अखिल भारतीय मराठी नाट्यपरिषदेच्या अध्यक्षपदी प्रशांत दामले यांची निवड झाली आहे. अध्यक्षपदासाठी प्रसाद कांबळी आणि प्रशांत दामले यांच्यात चुरस रंगली होती. परिषदेच्या राज्यभरातील 60 सदस्यांनी यासाठी मतदान केले होते. नाट्यपरिषदेचे अध्यक्षपद प्रशांत दामले यांनी जिंकलेले आहे.
अखिल भारतीय मराठी नाट्य परिषदेच्या नियामक मंडळाची निवडणूक गेल्या महिन्यात पार पडली होती. या निवडणुकीत प्रसाद कांबळी यांचे ‘आपलं पॅनल’ आणि प्रशांत दामले यांचं ‘रंगकर्मी समूह’ या दोन गटांमध्ये चांगलीच चुरस रंगली. अखेर या निवडणुकीत प्रशांत दामले यांच्या ‘रंगकर्मी समूहा’चे दहा उमेदवार निवडून आले. दुसरीकडे प्रसाद कांबळी यांच्या पॅनलचे चार उमेदवार नियामक मंडळावर निवडून आले.
अखिल भारतीय मराठी नाट्य परिषदेच्या 11 जणांची कार्यकारिणीवर निवड करण्यात आली आहे. यात सुशांत शेलार, गिरीश महाजन, विजय चौगुले, संदीप तेंडुलकर, दीपा क्षीरसागर, सविता मालपेकर, संदीप पाटील, विशाल शिंगाडे, विजयकुमार साळुंखे, संजय रहाटे, दीपक रेगेंचा कार्यकारिणीत समावेश आहे.
2018 ते 2023 या कार्यकाळात मोहन जोशी आणि प्रसाद कांबळी निवडणुकीच्या रिंगणात उतरले होते. प्रसाद कांबळी यांच्या ‘आपलं पॅनल’ने मोहन जोशी यांचा पराभव करत विजय मिळवला होता. कांबळी यांनी पाच वर्षे नाट्य परिषदेचा कारभार करताना त्यांच्यावर अनेक आरोप झाले होते. त्यांना पदावरून काढण्यासाठी अनेक खलबतं केली गेली. परंतु कांबळी यांनी शेवटपर्यंत या आरोपांच्या विरोधात लढा दिला. याउलट पूर्वी कशा पद्धतीने गैरव्यवहार चालायचे हे देखील त्यांनी उघड केले होते. पण यंदा प्रशांत दामलेंच्या पॅनलने त्यांचा पराभव केला आहे.