दहावीचा निकाल ८९. ४१ टक्के …कोकणाची भरारी ९६ टक्के ..पुणे ९२ तर मुंबई ९० टक्के

पुणे –

मार्चमध्ये झालेल्या दहावीच्या परीक्षेचा निकाल आज (शुक्रवार, ८ जून) दुपारी १ वाजता जाहीर झाला आहे. गेल्या तीन वर्षांच्या तुलनेत यंदा लवकर निकाल जाहीर होत असून उद्यापासून (९ जून) विद्यार्थ्यांना गुणपडताळणी आणि उत्तर पत्रिकांच्या छायाप्रतींसाठी अर्ज करता येईल. राज्याचा निकाल ८९. ४१ टक्के लागला असून गेल्या वर्षीच्या तुलनेत यंदा निकालात अर्धा टक्क्याने वाढ झाली आहे. सर्वाधिक निकाल कोकण विभागाचा लागला असून कोकणातील ९६ टक्के विद्यार्थी उत्तीर्ण झाले आहेत.

विभागनिहाय दहावीच्या निकालाची टक्केवारी 

• मुंबईः  टक्के ९०.४१ %
•  कोकणः  टक्के ९६.०० %
• पुणेः  टक्के ९२.०८ %
•  नाशिकः  टक्के ८७.८२ %
•  नागपूरः  टक्के ८५.९७ %
• कोल्हापूरः  टक्के ९३.८८ %
• अमरावतीः  टक्के ८६.४९ %
• औरंगाबादः  टक्के ८८.८१ %
• लातूरः  टक्के ८६.३० %

महाराष्ट्र राज्य माध्यमिक आणि उच्च माध्यमिक शिक्षण मंडळाच्यावतीने पुणे, नागपूर, औरंगाबाद, मुंबई, कोल्हापूर, अमरावती, नाशिक, लातूर आणि कोकण अशा नऊ मंडळांमार्फत मार्च २०१८ मध्ये दहावीची परीक्षा घेण्यात आली होती.  परीक्षेत अनुत्तीर्ण होणाऱ्या किंवा श्रेणी सुधारण्यासाठी इच्छुक असलेल्या विद्यार्थ्यांना जुलैमध्ये फेरपरीक्षेची संधी मिळणार आहे.

राज्य मंडळाच्या अध्यक्ष शकुंतला काळे यांनी पत्रकार परिषदेमध्ये ही माहिती दिली.  मुलींनी यशाची परंपरा कायम राखली आहे. यावर्षी मुलींची उत्तीर्ण टक्केवारी ९१.९७ टक्के तर मुलांची ८७.२७ टक्के आहे.

विद्यार्थ्यांचे शैक्षणिक वर्ष वाया जाऊ नये यासाठी दहावीची लगेच १७ जुलै २०१८ पासून फेर परीक्षा घेण्यात येणार आहे. या परीक्षेला अनुत्तीर्ण विद्यार्थां बरोबरच श्रेणी सुधार करू इच्छिनाऱ्या विद्यार्थ्यांनाही परीक्षा देता येणार आहे. मागील वर्षी दहावीचा निकाल ८८.७४ टक्के लागला होता, त्यातुलनेत यंदाच्या निकालात ०.६७ टक्क्यांची वाढ झाली आहे. राज्यातून १६ लाख २८ हजार ६१३ विद्यार्थ्यांनी दहावीची परीक्षा दिली होती.

या वेबसाइटवर पाहता येणार निकाल

www.mahresult.nic.in
www.result.mkcl.org
www.maharashtraeducation.com
असा पाहा निकाल?
दहावीचा निकाल पाहण्यासाठी तुम्ही तुमचा नंबर स्पेसशिवाय टाईप करा. त्यानंतर खालच्या रकान्यात तुमच्या आईच्या नावाची पहिली तीन अक्षरं लिहावी लागतील. समजा तुमचा नंबर P123456 असा आहे आणि तुमच्या आईचं नाव सोनाली आहे, तर तुम्हाला पहिल्या रकान्यात P123456 हा नंबर आणि दुसऱ्या रकान्यात कॅपिटलमध्ये SON असं लिहावं लागेल.