पुणे दि.७: कौशल्य विकास व उद्योजकता विभागाकडून १२ सप्टेंबर २०२२ रोजी सकाळी १० वाजता औद्योगिक प्रशिक्षण संस्था औंध पुणे येथे प्रधानमंत्री राष्ट्रीय शिकाऊ उमेदवारी भरती मेळावा आयोजित करण्यात आला आहे.

शिकाऊ उमेदवारी प्रशिक्षण योजना ही कुशल कारागिर घडविणारी योजना आहे. देशपातळीवरील आय. टी. आय. उत्तीर्ण व इच्छुक उमेदवारांसाठी जिल्हास्तरीय शिकाऊ उमेदवारी भरती मेळावा आयोजीत करण्यात आला असल्याने, या मेळाव्यास आय. टी. आय उत्तीर्ण उमेदवारांनी उपस्थित राहून संधीचा लाभ घ्यावा. आस्थापनांनी भरती मेळाव्याकरीता https://www.apprenticeshipindia.gov.in >> Apprenticeship Mela किंवा https://dgt.gov.in/appmela2022 या लिंकवर नोंदणी करावी, असे आवाहन सहायक प्रशिक्षणार्थी सल्लागार (तां) यशवंत कांबळे, विकास टेके, तसेच मूलभूत प्रशिक्षण तथा अनुषंगिक सूचना केंद्र द्वारा औद्योगिक प्रशिक्षण संस्थेचे अंशकालीन प्राचार्य बी. आर. शिंपले यांनी केले आहे.

पुणे – ३४ व्या पुणे फेस्टिवलमध्ये यशवंतराव चव्हाण नाट्यगृह येथे आज दुपारी *अंतरंग-ती  च्या प्रतिभेचे* हा तिच्या विविध रूपांचा व स्त्रीच्या अंतरंगातील भाव विश्वाला गायन, वादन आणि नृत्याच्या माध्यमातून उलगडणारा कार्यक्रम प्रेक्षकांची मन जिंकून गेला. तसेच ‘जिम पोरी झिम’ एक पारंपरिक सण, ‘खेळ मंगळागौरीचे’ सादर झाले.  अवीट गोडीच्या गीतांचे लाइव्ह सादरीकरण सोबत पुण्यातील ५० महिला कलाकारांचा संच आपल्या पारंपारिक वेशभूषेत होता. त्याच्या साथीला प्रतिथयश गायिकांचा – वाद्यवृंदा होता.

रत्ना दहिवेलकर व अर्चना नार्वेकर यांनी या कार्यक्रमाचे संयोजन केले होते. अजित कुमठेकर याचे मुख्य समन्वयक होते. एलिना इव्हेंट्स आणि मानिनी मंगळागौर ग्रुप यांनी हा कार्यक्रम सादर केला आहे. याचे प्रायोजक सोन रूपम, चैतन्य पराठा आणि गोखले किचन, अस्मि मोबाइल व माई मसाले हे होते.

लहान कन्या हळूहळू मोठी होत जाते व लग्नानंतर सासरी जाते याचे कल्पक चित्रण संगीत व नृत्यातून सादर करण्यात आले.

पुणे – 34 व्या पुणे फेस्टिवलमध्ये भारतरत्न लता मंगेशकर यांना श्रद्धांजली वाहणाऱ्या “गाये लता” या यशवंतराव चव्हाण नाट्यगृह येथे झालेल्या कार्यक्रमास प्रेक्षकांनी मोठी पसंती दिली. पुण्यातील २० नामवंत गायिकानी स्व. लता दिदिंची अजरामर हिंदी चित्रपट गीते सादर केली. त्या बरोबर काही प्रसिद्ध बंगाली व राजस्थानी गीतेहि यात समाविष्ट होती.

संत ज्ञानेश्वरांनी रचलेल्या व दीदींनी गायलेल्या काही रचनाहि या सर्व गायिकानी सादर केल्या.  त्या बरोबर साधना नृत्यालयाच्या नृत्यांगननी नृत्ये सादर केली. विशेष आकर्षण म्हणजे ‘आकृती’ गृपच्या चित्रकार महिला उर्मिला दुरगुडे, अनिता देशपांडे, वैश्णवी दामकोंडेवार यांनी लतादिदिंची विविध माध्यमातून चित्रे काढली. अहमदनगरचे सुप्रसिद्ध शिल्पकार व चित्रकार प्रमोद कांबळे यांनी त्यांच्या  चित्रांतून दिदिंना श्रद्धांजली वाहिली.

