आगामी 3-4 महिन्यांत आयुष रुग्णालयाचे उद्घाटन शक्य- श्रीपाद नाईक

पणजी, 10 जून 2022

केंद्रीय विधी व न्याय राज्यमंत्री एस पी सिंह बघेल आणि केंद्रीय पर्यटन तसेच बंदरे, नौवहन आणि जलमार्ग राज्यमंत्री श्रीपाद नाईक यांनी पेडणे येथील आयुष रुग्णालय आणि मोपा विमानतळाच्या कामाला भेट देऊन पाहणी केली. केंद्र सरकारला सत्तेत 8 वर्ष पूर्ण झाल्यानिमित्त विविध विकासकामांची माहिती घेण्यासाठी केंद्रीय मंत्र बघेल गोवा दौऱ्यावर आहेत.

एस पी सिंह बघेल यांनी आयुष रुग्णालयाची गोव्यात उभारणी होत असल्याबद्दल आनंद व्यक्त केला तसेच राज्यातील जनतेचे अभिनंदन केले. गोव्यासाठी एवढा अत्याधुनिक सोयी-सुविधायुक्त आयुष रुग्णालयाचा प्रकल्प आणण्यासाठी श्रीपाद नाईक यांचे महत्त्वाचे योगदान आहे, असे बघेल म्हणाले.

श्रीपाद नाईक यांनी 2014 मध्ये नव्यानेच स्थापन करण्यात आलेल्या आयुष मंत्रालयाचे काम करण्याची संधी दिल्याबद्दल पंतप्रधानांचे आभार मानले. या आयुष रुग्णालयामुळे गोव्याचा सर्वांगीण विकास होण्यास मदत होईल, असे नाईक म्हणाले. आयुष रुग्णालयाचे आगामी 3-4 महिन्यात उद्घाटन करण्यात येईल, अशी माहिती त्यांनी यावेळी दिली.

250 खाटांचे रुग्णालय आणि दरवर्षी 500 विद्यार्थ्यांना पदवी, पदव्युत्तर आणि पीएचडी शिक्षण यातून देण्यात येईल. तसेच या रुग्णालयात 100 खाटा निसर्गोपचारासाठी असतील. योग रुग्णालयात मधुमहे, ह्रदयरोग तपासणी विभाग असणार आहे. तसेच आयुर्वेद, निसर्गोपचार आणि योग रुग्णालयाच्या विद्यार्थ्यांसाठी वस्तीगृह सुविधा असणार आहे. यात डॉक्टरांसाठी 67 खोल्या आणि विद्यार्थ्यांसाठी 91 खोल्यांची सोय करण्यात आली आहे. पहिल्या टप्प्यातील प्रकल्पाचा खर्च 301 कोटी रुपये असून याच्या उद्घाटनानंतर दुसऱ्या टप्प्याचे काम हाती घेतले जाणार आहे.

दोन्ही मंत्र्यांनी मोपा विमानतळाला भेट देऊन कामाचा आढावा घेतला. यावेळी जीएमआर ग्रूपकडून तपशीलवार सादरीकरण करण्यात आले. विमानतळ संचलनासाठी 1 सप्टेंबर 2022 पासून तयार असल्याचे याप्रसंगी सांगण्यात आले. आग्रा-गोवा हवाईमार्गाने जोडल्यास पर्यटनाला आणखी चालना मिळेल, असे बघेल यांनी यावेळी सांगितले.

नवसारी -पंतप्रधान नरेंद्र मोदी आज ‘गुजरात गौरव अभियान’ या कार्यक्रमात सहभागी झाले.त्यांनी आज नवसारी येथील आदिवासी भाग असलेल्या खुडवेल येथे ‘गुजरात गौरव अभियान’ दरम्यान अनेक विकास उपक्रमांचे लोकार्पण  आणि पायाभरणी केली.यामध्ये 7 प्रकल्पांचे लोकार्पण, 12 प्रकल्पांची पायाभरणी आणि 14 प्रकल्पांचे भूमिपूजन यांचा समावेश आहे.हे प्रकल्प या भागातील पाणीपुरवठा सुधारण्यासाठी मदत करतील, तसेच संपर्क सुविधा वाढवण्यासाठी आणि जीवनमान  सुलभ करण्यासाठी सहाय्य  करतील. यावेळी गुजरातचे मुख्यमंत्री श्री भूपेंद्र रजनीकांत पटेल, केंद्रीय आणि राज्यमंत्री आणि लोकप्रतिनिधी उपस्थित होते.

