पुणे- महापालिकेची मिळकत कर आकारण्याच्या पद्धतीला आक्षेप घेत हि पद्धतच बेकायदा असल्याचा दावा करत याबाबत चे थेट आव्हान मुख्यमंत्री, उपमुख्यमंत्री, स्थानिक आमदार आणि अधिकारी यांना माजी विरोधी पक्षनेते उज्वल केसकर , सुहास कुलकर्णी तसेच माजी नगरसेवक प्रशांत बढे यांनी दिले आहे . या संदर्भात त्यांनी या सर्वांना एक संयुक्त पत्र दिल्याचे सांगितले. या पत्रात काय म्हटले आहे ते वाचा जसेच्या तसे ….

प्रति
मा.ना.एकनाथजी शिंदे
मुख्यमंत्री
महाराष्ट्र राज्य
मा.ना.देवेंद्रजी फडणवीस
उपमुख्यमंत्री
मा.ना.अजित दादा पवार
उपमुख्यमंत्री
मा.ना.चंद्रकांत दादा पाटील
उच्च शिक्षण मंत्री
यांसी सप्रेम नमस्कार
महोदय,

पुणे महानगरपालिकेमध्ये कर आकारणी आणि कर संकलन विभागामध्ये बेकायदेशीर काम चालू आहेत.
आपण खात्री करून घेऊ शकता
कुठल्याही मालमत्तेला कर आकारणी करण्याची कायदेशीर पद्धत खालील प्रमाणे आहे.
१) ज्या नागरिकांनी मालमत्ता खरेदी केली तो महानगरपालिकेकडे कर आकारणीसाठी अर्ज करतो.
२) कर आकारणी विभागाचे पेठ निरीक्षक यांच्या लक्षात आले की एखाद्या ठिकाणी नवीन इमारत झाली आहे त्या ठिकाणी नागरिक रहायला आले आहेत आणि त्यांची आकारणी झाली नाहीत अशा वेळेस ते नागरिकांना नोटीस देतात.
३) घराची मोजमापे महानगरपालिकेच्या बांधकाम परवाना विभागाकडून भोगवटा पत्र मिळाल्यानंतर उपलब्ध असते.
४) त्या नकाशाच्या आधारे अथवा प्रत्यक्ष घरामध्ये जाऊन मोजमापे घेऊन त्याची आकारणी पेठ निरीक्षक निश्चित करतात त्यानंतर त्यावर विभागीय निरीक्षकांची स्वाक्षरी होऊन अंतिमतः विभाग प्रमुखांची स्वाक्षरी होते.
५) कर आकारणी केल्यानंतर त्याची नोटीस ‘ए’ फॉर्म मध्ये मालमत्ता धारकाला दिली जाते आणि त्यावर मंजूर म्हणून त्याची सही घेतली जाते त्यांनी ती स्वीकारण्यास नकार दिला तर झालेली आकारणी त्यांच्या घराबाहेर लावून त्याचा फोटो काढला जातो आणि काढलेला फोटो आणि निवेदन खाते प्रमुखांच्या कडे पाठवून आकारणी अंतिम करून बिल काढण्यास मंजुरी मिळते.
६) वर उल्लेख केल्याप्रमाणे साधारणता पुणे महानगरपालिकेत कायदेशीर कर आकारणी करण्याची रूढ पद्धत आहे.
७) वरील कुठल्याही बाबींचा समावेश न करता फक्त विकसकांच्या कडून यादी मागवून घेऊन सदनिका धारकांच्या
आकारणीच्या नोटिसा तयार केल्या गेल्या आणि त्यावर विकसकाच्या मान्य अशा सह्या घेऊन नांदेड सिटी येथे बारा हजार (१२,०००) सदनिका धारकांना नवीन वर्ष संपवण्याच्या आधी तीन महिने संपूर्ण वर्षाचे बिल पाठविले ही बाब संपूर्णपणे बेकायदेशीर असून अशा प्रकारची कर आकारणी केली जात नाही.
८) ही कर आकारणी करताना मोकळ्या जागेची आकारणी देखील 75 पैसे चौरस फुटाच्या दराने केली पाहिजे असे असताना विकसक कंपनीला कर आकारणी न करता त्यांच्याकडून बारा हजार सदनिका धारकांना (१२,०००) कर आकारणी केली.
९) आमची आपणास विनंती आहे
अ) आपण याबाबत तातडीने बारा हजार सदनिका धारकांना दिलासा देऊन त्यांना कायदेशीर मार्गाने कर आकारणी स्वीकारण्याचा अथवा नाकारण्याचा अधिकार परत देण्यासाठी या कर आकारणीला त्वरित स्थगिती द्यावी.
ब) विकसकांकडे असलेल्या मोकळ्या जागेवर तातडीने कायद्याने आवश्यक प्रक्रिया करून कर लावण्याचे आदेश द्यावेत.