या कार्यक्रमास प्रमुख पाहुणे म्हणून डॉ. शामकांत बा. देवरे* सचिव, महाराष्ट्र राज्य मराठी विश्वकोश निर्मिती मंडळ आणि उपसंचालक राज्य मराठी विकास संस्था महाराष्ट्र राज्य उपस्थित होते. याची संकल्पना व निवेदन अनुराधा भारती यांनी केले. संगीत, नृत्य व चित्रकला अशा तिन्ही माध्यमातून गानस्वरस्वती यांना स्वर सुमनांजली अर्पण करण्यात आली. व्होईस ऑफ पुणे फेस्टिवलच्या गतविजेत्या गायकांनी यात सहभाग घेतला होता. कार्यक्रमास प्रेक्षकांनी मोठी गर्दी केली होती.

पुणे, ता. ७ : खर्‍या इतिहासाची ओळख, भारतीय परंपरांचा अभिमान बाळगणे आणि वैचारिक गुलामगिरीतून मुक्तता हे परिवर्तनाचे सूत्र असल्याचे मत खासदार प्रकाश जावडेकर यांनी व्यक्त केले.

डॉ. श्रीपती शास्त्री ‘रिसर्च इन्स्टिट्यूट ऑफ सोशल सायन्ससेस’ या सावित्रीबाई फुले पुणे विद्यापीठाशी संलग्न संशोधन केंद्राच्या कार्यालयाचे सहकारनगर येथे उद्घटान करताना जावडेकर बोलत होते. संस्थेचे अध्यक्ष नितीन देशपांडे, सचिव डॉ. शरद खरे, सहसचिव अविनाश नाईक, संचालक बाबासाहेब शिंदे, सागर नेवसे, सुधीर गाडे, डीईएसचे अध्यक्ष डॉ. शरद कुंटे, काशिनाथ देवधर, हरी मिरासदार, थॉमस डाबरे यांची प्रमुख उपस्थिती होती.

जावडेकर पुढे म्हणाले, ‘‘सध्या दोन ‘नरेटिव्ह’मध्ये स्पर्धा सुरू आहे. ब्रिटिश व मुघल मानसिकतेतून घडवलेला नरेटिव्ह संपवून राष्ट्र प्रथम माणणारा संवाद चालला पाहिजे. त्यासाठी खरा इतिहास सांगण्याची आवश्यकता आहे. खरा इतिहास सांगण्यासाठी संशोधन होणे आवश्यक आहे.’’
डॉ. शरद खरे यांनी प्रास्ताविक, काशिनाथ देवधर यांनी स्वागत, नितिन देशपांडे यांनी परिचय, अविनाश नाईक यांनी सूत्र संचालन आणि आभार प्रदर्शन केले.

मंत्री चंद्रकांतदादा पाटील यांच्या अधिकाऱ्यांना सक्त सूचना

पुणे- सूस खिंडीतील गार्बेज प्लांटची भिंत आत घेऊन वाहतूक कोंडी सोडवा, तसेच सेवा रस्ता जलदगतीने पूर्ण करा, तसेच पाषाण सूस उड्डाणपुलासाठी अधिग्रहण केलेल्या जागेचा मोबदला तातडीने आदा करा, आदी सूचना राज्याचे उच्च व तंत्रशिक्षण मंत्री आणि कोथरूडचे आमदार चंद्रकांतदादा पाटील यांनी अधिकाऱ्यांना दिल्या.

पाषाण -सूस मार्गावरील वाहतूक कोंडी सोडविण्यासाठी महापालिकेच्या वतीने उभारण्यात येणाऱ्या सूस खिंड उड्डाणपुलाची पाहाणी राज्याचे उच्च व तंत्रशिक्षण मंत्री चंद्रकांतदादा पाटील यांनी आज करुन आढावा घेतला. तसेच स्थानिक नागरिकांच्या अडचणी जाणून घेतल्या.