या जाहीर कार्यक्रमाला संबोधित  करताना,  कार्यक्रम स्थळी  मोठ्या प्रमाणात जमलेल्या आदिवासी लोकांबाबत पंतप्रधानांनी नमूद केले. अशा कार्यक्रमांचे आयोजन आदिवासी बंधू-भगिनींमधील निरंतर स्नेह दर्शवते, हे त्यांनी अभिमानाने नमूद केले. आदिवासींच्या कर्तृत्वाचा आणि करारीपणाचा  गौरव करत पंतप्रधान नवसारीच्या भूमीसमोर  नतमस्तक झाले.

गेल्या दोन दशकांत झालेला वेगवान आणि सर्वसमावेशक विकास आणि या विकासातून जन्माला आलेली नवी आकांक्षा हा  गुजरातचा अभिमान आहे. दुहेरी  इंजिनचे  सरकार ही गौरवशाली परंपरा प्रामाणिकपणे पुढे नेत आहे असे सांगत आजच्या प्रकल्पांमुळे दक्षिण गुजरातमधील सूरत, नवसारी, वलसाड आणि तापी जिल्ह्यांमधील नागरिकांच्या जीवनमानात सुलभता येईल असे ते म्हणाले.

8 वर्षांपूर्वी गुजरातच्या जनतेने त्यांना दिल्लीत कशाप्रकारे  पाठवले होते, याचे स्मरण पंतप्रधानांनी केले. गेल्या 8 वर्षात अनेक नव्या घटकांमधील  लोकांना आणि प्रदेशांना विकास प्रक्रियेशी आणि आकांक्षांशी  जोडण्यात सरकारला यश आले आहे, असे ते म्हणाले. एक काळ असा होता की, गरीब, वंचित, दलित, आदिवासी, महिला आणि अन्य  असुरक्षित घटक केवळ मूलभूत गरजा पूर्ण करण्यासाठी  आपले संपूर्ण आयुष्य व्यतीत करावे लागायचे, याची त्यांनी आठवण करून दिली. यापूर्वीच्या सरकारांनी विकासाला प्राधान्य दिले नाही.बहुसंख्य गरजू घटक आणि प्रदेश सुविधांपासून वंचित होते.  गेल्या 8 वर्षात सबका साथ, सबका विकास या मंत्राला अनुसरून त्यांच्या सरकारने गरिबांच्या कल्याणावर, गरिबांना मूलभूत सुविधा पुरवण्यावर सर्वाधिक भर दिला आहे, असे त्यांनी सांगितले. पुढे बोलताना ते म्हणाले की, सरकारने कल्याणकारी योजनांच्या पूर्ततेद्वारे  गरीबांचे 100 टक्के सक्षमीकरण करण्याचा कार्यक्रम हाती घेतला आहे.

कार्यक्रमासाठी मुख्य मंचावर पोहोचण्यापूर्वी, पंतप्रधानांनी आदिवासी समाजातील लाभार्थ्यांशी संवाद साधला. जनता आणि लाभार्थी यांच्याशी असलेल्या संपर्कामुळे विकासाच्या पाठबळाला नवीन गती मिळते, असे ते म्हणाले.