धन्यवाद
आपले पुणे
उज्ज्वल केसकर
सुहास कुलकर्णी
माजी विरोधी पक्षनेते
पुणे मनपा
प्रशांत बधे
माजी नगरसेवक
ukeskar@gmail.com
१९/१२/२३
प्रत:-
आमदार माधुरीताई मिसाळ
आमदार सिद्धार्थ शिरोळे
आमदार सुनील कांबळे
आमदार भीमराव अण्णा तापकीर
आमदार सुनील टिंगरे
आमदार रवींद्र धंगेकर
आमदार चेतन तुपे
आमदार संजय जगताप
आमदार संग्राम थोपटे

पुणे (दि. १९ डिसेंबर २०२३) पिंपरी चिंचवड शहराचे अभ्यासक श्रीकांत चौगुले लिखित ‘पिंपरी चिंचवड गाव ते महानगर’ या पुस्तकाच्या द्वितीय आवृत्तीचा प्रकाशन समारंभ सोमवारी (दि. २५) चिंचवड, समरसता गुरुकुलम येथे दुपारी चार वाजता, डॉ. डी. वाय. पाटील विद्यापीठाचे कुलपती डॉ. पी. डी. पाटील यांच्या हस्ते व माजी आमदार आणि प्रथम महापौर ज्ञानेश्वर लांडगे यांच्या उपस्थितीत, पद्मश्री गिरीश प्रभुणे यांच्या अध्यक्षतेखाली आयोजित करण्यात आला आहे.
या पुस्तकाच्या प्रथम आवृत्तीचा संदर्भग्रंथ म्हणून अभ्यासकांना उपयोग झाला आहे. जिज्ञासू वाचकांच्या मागणीमुळे द्वितीय आवृत्तीत तीनशे पंचवीस पृष्ठांसह गेल्या दोन दशकात अनेक दुर्मिळ छायाचित्रांचा समावेश आणि आकर्षक मांडणीचे रंगीत कव्हर करण्यात आले आहे. नितीन हिरवे हे या आवृत्तीचे प्रकाशक आहेत. प्रकाशनाच्या निमित्ताने सवलत देण्यात येणार आहे.
या पुस्तकाच्या प्रथम आवृत्तीचे प्रकाशन २००३ प्रसिद्ध वक्ते प्राचार्य शिवाजीराव भोसले यांच्या हस्ते आणि पिंपरी चिंचवड नगरपालिकेचे प्रथम लोकनियुक्त नगराध्यक्ष डॉ. श्री श्री घारे यांच्या अध्यक्षतेखाली झाले होते.