यावेळी महापालिका अतिरिक्त आयुक्त कुणाल खेमनार, राजेंद्र मुठे, वाहतूक शाखेचे श्रीनिवास बोनाला राष्ट्रीय महामार्गाचे संजय कदम, अधिकारी, स्थानिक नगरसेवक अमोल बालवडकर, ज्योती कळमकर, भाजपा पुणे शहर उपाध्यक्ष गणेश कळमकर, कोथरूड मंडल अध्यक्ष पुनीत जोशी, पुणे शहर प्रवक्ते संदीप खर्डेकर यांच्या सह भाजपाचे सर्व पदाधिकारी आणि स्थानिक नागरिक उपस्थित होते.

पाषाण -सूस मार्गावरील वाहतूक कोंडी सोडविण्यासाठी महापालिकेच्या वतीने सूस खिंड उड्डाणपुलाची उभारणी करण्यात येत असून, या उड्डाणपुलाचे काम पूर्णत्वास येत असले, तरी सेवा रस्त्याचे काम अद्याप अपूर्ण आहे. त्यासोबतच सूस भागातील गार्बेज प्लांटच्या भिंतीमुळे वाहतूक कोंडी होत आहे. त्यामुळे आज नामदार चंद्रकांतदादा पाटील यांनी सदर उड्डाणपुलाची पाहाणी केली. यावेळी स्थानिक नागरिकांना भेडसावणाऱ्या समस्यांबाबत नामदार पाटील यांना अवगत केले.

यावर नामदार पाटील यांनी नागरिकांच्या अडचणी तातडीने दूर करुन; त्यांचे जीवन सुसह्य करण्याच्या सूचना यावेळी महापालिका अधिकाऱ्यांना दिल्या. यात प्रामुख्याने सेवा रस्त्याचे काम तातडीने पूर्ण करणे, तसेच गार्बेज प्लांटची भिंत मागे घेऊन रस्त्यावरील वाहतूक कोंडी सोडवणे, त्याचप्रमाणे उड्डाणपुलासाठी अधिग्रहित केलेल्या जमीन मालकांना त्याचा मोबदला तातडीने आदा करण्याच्या सूचना अधिकाऱ्यांना दिल्या.

मुख्यमंत्र्यांची पुण्यातील मानाच्या गणपतींसह इतर गणेश मंडळांना भेट

राज्यातील जनतेला सुखसमृद्धी, समाधान लाभू दे-मुख्यमंत्री एकनाथ शिंदे यांचे साकडे

पुणे दि.७: मुख्यमंत्री एकनाथ शिंदे यांनी पुण्यातील मानाच्या गणपतींसह विविध गणेश मंडळांना भेट देऊन श्री गणेशाचे दर्शन घेतले. राज्यातील जनतेच्या आयुष्यात सुखसमृद्धी आणि समाधान लाभू दे, शेतकऱ्यांच्या जीवनात आनंद फुलू दे असे साकडे त्यांनी श्री गणरायाला घातले.तसेच त्यांनी अभिनेता नाना पाटेकर यांच्या डोणजे येथील निवासस्थानी भेट देऊन गणपतीचे दर्शन घेतले. याप्रसंगी श्री. पाटेकर यांनी मुख्यमंत्र्यांचे स्वागत व सत्कार केला. मुख्यमंत्र्यांच्या हस्ते यावेळी वृक्षारोपण करण्यात आले.. यावेळी नाना पाटेकर यांच्यासोबत विविध विषयांवर गप्पाही रंगल्या असे मुख्यमंत्र्यांनी म्हटले आहे.

मुख्यमंत्री श्री. शिंदे यांच्या हस्ते श्री कसबा गणपतीची आरती केली. त्वष्टा कासार समाज संस्था गणेश मंडळ, बुधवार पेठ येथील अशोक मंडळ ट्रस्ट, श्रीमंत दगडूशेठ हलवाई गणेशोत्सव मंडळ, महात्मा फुले मंडई येथील अखिल मंडई गणेशोत्सव मंडळ, तुळशी बाग येथील तुळशीबाग सार्वजनिक गणेशोत्सव मंडळ, लक्ष्मी मार्ग येथील गुरुजी तालीम मंडळ, केसरीवाडा येथील लोकमान्य टिळक वाडा गणेशोत्सव मंडळ, सदाशिव पेठ येथील छत्रपती राजाराम मंडळ, नवी पेठ येथील यशवंत नगर गणेशोत्सव मंडळ, कोथरुड येथील श्री साई मित्र मंडळाच्या गणपतीचे दर्शन घेतले. यावेळी त्यांचा मंडळांच्यावतीने सत्कार करण्यात आला.