गुजराती भाषेत बोलताना पंतप्रधानांनी स्थानिक लोकांसोबतच्या त्यांच्या दीर्घ सहवासाच्या आठवणी सांगितल्या.या प्रदेशात काम करत असताना लोकांचे  आदरातिथ्य आणि आपुलकी याचे त्यांनी स्मरण केले. “तुमची आपुलकी आणि आशीर्वाद हेच माझे सामर्थ्य आहे”, असे पंतप्रधानांनी  तो सगळा काळ डोळ्यासमोर आणत सांगितले.   आदिवासी समाजातील मुलांना शक्य त्या सर्व संधी मिळाव्यात असे सांगत  त्यांच्यातील स्वच्छता, ज्ञान , संघटन आणि शिस्त या गुणांची  त्यांनी नोंद घेतली. त्यांनी आदिवासी लोकांमधील समाज  जीवन आणि पर्यावरण संरक्षणाच्या मूल्यांबद्दलही सांगितले.आदिवासी भागात पाणी मिळणे सुनिश्चित करण्यासाठी त्यांनी केलेल्या कामांचाही त्यांनी उल्लेख केला. पूर्वी जेव्हा पाण्याच्या टाकीच्या उद्घाटनासारखी छोटीशी गोष्ट  ठळकपणे प्रसिद्ध व्हायची त्या काळा पेक्षा आजचे  3  हजार कोटींहून अधिक खर्चाचे  प्रकल्प अगदी विरुद्ध आहेत, असे ते म्हणाले. निरंतर कल्याण  आणि विकासाचे प्रकल्प दीर्घकाळापासून त्यांच्या शासन शैलीचा भाग आहेत आणि हे प्रकल्प लोकांच्या कल्याणासाठी आणि गरीब कल्याणासाठी असून ते कोणत्याही निवडणूक विचाराच्या पलीकडे आहेत, असे ते म्हणाले.  शुद्ध पाणी मिळावे हा कितीही दुर्गम भागात राहणाऱ्या प्रत्येक गरीबाचा , प्रत्येक आदिवासीचा  हक्क आहे,म्हणूनच असे मोठे प्रकल्प हाती घेतले जातात, प्रकल्प वेळेवर सुरु करण्यासाठीच्या  कार्यसंस्कृतीत मोठा बदल झाल्यामुळे प्रकल्पांची  पायाभरणी आणि लोकार्पणही पंतप्रधानांच्या हस्ते झाले,ही पंतप्रधानांच्या  उत्कृष्टतेची छाप असल्याचे त्यांनी सांगितले. ” सरकारमध्ये राहणे ही आम्ही सेवा करण्याची संधी मानतो”, यावर त्यांनी भर दिला.  जुन्या पिढीला भेडसावणाऱ्या समस्या आमच्या नवीन पिढीला भेडसावू नयेत यासाठी आम्ही वचनबद्ध आहोत.त्यामुळेच या योजना सर्वांसाठी शुद्ध पाणी, दर्जेदार शिक्षण या मूलभूत सुविधा सुनिश्चित करत आहेत, असे ते म्हणाले.त्यांनी त्या काळची आठवण करून दिली जेव्हा या प्रदेशात एकही विज्ञान शाळा नव्हती तर आता इथे वैद्यकीय महाविद्यालये आणि विद्यापीठे येत आहेत.दुर्गम  भागात पायाभूत सुविधा, शिक्षण, व्यवसाय, कनेक्टिव्हिटी संबंधित योजनांद्वारे जीवनमानात परिवर्तन होत आहे, असे पंतप्रधान म्हणाले.नैसर्गिक शेतीचा अवलंब करणारा  डांग जिल्हा आणि दक्षिण गुजरातचीही त्यांनी यावेळी प्रशंसा केली. मातृभाषेतून शिक्षण, अगदी वैद्यकीय आणि अभियांत्रिकी सारख्या तांत्रिक अभ्यासक्रमांसाठीही इतर मागासवर्गीय, आदिवासी मुलांसाठी संधी खुल्या  होतील, असे ते म्हणाले.वनबंधू योजनेचा नवीन टप्पा राबविल्याबद्दल त्यांनी राज्य सरकारची प्रशंसा केली. आम्ही सर्वांगीण, सर्वसमावेशक आणि न्याय्य विकासासाठी कार्यरत आहोत, असे पंतप्रधांनीं आपल्या भाषणाचा समारोप करता सांगितले.

तापी, नवसारी आणि सूरतजिल्ह्यातील रहिवाशांसाठी 961 कोटी रुपये खर्चाच्या  13 पाणीपुरवठा प्रकल्पांचे  भूमिपूजन पंतप्रधानांनी केले.नवसारी जिल्ह्यातील एका वैद्यकीय महाविद्यालयाचे भूमिपूजन त्यांनी केले,हे महाविद्यालय सुमारे  542 कोटी रुपये  खर्चून बांधण्यात येणार असून  या प्रदेशातील लोकांना स्वस्त आणि दर्जेदार वैद्यकीय सेवा प्रदान करण्यात मदत करेल.

