एमआयटी डब्ल्यूपीयूत अर्थ शास्त्र -२०२२ 

पुणे,  ७ जून : “काळी माती आपली आई आहे. तिचा र्‍हास होत आहे. ती टिकविण्यासाठी रासायनिक खताचा वापर कमी करून जुन्या पध्दतीचे बीज वापरून विषमुक्त अन्नधान्य पिकविले तर सुदृढ पिढी घडू शकेल. प्रत्येकाने देशी गाय आपल्या घरात आणावी. विकासाच्या नावाखाली होणारी जंगलतोड थांबवून निसर्गाने दिलेलं देणं जतन करावे.” असे प्रतिपादन अहमदनगर जिल्ह्यातील कोंभाळणे येथील बीजमाता पद्मश्री राहीबाई पोपेरे यांनी केले.
एमआयटी वर्ल्ड पीस युनिव्हसिटीच्या स्कूल ऑफ सस्टनेबलिटीस्टडिज व निनॉक्स नेचर क्लब यांच्यातर्फे जागतिक पर्यावरण दिनाचे औचित्य साधून अर्थ-शास्त्र २०२२ ( Earth Shastra 2022 ) या कार्यक्रम प्रसंगी प्रमुख पाहुण्या म्हणून त्या बोलत होत्या. अध्यक्षस्थानी एमआयटी वर्ल्ड पीस युनिव्हर्सिटीचे  संस्थापक अध्यक्ष प्रा.डॉ. विश्‍वनाथ दा. कराड हे होते.  टेर पॉलिसी सेंटरचे संचालक डॉ. राजेंद्र शेंडे, अ‍ॅग्रो टुरिझमचे प्रणेते पांडुरंग तावरे आणि बांबू उत्पादक व संशोधक संजिव करपे हे सन्माननीय अतिथी म्हणून उपस्थित होते.  एमआयटी वर्ल्ड पीस युनिव्हर्सिटीचे कार्याध्यक्ष राहुल विश्‍वनाथ कराड यांच्या नेतृत्वाखाली हा कार्यक्रम संपन्न झाला.
यावेळी एमआयटी वर्ल्ड पीस युनिव्हर्सिटीचे कुलगुरू डॉ. आर.एम.चिटणीस, प्र कुलगुरू डॉ. मिलिंद पांडे, फॅकल्टी ऑफ सस्टनेबलिटी स्टडिजच्या संचालिका डॉ. अनामिका बिस्वास व सहयोगी प्राध्यापक डॉ.पंकज कोपर्डे व डॉ. प्रसाद कुलकर्णी हे उपस्थित होते.
श्रीमती राहीबाई पोपेरे म्हणाल्या, “मी कुठलेही शिक्षण घेतलेले नाही. मी एक ऊसतोड कामगारच होते.परंतू माझे वडिल आणि निसर्ग यांनीच मला शिकविले. आज शेतीमध्ये सेंद्रिय खते  आणि हायब्रिड अशा अन्नधान्य व भाजीपाला पिकविला जात आहे. त्यामुळे मानवी जीवनावर त्याचा विपरित परिणाम होत आहे. त्यामुळे अनेक लोक आजारी पडत आहे. आणि नवीन पिढीसुध्दा याला अपवाद नाही. त्याकरिता पारंपारिक वाण वापरून उत्पादन केल्यास जमीनीचा र्‍हासपण कमी होईल आणि दर्जेदार उत्पादन होऊन सुदृढ अशी नवीन पिढी घडेल . ”  
श्री.राजेंद्र शेंडे म्हणाले, “पूर्वीच्या काळी शेती पारंपारिक पध्दतीने करून चांगल्या प्रतिचे उत्पादन केले जात होते. सेंद्रीय खताचा वापर करून जमीनीचा कस वाढविला जात होता. एकमेकांना उपयोगी पडेल अशा पध्दतीने काम करत तोच शाश्‍वत विकासाचा पाया होता. भविष्यात शाश्‍वत विकासाशिवाय पर्याय नाही. प्रत्येकाने शिका, त्यावर काम करा आणि उच्चदर्जाची निर्मिती केली तरच भारत आत्मनिर्भर बनेल.”  
श्री.संजिव करपे म्हणाले, ‘ आज बांबू शेतीला चांगले दिवस आले आहेत. यातून शेतकर्‍यांचे उत्पादन वाढले आहेच व इतर लोकांनाही मोठ्या प्रमाणावर रोजगार उपलब्ध झालेला आहे. आता या बांबूचा उपयोग फर्निचर, बिल्डिंग कन्स्ट्रक्शन, सायकली, कपडे, बोर्ड, चप्पल, सीट कव्हर, बांबूची घरे बनविले जात आहेत.”  
श्री.पांडुरंग तावरे म्हणाले, “शेतीला पर्यटनाची जोड दिल्यामुळे शेतकर्‍यांचा शाश्‍वत विकास होईल. खेडेगावाची संस्कृती परंपरा ही या पर्यटनाच्या माध्यमातून माहित होऊन तेथील शेतीमध्ये उत्पादित झालेल्या मालाची विक्री यातून त्यांना रोजगार मिळू शकेल. आणि गावाचा विकास होईल. गाव आत्मनिर्भर बनेल.”  
प्रा.डॉ. विश्‍वनाथ दा. कराड म्हणाले, “शेती, कृषी पर्यटन आणि बांबूची शेती यावर ग्रामीण भागातील शेतकर्‍यांनी विशेष लक्ष दिले पाहिजे. शेतकरी समृध्द झाला, की समाज समृद्ध होईल. त्यातून देशाचा विकास होईल. प्रत्येकाने निसर्ग तत्त्वाचे पालन केल्याने विकासाबरोबरच समाजात सुख, समाधान आणि शांती नांदेल.”  
यावेळी मनोज अनपट, अनपटवाडी, शांताबाई वरवे, तिकोना पेठ, किशोर फडतरे, निंबोडी व वैशालीताई, वडगाव, जुन्नर या सरपंचांचा सत्कार करण्यात आला.
   डॉ. पंकज कोपर्डे यांनी प्रास्ताविक केले. निधी धामणे यांनी सूत्रसंचालन केले.
डॉ. अनामिका बिस्वास यांनी आभार मानले.