पुणे (दि.१९ डिसेंबर २०२३) पिंपरी चिंचवड एज्युकेशन ट्रस्टच्या रावेत येथील एस. बी. पाटील पब्लिक स्कूलची विद्यार्थीनी आर्या म्हस्के हिने कोल्हापूर येथे झालेल्या राज्य स्तरीय पिस्तूल शूटिंग स्पर्धेत (पंधरा वर्षांखालील वयोगटात) रौप्य पदकावर मोहर उमटवली. त्यामुळे आर्या म्हस्के हीची २७ डिसेंबर रोजी भोपाळ येथे होणाऱ्या राष्ट्रीय स्पर्धेसाठी निवड झाली आहे.
एस. बी. पाटील पब्लिक स्कूलच्या प्राचार्या डॉ. बिंदू सैनी, पिंपरी चिंचवड एज्युकेशन ट्रस्टचे अध्यक्ष ज्ञानेश्वर लांडगे, उपाध्यक्षा पद्माताई भोसले, सचिव विठ्ठल काळभोर, खजिनदार शांताराम गराडे, विश्वस्त हर्षवर्धन पाटील, उद्योजक नरेंद्र लांडगे, अजिंक्य काळभोर, कार्यकारी संचालक डॉ. गिरीश देसाई यांनी आर्या म्हस्के हीस राष्ट्रीय स्पर्धेसाठी शुभेच्छा दिल्या.

पुणे (दि.१९ डिसेंबर २०२३) निगडीतील खंडोबा मंदिरात श्री खंडोबा प्रतिष्ठानच्या मार्तंड भैरव षडरोत्सवानिमित्त (देव दीपावली) विविध धार्मिक कार्यक्रमांचे आयोजन करण्यात आले होते. या महोत्सवाची सांगता सोमवारी चंपाषष्ठीच्या कार्यक्रमाने हजारो भाविक भक्तांच्या उपस्थितीत झाली.
षडरोत्सवानिमित्त दररोज पहाटे काकड आरती, भजन कीर्तनाचे आयोजन करण्यात आले होते. सोमवारी चंपाषष्ठी निमित्त पहाटे श्री खंडोबा आणि महादेवाच्या पिंडीला महाअभिषेक करण्यात आला, दुपारी विठ्ठल रूक्मिणी महिला भजनी मंडळ दापोडी यांचा भजनाचा कार्यक्रम, त्यानंतर जागरण गोंधळ तर सायंकाळी महाआरती करण्यात आली. आलेल्या सर्व भाविक भक्तांना महाप्रसाद वाटप करण्यात आले. सकाळ पासून पंचकृषितील भाविक भक्तांनी मंदिरात येऊन खंडेरायाचे व आयोध्या येथून आलेल्या श्रीराम पूजा मंगल अक्षता व कलशाचे ही दर्शन घेतले अशी माहिती अध्यक्ष तानाजी काळभोर यांनी दिली.
या कार्यक्रमाचे नियोजन देवस्थानचे अध्यक्ष तानाजी काळभोर, उपाध्यक्ष सोमनाथ काळभोर, खजिनदार जंगली महाराज काळभोर, कार्याध्यक्ष शंकरआप्पा काळभोर, सचिव भाऊसाहेब काळभोर, विश्वस्त दीपक काळभोर, ॲड. राजेंद्र काळभोर, दिलीप काळभोर, राजेंद्र ल.काळभोर, चेतन काळभोर, राजू अ. काळभोर यांनी केले. पोलिस अधिकारी रणजित सावंत, तेजस्विनी कदम, राजेंद्र बहिरट, राजेंद्र बोरसे तसेच देहु देवस्थानचे विश्वस्त सुनिल महाराज मोरे, राजेंद्र महाराज मोरे, अमोल महाराज मोरे, उद्योजक जयदीप खापरे, रोहीदास गाडे, निखिल दरेकर, विजय तारक, माजी नगरसेविका सुमन पवळे, शर्मिला बाबर, कमल घोलप, अश्विनी बोबडे, माजी नगरसेवक शांताराम भालेकर, पंकज भालेकर, हिरामण येळवंडे आदी उपस्थित होते. महाप्रसादाचे नियोजन भानुदास काळभोर, शंकर पा. काळभोर, दत्तात्रय पा. काळभोर, संभाजी काळभोर, अजय काळभोर, सुशांत मोहिते, विशाल मडके, इंद्रसिंग राजपूत, बबन जीवना, वैभव कुऱ्हाडे, विश्वास थोरात, सतिश झेंडे, योगेश काळभोर, अमोल काळभोर, हनुमंत रेवी, स्वातीताई इंजे, संस्कृती सुधीर ढगे, मार्तंड रेवी, प्रेमा रेवी, संदिप केंदळे यांनी केले.

