पुणे-स्वच्छ भारत अभियान अंतर्गत होणा-या स्वच्छ सर्वेक्षण २०२३ पूर्वतयारी निमित्त कर्मचारी व अधिकारी यांची कार्यक्षमता वाढविण्याकरिता कोंढवा-येवलेवाडी क्षेत्रिय कार्यालयामार्फत आदर्श कोठी – स्वच्छ प्रभाग स्पर्धा घेण्यात आली. ही स्पर्धा दि.४ नोव्हेंबर २०२२ ते ८ नोव्हेंबर २०२२ या कालावधीत घेण्यात आली. या स्पर्धेचा पारितोषिक वितरण समारंभ अण्णाभाऊ साठे सभागृह या ठिकाणी पार पडला.
सदर कार्यक्रम पारितोषिक वितरण समारंभास श्रीमती आशा राऊत, उप आयुक्त, घनकचरा व्यवस्थापन, संदीप कदम, उपायुक्त, परिमंडळ क्र.४, डॉ.ज्योती धोत्रे, महापालिका सहाय्यक आयुक्त, डॉ.केतकी घाटगे, सहाय्यक आरोग्य इ. अधिकारी उपस्थित होते.
सदर स्पर्धेमध्ये राजस आरोग्य कोठीस आदर्श कोठीचे प्रथम मानांकन, चैत्रबन-ब आरोग्य कोठीस द्वितीय क्रमांकाचे मानांकन मिळाले. त्याचप्रमाणे कार्यक्षम आरोग्य निरीक्षक म्हणून श्री.उमेश ठोंबरे यांस प्रथम क्रमांकाने तर श्री.प्रशांत कर्णे यांना द्वितीय क्रमांकाने गौरविण्यात आले. कार्यक्षम मोकादम या गटात श्री. सुनील चव्हाण यांस प्रथम क्रमांकाने व श्री.अनंता तावरे यांस द्वितीय क्रमांकाने गौरविण्यात आले. आदर्श सफाई सेवक गटात श्रीमती केशर प्रकाश कोलते यांना प्रथम क्रमांक, श्री.गोरख सूर्यवंशी यांना द्वितीय क्रमांक, श्री.सचिन क्षिरसागर यांना तृतीय क्रमांक व श्रीमती मनिषा निकम, स्वच्छ समन्वयक यांना उत्तेजनार्थ स्मृतिचिन्ह व प्रशस्तीपत्रक देऊन गौरविण्यात आले.
शहर स्वच्छतेचे दैनंदिन कामकाज दररोज होत असते, परंतु कार्यक्षमपणे सातत्य ठेऊन नाविन्यपूर्ण उपक्रम राबविणाऱ्या अधिकारी व कर्मचारी यांचे कौतुक झाले पाहिजे तरच कार्यक्षमता टिकून राहते असे यावेळी डॉ.धोत्रे, महापालिका सहाय्यक आयुक्त यांनी सांगितले.
याप्रकारचे स्पर्धात्मक स्थुत्य उपक्रम राबवून अधिकारी व कर्मचारी यांचे कौतुक केल्यास कार्यक्षमता वाढवून ते नागरिकांना चांगली सेवा देऊ शकतात असे यावेळी डॉ.केतकी घाटगे, सहाय्यक आरोग्य अधिकारी यांनी सांगितले. कोंढवा येवलेवाडी क्षेत्रिय कार्यालयाकडून ज्या पद्धतीने पुढाकार घेऊन नागरिकांच्या सहभागाने विविध कार्यक्रम राबविले जात आहेत, यामुळे निश्चितच स्वच्छ सर्वेक्षण २०२३ स्पर्धेमध्ये पुणे शहराचे मानांकन उंचविण्यासाठी मदत होईल असे यावेळी त्यांनी सांगितले.
श्रीमती आशा राऊत, उप आयुक्त, घनकचरा व्यवस्थापन यांनी घनकचरा व्यवस्थापन विभागातील सर्वच आरोग्य निरीक्षक, मोकादम यांचेसाठी आर्ट ऑफ लिव्हिंग हॅपिनेस प्रोग्रॅम राबवून मानसिक ताणतणाव कमी करून आनंदी व कार्यक्षमतेत वाढ होण्यासाठीचे उपक्रम राबविले जाणार असल्याची माहिती दिली. कोंढवा-येवलेवाडी क्षेत्रिय कार्यालयाप्रमाणेच इतर सर्व क्षेत्रिय कार्यालयांनी देखील याप्रमाणे उपक्रम राबवावेत असे यावेळी त्यांनी सांगितले.