पुणे-महापालिकेच्या अतिक्रमण निर्मूलन विभागाने सारसबाग येथील खाद्यपदार्थांच्या स्टॅालवर कारवाई करत ते सील केले होते. रस्त्यावर टाकण्यात आलेले टेबल, खुर्च्यांसह अन्य साहित्य महापालिका प्रशासनाने कारवाई वेळी जप्त केले होते. या कारवाईचे तीव्र पडसाद उमटले होते. पथारी संघटनांबरोबरच राजकीय पक्षांनी व्यावसायिकांच्या बाजूने आक्रमक भूमिका घेतली होती. मात्र सारसबाग परिसरात वॉकिंग प्लाझा करण्याचा निर्णय आयुक्त, प्रशासक विक्रम कुमार यांनी घेतला होता. व्यावसायिकांनी अटी-शर्तींचे पालन करण्याबाबतचे हमीपत्र दिल्यानंतर व्यवसाय सुरू करण्यास मान्यता दिली जाईल, अशी भूमिका प्रशासनाकडून घेण्यात आली होती.रस्त्यावर टेबल, खुर्च्या ठेवण्यात येणार नाही. शेड टाकण्यात येणार नाही, असे हमीपत्र घेऊन व्यावसायिकांना व्यवसाय करण्यास परवानगी देण्यात आली आहे. हमीपत्र मिळाल्यानंतर प्रशासनाकडून रस्ता रुंद करण्यात आला असून सध्या केवळ रस्त्याची दहा फूट जागा वापरण्यास व्यावसायिकांना मान्यता देण्यात आली आहे. त्यामुळे वॉकिंग प्लाझा करण्याच्या दृष्टीने कार्यवाही सुरू झाल्याचे स्पष्ट होत आहे.राष्ट्रवादीच्या माजी नगरसेविका अश्विनी नितीन कदम यांनी केलेल्या मध्यस्थीला यश आले आहे.

 सारसबाग येथील नियोजित ‘वॉकिंग प्लाझा’ तयार करण्याच्या दृष्टीने महापालिका प्रशासनाकडून कार्यवाही सुरू करण्यात आली आहे. खाद्यपदार्थांच्या स्टॅालसमोर व्यावसायिकांनी फरशी टाकून केलेला रस्ता रूंद करण्यात आला आहे. रस्त्यालगतची केवळ दहा फूट जागा व्यावसायिकांना वापरण्यास परवानगी मिळणार आहे. शेड न उभारण्याचे तसेच खुर्च्या हटवून रस्ता मोकळा करण्याचे हमीपत्र व्यावसायिकांकडून घेत व्यवसायायाला मान्यता देण्यात आली आहे. त्यामुळे येत्या काही दिवसांत सारसबाग चौपाटी परिसरात वॉकिंग प्लाझा सुरू होण्याची शक्यता आहे.