सुमारे  586 कोटी रुपये खर्चून बांधलेल्या   मधुबन धरणावर आधारित  अस्टोल प्रादेशिक पाणीपुरवठा प्रकल्पाचे पंतप्रधानांनी उद्घाटन केले.पाणी पुरवठा अभियांत्रिकी कौशल्याचा हा एक चमत्कार आहे.तसेच, 163 कोटी रुपये खर्चाच्या  ‘नल से जल’ प्रकल्पांचे पंतप्रधानांच्या हस्ते लोकार्पण करण्यात आले.

हे प्रकल्प सुरत, नवसारी, वलसाड आणि तापी जिल्ह्यातील रहिवाशांना सुरक्षित आणि पुरेसे पिण्याचे पाणी उपलब्ध करून देतील.

तापी जिल्ह्यातील रहिवाशांना वीज उपलब्ध करून देण्यासाठी 85 कोटी रुपये खर्चून बांधण्यात आलेल्या वीरपूर व्यारा उपकेंद्राचे  पंतप्रधानांनी उद्घाटन केले.सांडपाणी प्रक्रिया सुलभ करण्यासाठी वलसाड जिल्ह्यातील वापी शहरासाठी  20 कोटी रुपये मुळ्याच्या  14 एमएलडी क्षमतेच्या सांडपाणी प्रक्रिया प्रकल्पाचे उद्घाटनही करण्यात आले.पंतप्रधानांनी नवसारी येथे 21 कोटी रुपयांहून अधिक खर्च करून बांधलेल्या सरकारी निवास्थानांचे उद्घाटन केले. त्यांनी पिपळदेवी – जुनेर – चिचविहीर – पिपळदहाड या रस्त्यांचे आणि  डांगमध्ये प्रत्येकी 12 कोटी रुपये खर्चून बांधण्यात आलेल्या शाळांच्या इमारतींचे उद्घाटनही त्यांनी केले.

सुरत, नवसारी, वलसाड आणि तापी जिल्ह्यातील रहिवाशांना शुद्ध पिण्याचे पाणी उपलब्ध करून देण्यासाठी  549 कोटी रुपये खर्चाच्या  8 पाणीपुरवठा प्रकल्पांची पंतप्रधानांनी पायाभरणी केली.नवसारी जिल्ह्यात 33 कोटी रुपये खर्चून बांधण्यात येणाऱ्या खेरगाम आणि पिपळखेड यांना जोडणाऱ्या रुंद रस्त्याची पायाभरणीही करण्यात आली. नवसारी ते बारडोली मार्गे सुपा दरम्यान सुमारे 27 कोटी रुपये खर्चून आणखी एक चौपदरी रस्ता बांधण्यात येणार आहे. डांग येथे 28 कोटी खर्चाच्या जिल्हा पंचायत भवनाची आणि 10 कोटी खर्चाच्या रोलर क्रॅश बॅरियर लावण्याच्या कामाचे भूमिपूजनाही पंतप्रधानांनी केले.

नवी दिल्ली – ग्राहक व्यवहार विभागांतर्गत केंद्रीय ग्राहक संरक्षण प्राधिकरणाने (CCPA) दिशाभूल करणाऱ्या जाहिरातींना प्रतिबंध घालण्यासाठी तसेच जाहिरातींमुळे  शोषण झालेल्या किंवा प्रभावित झालेल्या ग्राहकांचे संरक्षण करण्याच्या उद्देशाने दिशाभूल करणार्‍या जाहिरातींना प्रतिबंध आणि दिशाभूल करणार्‍या जाहिरातींचे  समर्थन याबाबत  मार्गदर्शक तत्त्वे 2022’ अधिसूचित केली  आहेत.

मार्गदर्शक तत्त्वांमुळे हे सुनिश्चित होईल की  तथ्यहीन  दावे, अतिशयोक्तीपूर्ण आश्वासने, चुकीची माहिती आणि खोटे दावे यामुळे ग्राहकांची फसवणूक होणार  नाही. अशा जाहिराती माहिती मिळण्याचा अधिकार, निवडण्याचा अधिकार आणि संभाव्य असुरक्षित उत्पादने आणि सेवांपासून संरक्षण मिळण्याचा  अधिकार यासारख्या ग्राहकांच्या विविध हक्कांचे उल्लंघन करतात.