केसरीवाडा येथे गणेशदर्शन घेतल्यानंतर मुख्यमंत्री श्री. शिंदे यांनी आमदार मुक्ता टिळक यांची भेट घेतली. त्यावेळी श्रीमती टिळक यांनी गणेशोत्सवाच्या जुन्या आठवणी मुख्यमंत्र्यांना सांगितल्या.

गणेश मंडळांना भेटी व दर्शनाच्या प्रसंगी आरोग्य मंत्री तानाजी सावंत, खासदार श्रीरंग बारणे, माजी मंत्री विजय शिवतारे, मंडळाचे अध्यक्ष, पदाधिकारी आदी उपस्थित होते.

निर्बंधमुक्त गणेशोत्सव; भाविकांच्या उत्साहाला उधाण

कोरोनाच्या साथीमुळे २०२० पासून दोन वर्षे निर्बंधांमुळे गणेशोत्सव साजरा करण्यावर मर्यादा आल्या होत्या. यंदाच्या गणेशोत्सवादरम्यान शासनाने निर्बंध दूर केल्यामुळे सर्वत्र उत्साहाचे वातावरण आहे. सर्व गणेशमंडळांनी कल्पकतेने देखावे साकारले आहेत. हे देखावे पाहण्यासाठी भाविक मोठ्या संख्येने बाहेर पडत असून भाविकांच्या उत्साहाला उधाण आले आहे, असेही श्री.शिंदे यावेळी म्हणाले.

मुख्यमंत्री श्री. शिंदे गणेश मंडळांना भेटी देऊन दर्शन घेत असताना नागरिकही श्री. शिंदे यांना भेटण्यासाठी रस्त्याच्या दुतर्फा उभे होते. मुख्यमंत्र्यांनीही गाडीतून बाहेर येत त्यांची भेट घेतली.

पुणे – 34 व्या पुणे फेस्टिवलमध्ये यंदा खास महिलांसाठीच्या ‘तुझ्यात जीव रंगला’ या बालगंधर्व रंगमंदिर येथे झालेल्या लावणी कार्यक्रमाने रसिक महिलांची मने तृप्त केली. यामध्ये अर्चना जावळेकर, प्राची मुंबईकर,  संगीता लाखे,  किरण पुणेकर आणि नमिता पाटील या लोककलावंत नृत्यांगनानी  सहकार्यांसमवेत सर्वांना मंत्रमुग्ध केले.

प्रारंभी ज्येष्ठ अभिनेत्री लीला गांधी, सौ. मीरा कलमाडी, महाराष्ट्र महिला आयोगाच्या अध्यक्षा रूपाली चाकणकर यांनी दीपप्रज्वलन केले. शशी कोठावळे हे याचे निर्माते आहेत. ज्येष्ठ अभिनेत्री लीला गांधी यांचा सत्कार यावेळी पैठणी व पुष्पगुच्छ देऊन करण्यात आला. सौ. मीरा कलमाडी आणि महाराष्ट्र महिला आयोगाच्या अध्यक्षा रूपाली चाकणकर यावेळी प्रमुख पाहुणे म्हणून उपस्थित होत्या. तसेच सिंहगड इंस्टीट्यूट सुगंधा नवले, बाल हक्क आयोगाच्या सदस्या जयश्री पालवे, उद्योगिका रोटरीअन मंजुषा फडके विशेष निमंत्रित म्हणून उपस्थित होत्या. संयोगिता कुदळे व दिपाली पांढरे यांनी याचे आयोजन केले होते.

या कार्यक्रमात “तुझ्या उसाला लागल कोल्हा..”, “वाजले की बारा…”, “बुगडी माझी सांडली ग……”, “बाई वाड्यावर या…”, “रात रंगी राती रंगुनी चंद्रा…..”, अशा अनेक ठसकेबाज लावण्यांनी जोरदार टाळ्या व शिट्या मिळवल्या. महिलां प्रक्षालांमध्ये येवून या नृत्याग्नांनी सभागृहात जोश भरला.