पुणे, दि:६- उप नियंत्रक वैध मापन शास्त्र कार्यालयामार्फत वजने व मापे यांचे विहित मुदतीत फेर पडताळणी व मुद्रांकन न केलेल्या आणि आवेष्टित वस्तू नियमांचे उल्लंघन करणाऱ्या अस्थापनाविरुद्ध ग्राहकांनी संपर्क करुन तक्रार नोंदविण्याचे आवाहन सहायक नियंत्रक वैध मापन शास्त्र विभागाने केले आहे.

मुळ छापील किंमत खाडाखोड करणे, छापील किंमतीपेक्षा जादा दराने विक्री करणे, गॅस सिलिंडर वितरीत करणाऱ्या कामगाराकडे वजन काटा उपलब्ध नसणे अशाप्रकारे नियमांचे उल्लंघन केलेले आढळल्यास कारवाई करण्यात येते. सन २०२०-२१ मध्ये एकूण २७३ आस्थापनांवर दंडात्मक कार्यवाही करण्यात आली असून त्यामध्ये रुपये २३ लाख ९२ हजार ५०० दंड वसूल करण्यात आला आहे.

ग्राहकांनी असे नियमांचे उल्लंघन होताना आढळल्यास कार्यालयाच्या नियंत्रक कक्ष संपर्क क्रमांक ०२२-२२६२२०२२/०२०-२६१३७११४, व्हॉटस ॲप क्रमांक ९८६९६९१६६६, ईमेल आयडी dclmms_complaints@yahoo.in , aclmpune@yahoo.in येथे संपर्क करुन तक्रार करावी, असे आवाहन वैध मापन शास्त्र विभागाचे सहायक नियंत्रक संजीव कवरे यांनी केले आहे.

पुणे दि.७- जिल्हाधिकारी डॉ. राजेश देशमुख यांच्या मार्गदर्शनाखाली श्री क्षेत्र देहू व श्री क्षेत्र आळंदी पालखी सोहळा-२०२२ साठी प्रशासनाने आवश्यक नियोजन केले असून त्यासंबंधितची कामे अंतिम टप्प्यात आहे. पालखी तळ व इतर अनुषंगिक सुविधांची कामे १५ जूनपर्यंत पुर्ण करण्याचे नियोजन करण्यात आले आहे.

मौजे उरळी देवाची येथील साईड पट्टयांची कामे, वडकीनाला येथील पालखी विसाव्याच्या ठिकाणी असलेल्या चरांची दुरुस्ती, लोणी काळभोर येथील मोऱ्यांची दुरुस्ती, बारामती तालुक्यातील उंडवडी सुपे येथील सर्विस रोडची दुरुस्ती, दौंड ते निरा रस्त्याच्या साईड पट्टयांची दुरुस्ती ही कामे राष्ट्रीय महामार्ग प्राधिकरणातर्फे करण्यात येत आहेत. सार्वजनिक बांधकाम विभागातर्फे कऱ्हा नदीवरील पुलाची दुरुस्ती, इंदापुर तालुक्यातील आंथुर्णे आणि सणसर येथील पालखी मुक्कामाच्या ठिकाणी सपाटीकरण व रस्ता, करण्यात येत आहे. सासवड नगरपालिकेतर्फे पालखी तळ आणि विसाव्याच्या ठिकाणाशी संबंधित कामे वेगाने करण्यात येत आहेत.

जेजुरी पालखी तळाची कामे सुरू करण्यात आली आहे. जिल्हा परिषद आणि दोन्ही महानगरपालिकेतर्फे महिलांच्या आरोग्यासाठी आवश्यक सुविधांसह स्त्रीरोग तज्ञांची सुविधा देण्यात येणार आहे. पालखी मार्गावर महिलांसाठी ५ किमी अंतरावर शौचालय सुविधा करण्यात येणार आहे. सर्व उपविभागीय अधिकारी यांची समन्वय अधिकारी आणि तहसिलदार यांची उपसमन्वय अधिकारी म्हणून नियुक्ती करण्यात आली असून अनुषंगिक कामांचा त्यांच्याकडून दैनंदिन आढावा घेण्यात येत आहे. पालखी मुक्कामाच्या ठिकाणी गावनिहाय संनियंत्रण समितीची स्थापना करण्यात आली आहे.