ग्राहकांच्या हक्कांचे उल्लंघन, अनुचित व्यापार पद्धती आणि सार्वजनिक आणि ग्राहकांच्या हितासाठी प्रतिकूल अशा  खोट्या किंवा दिशाभूल करणार्‍या जाहिरातींचे नियमन करण्यासाठी आणि एक वर्ग म्हणून ग्राहकांच्या हक्कांचा प्रचार , संरक्षण  आणि अंमलबजावणी  करण्यासाठी  ग्राहक संरक्षण कायदा, 2019 च्या कलम 10 अंतर्गत सीसीपीएची स्थापना करण्यात आली आहे.

ग्राहक संरक्षण कायदा, 2019 च्या कलम 18 द्वारे सीसीपीएला बहाल केलेल्या अधिकारांचा वापर करून मार्गदर्शक तत्त्वे अधिसूचित करण्यात आली आहेत.

ग्राहक संरक्षण कायदा, 2019 च्या कलम 2(28) अंतर्गत दिशाभूल करणारी जाहिरात याआधीच परिभाषित केली  आहे.

सध्याची मार्गदर्शक तत्त्वे “प्रलोभन  जाहिरात”, “प्रचार  जाहिरात” परिभाषित करतात आणि “मुक्त दावा जाहिराती” म्हणजे काय ते स्पष्ट  करतात.

लहान मुलांची संवेदनशीलता आणि असुरक्षितता तसेच  जाहिरातींचे लहान मुलांच्या  मनावर होणारे गंभीर परिणाम लक्षात घेऊन, लहान मुलांना लक्ष्य करणाऱ्या जाहिरातींसंदर्भात याआधीच अनेक तरतुदी करण्यात आल्या आहेत. मार्गदर्शक तत्त्वे जाहिरातींना अशा प्रकारे एखाद्या उत्पादनाची   किंवा सेवेची वैशिष्ट्ये याबाबत अतिशयोक्ती करण्यापासून प्रतिबंधित करतात , ज्यामुळे मुलांच्या अशा उत्पादन किंवा सेवेबाबत अवास्तव अपेक्षा असतात आणि मान्यताप्राप्त संस्थेकडून   वैज्ञानिकदृष्ट्या सिद्ध न करता  आरोग्य किंवा पोषण विषयक दावे केले जातात.  कोणत्याही कायद्यानुसार अशा जाहिरातींसाठी आरोग्यविषयक इशारा  आवश्यक आहे किंवा मुले खरेदी करू शकत नाहीत अशा उत्पादनांना  मुलांना केंद्रस्थानी ठेवून तयार करण्यात येणाऱ्या  जाहिरातींमध्ये  क्रीडा, संगीत किंवा चित्रपट  क्षेत्रातील कोणत्याही व्यक्तिमत्त्वाला दाखवता येणार नाही, असे मार्गदर्शक तत्वांमध्ये नमूद करण्यात आले आहे.

जाहिरातींमधील अस्वीकरण (डिस्क्लेमर )ग्राहकांच्या दृष्टीकोनातून महत्त्वाची भूमिका बजावते ,एक प्रकारे ते कंपनीची जबाबदारी मर्यादित करते.त्यामुळे मार्गदर्शक तत्त्वांमध्ये असे नमूद केले आहे की, अस्वीकरणअशा जाहिरातीत केलेल्या कोणत्याही दाव्याच्या संदर्भात भौतिक माहिती लपवण्याचा प्रयत्न करणार नाही,ज्याच्या वगळण्यामुळे  किंवा न दिल्यामुळे  जाहिरात फसवी होण्याचाही किंवा व्यावसायिक हेतू लपविण्याची शक्यता आहे आणि जाहिरातीमध्ये केलेला  दिशाभूल करणारा दावा दुरुस्त करण्याचा प्रयत्न करणार नाही.  अस्वीकरण हे जाहिरातीत केलेल्या दाव्याच्या भाषेत  असेल आणि अस्वीकरणामध्ये वापरलेलेलया अक्षरांची रचनादेखील(फॉन्ट)  दाव्यामध्ये वापरल्याप्रमाणेच असेल, असे या मार्गदर्शक तत्वांमध्ये नमूद करण्यात आले आहे.

