पणजी – गोवा सध्या वार्षिक गोवा खाद्यपदार्थ आणि संस्कृती महोत्सव २०१९ साठी सज्ज होत असून या महोत्सवात राज्याचे खाद्यपदार्थ आणि देशभरातील जीवनशैली खाद्यपदार्थांची अनुभूती घेता येणार आहे. देशांतर्गत आणि परदेशी प्रवाशांसाठी गोव्याच्या कलाकारांतर्फे स्थानिक तसेच राष्ट्रीय असे दोन्ही नृत्य सादरीकरण केले जाणार आहे. हा कार्यक्रम ६ ते १० फेब्रुवारी २०१९ दरम्यान संध्याकाळी सहानंतर रंगणार आहे.
समुद्रकिनारे आणि सुशेगात स्वभावानंतर गोव्याकडे आकर्षित होण्यामागे बहुधा इथले खाद्यपदार्थ महत्त्वाचे कारण असावेत. या पाच दिवसीय दिमाखदार कार्यक्रमासाठी दूरदूरहून लाखो पर्यटक राज्यात गोव्याचे खास खाद्यपदार्थ चाखण्यासाठी आणि गोव्यातील धमालमस्ती अनुभवण्यासाठी येतात. यंदाही या महोत्सवात शाकाहारी व मांसाहारी प्रकारचे कित्येक खाद्यपदार्थ, गोड पदार्थ व इतर खास खाद्यपदार्थांचे ७० पेक्षा जास्त स्टॉल्स असतील. या कार्यक्रमासाठी खवैय्ये दूर ठिकाणांवरून नेहमीच्या फिशकरी आणि भाताशिवाय अस्सल पदार्थ चाखायला येतात. या पाच दिवसीय सोहळ्यात प्रेक्षकांच्या मनोरंजनासाठी वेगवेगळ्या समूहांद्वारे लाइव्ह सादरीकरण, पाककृती स्पर्धा आणि नृत्य सादरीकरण केले जाणार आहे. या लाइव्ह सादरीकरणामध्ये स्थानिक तसेच प्रसिद्ध राष्ट्रीय नावे उदा. अंतरिक्ष, थैक्कुडम ब्रिज, बॅड ब्लड, पायनॅपल एक्सप्रेस आणि लगोरी यांचा समावेश असेल. या कार्यक्रमात भरपूर आतषबाजी, बक्षिसे आणि बरंच काही अनुभवायला मिळेल. हा कार्यक्रम डी. बी. बांदोडकर मैदान, कंपाळ, पणजी येथे संध्याकाळी ६ नंतर आयोजित केला जाणार आहे. या कार्यक्रमासाठी प्रवेश मोफत आहे.