पाणी पुरवठ्यासाठी विशेष नियोजन करण्यात येत आहे. आषाढी वारीसाठी ३७ विहिरी आणि विंधनविहिरी अधिग्रहीत करण्यात आल्या आहेत आणि ७० टँकरची व्यवस्था करण्यात आली आहे. कोरोनाच्या पार्श्वभूमीवर आरोग्यविषयक विशेष दक्षता घेण्यात येणार आहे. ११२ वैद्यकीय अधिकारी आणि ३३६ कर्मचाऱ्यांची आरोग्यसेवेसाठी पालखी मार्गावर नियुक्ती करण्यात आली आहे. २३ प्राथमिक आरोग्य केंद्रे, ८७ फिरते वैद्यकीय पथक आणि १०८ रुग्णवाहिकेद्वारे आरोग्य सुविधा करण्यात येणार आहे.

परिवहन विभागातर्फे पालखी सोहळ्यासाठी वापरल्या जाणाऱ्या वाहनांच्या सुरक्षाविषयक तपासणीचे नियोजन करण्यात आले आहे. पालखी मार्गावरील मांसाहारी हॉटेल, मच्छी् मार्केट, दारुची दुकाने बंद ठेवण्यात येणार आहेत. अन्न व औषध प्रशासनातर्फे खाद्य आणि पेय पदार्थांची तपासणी करण्यात येणार आहे. अतिरिक्त मोबाईल टॉवर उभारण्याचे नियेाजन आहे.

पालखी मार्गावर प्रस्थानाच्या वेळी ठरावीक मार्गावरील वाहतूक बंद करण्याचे नियोजन करण्यात आले आहे. पालखी मार्गावरील रुग्णालयातील १० टक्केण खाटा पालखी सोहळ्यादरम्यान आरक्षीत ठेवण्यात येणार आहेत. पालखी व्यवस्थापनाबाबत माहितीसाठी पुस्तिकेचेही प्रकाशन करण्यात आले आहे.

पुणे: महावितरणच्या १७ व्या वर्धापनदिनानिमित्त पुणे परिमंडलामध्ये क्रिकेट, रांगोळी स्पर्धा  तसेच स्नेहमेळा व शैक्षणिक प्राविण्य मिळविणाऱ्या कर्मचाऱ्यांच्या पाल्यांचा गुणगौरव आदी कार्यक्रमांचे आयोजन करण्यात आले होते. वीजग्राहकांना अविश्रांत सेवा देणाऱ्या महावितरणच्या अधिकारी व कर्मचाऱ्यांना या आयोजनामुळे नवी ऊर्जा मिळाली.

महावितरणच्या वर्धापनदिनानिमित्त रास्तापेठ येथील प्रशासकीय इमारतीच्या प्रांगणात अधिकारी, कर्मचारी व त्यांच्या कुटुंबियांसाठी स्नेहमेळा-२०२२ कार्यक्रमाचे आयोजन करण्यात आले होते. यावेळी पुणे प्रादेशिक संचालक (प्र.) श्री. अंकुश नाळे, मुख्य अभियंता श्री. सचिन तालेवार, अधीक्षक अभियंता सर्वश्री राजेंद्र पवार, प्रकाश राऊत, सतीश राजदीप, डॉ. सुरेश वानखेडे यांची प्रमुख पाहुणे म्हणून उपस्थिती होती. त्यांच्याहस्ते दीप प्रज्वलनाद्वारे स्नेहमेळ्याचे उद्घाटन झाले.

दरम्यान दि. ४ ते ५ जून रोजी पुणे परिमंडल अंतर्गत विभागस्तरीय पुरुष व मंडलस्तरीय महिला क्रिकेट स्पर्धेचे आयोजन करण्यात आले. या क्रिकेट स्पर्धेत मंचर विभागाच्या पुरुष संघाने व रास्तापेठ मंडलाच्या महिला संघाने विजेतेपद पटकाविले तर बंडगार्डन विभागाचा पुरुष संघ व गणेशखिंड मंडलाचा महिला संघ उपविजेता पदाचे मानकरी ठरले. तसेच परिमंडलस्तरीय रांगोळी स्पर्धेत उज्ज्वला सोनार- प्रथम, काजल लिंबोळे- द्वितीय तर अपर्णा मुळे यांनी तृतीय क्रमांक पटकाविले. स्नेहमेळ्याच्या कार्यक्रमात क्रिकेट स्पर्धेतील विजेता व उपविजेत्या संघांना चषक व प्रशस्तीपत्र प्रदान करण्यात आले. तसेच रांगोळी स्पर्धेतील विजेत्यांना स्मृतिचिन्ह व प्रशस्तीपत्र देऊन पाहुण्यांच्या हस्ते गौरविण्यात आले.

