360 एक्सप्लोरर मार्फत पहिल्या जिल्हा परिषद शिक्षिका आफ्रिकेतील सर्वोच्च शिखरावर
इंक्रेडेबल बुक ऑफ रेकॉर्ड मध्ये नोंद.
सोलापूर : काही महिन्यांपूर्वी जिल्हा परिषदेच्या शिक्षिका अनुराधा काजळे यांनी दक्षिण आफ्रिकेतील किलिमांजारो शिखर सर केले होते. या शिखरावर जाणाऱ्या त्या सोलापुरातील पहिल्या महिला व जिल्हा परिषदेच्या पहिल्या महिला शिक्षिका ठरल्या आहेत. अशी नोंद इंक्रेडेबल बुक ऑफ रेकॉर्ड मध्ये झाली असून नुकतेच असे प्रमाणपत्र त्यांना मिळाले आहे. अनुराधा काजळे यांचे गिर्यारोहक मार्गदर्शक एव्हरेस्टवीर आनंद बनसोडे यांच्या हस्ते या प्रमाणपत्राचे अनावरण केले गेले.
आफ्रिकेतील टांझानिया देशातील हे शिखर असून याची उंची समुद्र सपाटी पासून 19,341फूट आहे. एव्हरेस्टवीर आनंद बनसोडे यांनी 15 ऑगस्ट 2015 रोजी हे शिखर सर करून त्यावर भारताचे राष्ट्रगीत वाजवून विश्वविक्रम केला होता. गेल्या 6 वर्षात सोलापूरमधील जवळपास 250 प्रोफेशनल गिर्यारोहक व ट्रेकर्स आनंद बनसोडे यांच्या मार्गदर्शनाखाली तयार झाले आहेत. गेल्या 3 वर्षात तब्बल 12 लोकांनी आनंद बनसोडेच्या मार्गदर्शनाखाली माउंट किलीमांजारो हे आफ्रिकेतील सर्वोच्च शिखर सर केले आहे. त्यांच्याच मार्गदर्शनाखाली गेले 1 वर्ष सराव करून अनुराधा काजळे यांनी ही मोहीम यशस्वी केली.
एव्हरेस्टवीर आनंद बनसोडेने स्थापन केलेल्या 360एक्सप्लोरर मार्फत साहसी खेळाच्या प्रचार व प्रसारासाठी वेगवेगळ्या जागतिक मोहीम आखल्या जात आहेत त्या मध्ये वेगवेगळ्या खंडातील गिर्यारोहण, स्काय डायविंग, स्कुबा डायविंग हे सर्व समाविष्ट आहे.
-अनुराधा काजळे-
हा माझ्यासाठी अतिशय आनंदाचा क्षण असून याचे सर्व श्रेय माझे कुटुंब, मित्रपरिवार आणि आनंद बनसोडे यांना जाते. शिखर सर करायचे असे ठरवले होते. त्याचे रेकॉर्ड होईल असे वाटले नव्हते. त्यामुळे माझा आनंद द्विगुणीत झाला आहे. मला या प्रवासात मदत करणाऱ्या प्रत्येक व्यक्तीचे हे यश आहे.
– आनंद बनसोडे –
“सोलापूरमधील प्रथम शिक्षिका व महिला गिर्यारोहक म्हणून अनुराधा काजळे यांनी मिळवलेले यश अभिमानास्पद आहे. त्याबद्दल त्यांचे अभिनंदन. किलीमांजारो सर करून जिल्हापरिषद शिक्षकांपुढे एक आदर्श निर्माण केला. 360 एक्सप्लोरर मार्फत अनेकांना जागतिक मोहिमांसाठी मार्गदर्शन केले जाणार आहे.”