त्याचप्रमाणे, निर्माता, सेवा प्रदाता , जाहिरातदार आणि जाहिरात संस्थांसाठी  कर्तव्य पूर्ततेच्या अनुषंगाने, मान्यता देण्यापूर्वी योग्य ती काळजी घेणे आणि इतर    स्पष्ट मार्गदर्शक तत्त्वे निश्चित करण्यात आली आहेत. जाहिराती ज्या प्रकारे प्रकाशित केल्या जात आहेत त्यामध्ये अधिक पारदर्शकता आणि स्पष्टता आणून ग्राहकांच्या हिताचे रक्षण करणे हे मार्गदर्शक तत्त्वांचे उद्दिष्ट आहे,जेणेकरून खोट्या कथा आणि अतिशयोक्ती ऐवजी ग्राहक तथ्यांवर आधारित माहितीपूर्ण निर्णय घेण्यास सक्षम होतील.

मार्गदर्शक तत्त्वांचे उल्लंघन केल्यास  दंड देखील स्पष्टपणे दर्शवण्यात आला आहे. केंद्रीय ग्राहक संरक्षण प्राधिकरण कोणत्याही दिशाभूल करणार्‍या जाहिरातींसाठी उत्पादक, जाहिरातदार आणि अनुमोदकांना 10 लाख रुपयांपर्यंत दंड ठोठावू  शकते.त्यानंतरच्या उल्लंघनांसाठी, केंद्रीय ग्राहक संरक्षण प्राधिकरण 50 लाख रुपयांपर्यंत दंड ठोठावू शकते.प्राधिकरण दिशाभूल करणार्‍या जाहिरातीचे समर्थन करणार्‍याला 1 वर्षापर्यंत कोणतेही अनुमोदन  करण्यास प्रतिबंध करू शकते आणि त्यानंतरच्या उल्लंघनासाठी, प्रतिबंध 3 वर्षांपर्यंत वाढू शकतो.

मार्गदर्शक तत्त्वे येथे पाहता येतील 

https://consumeraffairs.nic.in/sites/default/files/file-uploads/latestnews/CCPA%20Notification.pdf

 नवसारी, १० जून, २०२२:  भारताचे पंतप्रधान नरेंद्र मोदी यांच्या हस्ते नवसारीमध्ये ५०० खाटांची क्षमता असलेल्या, मल्टीस्पेशालिटी व कॅन्सर रुग्णालयांच्या कॉम्प्लेक्सचे तसेच दक्षिण गुजरातमधील खरेल गावामध्ये उत्कृष्टता केंद्राचे उद्घाटन पार पडले, या उत्कृष्टता केंद्रामध्ये एक कौशल-निर्माण केंद्र, प्राथमिक, माध्यमिक आणि उच्च माध्यमिक शाळांचा समावेश आहे.  मल्टीस्पेशालिटी आणि कॅन्सर रुग्णालये ही ८ एकर जागेमध्ये वसवण्यात आलेल्या ए एम नाईक हेल्थकेयर कॉम्प्लेक्सचा एक भाग आहेत, यामध्ये कंसल्टंट्स, स्पेशलिस्ट्स, नर्सेस आणि पॅरामेडिकल कर्मचाऱ्यांसाठी निवासी सुविधांचा देखील समावेश आहे.  शाळांच्या जवळ विद्यार्थ्यांसाठी वसतिगृहे व शिक्षक आणि मुख्याध्यापकांसाठी राहण्याच्या सुविधा पुरवण्यात आल्या आहेत.

याप्रसंगी निराली मेमोरियल मेडिकल ट्रस्टचे संस्थापक अध्यक्ष, परोपकारासाठी सदैव झटणारे, पद्म विभूषणाने सन्मानित करण्यात आलेले ए एम नाईक म्हणाले की, त्यांची स्वतःची परोपकार मूल्ये माननीय पंतप्रधानांच्या जनतेला परवडेल आणि सहज उपलब्ध होतील अशा आरोग्यसेवा, शिक्षण व कौशल प्रशिक्षण उपलब्ध करवून देण्याच्या उद्दिष्टांशी मिळतीजुळती, अनुरूप आहेत.