उच्च शिक्षणासाठी आयआयटीमध्ये प्रवेश मिळविणारे शिवम अंकुश नाळे, हेमंत सुरेश वानखडे, ऋषिकेश रवींद्र कारंडे, डेलिया तुषार काळे, सृष्टी श्रीकांत गंगावणे, मयांक देविदत्त जोशी, आर्यन माणिक राठोड तसेच शैक्षणिकसह कला व क्रीडा स्पर्धेत राष्ट्रीयस्तरावर उल्लेखनीय कामगिरी करणारे आदित्य राजेश काळे, प्रद्युम्न्य संजय जगनाडे, सोनल चंद्रकांत कानडे, यश सतीश उंडे आणि एमपीएससी स्पर्धा परिक्षेतून प्रशासकीय अधिकारी झालेले श्री. नीलेश कृष्णाजी सस्ते यांचा स्मृतिचिन्ह व सन्मानपत्र देऊन पाहुण्यांच्या हस्ते गौरव करण्यात आला. यानंतर हिंदी व मराठी गाण्यांच्या संगीत रजनीचा कार्यक्रम झाला. कार्यक्रमाचे सूत्रसंचालन डॉ. संतोष पटनी, श्री. संतोष गहेरवार, भक्ती जोशी यांनी केले तर कार्यकारी अभियंता श्री. बाळासाहेब हळनोर यांनी आभार मानले. वर्धापनदिनानिमित्त विविध स्पर्धा व कार्यक्रमाच्या आयोजनासाठी उपमुख्य औद्योगिक संबंध अधिकारी श्री. शिरीष काटकर व सहकाऱ्यांनी पुढाकार घेतला.

पुणे -उन्हामुळे तापलेल्या जमिनीवर पहिल्या पाऊसाच्या सरी कोसळल्यानंतर वातावरणात निर्माण झालेल्या मृद्गंधाचा वास कोणत्याही सुगंधी अत्तर यापेक्षा सुंदर असतो. या मृद्गंधामुळे सगळीकडे  आशेचे वातावरण तयार होते व सुखाचे दिवस आता येतील ही भावना मनाला स्पर्श करते. या पार्श्वभूमिवर कवयित्री सौ. जयश्री घोलप चव्हाण यांचा ‘मृद्गंधा’ या निसर्गविषयक काव्यसंग्रहामुळे केवळ मन आनंदाने फुलते एवढेच नव्हे तर निसर्गाचे संवर्धन करणे ही आपली प्रत्येकाची जबाबदारी आहे याची जाणीव प्रत्येकाला होते अशी भावना ज्येष्ठ गांधीवादी विचारवंत उल्हास पवार यांनी आज काढले. तनया–ईशा प्रकाशनतर्फे प्रकाशित ‘मृद्गंधा’ या निसर्गविषयक काव्य संग्रहाच्या प्रकाशन प्रसंगी ते बोलत होते. प्रारंभी तनया–ईशा प्रकाशनचे प्रवीण प्र. वाळिंबे यांनी स्वागत व प्रास्ताविक केले. ते म्हणाले ‘सध्या वाढत्या शहरीकरणामुळे बेसुमार जंगलतोड होत आहे. त्यातूनच ग्लोबल वॉर्मिंगचे संकट सर्वांनाच भोगावे लागत आहे. या पार्श्वभूमीवर मृद्गंधा हा निसर्गविषयक महत्व वाढवणारा काव्यसंग्रह प्रकाशित होत आहे याचा आनंद आहे.

कवयित्री सौ. जयश्री घोलप चव्हाण म्हणाल्या कि वृक्ष, वेली, फुले, शेती, नदी, पक्षी, आकाश, वारा हा सारा निसर्ग असल्यामुळेच आपले जीवन समृद्ध होत असते. निसर्गाची नासाडी न करता निसर्गाचे संवर्धन व्हावे हिच भावना या काव्य संग्रहात प्रतिबिंबित होत आहे.