पुणे, दि. १९: उद्योग संचालनालयाच्यावतीने ३० डिसेंबरपर्यंत मुख्यमंत्री रोजगार निर्मिती कार्यक्रमाबाबत गतिमानता पंधरवडा घोषित केला असून याबाबत जिल्हा उद्योग केंद्रातर्फे जनजागृती मोहिम राबविण्यात येत आहे. या मोहिमेचा अधिकाधिक नागरिकांनी लाभ घ्यावा, असे आवाहन जिल्हा उद्योग केंद्राच्या महाव्यवस्थापकांनी केले आहे.

या पंधरवडा मोहिमेत मुख्यमंत्री रोजगार निर्मिती कार्यक्रम योजनेअंतर्गत अधिकाधिक अर्ज प्राप्त करणे, ऑनलाईन पद्धतीने संकेतस्थळावर अर्ज भरणे, योजनेबाबत प्रत्येक तालुक्यात या योजनेची प्रचार व प्रसिद्धी करणे आदी कामे करण्यात येणार आहे. योजनेचे अर्ज नि: शुल्क भरण्यात येणार आहेत.

लाभार्थ्यांचे अर्ज त्यांच्या कागदपत्रासहीत स्विकारण्यात येणार असून त्याअर्जाची तात्काळ छाननी करुन बँकेकडे पाठविण्यात येणार आहेत. तसेच ती प्रकरणे प्राधान्याने मंजूर करुन घेण्यासाठी जिल्हा उद्योग केंद्रामार्फत प्रयत्नही केले जाणार आहेत. यामध्ये बँकेकडून उपयोगिता प्रमाणपत्रे जमा करणे, प्रलंबित मुख्यमंत्री रोजगार निर्मिती कार्यक्रमाची प्रकरणे मार्गी लावणे आदी कामे करण्यात येणार आहेत.

जिल्ह्यातील अभियांत्रिकी महाविद्यालय, औद्योगिक प्रशिक्षण संस्था, तंत्रनिकेतन महाविद्यालय, पंचायत समिती, जिल्हा परिषद व तहसिल कार्यालय या ठिकाणी संबंधित अधिकारी, उद्योग निरीक्षक हे नागरिकांना मार्गदर्शन करणार आहेत. तसेच नागरिकांच्या शंका व अडचणीचे निराकरणही करण्यात येणार आहे, अशी माहिती जिल्हा उद्योग केंद्राच्या महाव्यवस्थापकांनी दिली आहे.

पुणे : रेशन कार्ड पूर्ववत करणेसाठी साहेबांना पैसे द्यावे लागतील असे सांगून 2800 रुपये लाच स्वीकारताना एका खाजगी व्यक्तीला पुणे लाचलुचपत प्रतिबंधक विभागाने रंगेहात पकडले. शंकर शिवाजी क्षिरसागर (वय 32 रा. पुणे) असे लाच घेताना पकडण्यात आलेल्या व्यक्तीचे नाव आहे. पुणे एसीबीने ही कारवाई सोमवारी (दि.18) जुनी जिल्हा परिषदेसमोरील फुटपाथवर केली.याबाबत 67 वर्षीय व्यक्तीने पुणे एसीबी कार्यालयात 5 डिसेंबर रोजी तक्रार दिली आहे. तक्रारदार हे त्यांच्या नावावर असलेली शिधापत्रिका पूर्ववत करणेसाठी व अन्न धान्य पुरवठा चालू करणेकरिता जुनी जिल्हा परिषद कार्यालयातील पुरवठा अधिकारी यांना भेटले होते. त्यावेळी कार्यालयात असलेला खासगी इसम शंकर क्षीरसागर याने तकरारदार यांना साहेबांचे काम मी करतो व तुमचे रेशनकार्ड काढून देतो असे सांगितले. यासाठी क्षिरसागर याने तक्रारदार यांचेकडे सुरवातीला 4 हजार 500 रुपयांची लाच मागितली. तक्रारदार यांना लाच देणे मान्य नसल्याने त्यांनी पुणे एसीबी कार्यालयात तक्रार केली.

