पणजी(शरद लोणकर )–
आशियामधील सर्वाधिक जुन्या आणि भव्य चित्रपट महोत्सवाची सुरुवात होणार आहे एका संगीतमय चित्रपटाच्या प्रदर्शनाने. ही सुरुवात नक्कीच संगीतामधील सामर्थ्याविषयी मानवाला असलेला जिव्हाळा आणि परस्परांमध्ये बंध निर्माण करून त्यांची जोपासना करण्याची अमर्याद क्षमता यांची प्रचिती देणारी ठरेल. कारण 52व्या भारतीय आंतरराष्ट्रीय चित्रपट महोत्सवाची सुरुवात होणार आहे, एका संगीत सोहळ्याच्या आयोजनावर आधारित असलेल्या ‘ द किंग ऑफ ऑल द वर्ल्ड’(El Rey de Todo El Mundo) या स्पॅनिश म्युझिकल ड्रामाने. कार्लोस सौरा यांनी या चित्रपटाचे दिग्दर्शन आणि लेखन केले आहे. मेक्सिको आणि स्पेन यांची संयुक्त निर्मिती असलेला हा चित्रपट म्हणजे मेक्सिको आणि स्पेन या दोन्ही देशांना कलेच्या माध्यमातून जोडण्याचा आणि या दोन्ही देशांमध्ये एकेकाळी असलेल्या संबंधांचे संगीत आणि नृत्याचे नव्या आणि आधुनिक प्रकारांमध्ये मिश्रण करून पुनरुज्जीवन करण्याचा प्रयत्न आहे.
मेक्सिकन कोरिओग्राफर साराच्या भोवती या चित्रपटाचे कथानक फिरते. साराला तिच्या पूर्वाश्रमीचा पती आणि रंगमच दिग्दर्शक असलेल्या मॅन्युएल जी याने एका नव्या म्युझिकल शो ची निर्मिती करायला निमंत्रित केले आहे. या चित्रपटात इनेस(ऍग्नेस) नावाच्या एका तरुणीची देखील कहाणी आहे जी एक उदयोन्मुख कलाकार आहे आणि तिचे वडील आणि स्थानिक गटांना तोंड देत आहे.
दोन देशांमधील संबंधांचे पुनरुज्जीवन करणाऱ्या या चित्रपटात दोन्ही देशांच्या कलाकारांची आणि नर्तकांची मांदियाळी आहे. ऍना डे ला रेगेरा, मॅन्युएल गार्सिया रुल्फो, डॅमियन अल्काजार, एन्रिक आर्स, मनोलो कार्दोना, आयझॅक हर्नांडेझ आणि ग्रेटा एलिजोंदो यांनी यात भूमिका साकारल्या आहेत.अतिशय उत्तमोत्तम चित्रकृतींचा समावेश असलेल्या या नऊ दिवसांच्या 52 व्या इफ्फी महोत्सवाचा प्रारंभ शोकांतिका, काल्पनिक कथा आणि वस्तुस्थिती यांचा मेळ असलेल्या संगीतमय मेजवानीने होत आहे. हा चित्रपट महोत्सव गोव्यामध्ये हायब्रिड स्वरुपात 20 ते 28 नोव्हेंबर दरम्यान होत आहे.
नव्या पिढीतील 75 सर्जनशील व्यक्तिमत्त्वे 52 व्या इफ्फी महोत्सवात होणार सहभागी
इफ्फी अर्थात भारतीय आंतरराष्ट्रीय चित्रपट महोत्सवाच्या इतिहासात प्रथमच नव्या पिढीचे प्रतिनिधित्व करणारी आणि सर्जनशील प्रतिभा असलेली 75 व्यक्तिमत्त्वे गोव्यात होत असलेल्या 52 इफ्फीमध्ये सहभागी होणार आहेत. स्वातंत्र्याच्या अमृतमहोत्सवाअंतर्गत सुरु करण्यात आलेला हा अभिनव उपक्रम देशातील नावनिर्मितीक्षम तरुण कलाकारांना आणि उमलत्या प्रतिभांना ओळखून त्यांना आणखी बहरण्याची संधी देईल.
या उपक्रमासाठी निवडलेली ’उद्याची 75 सर्जनशील मने’ गोव्यात होत असलेल्या 2021 सालच्या इफ्फीचा भाग असतील आणि त्यांना सर्व तज्ञ वर्गांमध्ये तसेच संवादात्मक चर्चा कार्यक्रमांमध्ये सहभागी होता येईल तसेच इतर अनेक उपक्रमांसह चित्रपट उद्योगातील आघाडीच्या व्यक्तींशी विचारांची देवाणघेवाण करता येईल. या उपक्रमाअंतर्गत निवडण्यात आलेल्या प्रत्येक उमेदवाराची प्रवास तसेच निवास व्यवस्था महोत्सवाच्या आयोजकांकडून केली जाईल.
केंद्रीय माहिती आणि प्रसारण मंत्री अनुराग सिंग ठाकूर यांनी 22 ऑक्टोबर रोजी या अभिनव उपक्रमाची घोषणा केली होती. तेव्हा ते म्हणाले होते की इफ्फीची 52 वी आवृत्ती भारतभरातील उमलत्या युवा प्रतिभांना चित्रपट निर्माते आणि या उद्योगाच्या मुख्य प्रवाहाशी जोडण्यासाठीचा मंच उपलब्ध करून देईल
देशभरात घेण्यात आलेल्या एका स्पर्धेद्वारे या उपक्रमात सहभागी होणाऱ्या युवा चित्रपट निर्मात्यांची निवड करण्यात आली. या स्पर्धेसाठी देशभरातून 400 पेक्षा अधिक अर्ज सादर करण्यात आले होते.
’उद्याची 75 सर्जनशील मने’ निवडण्याचे काम खालील मुख्य परीक्षक मंडळ आणि निवड परीक्षक मंडळ यांच्याकडे होते :
मुख्य परीक्षक
प्रसून जोशी – प्रसिध्द गीतकार आणि सीएफबीसीचे अध्यक्ष
केतन मेहता – प्रसिध्द दिग्दर्शक
शंकर महादेवन – प्रसिध्द भारतीय संगीतकार आणि गायक
मनोज वाजपेयी – प्रसिध्द अभिनेता
रसूल पुकुट्टी – ऑस्कर विजेते ध्वनी मुद्रक
विपुल अमृतलाल शाह – प्रख्यात निर्माते आणि दिग्दर्शक
निवड परीक्षक
वाणी त्रिपाठी टिकू – निर्माती, अभिनेत्री आणि सीएफबीसी सदस्य
अनंत विजय – लेखक आणि चित्रपट विषयावरील उत्तम लेखनासाठीचा राष्ट्रीय पुरस्कार विजेते
यतींद्र मिश्र – प्रख्यात लेखक आणि इतर प्रकारांतील लिखाण करणारे तसेच चित्रपट विषयावरील उत्तम लेखनासाठीचा राष्ट्रीय पुरस्कार विजेते
संजय पूरण सिंग – चित्रपट निर्माता, उत्कृष्ट चित्रपटासाठीचा राष्ट्रीय पुरस्कार विजेते
सचिन खेडेकर – अभिनेता, दिग्दर्शक