्‍हास होत आहे. ती टिकविण्यासाठी रासायनिक खताचा वापर कमी करून जुन्या पध्दतीचे बीज वापरून विषमुक्त अन्नधान्य पिकविले तर सुदृढ पिढी घडू शकेल. प्रत्येकाने देशी गाय आपल्या घरात आणावी. विकासाच्या नावाखाली होणारी जंगलतोड थांबवून निसर्गाने दिलेलं देणं जतन करावे.” असे प्रतिपादन अहमदनगर जिल्ह्यातील कोंभाळणे येथील बीजमाता पद्मश्री राहीबाई पोपेरे यांनी केले.
एमआयटी वर्ल्ड पीस युनिव्हसिटीच्या स्कूल ऑफ सस्टनेबलिटीस्टडिज व निनॉक्स नेचर क्लब यांच्यातर्फे जागतिक पर्यावरण दिनाचे औचित्य साधून अर्थ-शास्त्र २०२२ ( Earth Shastra 2022 ) या कार्यक्रम प्रसंगी प्रमुख पाहुण्या म्हणून त्या बोलत होत्या. अध्यक्षस्थानी एमआयटी वर्ल्ड पीस युनिव्हर्सिटीचे  संस्थापक अध्यक्ष प्रा.डॉ. विश्‍वनाथ दा. कराड हे होते.  टेर पॉलिसी सेंटरचे संचालक डॉ. राजेंद्र शेंडे, अ‍ॅग्रो टुरिझमचे प्रणेते पांडुरंग तावरे आणि बांबू उत्पादक व संशोधक संजिव करपे हे सन्माननीय अतिथी म्हणून उपस्थित होते.  एमआयटी वर्ल्ड पीस युनिव्हर्सिटीचे कार्याध्यक्ष राहुल विश्‍वनाथ कराड यांच्या नेतृत्वाखाली हा कार्यक्रम संपन्न झाला.
यावेळी एमआयटी वर्ल्ड पीस युनिव्हर्सिटीचे कुलगुरू डॉ. आर.एम.चिटणीस, प्र कुलगुरू डॉ. मिलिंद पांडे, फॅकल्टी ऑफ सस्टनेबलिटी स्टडिजच्या संचालिका डॉ. अनामिका बिस्वास व सहयोगी प्राध्यापक डॉ.पंकज कोपर्डे व डॉ. प्रसाद कुलकर्णी हे उपस्थित होते.
श्रीमती राहीबाई पोपेरे म्हणाल्या, “मी कुठलेही शिक्षण घेतलेले नाही. मी एक ऊसतोड कामगारच होते.परंतू माझे वडिल आणि निसर्ग यांनीच मला शिकविले. आज शेतीमध्ये सेंद्रिय खते  आणि हायब्रिड अशा अन्नधान्य व भाजीपाला पिकविला जात आहे. त्यामुळे मानवी जीवनावर त्याचा विपरित परिणाम होत आहे. त्यामुळे अनेक लोक आजारी पडत आहे. आणि नवीन पिढीसुध्दा याला अपवाद नाही. त्याकरिता पारंपारिक वाण वापरून उत्पादन केल्यास जमीनीचा र्‍हासपण कमी होईल आणि दर्जेदार उत्पादन होऊन सुदृढ अशी नवीन पिढी घडेल . ”  
श्री.राजेंद्र शेंडे म्हणाले, “पूर्वीच्या काळी शेती पारंपारिक पध्दतीने करून चांगल्या प्रतिचे उत्पादन केले जात होते. सेंद्रीय खताचा वापर करून जमीनीचा कस वाढविला जात होता. एकमेकांना उपयोगी पडेल अशा पध्दतीने काम करत तोच शाश्‍वत विकासाचा पाया होता. भविष्यात शाश्‍वत विकासाशिवाय पर्याय नाही. प्रत्येकाने शिका, त्यावर काम करा आणि उच्चदर्जाची निर्मिती केली तरच भारत आत्मनिर्भर बनेल.”  
श्री.संजिव करपे म्हणाले, ‘ आज बांबू शेतीला चांगले दिवस आले आहेत. यातून शेतकर्‍यांचे उत्पादन वाढले आहेच व इतर लोकांनाही मोठ्या प्रमाणावर रोजगार उपलब्ध झालेला आहे. आता या बांबूचा उपयोग फर्निचर, बिल्डिंग कन्स्ट्रक्शन, सायकली, कपडे, बोर्ड, चप्पल, सीट कव्हर, बांबूची घरे बनविले जात आहेत.”  
श्री.पांडुरंग तावरे म्हणाले, “शेतीला पर्यटनाची जोड दिल्यामुळे शेतकर्‍यांचा शाश्‍वत विकास होईल. खेडेगावाची संस्कृती परंपरा ही या पर्यटनाच्या माध्यमातून माहित होऊन तेथील शेतीमध्ये उत्पादित झालेल्या मालाची विक्री यातून त्यांना रोजगार मिळू शकेल. आणि गावाचा विकास होईल. गाव आत्मनिर्भर बनेल.”  
प्रा.डॉ. विश्‍वनाथ दा. कराड म्हणाले, “शेती, कृषी पर्यटन आणि बांबूची शेती यावर ग्रामीण भागातील शेतकर्‍यांनी विशेष लक्ष दिले पाहिजे. शेतकरी समृध्द झाला, की समाज समृद्ध होईल. त्यातून देशाचा विकास होईल. प्रत्येकाने निसर्ग तत्त्वाचे पालन केल्याने विकासाबरोबरच समाजात सुख, समाधान आणि शांती नांदेल.”  
यावेळी मनोज अनपट, अनपटवाडी, शांताबाई वरवे, तिकोना पेठ, किशोर फडतरे, निंबोडी व वैशालीताई, वडगाव, जुन्नर या सरपंचांचा सत्कार करण्यात आला.
   डॉ. पंकज कोपर्डे यांनी प्रास्ताविक केले. निधी धामणे यांनी सूत्रसंचालन केले.
डॉ. अनामिका बिस्वास यांनी आभार मानले.