एसबीच्या पथकाने पडताळणी केली असता शंकर क्षिरसागर याने तक्रारदार यांचे शिधापत्रिकेचे काम करून देण्यासाठी
साहेबांना पैसे द्यावे लागतील असे सांगून साडेचार हजार रुपये लाच मागून तडजोड़ी अंती 2 हजार 800 रुपये
लाच मागितल्याचे निष्पन्न झाले. त्यानुसार एसीबीच्या अधिकाऱ्यांनी जुन्या जिल्हा परिषदेसमोरील फुटपाथवर सापळा रचला. तक्रारदार यांच्याकडून लाचेची रक्कम स्विकारताना शंकर क्षिरसागर याला रंगेहाथ पकडण्यात आले. त्याच्यावर समर्थ पोलीस ठाण्यात भ्रष्टाचार प्रतिबंध अधिनियमाखाली) गुन्हा दाखल करण्यात आला आहे.

ही कारवाई पुणे परिक्षेत्राचे पोलीस अधीक्षक अमोल तांबे , अपर पोलीस अधीक्षक शीतल जानवे
यांच्या मार्गदर्शनाखाली पोलीस उप अधीक्षक नितीन जाधव ,पोलीस निरीक्षक प्रविण निंबाळकर , महिला पोलीस नाईक वनिता गोरे,पोलीस शिपाई सौरभ महाशब्दे, चालक कदम यांच्या पथकाने केली.

पुणे, दि. १९: विकसित भारत संकल्प यात्रेच्या माध्यमातून मावळ तालुक्यातील ३२ गावात केंद्र व राज्य शासनाच्या योजनांची माहिती देण्यात आली. यात्रेत महिला, विद्यार्थी, खेळाडू आणि स्थानिक कलाकारांना प्रोत्साहनपर पुरस्कार देण्यात आले.

केंद्र आणि राज्य शासनाच्या योजनांची माहिती ग्रामीण भागातील नागरिकांपर्यंत पोहोचवण्यासाठी विकसित भारत संकल्प यात्रेचे आयोजन तालुक्यात आयोजन करण्यात आले आहे. ही संकल्प यात्रा २२ जानेवारी २०२४ पर्यंत सूरू राहणार आहे. मावळ तालुक्यात यात्रेला नागरिकांचा चांगला प्रतिसाद मिळत आहे. यामध्ये २१ हजार नागरिकांनी सहभाग घेतला आहे. तसेच ६ हजार ६२४ नागरिकांनी विकसित भारतासाठी संकल्प घेतला. यात्रेत ३ हजार २९० महिला, १ हजार ११२ विद्यार्थी, १०४ खेळाडू आणि १०२ स्थानिक कलाकार कलाकारांना प्रोत्साहनपर पुरस्कार देण्यात आले.

