पुणे-उपमुख्यमंत्री अजित पवार यांना प्रचारसभेत विकासनिधीवरुन केलेल्या विधानाप्रकरणी निवडणूक आयोगाकडून क्लीन चिट देण्यात आली आहे. अजित पवारांनी केलेल्या वक्तव्यात उमेदवाराचे नाव नव्हतं असे कारण देत त्यांना क्लीन चिट देण्यात आली आहे. बारामती लोकसभा मतदारसंघाच्या निवडणूक अधिकरी कविता द्विवेदी यांनी या बाबतचा अहवाल पुण्याचे जिल्हाधिकारी सुहास दिवसे यांना सादर केल्याची माहिती समोर आली आहे.
बारामतीमधील एका सभेत अजित पवार यांनी केलेल्या विधानाची चांगलीच चर्चा रंगली होती. विरोधकांवर निशाणा साधताना अजित पवार यांनी केलेली वक्तव्य वादाच्या भोवऱ्यात अडकले होते. विरोधकांकडून देखील या विधानावर प्रचंड टीका करण्याात आली. त्यानंतर आचारसंहितेचा भंग केल्याप्रकरणी निवडणूक आयोगाने चौकशीचे आदेश दिले होते. यामधून आता अजित पवार यांना निवडणूक आयोगाकडून क्लीन चिट देण्यात आली असून राज्य निवडणूक आयोगाला देखील त्याची एक प्रत पाठवण्यात आली आहे.
बारामती लोकसभा मतदारसंघाचा भाग असलेल्या इंदापूरमधील सभेत बोलताना अजित पवार यांनी विकास निधी हवा असेल तर उमेदवाराच्या चिन्हासमोरील बटण कचाकचा दाबा , अन्यथा विकासनिधी देताना आपला हात आखडेल अस वक्तव्य केले होते. या वक्तव्याला राष्ट्रवादी काँग्रेस शरदचंद्र पवार पक्षाकडून आक्षेप घेण्यात आला आणि निवडणूक आयोगाकडे त्याची तक्रार करण्यात आली. त्यानंतर या प्रकरणाची चौकशी कविता द्विवेदी यांच्याकडून करण्यात आली. प्राथमिक चौकशीत अजित पवारांनी केलेल्या वक्तव्यात कोणत्याही उमेदवाराचे नाव किंवा पक्षाचे नाव त्यांच्याकडून घेण्यात आले नव्हते. त्यामुळे हा आचारसंहितेचा भंग ठरत नाही अस कविता द्विवेदी यांनी सादर केलेल्या अहवालात नमूद करण्यात आले आहे.
दरम्यान, ”आम्ही केलेल्या कामाला तुम्हाला फायदा होईल, पण जेव्हा तुम्हाला फायदा होईल तेव्हा कुणामुळे फायदा झाला हे विसरू नका. विकासकामासाठी लागेल तेवढा निधी आम्ही देऊ. पण जस आम्ही पाहिजेल तेवढा निधी देतो, त्याप्रमाणे मशीनमध्ये देखील कचाकचा बटण दाबा. म्हणजे मला निधी द्यायला बरं वाटेल. नाहीतर माझा हात आखडता घेईल”, असे अजित पवार म्हणाले होते.