पुणे-डेक्कन एज्युकेशन सोसायटीच्या फर्ग्युसन (स्वायत्त) महाविद्यालयाचा सावित्रीबाई फुले पुणे विद्यापीठाचा पदवीग्रहण समारंभ नुकताच संपन्न झाला. शिवाजी विद्यापीठाचे माजी कुलगुरु प्रा. एन. जे. पवार यांच्या हस्ते पदवी प्रमाणपत्र देण्यात आली.
महाविद्यालयाचे प्राचार्य डॉ. रविंद्रसिंग परदेशी अध्यक्षस्थानी होते. उपप्राचार्य डॉ. नितीन कुलकर्णी, डॉ. प्रकाश पवार, डॉ. सचिन खेडकर, डॉ. तनुजा मराठे, डॉ. सिध्दार्थ आगळे, परीक्षा विभागाचे नियंत्रक विजय तडके, विद्यार्थी प्रतिनिधी संध्या सोनावणे यांची प्रमुख उपस्थिती होती.
प्रा. पवार म्हणाले, ‘आपल्याला चारित्र्यसंपन्न, बुध्दिवंत, स्वावलंबी पीढी निर्माण करायची आहे. त्यासाठी शिक्षण आणि शिक्षकांची भूमिका महत्वाची आहे. व्यावसायिकता, विषयावर प्रभुत्व, आधुनिक तंत्रज्ञानाची जाण, कौशल्य असे बहुआयामी व्यक्तिमत्व शिक्षकांनी घडविणे गरजेचे आहे.’
बायोटेक्नॉलॉजीमध्ये विद्यापीठात पहिल्या आलेल्या मोनिका हर्षवाल, संगणकशास्त्रात पहिल्या आलेल्या नर्मदा अगरवाल यांच्यासह ऍनिमेशन, बॉटनी, केमिस्ट्री, इलेक्ट्रॉनिक्स, इंग्रजी, फ्रेंच, जर्मन, पॉलिटिकल सायन्स आदी विज्ञान व कला शाखेतील ४८ विद्यार्थ्यांचा विशेष गौरव करण्यात आला.