तालुक्यात ३९५ ठिकाणी आरोग्य शिबाराचे आयोजन करुन क्षयरोगासाठी ७८ आणि सिकलसेल समस्येबाबत ६३ व्यक्तींची तपासणी करण्यात आली आहे. १५ लाभार्थ्यांना प्रधानमंत्री आयुष्मान योजना कार्ड वितरीत करण्यात आले. विविध ठिकाणी शेतकऱ्यांसाठी ड्रोन प्रात्यक्षिकांचे आयोजन करण्यात येत आहे. यात्रेद्वारे १५ शेतकऱ्यांशी नैसर्गिक शेतीविषयी संवाद साधला. १५ संगणकीकृत अभिलेख्यावर कार्यवाही करण्यात आली आहे. रमाई घरकुल योजनेअंतर्गत नमुना – ‘८ अ’ चे उतारे वितरण करण्यात येत आहेत.

तालुक्यात केंद्र व राज्य शासनाच्या योजनांची आकर्षक एलडी चित्ररथाद्वारे प्रसिद्धी करण्यात येत असल्याने गावातील ज्येष्ठ नागरिक, महिला, विद्यार्थी आदी मोठ्या संख्येने यात्रेत सहभागी होऊन माहिती घेत आहेत. यात्रेच्या माध्यमातून नागरिकांना योजनांची माहिती पुस्तिका, घडीपत्रिकेचे वाटपही करण्यात येत आहे. आपल्या गावाताच योजनांचा प्रत्यक्ष लाभ मिळत असल्यामुळे नागरिक समाधान व्यक्त करीत आहेत.

यात्रा २० डिसेंबर रोजी थुगांव व मळवंडी ढोरे, २१ डिसेंबर रोजी येलघोल व डोणे, २२ डिसेंबर रोजी आढले बु व आढले खु आणि २३ डिसेंबर रोजी ओव्हाळे व दिवड गावात येणार असून नागरिकांनी या यात्रेचा लाभ घ्यावा, असे आवाहन गटविकास अधिकारी सुधीर भागवत यांनी केले आहे.

; पुणे जिल्हा अग्रवाल समाजातर्फे आयोजित ‘अपने अपने राम’ कार्यक्रमाच्या तिस-या दिवशी कार्यक्रमाचा ह्रदय वातावरणात समारोप 

पुणे : आपण मूळ अमूक गावातील आहोत, असे प्रत्येकजण सांगतो. मात्र, आपली उत्पत्ती ही मनू राजा च्या कुळातून झाली आहे. मनू हे अयोध्येचे प्रथम सूर्यवंशी राजे होते. त्यामुळे अयोध्या ही आपल्या सर्वांची पुण्यभूमी आणि मातृभूमी आहे. तपस्वी, त्यागी, वैरागी असे प्रभू श्रीरामांचे अयोध्येतील कुटुंब होते. त्यामुळे या परिवारातील प्रत्येकाच्या कार्याचा उद्देश समजून घेत त्यांचा आदर्श आपण घ्यायला हवा, असे सांगत कवी प्रख्यात कवी डॉ. कुमार विश्वास यांनी प्रभू श्रीराम, अयोध्या आणि संपूर्ण कुटुंबाच्या कार्याचे वर्णन आपल्या अमोघ वाणीतून केले. 

पुणे जिल्हा अग्रवाल समाजातर्फे ‘अपने अपने राम’ या कार्यक्रमाचे आयोजन आरटीओ जवळील एसएसपीएमएस च्या मैदानात करण्यात आले होते. त्याच्या समारोपाच्या तिस-या दिवशी डॉ. कुमार विश्वास यांनी उपस्थितांना मार्गदर्शन केले. या संगीतमय राम ऊर्जा सत्राकरिता पुणे, पिंपरी-चिंचवड सह जिल्ह्यातून ५ हजार हून अधिक समाज बांधव उपस्थित होते. 