पुणे-महापालिकेच्या अतिक्रमण निर्मूलन विभागाने सारसबाग येथील खाद्यपदार्थांच्या स्टॅालवर कारवाई करत ते सील केले होते. रस्त्यावर टाकण्यात आलेले टेबल, खुर्च्यांसह अन्य साहित्य महापालिका प्रशासनाने कारवाई वेळी जप्त केले होते. या कारवाईचे तीव्र पडसाद उमटले होते. पथारी संघटनांबरोबरच राजकीय पक्षांनी व्यावसायिकांच्या बाजूने आक्रमक भूमिका घेतली होती. मात्र सारसबाग परिसरात वॉकिंग प्लाझा करण्याचा निर्णय आयुक्त, प्रशासक विक्रम कुमार यांनी घेतला होता. व्यावसायिकांनी अटी-शर्तींचे पालन करण्याबाबतचे हमीपत्र दिल्यानंतर व्यवसाय सुरू करण्यास मान्यता दिली जाईल, अशी भूमिका प्रशासनाकडून घेण्यात आली होती.रस्त्यावर टेबल, खुर्च्या ठेवण्यात येणार नाही. शेड टाकण्यात येणार नाही, असे हमीपत्र घेऊन व्यावसायिकांना व्यवसाय करण्यास परवानगी देण्यात आली आहे. हमीपत्र मिळाल्यानंतर प्रशासनाकडून रस्ता रुंद करण्यात आला असून सध्या केवळ रस्त्याची दहा फूट जागा वापरण्यास व्यावसायिकांना मान्यता देण्यात आली आहे. त्यामुळे वॉकिंग प्लाझा करण्याच्या दृष्टीने कार्यवाही सुरू झाल्याचे स्पष्ट होत आहे.राष्ट्रवादीच्या माजी नगरसेविका अश्विनी नितीन कदम यांनी केलेल्या मध्यस्थीला यश आले आहे.

 सारसबाग येथील नियोजित ‘वॉकिंग प्लाझा’ तयार करण्याच्या दृष्टीने महापालिका प्रशासनाकडून कार्यवाही सुरू करण्यात आली आहे. खाद्यपदार्थांच्या स्टॅालसमोर व्यावसायिकांनी फरशी टाकून केलेला रस्ता रूंद करण्यात आला आहे. रस्त्यालगतची केवळ दहा फूट जागा व्यावसायिकांना वापरण्यास परवानगी मिळणार आहे. शेड न उभारण्याचे तसेच खुर्च्या हटवून रस्ता मोकळा करण्याचे हमीपत्र व्यावसायिकांकडून घेत व्यवसायायाला मान्यता देण्यात आली आहे. त्यामुळे येत्या काही दिवसांत सारसबाग चौपाटी परिसरात वॉकिंग प्लाझा सुरू होण्याची शक्यता आहे.

पुणे, दि:६- उप नियंत्रक वैध मापन शास्त्र कार्यालयामार्फत वजने व मापे यांचे विहित मुदतीत फेर पडताळणी व मुद्रांकन न केलेल्या आणि आवेष्टित वस्तू नियमांचे उल्लंघन करणाऱ्या अस्थापनाविरुद्ध ग्राहकांनी संपर्क करुन तक्रार नोंदविण्याचे आवाहन सहायक नियंत्रक वैध मापन शास्त्र विभागाने केले आहे.

मुळ छापील किंमत खाडाखोड करणे, छापील किंमतीपेक्षा जादा दराने विक्री करणे, गॅस सिलिंडर वितरीत करणाऱ्या कामगाराकडे वजन काटा उपलब्ध नसणे अशाप्रकारे नियमांचे उल्लंघन केलेले आढळल्यास कारवाई करण्यात येते. सन २०२०-२१ मध्ये एकूण २७३ आस्थापनांवर दंडात्मक कार्यवाही करण्यात आली असून त्यामध्ये रुपये २३ लाख ९२ हजार ५०० दंड वसूल करण्यात आला आहे.

