पुणे-पुण्यात काल अडीच वर्षांच्या चिमुकलीवर झालेल्या बलात्कार आणि खून प्रकरणाने खळबळ उडवून पुणे पोलिसांच्या कार्यपद्धतीवर टीकेचा सूर उमटत असताना आज पोलिसांनी सांगितले कि, त्या मुलीवर लैंगिक अत्याचार झाला नसल्याचे शवविच्छेदन अहवालातून स्पष्ट झाले आहे. या मुलीचा पूर्ववैमन्यस्यातून खून करण्यात आल्याचे बंडगार्डन पोलीस ठाण्याचे सहाय्यक पोलीस आयुक्त रवींद्र रसाळ यांनी सांगितले. आरोपीचा शोध घेत असताना पोलिसांना बुधवारी पुणे स्टेशनच्या परिसरातील प्रथमेश बाळू गायकवाड या तरुणाकडे आधिक चौकशी केली असता त्याने गुन्ह्याची कबुली दिली. आरोपीला अटक करण्यात आली असून उद्या न्यायालयात हजर करण्यात येणार आहे असेही त्यांनी सांगितले.
पोलिसांनी दिलेल्या माहितीनुसार, मुलीचे वडील आणि मामासोबत आरोपीच्या झालेल्या वादातून अडीच वर्षांच्या चिमुरडीचा खून करण्यात आल्याची माहिती तपासादरम्यान समोर आली आहे. याप्रकरणी प्रथमेश बाळू गायकवाड (वय १९) या आरोपीला अटक करण्यात आली असून त्याने खून केल्याची कबूली दिली आहे. दरम्यान, आज शवविच्छेदन अहवाल समोर आल्यानंतर तिच्यावर लैंगिक अत्याचार झाला नसल्याचे स्पष्ट झाले आहे.
पुणे स्टेशन येथील मालधक्का चौकातील फुटपाथवर ही पीडित मुलगी तिच्या आई-वडिलांसोबत राहत होती. मंगळवारी पहाटेच्या सुमारास ती आईजवळ झोपलेली असताना आरोपी प्रथमेश बाळू गायकवाड याने तिला गुपचूप उचलून नेले. काही अंतरावर असलेल्या रेल्वेच्या बोगीमध्ये गेल्यावर त्याने तिला मारहाण केली आणि तो पसार झाला. त्यानंतर काही तासाने डोक्यावर आणि गालावर जखमा झालेल्या बेशुद्धावस्थेत ती आढळून आली. पोलिसांनी तिला तातडीने ससून रुग्णालयात दाखल केले. दरम्यान, मुलीचे आई-वडील तिचा शोध घेत असताना पोलिसांनी त्यांना रुग्णालयात नेले आणि तिची ओळख पटली. मात्र, काही वेळात उपचारांदरम्यान तिचा मृत्यू झाला..