कार्यक्रमाच्या सुरुवातीला सिया वर रामचंद्र की जय च्या जयघोषात भगवे ध्वज आसमंतात फडकत होते. तर, रामजी की निकली सवारी… सालासर हनुमान…सिया जी बहिनिया हमार हो, राम लगी हे पहुनवा…यांसह विविध गीतांच्या सादरीकरणाने उपस्थितांच्या मनावर अधिराज्य गाजविले. तीन दिवसीय कार्यक्रमातून श्रीराम कथा आणि वर्तमानात प्रभू श्रीरामांच्या जीवनातील मूल्यांचे महत्व अत्यंत सोप्या शब्दात मांडत तरुणाईला धर्माशी जोडण्याचा प्रयत्न अग्रवाल समाजातर्फे करण्यात आला आहे. कविता तिवारी यांनी कार्यक्रमाचे निवेदन केले. 

डॉ. कुमार विश्वास म्हणाले, श्रीराम, लक्ष्मण, भरत, शत्रुघन यांसह त्यांच्या माता कौसल्या, सुमित्रा, कैकयी आणि सूना यांचे कार्य आदर्शवत होते. आज आपल्यासमोर परिवाराची चुकीची व्याख्या ठेवून आक्रमण होत आहे. राम जिथे राहतील तिथे अयोध्या असेल, असा विचार या परिवाराचा होता. रामरुपी आदर्शाच्या अमृताचा प्रसाद पृथ्वीवर सर्वत्र वाटला जावा, याकरिता माता कैकयी ने अनेक अटी शर्ती ठेवल्या. त्याबद्दल, सर्वांनी उलटसुलट बोललेले ऐकून घेत आपल्या कार्यातून जणू हे वेगळे विषच प्यायले होते. मात्र, हे पृथ्वीच्या कल्याणासाठी प्यायलेले हे विष म्हणजे कैकयी मध्ये शिवतत्व निर्माण झाले, असेच म्हणावे लागेल. 

ते पुढे म्हणाले, आठ चक्र आणि नऊ दरवाजांची ईश्वरापुरी म्हणजे अयोध्या असे अयोध्येचे वेदांमध्ये वर्णन आहे. वाल्मिकी रामायणात प्रत्यक्ष इतिहास मांडला असून इतर कथांमध्ये भक्ती, रस यांचा उल्लेख आढळतो. प्रत्यक्षात आपला देश हा दोन संस्कृतींवर आधारलेला आहे. ती म्हणजे ऋषी आणि कृषी संस्कृती. 

प्रभू श्रीरामांचा जन्म हा ऋषींनी दिलेल्या फळाच्या प्रसादाद्वारे तर, माता सीतेचा जन्म हा राजा जनक शेतात नांगर चालविताना सापडलेल्या कुंभातून झाला आहे. त्यामुळे आपला देश प्रभू राम आणि माता सीता यांच्याशी निगडीत असलेल्या ऋषी आणि कृषी संस्कृतीवर आधारलेला दिसतो. सूर्य, पृथ्वी आणि वायू म्हणजेच प्रभू श्रीराम, माता सीता व हनुमान अशांच्या गुणांशी संबंधित आहे. त्यामुळे आपण सर्व भारतीय मूळ अयोध्यावासी आहोत. 

महावितरणच्या ‘गो-ग्रीन’ योजनेमध्ये पश्चिम महाराष्ट्राची राज्यात आघाडी

पुणे, दि. १९ डिसेंबर २०२३: महावितरणच्या वीजबिलांसाठी छापील कागदाचा पूर्णपणे वापर बंद करीत पश्चिम महाराष्ट्रातील तब्बल १ लाख ७२ हजार ४५० पर्यावरणस्नेही वीजग्राहकांनी केवळ ‘ई-मेल’ व ‘एसएमएस’चा पर्याय निवडला आहे. या वीजग्राहकांनी ‘गो-ग्रीन’ योजनेला प्रतिसाद दिल्याने त्यांची तब्बल २ कोटी ६ लाख ९४ हजार रुपयांची वार्षिक बचत होत आहे. या योजनेत आतापर्यंत राज्यातील ४ लाख ३५ हजार ९०२ वीजग्राहकांनी सहभाग घेतला आहे. यातील सर्वाधिक ३९.६ टक्के ग्राहक पश्चिम महाराष्ट्रातील आहेत. तर पुणे परिमंडलातील १ लाख १५ हजार ४३५ ग्राहक राज्यात सर्वाधिक संख्येने या योजनेत सहभागी झाले आहेत.

