दिग्दर्शक संजय सुरे यांचा ‘ बेल्स यू ’ ह्या हिन्दी चित्रपटचा प्रीव्हू नुकताच मुंबईत पार पडला. विविध मान्यवर चित्रपट समीक्षकांनी चित्रपटाला उत्स्फूर्त दाद दिली.
‘ बेल्स यू ’ चा वर्ल्ड प्रिमीयर नुकताच ४५ व्या एशियन अमेरिकन इंटरनॅशनल फिल्म फेस्टिव्हल २०२२ न्यूयाॅर्क येथे पार पडला. भूतानच्या ड्रक इंटरनॅशनल फिल्म फेस्टिव्हल २०२२ येथे हा चित्रपट जागतिक विजेता ठरला. तसेच टोकियो, पौस इत्यादी आंतरराष्ट्रीय चित्रपट महोत्सवांमध्ये याची निवड झाली आहे.
चित्रपटाची कथा आहे सदानंद नावाच्या एका मुंबईतील सरकारी कारकुनाची आहे. एका रविवारी सदानंद आपल्या कुटुंबासहित बाजारहाट करायला निघतो. नंतर कुटुंबासहित रस्त्याच्या कडेला असलेल्या एका गाडीवर बर्फाचा गोळा खाताना त्याला शिंक येते आणि त्यानंतर त्याचं जगच बदलत. याची एक गमतीदार कहाणी यात दाखविली आहे. गोष्ट शेवट पर्यंत रसिकांना खिळवून ठेवते.
चित्रपटाचे दिग्दर्शन संजय सुरे यांचे आहे. जाहिरात क्षेत्राचा प्रदीर्घ अनुभव गाठीशी असून ते जे.जे.स्कूल ऑफ आर्ट्स गोल्ड मेडलिस्ट आहेत. अत्यंत कलात्मक पध्दतीने ही कथा हाताळण्यात ते यशस्वी झालेले आहेत.
चित्रिकरण हे मुंबईच्या विविध स्थळांवर, रस्त्यावर, गल्ल्यांमधून अत्यंत खुबीने व सहज, नैसर्गिक वाटावे असेच आहे.
दृश्यांची रंगसंगती, छायाप्रकाश यावर विशेष ध्यान दिल्याने मुंबई एका वेगळ्याच नजरेतून सुंदर जाणवते.
प्रमुख भूमिकेत मनिष कुमार आणि अंकिता गुसाई आहेत तर खलनायक मोहनीश कल्याण यांनी रंगविले आहे. सर्व कलावंत हे देशभरातील विविध भागात रंगकर्मी म्हणून सक्रिय आहेत. रंगमंचावरील अनुभवातूनच त्यांचा कसदार अभिनय रंगत आणतो.
नैसर्गिक अभिनय, खरी लोकेशन यांमुळे ह्याचा एक आकर्षक पोत झाला आहे.
यांसोबत सरकारी कार्यालयांचे बारकावे, मध्यमवर्गीय कुटुंबियांची ओढाताण अत्यंत बारकाईने व गंमतशीर पध्दतीत सादर करण्यात दिग्दर्शक यशस्वी ठरले आहेत.
लवकरच हा चित्रपट ओटीटी प्लॅटफॉर्मवर प्रेक्षकांच्या भेटीस येत आहे.