नाईक यांनी सांगितले, “आपले पंतप्रधान नरेंद्र मोदी जी आज याठिकाणी आले याचा मला खूप आनंद होत आहे.  भारत आणि भारतातील लोकांच्या सेवेप्रती त्यांची अतीव निष्ठा खरोखरीच प्रेरणादायी आहे.  त्यांची ही दृढ निष्ठा इतरांनाही त्याचप्रकारे कार्य करण्यासाठी प्रोत्साहित करते.” 

ते पुढे म्हणाले, “गरजू लोकांना मदत पुरवण्याचे काम माझ्या विश्वस्त संस्था यापुढे देखील सुरु ठेवतील आणि लोकांच्या जीवनात सुधारणा घडवून आणत राहतील. या कार्यासाठी मी वचनबद्ध आहे. माझ्या विश्वस्त संस्थांकडून समाजाची सर्वतोपरी सेवा केली जावी यासाठी मी अथक मेहनत करत राहीन.”

नाईक यांनी २००९ मध्ये मध्ये स्थापन केलेल्या दोन विश्वस्त संस्थांनी रुग्णालये, शाळा व कौशल-निर्माण केंद्र सुरु केले आहे. गरजू व्यक्तींना आधुनिक आरोग्यसेवांचा लाभ घेता यावा यावर ‘निराली मेमोरियल मेडिकल ट्रस्ट’चा भर असतो. ‘नाईक चॅरिटेबल ट्रस्ट’मार्फत शिक्षण व कौशल-निर्माण सुविधा पुरवण्याचे कार्य केले जाते.

अत्याधुनिक वैद्यकीय सेवा उपलब्ध करवून देणारी ही रुग्णालये दक्षिण गुजरातसाठी मोठे वरदान ठरणार आहेत. अनेक वेगवेगळ्या, अत्याधुनिक उपकरणांनी सुसज्ज अशी ही रुग्णालये सर्वोत्तम आरोग्यसेवासुविधांच्या तोडीस तोड ठरतील.

निराली मल्टीस्पेशालिटी रुग्णालयामध्ये सर्वसाधारण वैद्यकीय सेवा, सर्वसाधारण शस्त्रक्रिया, कार्डिओलॉजी आणि कार्डिओथोरॅसिक सर्जरी, नवजात बाळे तसेच लहान मुलांवरील वैद्यकीय उपचार, ऑब्स्टट्रिक्स आणि गायनॅकॉलॉजी, ऑर्थोपेडिक उपचार, अतिगंभीर व आघात स्थितीमधील देखभाल सेवा यांच्यासह विविध वैद्यकीय सेवा पुरवल्या जातात.

हेल्थकेयर कॉम्प्लेक्सचा एक भाग असलेल्या निराली कॅन्सर हॉस्पिटलचे भूमिपूजन २०१९ साली माननीय पंतप्रधानांच्या हस्ते करण्यात आले होते.  २०२१ मध्ये गुजरातच्या माननीय मुख्यमंत्र्यांच्या हस्ते याचे उद्घाटन करण्यात आले होते.  या रुग्णालयात थ्रीडी मॅमोग्राफी, एक्सरे सुविधा तसेच न्यूक्लियर औषधांचा वापर करण्याच्या सुविधा यांच्यासह अनेक अत्याधुनिक सुविधा उपलब्ध आहेत.