महावितरणच्या ‘गो-ग्रीन’ योजनेनुसार छापील वीजबिलाच्या कागदाऐवजी फक्त ‘ई-मेल’ व ‘एसएमएस’चा पर्याय निवडल्यास प्रतिबिलात १० रुपये सवलत देण्यात येत आहे. त्यामुळे योजनेत सहभागी ग्राहकांची वीजबिलांमध्ये वार्षिक १२० रुपयांची बचत होत आहे. वीजबिल तयार झाल्यानंतर लगेचच संगणकीय प्रणालीद्वारे ते ‘गो-ग्रीन’मधील ग्राहकांना ‘ई-मेल’द्वारे पाठविण्यात येत आहे. सोबतच ‘एसएमएस’द्वारे देखील वीजबिलाची माहिती देण्यात येत आहे. त्यामुळे प्रॉम्ट पेमेंटसह ऑनलाइनद्वारे लगेचच बिल भरणा करणे आणखी सोपे झाले आहे.

आधुनिक जीवनशैलीशी सुसंगत ‘गो-ग्रीन’ योजना पर्यावरण रक्षणासाठी देखील महत्वाची आहे. कागदी वीजबिलांचा वापर बंद केला तरी महावितरण मोबाईल ॲप व वेबसाईटवर ग्राहकांसाठी चालू व मागील वीजबिल तसेच वीजबिल भरल्याचा पावत्या आदींची माहिती उपलब्ध आहे. त्यामुळे ‘गो-ग्रीन’ योजनेत सर्व लघुदाब ग्राहकांनी सहभागी व्हावे असे आवाहन पुणे प्रादेशिक संचालक श्री. अंकुश नाळे यांनी केले आहे.

‘गो-ग्रीन’ योजनेत पुणे प्रादेशिक विभाग अंतर्गत पुणे जिल्ह्यात १ लाख २३ हजार ३९६ ग्राहक सहभागी झाले आहेत त्यांची १ कोटी ४८ लाख ७ हजार ५२० रुपयांची वार्षिक बचत होत आहे. तर या योजनेत सहभागी सातारा जिल्ह्यातील ११ हजार ५२५ ग्राहकांचे १३ लाख ८३ हजार रुपये, सोलापूर जिल्ह्यातील १२ हजार १९७ ग्राहकांचे १४ लाख ६३ हजार ६४० रुपये, कोल्हापूर जिल्ह्यातील १५ हजार ४५७ ग्राहकांचे १८ लाख ५४ हजार ८४० रुपये आणि सांगली जिल्ह्यातील ९ हजार ८७५ ग्राहकांच्या ११ लाख ८५ हजार रुपयांची वीजबिलात वार्षिक बचत होत आहे.

वीजग्राहकांनी ‘गो-ग्रीन’ योजनेचा पर्याय निवडण्यासाठी महावितरणचे मोबाईल अ‍ॅप किंवा www.mahadiscom.in संकेतस्थळावर अधिक माहिती उपलब्ध आहे. ‘गो-ग्रीन’ योजनेत सहभागी झालेल्या वीजग्राहकांना छापील वीजबिलांची गरज भासल्यास त्यांना ईमेलद्वारे प्राप्त झालेले दरमहा वीजबिल संगणकात सॉफ्ट कॉपीमध्ये जतन करून ठेवता येईल. सोबतच संकेतस्थळावर चालू वीजबिलासह मागील ११ महिन्यांचे वीजबिले मूळ स्वरुपात उपलब्ध आहेत. आवश्यकतेप्रमाणे वीजग्राहकांना ते कधीही डाऊनलोड करण्याची किंवा मूळ स्वरूपात रंगीत प्रिंट करण्याची सोय आहे.