पहिल्याच दिवशी उत्स्फूर्त प्रतिसाद,
नगरसेवक महेश वाबळे यांच्या प्रयत्नांना यश
पुणे- नगरसेवक महेश वाबळे यांनी सुरु केलेल्या लसीकरणा च्या नव्या विशेष मोहिमेत पहिल्याच दिवशी 200 कामगार महिलांचे लसीकरण करण्यात आले. भारतीय जनता पक्षाचे पद्मावती, सहकारनगर परिसरातील प्रभाग क्रमांक ३५ चे भाजपा नगरसेवक महेश वाबळे यांच्या वतीने घरेलू कामगार महिलांसह विविध कलाक्षेत्रातील कलाकारांसाठी महापालिकेच्या माध्यमातून लसीकरण मोहीम राबवण्यात येत आहे.
या संदर्भात वाबळे म्हणाले,’घरेलू कामगारांसह परिसरातील विविध कलाक्षेत्रातील कलाकार मिळून सुमारे दोन हजार महिलांना या मोहिमेचा लाभ होईल.नगरसेवक स्तरावर राबविण्यात येणारी ही दक्षिण पुण्यातील सर्वात व्यापक मोहीम आहे. महापालिकेच्या सहकार्याने हे लसीकरण केले जाणार आहे. नगरसेवक महेश वाबळे पुढे म्हणाले, माझ्या प्रभागामधील पद्मावती झोपडपट्टी, शंकर महाराज वसाहत, मोरे वस्ती, अरणेश्वर येथील आण्णा भाऊ साठे वसाहत, अशा वसाहतीं मधील १८ ते ४४ वयोगटातील महिलांना या मोफत लसीकरण मोहिमेचा लाभ होणार आहे. ऑनलाईन ॲपच्या माध्यमातून नोंदणीद्वारे लसीकरण करण्यात या महिलांना अनेक समस्या येत आहेत. त्यापैकी अनेकांकडे पुरेशी माहिती, कागदपत्रे नाहीत. परिणामी, या महिला मोठ्या संख्येने लसीकरणापासून दूर राहिल्या आहेत. आम्ही वेळोवेळी मागणी केल्यानंतर आता अखेर प्रशासनाने कोविन ॲपवर नोंदणी करण्याची सक्ती मागे घेतली आहे. परंतु, तरीही लस केंद्रांवर जाऊ न शकल्याने अनेक महिला लसीकरणापासून वंचित राहण्याचा धोका आहे. म्हणूनच अशा महिलांची केवळ नोंदणी करण्यात मदत करण्याऐवजी संपूर्ण लसीकरण करण्याची जबाबदारीच घेण्याचे मी ठरवले. त्यासाठी आवश्यक त्या प्रशासकीय बाबींची पूर्तता केली असून पहिल्याच दिवशी दोनशे महिलांचे लसीकरण करण्यात यश मिळाले.
लसीकरणाचा दुहेरी फायदा
घरेलू कामगार महिलांचा या लसीकरणामुळे दुहेरी फायदा मिळणार आहे. या परिसरातील मोठ्या सोसायट्या व तेथील कुटुंबीयांच्या सुरक्षेच्या दृष्टीने सुद्धा फायदा होणार आहे. या घरेलू कामगारांपैकी बहुतांश महिला या परिसरातील मोठ्या सोसायट्यांमध्ये घरेलू कामगार म्हणून काम करतात. त्यांचे लसीकरण होऊ शकत नसल्यामुळे संबंधित सोसायट्यांमधील नागरिकांमध्ये काहीशी अस्वस्थता व भीती पसरली होती. तसेच या घरेलू कामगार महिलांना आपल्या रोजगारापासून वंचित राहावे लागण्याची शक्यता निर्माण झाली होती. आता या घरेलू कामगार महिलांचेही आता लसीकरण होणार असल्यामुळे बिनदिक्कतपणे त्या परिसरातील सोसायट्यांमध्ये कामासाठी जाऊ शकतील आणि तेथे राहणाऱ्या नागरिकांना कोणताही धोका उद्भवणार नाही. पर्यायाने कोविड सुरक्षित वातावरण आणि घरेलू कामगार महिलांसाठी रोजगाराची हमी असे दुहेरी फायदे या मोहिमेच्या माध्यमातून साध्य करता येणार आहेत, असा विश्वास नगरसेवक महेश वाबळे यांनी व्यक्त केला.
