आणि एकता कपूरने त्याला हेरले
अभिनेता सुशांत सिंह राजपूतने मुंबईत राहत्या घरी आत्महत्या केली. या वृत्ताने संपूर्ण कलाविश्वावर दु:खाचं डोंगर कोसळलं आहे. एकेकाळी गाजलेल्या ‘पवित्र रिश्ता’ मालिकेतील मानव म्हणजेच सुशांत तरुणींच्या गळ्यातील ताईत होता. काही काळापूर्वी क्रिकेटपटू एम.एस.धोनीच्या जीवनावर आधारित चित्रपटात त्याने मुख्य भूमिका साकारत प्रेक्षकांची मनं जिंकली. खरंतर सुशांत याआधीपासूनच चित्रपटसृष्टीत सक्रिय होता. पण, त्याला धोनीच्या भूमिकेने एक वेगळी ओळख दिली. छोट्या पडद्यापासून सुरु झालेला त्याचा प्रवास अगदी हेवा वाटेल असाच आहे.
सुशांत सिंह राजपूत मूळचा बिहारचा असून तो दिल्लीमध्ये लहानाचा मोठा झाला होता. ऑल इंडिया एन्ट्रन्स एक्झाम देऊन त्यात सातव्या क्रमांकाने उत्तीर्ण झालेल्या सुशांतने केमिकल इंजिनिअरींगला प्रवेशही घेतला. मात्र यामध्ये आपले मन रमत नसल्याचे लक्षात आल्यावर त्याने दुसऱ्या वर्षी हे शिक्षण सोडून दिले आणि अभिनयाच्या क्षेत्रात पुढे करियर करायचे असे ठरवले होते.
इंजिनिअरींगचे शिक्षण घेत असताना त्याने शामक दावरकडे नृत्याचे शिक्षण घेण्यास सुरुवात केली होती. २००६मध्ये ऑस्ट्रेलिया येथे आयोजित करण्यात आलेल्या कॉमनवेल्थ गेम्समध्ये त्याला ऐश्वर्या रायसोबत नृत्य करण्याची संधी मिळाली होती.
मुंबईमध्ये नादिरा बब्बरसोबत अभिनयाच्या क्षेत्रात काम करुन एलन-अमीनकडून तो काही अॅक्शन शिकला. यावेळी एका नाटकाच्यावेळी एकता कपूर त्याठिकाणी उपस्थित होती. तिने त्याच्या टॅलेंटला हेरले आणि त्याचे नशीबच बदलले. त्यानंतर ‘पवित्र रिश्ता’मधून त्याने आपल्या छोट्या पडद्यावरील अभिनयाला सुरुवात केली आणि ‘झलक दिख ला जा’ मध्येही आपल्यातील चमक दाखवून दिली होती.
पवित्र रिश्ता मालिका गाजल्यानंतर सुशांतला बॉलिवूडमध्ये प्रवेश मिळाला. ‘काई पो चे’ या चित्रपटाद्वारे त्याने बॉलिवडूमध्ये पदार्पण केले. त्यानंतर ‘शुद्ध देसी रोमान्स’ या यशराज फिल्म्सच्या चित्रपटातही त्याने काम केले. डिटेक्टीव्ह ब्योमकेश बक्षी आणि एम.एस.धोनी या चित्रपटांनी त्याला अभिनेता म्हणून खरी ओळख मिळवून दिली.
अंकिता लोखंडेसोबत त्याची पवित्र रिश्तामध्ये अतिशय चांगली केमिस्ट्री जुळली होती. हीच केमिस्ट्री प्रत्यक्ष आयुष्यातही जुळत होती. मात्र कालांतराने त्यांच्यामध्ये वाद व्हायला लागले आणि या वादांची जागा ब्रेक-अपने घेतली. त्यानंतर त्याने समोर येत माध्यमांना याबाबतचे स्पष्टकरणही दिले होते.