“पुण्याचे नाव जगाच्या नकाशावर जावे यासाठी खा. सुरेश कलमाडी यांनी १९८९ मध्ये पुणे फेस्टिवल सुरु केला, त्या पहिल्या वर्षापासून माझा पुणे फेस्टिव्हलमध्ये सहभाग आहे असे सांगून ज्येष्ठ अभिनेत्री लीला गांधी यांनी “पुणे फेस्टिव्हलच्या लावणी मंचावर झालेला सत्कार हा मी सर्वोच्च बहुमान मानते, असे नमूद केले.

रुपाली चाकणकर यांनी लीला गांधींचे अभिनंदन करून म्हटले की पुणे फेस्टिव्हलच्या माध्यमातून श्री सुरेश कलमाडी व सौ. मीरा कलमाडी यांनी पुण्याचे नव जगाच्या नकाशावर नेले. कलाकारांना मनाचे स्थान मिळाले. कन्या बचाव हा संदेश मोलाचा आहे असे त्या शेवटी म्हणाल्या.

शेवटी संयोजिका दिपाली पांढरे यांनी आभार प्रदर्शन केले. बालगंधर्व रंगमंदिर रसिक महिलांनी खचाखच भरले होते. पुणे फेस्टिव्हलचे बालगंधर्व रंगमंदिराचे समन्वयक श्रीकांत कांबळे या वेळी उपस्थित होते.  

पुणे दि. ७ :  रामोशी समाजाच्या सर्वांगीण विकासासाठी राजे उमाजी नाईक आर्थिक विकास महामंडळाची स्थापना करण्यात येईल, अशी ग्वाही उपमुख्यमंत्री देवेंद्र फडणवीस यांनी दिली.

पुरंदर तालुक्यातील भिवडी येथे जय मल्हार क्रांती संघटना महाराष्ट्र राज्य आयोजित आद्यक्रांतीवीर नरवीर राजे उमाजी नाईक यांच्या २३१ व्या जयंती सोहळा कार्यक्रमात श्री. फडणवीस बोलत होते.  यावेळी खासदार रणजितसिंह नाईक निंबाळकर, आमदार चंद्रकांत बावनकुळे, गोपीचंद पडळकर, संजय जगताप, जयकुमार गोरे, माजी मंत्री हर्षवर्धन पाटील, माजी राज्यमंत्री विजय शिवतरे, जय मल्हार क्रांती संघटनेचे  संस्थापक अध्यक्ष दौलत शितोळे, उपाध्यक्ष अंकुश जाधव आदी उपस्थित होते.

आद्यक्रांतीवीर नरवीर राजे उमाजी नाईक यांना अभिवादन करून उपमुख्यमंत्री श्री. फडणवीस पुढे म्हणाले, स्वराज्याच्या अमृत महोत्सवानिमित्ताने भारतीय स्वातंत्र्याकरीता ज्यांनी बलिदान दिले त्या नाम- अनाम वीरांचे स्मरण होणे आवश्यक आहे. छत्रपती  शिवाजी महाराजांनी स्वराज्याची स्थापना करून स्वातंत्र्य काय असते ते दाखवून दिले. महाराजांचे किल्ले म्हणजे स्वराज्याची संपत्ती होती. त्यांच्यामागे अठरा पगड जातीचे मावळे होते.

शिवाजी महाराजांनंतर इतिहासात इंग्रजांविरुद्ध प्रथम आवाज उठवणारे राजे उमाजी नाईक होते. ते खरे आद्यक्रांतिकारक नव्या स्वराज्याचे राजे होते. स्वराज्याची ज्योत पेटविण्याचे काम उमाजी नाईक यांनी केले. ब्रिटिशांच्या विरोधात तळागाळातील लोकांकडून उठाव घडवून आणण्यात त्यांचे मोठे योगदान होते. राज्यकारभार करतांना त्यांनी सनद निर्माण केली. त्या सनदीतून प्रत्येकाला न्याय मिळवून देण्याचे काम त्यांनी केले. ब्रिटिशांना सळो की पळो करणाऱ्या राजे उमाजींना देहदंडाला सामोरे जावे लागले.

