पुणे: राजेश वाधवान समूह आणि ह्रितिक रोशन यांच्या सहमालकीच्या इंडियन सुपर लीग टीम असलेल्या एफसी पुणे सिटी संघाने मध्यरक्षक डॅमिर ग्रेगिक याला करारबध्द केले आहे. 2017-18या मौसमासाठी क्रोएशियनच्या डॅमिर ग्रेगिक हा इंडियन सुपर लीग मध्ये पहिल्यांदाच सहभागी होत आहे.
एफसी पुणे सिटी संघात डॅमिर ग्रेगिक याचा समावेश केल्याची अधिकृत घोषणा एफसी पुणे सिटी संघाचे मुख्य कार्यकारी अधिकारी गौरव मोडवेल यांनी आज केली. मोडवेल म्हणाले की, स्लोव्हेनियामध्ये उत्कृष्ट कामगिरी करून डॅमिर संघात सहभागी झाला आहे. तो अतिशय ताकदवान आणि आक्रमक खेळाडू असून त्याच्या संघातील समावेशामुळे संघाची ताकद वाढणार आहे. तसेच, चेंडू पास करण्यात आणि ताबा मिळविण्यात या दोन्हीमध्ये त्याचा हातखंडा आहे.
2010मध्ये दमिर याने आपल्या कारकिर्दीची सुरुवात क्रोएशियनच्या प्रथम श्रेणी विभागांतील एनके कार्लोवक संघाकडून केली आणि त्यांनतर तो जर्मनच्या व्हीएफएल बौचम संघात सहभागी झाला. 2015पासून त्याने स्लोव्हेनियन प्रवलिगाकडून एनके रुदर वेलेंजे संघाचे प्रतिनिधीत्व केले होते.
यावेळी डॅमिर ग्रेगिक म्हणाला कि, भारतात येऊन इंडियन सुपर लीग स्पर्धेत एफसी पुणे सिटी संघाकडून खेळण्यास मी फार उत्सुक आहे. माझ्या व्यावसायिक कारकिर्दीत मी सर्वाधिक काळ युरोपमध्ये खेळला असल्यामुळे माझ्यासाठी हे एक नव्हे आव्हान असणार आहे.
