नवी दिल्ली- संपूर्ण देशाला हादरवून सोडणाऱ्या कठुआ बलात्कार आणि हत्या प्रकरणातील निकाल अखेर सुनावण्यात आला आहे. यातील मुख्य आरोपी सांझी राम याच्यासह तिघांना जन्मठेपेची शिक्षा सुनावण्यात आली असून इतर तिघांना 5 वर्षांच्या कारावासाची शिक्षा सुनावण्यात आली आहे. तत्पूर्वी, न्यायालयाने एकूण 7 आरोपींपैकी 6 जणांना दोषी ठरवले होते. जम्मू-काश्मीरमधील कठुआ येथे आठ वर्षांच्या मुलीवर बलात्कार करून खून करण्यात आला होता. या प्रकरणाची सुनावणी सोमवारी विशेष न्यायालयात पार पडली.या प्रकरणी मुख्य आरोपी सांझी राम याच्यासह, परवेश कुमार, दीपक खजुरिया यांना जन्मठेप सुनावण्यात आली आहे, तर आनंद दत्ता, सुरेंद्र वर्मा, तिलक राज या आरोपींना 5 वर्षांची शिक्षा झाली आहे.
मंदीराचा पुजारी होता मास्टरमाइंड
गुन्हे शाखेने गेल्या वर्षी 9 एप्रिल रोजी आरोपींविरोधात चार्टशीट दाखल केली होती. या चार्जशीटनुसार मंदिराचा पुजारी सांझी राम या संपूर्ण घटनेचा मास्टरमाइंड होता. अपहरण केल्यानंतर मुलीला त्याच्याच मंदिरात ठेवण्यात आले होते. कोर्टाने एसपीओ दीपक खजूरिया, सुरिंदर वर्मा, प्रवेश कुमार ऊर्फ मन्नू, हेड कॉन्स्टेबल तिलक राज आणि पोलिस उपनिरीक्षक अरविंद दत्ता यांना दोषी ठरवले. तर पुजारी सांझी रामचा मुलगा विशालची निर्दोष मुक्तता केली.
सर्वोच्च न्यायालयाच्या आदेशावरून खटला ट्रान्सफर केला
सुप्रीम कोर्टाने गेल्या वर्षी हा खटला जम्मू-काश्मीरच्या बाहेर पठाणकोटच्या जलद गती कोर्टाकडे सुपूर्त केला होता. 10 जानेवारी 2018 रोजी मुलगी बेपत्ता झाली होती. नंतर तिचा मृतदेह जंगलात छिन्नविछिन्न अवस्थेत आढळून आला होता. मुलीला येथील एका मंदिरात कोंडून ठेवून तिच्यावर अनेक दिवस बलात्कार केल्याचा आरोप आहे.