याप्रसंगी कार्यक्रमाचे सूत्र संचालन सागर बाबर यांनी केले व आभार प्रदर्शन श्रुति तिवारी यांनी केले.

पुणे, दि. ७:- जिल्हातील स्वयंसहाय्यता समुहातील महिलांनी तयार केलेल्या उत्पादनांना बाजारपेठ उपलब्ध होण्यासाठी महाराष्ट्र राज्य ग्रामीण जीवनोन्नती अभियान (उमेद), जिल्हा ग्रामीण विकास यंत्रणा जिल्हा परिषद पुणे व उस्मानाबाद यांच्या संयुक्त विद्यमाने ९ व १० जून २०२२ रोजी जिल्हास्तरीय तांदुळ व डाळ महोत्सव २०२२-२३ चे नवीन जिल्हा परिषद, पुणे येथे आयोजन करण्यात आले आहे.

नागरिकांनी मोठ्याप्रमाणात या प्रदर्शनास भेट देऊन महोत्सवात तांदूळ, डाळ आदींची खरेदी करण्याचे आवाहन करण्यात येत आहे. त्यामुळे  ग्रामीण भागातील महिला स्वयंसहाय्यता समुहाच्या आर्थिक उन्नतीसाठी हातभार लागेल, असे जिल्हा ग्रामीण विकास यंत्रणेच्या प्रकल्प संचालक तथा जिल्हा अभियान व्यवस्थापन कक्षाच्या सहसंचालक शालिनी कडू यांनी कळविले आहे.

पुणे- हल्ली चर्चेत राहावे , लक्षात राहावे , चटकन पाहावे ,किंवा ऐकावे म्हणून वेगवेगळ्या क्लुप्त्या लढवून जाहिराती केल्या जातात ,पण या जाहिराती करताना संस्कृतीचे भान विसरून अश्लीलतेकडे वळलेल्या जाहिरातींना तातडीने बंदी घातली पाहिजे अशी मागणी क्रिएटिव्ह फाउंडेशनचे अध्यक्ष संदीप खर्डेकर यांनी भारत सरकारच्या सूचना आणि प्रसारण मंत्रालयाचे मंत्री अनुराग ठाकूर यांच्याकडे केली आहे . त्यांनी म्हटले आहे कि,’काही टीव्ही चॅनल्स वर टायटन रागा ह्या घड्याळाची जाहिरात प्रसारित होत आहे. सदर जाहिरातीत एका विवाह सोहोळ्याच्या निमित्ताने संपूर्ण कुटुंब एकत्र जमले असून सर्वजण नियोजित वधू सोबत लग्नाच्या विविध समारंभात ती काय घालणार यावर चर्चा करत आहेत.यात नियोजित वधू आपल्या बॅचलर पार्टीचा ड्रेस व घड्याळ, कॉकटेल पार्टीचा ड्रेस व घड्याळ, लग्नाच्या दिवशीचे ड्रेस वगैरा दाखवत आहे. यावेळी तिची मावशी तिला विचारते की हनिमून ला काय घालणार आहेस ? यावर एक क्षण थांबून नियोजित वधू
थांबून म्हणते – मावशी “हनिमून ला कोणी कपडे घालते का ?”
माझ्या मते कोणत्याही भारतीय कुटुंबात नियोजित वधू अश्या प्रकारचे वक्तव्य करणार नाही. कदाचित काही पुरोगामी मंडळींना यात काही वावगे वाटणार नाही किंवा अभिव्यक्ती स्वातंत्र्य म्हणून ही याकडे पहिले जाईल, मात्र माझ्या मते याला बंधन घालणे गरजेचे असून योग्य कारवाई व्हावी अशी आग्रही मागणी करत आहे. तसेच अनेक जाहिरातींमध्ये स्त्री देहाचे प्रदर्शन केले जाते, याबाबत ही आचारसंहिता तयार केली जावी अशी ही मागणी यनिमित्ताने करत आहे.

या सोबत BRUMEX FORTE च्या सूचक जाहिराती कडे हि खर्डेकर यांनी लक्ष वेधले आहे.ज्यात विजय पाटकर यांनी काम केलेले आहे. टीव्ही वर जाहिराती दाखविताना कौटुंबिक वातावरण लक्षात घेऊन संस्कृती जपूनच अश्लील नसतील अशा जाहिराती करायला हव्यात .असे ते म्हणाले.