ग्राहकांनी असे नियमांचे उल्लंघन होताना आढळल्यास कार्यालयाच्या नियंत्रक कक्ष संपर्क क्रमांक ०२२-२२६२२०२२/०२०-२६१३७११४, व्हॉटस ॲप क्रमांक ९८६९६९१६६६, ईमेल आयडी dclmms_complaints@yahoo.in , aclmpune@yahoo.in येथे संपर्क करुन तक्रार करावी, असे आवाहन वैध मापन शास्त्र विभागाचे सहायक नियंत्रक संजीव कवरे यांनी केले आहे.

पुणे दि.७- जिल्हाधिकारी डॉ. राजेश देशमुख यांच्या मार्गदर्शनाखाली श्री क्षेत्र देहू व श्री क्षेत्र आळंदी पालखी सोहळा-२०२२ साठी प्रशासनाने आवश्यक नियोजन केले असून त्यासंबंधितची कामे अंतिम टप्प्यात आहे. पालखी तळ व इतर अनुषंगिक सुविधांची कामे १५ जूनपर्यंत पुर्ण करण्याचे नियोजन करण्यात आले आहे.

मौजे उरळी देवाची येथील साईड पट्टयांची कामे, वडकीनाला येथील पालखी विसाव्याच्या ठिकाणी असलेल्या चरांची दुरुस्ती, लोणी काळभोर येथील मोऱ्यांची दुरुस्ती, बारामती तालुक्यातील उंडवडी सुपे येथील सर्विस रोडची दुरुस्ती, दौंड ते निरा रस्त्याच्या साईड पट्टयांची दुरुस्ती ही कामे राष्ट्रीय महामार्ग प्राधिकरणातर्फे करण्यात येत आहेत. सार्वजनिक बांधकाम विभागातर्फे कऱ्हा नदीवरील पुलाची दुरुस्ती, इंदापुर तालुक्यातील आंथुर्णे आणि सणसर येथील पालखी मुक्कामाच्या ठिकाणी सपाटीकरण व रस्ता, करण्यात येत आहे. सासवड नगरपालिकेतर्फे पालखी तळ आणि विसाव्याच्या ठिकाणाशी संबंधित कामे वेगाने करण्यात येत आहेत.

जेजुरी पालखी तळाची कामे सुरू करण्यात आली आहे. जिल्हा परिषद आणि दोन्ही महानगरपालिकेतर्फे महिलांच्या आरोग्यासाठी आवश्यक सुविधांसह स्त्रीरोग तज्ञांची सुविधा देण्यात येणार आहे. पालखी मार्गावर महिलांसाठी ५ किमी अंतरावर शौचालय सुविधा करण्यात येणार आहे. सर्व उपविभागीय अधिकारी यांची समन्वय अधिकारी आणि तहसिलदार यांची उपसमन्वय अधिकारी म्हणून नियुक्ती करण्यात आली असून अनुषंगिक कामांचा त्यांच्याकडून दैनंदिन आढावा घेण्यात येत आहे. पालखी मुक्कामाच्या ठिकाणी गावनिहाय संनियंत्रण समितीची स्थापना करण्यात आली आहे.

पाणी पुरवठ्यासाठी विशेष नियोजन करण्यात येत आहे. आषाढी वारीसाठी ३७ विहिरी आणि विंधनविहिरी अधिग्रहीत करण्यात आल्या आहेत आणि ७० टँकरची व्यवस्था करण्यात आली आहे. कोरोनाच्या पार्श्वभूमीवर आरोग्यविषयक विशेष दक्षता घेण्यात येणार आहे. ११२ वैद्यकीय अधिकारी आणि ३३६ कर्मचाऱ्यांची आरोग्यसेवेसाठी पालखी मार्गावर नियुक्ती करण्यात आली आहे. २३ प्राथमिक आरोग्य केंद्रे, ८७ फिरते वैद्यकीय पथक आणि १०८ रुग्णवाहिकेद्वारे आरोग्य सुविधा करण्यात येणार आहे.

परिवहन विभागातर्फे पालखी सोहळ्यासाठी वापरल्या जाणाऱ्या वाहनांच्या सुरक्षाविषयक तपासणीचे नियोजन करण्यात आले आहे. पालखी मार्गावरील मांसाहारी हॉटेल, मच्छी् मार्केट, दारुची दुकाने बंद ठेवण्यात येणार आहेत. अन्न व औषध प्रशासनातर्फे खाद्य आणि पेय पदार्थांची तपासणी करण्यात येणार आहे. अतिरिक्त मोबाईल टॉवर उभारण्याचे नियेाजन आहे.

पालखी मार्गावर प्रस्थानाच्या वेळी ठरावीक मार्गावरील वाहतूक बंद करण्याचे नियोजन करण्यात आले आहे. पालखी मार्गावरील रुग्णालयातील १० टक्केण खाटा पालखी सोहळ्यादरम्यान आरक्षीत ठेवण्यात येणार आहेत. पालखी व्यवस्थापनाबाबत माहितीसाठी पुस्तिकेचेही प्रकाशन करण्यात आले आहे.