महामंडळासाठी १०० कोटी, स्मारकासाठी ५ कोटी देणार

रामोशी आणि इतर भटक्या विमुक्त जातीच्या सर्वांगीण विकासासाठी राजे उमाजी नाईक आर्थिक विकास महामंडळाची स्थापना करण्यात येईल. त्यासाठी १०० कोटी रुपयांची व राजे उमाजी नाईक यांच्या स्मारकासाठी ५ कोटी रुपयांची तरतूद करण्यात येईल.  रामोशी आणि इतर भटक्या व विमुक्त जाती मधील नागरिकांना यापुढे जातीच्या दाखल्यासाठी अडचणी येणार नाहीत यासाठी जातीच्या दाखल्यासंदर्भातील प्रक्रिया सुलभ करण्यात येईल. या समाजाच्या सर्व समस्या निकाली काढण्यासाठी शासन कटिबद्ध आहे, अशी ग्वाहीही त्यांनी दिली.

यावेळी आमदार श्री. पडळकर यांनीही मनोगत व्यक्त केले. कार्यक्रमास जय मल्हार क्रांती संघटनेचे चंद्रकांत खोमणे, रमण खोमणे, तानाजी खोमणे यांच्यासह नागरिक उपस्थित होते.

·         सीएससी आणि शुगरबॉक्स नेटवर्क्सच्या भागीदारीने १५ गावांमधील मुलांना इंग्रजी संभाषण कोर्सेस उपलब्ध करवून दिले.

·         टीम शुगरबॉक्सने प्रत्येक घराघरांत जाऊन शिक्षणाच्या उपलब्धतेबाबत माहिती दिली.

पुणे, सांगली, ७ सप्टेंबर २०२२: बुद्धीची देवता गणपतीबाप्पाचा उत्सव असलेल्या गणेश चतुर्थीला अनुसरून शुगरबॉक्स नेटवर्क्सने पुण्यातील दौंड आणि सांगली जिल्ह्यात मिळून १५ गावांमधील मुलांना  विश्वसनीय व किफायतशीर डिजिटल शिक्षणाची उपलब्धता खुली करवून दिली आहे.  सीएससीच्या सहयोगाने शुगरबॉक्सने या सर्व गावांमधील सीएससी सेंटर्समध्ये आपले पेटंटेड टेक्नॉलॉजी सोल्युशन इन्स्टॉल केले आहे, ज्यामुळे जवळपासच्या मंडपांना डिजिटल कन्टेन्ट उपलब्ध होऊ शकत आहे.

यंदा गणेश चतुर्थीला शुगरबॉक्स नेटवर्क्सने शिक्षणाचा मूलभूत अधिकार मिळवून देण्याचा उद्देश डोळ्यासमोर ठेवून शिक्षण कन्टेन्ट पुरवणाऱ्यांसोबत सहयोग केला आहे. इंग्रजी संभाषण, के-१२ शिक्षण, स्पर्धा परीक्षा आणि व्यावसायिक शिक्षण किफायतशीर पद्धतीने देणाऱ्या महत्त्वाच्या अभ्यासक्रमांचा यामध्ये समावेश आहे. शिक्षणाची उपलब्धता वाढवण्यासाठी या कंपनीने सीएससी सेंटर्समधील सर्व्हर उपयोगात आणून मुलांसाठी शिक्षणविषयक कन्टेन्टचे हाय-स्पीड स्ट्रीमिंग व डाऊनलोडिंग उपलब्ध करवून दिले आहे. डाउनलोड केलेला कन्टेन्ट मुले आपापल्या घरी देखील आपल्या सुविधेनुसार पाहू शकतात. या तंत्रज्ञानयुक्त सुविधेमुळे ग्रामीण भारतातील विद्यार्थ्यांना दर्जेदार शैक्षणिक कन्टेन्टच्या अखंडित उपलब्धतेचा अनुभव मिळवू शकतील.

