पुणे, दि. १६ जुलै २०२२: आगीमुळे जळालेले उच्चदाब फिडर पिलर बदलताना संततधार पावसाचे अडथळे तसेच भूमिगत पाईपलाईनमधून झालेली गॅस गळती आदी अडचणींवर मात करीत औंधमधील सुमारे ५५० ग्राहकांचा वीजपुरवठा रात्री उशिरा सुरळीत करण्यात आला आहे.
याबाबत माहिती अशी की, औंध येथील मेडीपॉईंट रुग्णालयाजवळ महावितरणच्या उच्चदाब फिडर पिलरजवळ शुक्रवारी (दि. १५) पहाटे ४ वाजता आग लागली. त्यामुळे वीजपुरवठा खंडित झाला तसेच फिडर पिलर देखील जळून खाक झाला.महावितरणकडून सकाळी फिडर पीलर बदलण्याचे काम सुरु करण्यात आले. मात्र पावसाची संततधार सुरु असल्यामुळे खोदकाम करणे, सहा उच्चदाबाच्या वीजवाहिन्यांना जॉईंट करणे, जॉईंटींग कीट बसविणे आदी कामांमध्ये व्यत्यय येत गेले. तरीही रात्री ६ वाजताच्या सुमारास ही सर्व कामे पूर्णत्वास गेले.
त्यानंतर पावसामुळे भूमिगत वाहिन्यांमध्ये निर्माण झालेली आर्द्रता ब्लोअरने काढण्याचे काम सुरु करताच त्याठिकाणीच असलेल्या ‘एमएनजीएल’च्या भूमिगत पाईपलाईनमधून गॅस लिकेज होत असल्याचे आढळून आले. आगीचा मोठा भडका उडण्याचा धोका असल्याने तात्काळ ‘एमएनजीएल’ला कळविण्यात आले. या कंपनीच्या पथकाकडून गॅस पाईपलाईनच्या दुरुस्तीचे काम रात्री ११ वाजता पूर्ण झाले. त्यानंतर महावितरणकडून उर्वरित कामे जलदगतीने पूर्ण करून रात्री ११.४५ च्या सुमारास वीजपुरवठा सुरळीत करण्यात आला. वीजपुरवठ्याबाबत मोबाईल क्रमांकांची नोंदणी केलेल्या संबंधित ग्राहकांना ‘एसएमएस’द्वारे कळविण्यात आली. तसेच मुख्य अभियंता श्री. सचिन तालेवार व अधीक्षक अभियंता श्री. सतीश राजदीप यांनी वीजयंत्रणेच्या दुरुस्तीची पाहणी केली व तांत्रिक मार्गदर्शन केले.