निराली मेमोरियल मेडिकल ट्रस्ट

वैद्यकीय सेवा क्षेत्रात परोपकारी कार्य करण्यासाठी श्री. ए एम नाईक यांनी आपल्या व्यक्तिगत क्षमतेच्या बळावर निराली मेमोरियल मेडिकल ट्रस्ट या सार्वजनिक धर्मादाय ट्रस्टची स्थापना केली. श्री. नाईक यांच्या नातीचे ‘निराली’ हे नाव ट्रस्टला देण्यात आले आहे जिचे कर्करोगामुळे वयाच्या अवघ्या दुसऱ्या वर्षी दुःखद निधन झाले. श्री. नाईक यांनी गुजरातमधील खरेल येथील सर्वसाधारण रुग्णालयात एक अतिरिक्त विंग उभारून तेथील वैद्यकीय सुविधांमध्ये सुधारणा घडवून आणण्यात देखील मदत केली आहे. ए एम नाईक चॅरिटेबल हेल्थकेयर सेंटर या नावाने मुंबईतील पवई येथे एक नवी सुविधा देखील या ट्रस्टने स्थापन केली आहे. मुंबईतील जनतेला परवडण्याजोग्या किमतींमध्ये सर्वोत्तम दर्जाच्या वैद्यकीय देखभाल सेवा पुरवण्याचे कार्य याठिकाणी केले जाते.

नाईक चॅरिटेबल ट्रस्टसमाजातील वंचित समुदायांना उत्तम दर्जेदार शिक्षण सेवासुविधा पुरवण्याचे कार्य नाईक चॅरिटेबल ट्रस्टमार्फत (एनसीटी) केले जाते.

खेलो इंडिया युथ गेम्स

पंचकुला, (हरियाना) १० –
खेलो इंडिया स्पर्धेत महाराष्ट्राच्या मल्लखांबच्या खेळाडूंनी केलेल्या चित्तथराक कसरती संघाला सुवर्णपदक देऊन गेल्या. दोन दिवसांपूर्वी मुलींच्या संघाने उपविजेतेपद पटकावले आहे. प्रारंभीपासून महाराष्ट्राची मदार मल्लखांबच्या संघावर होती. परंतु मुलींच्या संघाला रौप्यपदक मिळाल्याने महाराष्ट्र तालिकेत एक पदकाने हरियानाच्या मागे आहे. आज दुसरे सुवर्ण पदक ज्युदोमध्ये मिळाले. ४० किलो वजन गटात मिथिला भोसले हिने ही सुवर्ण कामगिरी केली. ती मूळ ठाण्याची असून सध्या बालेवाडी येथे ज्युदो अकादमीत सराव करते. तिने गुजरातच्या अर्चना नागेरा हिच्यावर विजय मिळवला.
प्रशिक्षक मधुश्री देसाई-काशीद, मंगेश भोसले यांच्या मार्गदर्शनाखाली मिथलाचा सराव सुरू असतो. मंगेश भोसले हे तिचे वडील आहेत.
मुलांच्या मुल्लखांबच्या संघाला मध्य प्रदेश आणि छत्तीसगडच्या संघांकडून कडवे आव्हान मिळाले. ०.५ गुणांनी महाराष्ट्राचा संघ विजेता ठरला. महाराष्ट्राच्या विजेत्या संघाला १२६.४५ गुण मिळाले. दुसऱ्या क्रमांकावर असलेल्या मध्य प्रदेशने १२६.४० गुणांपर्यंत कडवी झुंज दिली. तिसऱ्या स्थानावर राहिलेला छत्तीसगडचेही १२४. ५० गुण होते.
महाराष्ट्राच्या संघाने रोप, पोल आणि हँगिंग या प्रकारात कसरती केल्या.
या संघामध्ये अवधूत पिंगळे (मुंबई), ऋषभ गुगळे (मुंबई), अथर्व कोंडविलकर (मुंबई), चेतन मानकर (नाशिक), मुग्रान पाठारे (मुंबई), अमेय सूर्ववंशी (पुणे) यांचा समावेश होता. रात्री आणि उद्या (शनिवारी) मल्लखांबचे वैयक्तिक क्रीडा प्रकार होणार आहेत, अशी माहिती प्रशिक्षक अनिल नागपुरे यांनी दिली. त्या प्रकारातही महाराष्ट्राला सुवर्णपदकांची आशा आहे.
मुलींच्या संघाने सांघिक उपविजेतेपद पटकावले होते. त्या संघात आरूषी शिंगवी, तमन्ना संघवी, प्रणाली मोरे, भक्ती मोरे, हार्दिका शिंदे, पलक सुरी यांचा समावेश होता. मुलींच्या संघाच्या काजल काळे या प्रशिक्षक आहेत.