आधुनिक शिक्षण सुविधा तंत्रज्ञानावर खूप मोठ्या प्रमाणावर अवलंबून असतात. इंटरनेट उपलब्ध नसल्याने अधिक चांगले शिक्षण व विकासाच्या शक्यता मिळवून देणे किंवा मिळवणे शक्य होत नाही.  महामारीमुळे ग्रामीण भारतातील मुलांना अजूनच मागे ढकलले आहे, गावांमध्ये पुरेशा प्रमाणात पायाभूत सोयीसुविधा नसल्याने महामारीच्या काळात मुलांचे शिक्षण नीट होऊ शकले नाही.  तंत्रज्ञानाची कमतरता व गावातील प्रत्येक मुलामुलींपर्यंत आधुनिक शिक्षण पोहोचवण्यातील अडचणी लक्षात घेऊन शुगरबॉक्स नेटवर्क्सने या मुलांना डिजिटल जग खुले करवून देण्याचे ठरवले. प्रत्येक क्षेत्रातील मुलांना डिजिटल शिक्षण अत्यावश्यक असल्याचा संदेश यामधून दिला जात आहे. सर्वाधिक वेगाने वाढत असलेले ‘मेड इन इंडिया’  हायपरलोकल क्लाऊड तंत्रज्ञान, शुगरबॉक्स नेटवर्क्स आपल्या ग्राहकांना डिजिटल माहिती व सेवांची उपलब्धता खुली करवून देते. सध्या महाराष्ट्र, हरयाणा, उत्तराखंड आणि उत्तर प्रदेशातील २५० पेक्षा जास्त ग्राम पंचायतींमध्ये या सेवा पुरवल्या जात आहेत.

शुगरबॉक्स नेटवर्क्सचे सीईओ आणि सह–संस्थापक श्री. रोहित परांजपे म्हणाले, “बुद्धी आणि समृद्धीचे वरदान देणाऱ्या गणपतीबाप्पाच्या आगमनाच्या या उत्सवाने आम्हाला सर्वांना शिक्षणाचे महत्त्व पटवून देण्याची संधी दिली, खासकरून आपली गावांमध्ये डिजिटल शिक्षण पोहोचवणे गरजेचे असल्याचे आम्ही या उपक्रमातून जाणवून देऊ शकलो आहोत. सीएससी आणि शुगरबॉक्स नेटवर्क्स मिळून या गावांमध्ये मुलांना संवादात्मक शिक्षण सुविधा पुरवण्यासाठी तंत्रज्ञान उपलब्ध करवून देत आहेत, आणि अधिक चांगले जीवन जगता यावे यासाठी मजबूत भविष्य निर्माण करण्यासाठी त्यांना सक्षम करत आहेत.  डिजिटल पद्धतीने जोडल्या गेलेल्या जगाच्या अमर्याद शक्यता दर्शवणे आणि डिजिटल सर्वप्रथम जगामध्ये यशस्वी होण्याचा पर्याय उपलब्ध करवून देऊन उद्याच्या पिढ्यांना सक्षम करणे ही आमची यामागची संकल्पना आहे.” 

सोयीसुविधांचा अभाव असलेल्या भागांमध्ये डिजिटली कनेक्टेड राहणे ही एक मूलभूत गरज म्हणून पूर्ण करण्यासाठी शुगरबॉक्स आपले हायपरलोकल एज क्लाऊड तंत्रज्ञान ग्राम पंचायत, सीएससी आणि सरकारी शाळा यासारख्या अधिक लोकसंख्या असलेल्या ठिकाणी इन्स्टॉल करत आहे. नेटवर्क पार्टनर्स आणि डिजिटल ऍप्लिकेशन सेवांसाठी टिकाऊ, पर्यावरणपूरक व लाभदायक अशी इकोसिस्टिम देखील ते निर्माण करत आहेत. सीएससी आणि शुगरबॉक्स नेटवर्क्स मिळून ओटीटी, डी२सी ई-कॉमर्स, डेटासाठी निःशुल्क फिनटेक (ग्राहकांसाठी) यासारख्या कन्टेन्ट व सेवा देऊन एका न्याय्य डिजिटल भविष्याची निर्मिती करत आहेत. एलअँडटी मेट्रो रेल हैदराबाद (एलटीएमआरएचएल), चेन्नई मेट्रो रेल्वे लिमिटेड (सीआरएमएल), सेंट्रल रेल्वेज (मुंबई उपनगरांमधील) मध्ये देखील शुगरबॉक्स आपल्या सेवा पुरवत आहे.