पुणे- राष्ट्रवादीचे शहर अध्यक्ष दीपक मानकर आणि रुपाली पाटील या दोहोंनी आज मुंबईत जाऊन राष्ट्रवादीचे राष्ट्रीय अध्यक्ष अजित पवार यांची भेट घेतली यावेळी तुमची नाराजी माझ्या लक्षात आली आहे, यावेळी मला जमले नाही पण पुढच्या वेळी आपणास नक्की न्याय दिला जाईल असे आश्वासन देत या दोहोंची अजित पवार यांनी समजूत काढल्याचे येथे वृत्त आले आहे.
दिपक मानकर यांना विधान परिषदेवर संधी न दिल्याने अनेक नाराज पदाधिकाऱ्यांनी राजीनामे देत रोष व्यक्त केला होता. त्यानंतर दिपक मानकर यांनी पत्रकार परिषद घेऊन भूमिका मांडली होती. यावेळी बोलताना ते म्हणाले, मी मागील 40 वर्षांपासून राजकीय आणि समाजिक जीवनात कार्य करत आहे. या संपूर्ण कालावधीत राजकीय जीवनात अनेक पदं भूषवली आणि पदांना न्याय देण्याच काम केलं . गेल्या दीड वर्षापूर्वी माझ्यावर पुणे शहर अध्यक्षपदाची जबाबदारी दिली आणि त्या पदाला न्याय देऊन विविध पक्षांतील पदाधिकारी, कार्यकर्ते पक्षासोबत जोडण्याचे काम केले आहे. त्याचबरोबर लोकसभेवेळी देखील त्यांनी मोठी मेहनत केल्याचे सांगितले. तर रुपाली चाकणकर यांना पुन्हा महिला आयोगाच्या अध्यक्षापदावर पुन्हा संधी देण्यात आली आणि माझा मात्र विचार केला नाही अशी त्यांची तक्रार होती.
या संदर्भात दीपक मानकर यांनी असे म्हटले आहे कि,’माझ्यावर विश्वास ठेऊन पुणे शहरातील ८५० पेक्षा जास्त पदाधिकारी, कार्यकर्ते यांनी सामूहिक राजीनामे दिले आणि माझ्या पाठीशी ठामपणे उभे राहिले. गेल्या काही दिवसात पक्षात घडलेल्या घटनांची योग्य दखल घेऊन राष्ट्रवादी काँग्रेस पार्टीचे राष्ट्रीय अध्यक्ष, महाराष्ट्राचे लाडके उपमुख्यमंत्री.अजितदादा पवार यांनी आज, शुक्रवार दिनांक १८ ऑक्टोबर रोजी सकाळी प्रदेश कार्यालय, मुंबई येथे वेळ देत माझी भेट घेऊन शहराध्यक्ष या नात्याने पुणे शहरातील परिस्थितीचा आढावा घेतला.अजितदादा हे पुणे शहर कार्यकारणीच्या कार्यावर अत्यंत समाधानी आहेत. त्यांचे पुण्यातील कार्यकर्त्यांवर विशेष प्रेम असून कोणत्याही पदाधिकाऱ्याचा राजीनामा स्वीकारला जाणार नाही, असे अजितदादांनी ठामपणे जाहीर केले आहे.शहरातील सर्वच कार्यकर्त्यांना एकत्र घेऊन आपण तयार केलेले संघटन कौतुकास्पद असून त्यांच्या बळकटीसाठी आणि पक्षवाढीसाठी उपयोगी होणाऱ्या विधानपरिषदेसाठी आपण मागणी केली होती. परंतू काही कारणास्तव ती मागणी पूर्ण करता आली नाही. परंतू येत्या काळात आपल्याला योग्य वेळी योग्य न्याय दिला जाईल, अशी ग्वाही दादांनी यावेळी दिली. शहरातील सर्वच कार्यकर्त्यांच्या आणि पदाधिकाऱ्यांच्या कामाची प्रशंसा करत दादांनी या कार्याची योग्य पोचपावती लवकरच दिली जाईल असा ठाम विश्वास मला दिला आहे.पुणे शहर आपला बालेकिल्ला असून कोणत्याही कार्यकर्त्यांनी नाराज न होता येत्या विधानसभेत महायुतीचे जोमाने काम करून पक्षाची ताकद दाखवून देऊया, मी आपल्या सर्वांच्या पाठीशी ठामपणे उभा आहे, असा शब्द अजितदादानी यावेळी दिला.तरी आमची एकी अशीच ठेऊन आम्ही येत्या विधानसभेला जोमाने सामोरे जाणार आहोत.यामुळे १९ ऑक्टोबर २०२४ रोजी पुणे पक्ष कार्यालय, गुप्ते मंगल कार्यालय, नारायण पेठ येथे होणारी बैठक रद्द करत आहे. विधासभा मतदारसंघ नियोजनासाठी लवकरच पुढच्या बैठकीचा तपशील जाहीर केला जाईल.असेही मानकर यांनी म्हटले आहे.