पुणे-
तुरुंग हा कारागृह नसून सुधारगृह आहे. आपण येथे कैदी आहात मात्र जर यापूर्वीच आपली भेट झाली असती तर
आपल्याला तुरुंगवास घडला नसता कारण ,सत्संगाचा विचार आपल्या मनात रूजला असता.असे उद्गार दिगंबर जैन
मुनीश्री प.पू १०८ पुलकसागरजी महाराज यांनी आज येरवडा कारागृहात काढले .पुण्यातील येरवडा कारागृहात सुमारे
४५० कैद्यांसमोर त्यांचे तासभर प्रवचन झाले त्यात ते बोलत होते . यापूर्वी देखील मुनीश्रींनी तिहारपासून देशातील
१९ तुरुंगांमध्ये जाऊन कैद्यांसमोर सत्संगाची प्रवचने केली आहेत.येरवडा येथील आशियातील सर्वात मोठ्या
तुरुंगातील त्यांचे प्रवचन हे तुरुंगातील २० वे प्रवचन होते.
मुनीश्रींच्या पुण्यातील चातुर्मासाचे संयोजन करणाऱ्या सकल जैन वर्षायोग समितीचे उपाध्यक्ष चकोर गांधी यांनी
प्रास्ताविक करून मुनिश्रींची माहिती सर्व कैद्यांना दिली .त्यानंतर झालेल्या प्रवचनात मुनीश्री पुढे म्हणाले की ,
आपण तुरुंगात जरी कैदी असलात तरी त्याची खरी शिक्षा आपल्या कुटुंबियांनाच होत असते, मात्र आता जेवढे दिवस
तुरुंगात राहाल तेवढे अधिक चांगले होण्याचा विचार मनात सदैव बाळगा. कोणत्यातरी घटनेमुळे आपणास शिक्षा
झालेली असते व तुरुंगवास घडलेला असतो. मात्र आता आपले भावी आयुष्य चांगले घडवण्यासाठी चांगला विचार
करा आणि आनंदी राहा असा उपदेश त्यांनी कैद्यांना दिला .
मुनिश्रींच्या प्रवचनावेळी कैद्यांच्या मनावरील ताण कमी होताना दिसला " आपण सारे कैदी आहात ,काही काळाने
आपण तुरुंगातून शिक्षा भोगून बाहेरही याल मात्र आपल्यावर देखरेख करणारे सर्व पोलिस अधिकारी व कर्मचारी हे
मात्र येथेच तुरुंगात राहणार " असे त्यांनी मिश्कीलपणे सांगताच सर्वत्र हशा पिकला .त्यामध्ये कैद्यांबरोबरच पोलिस
अधिकारीही सामील झाले.मुनिश्रींचे हे प्रवचन ४५० कैद्यांनी प्रत्यक्ष हॉलमध्ये बसून ऐकले तसेच तुरुंगातील सर्वत्र
असणाऱ्या स्पीकर्सच्या माध्यमातून तुरुंगातील सर्व ५५०० कैद्यांनी देखील हे प्रवचन ऐकले.मुनिश्रीनी या प्रसंगी
पोलिस अधिकाऱ्यांना व कैद्यांसाठी असणाऱ्या लायब्ररीला त्यांची पुस्तके भेट दिली.
मुनीश्रींचा चातुर्मास पुणे व परिसरात सुरु असून ,पुणे शहरानंतर सप्टेंबर महिन्यात मुनीश्रींनी निगडी, चिंचवड,
सांगवी ,एच.एन.डी जैन बोर्डिंग येथे राहून धर्मचिंतन व समाजप्रबोधन केले.आज सकाळी ९ किलोमीटर पायी चालत
ते येरवडा तुरुंगात आले तेथे सुमारे ४५० कैद्यांसमोर त्यांचे प्रवचन झाले.
येरवडा तुरुंगात महात्मा गांधी ,पंडित जवाहरलाल नेहेरू ,सरदार वल्लभभाई पटेल यांना ब्रिटिशांनी कैद करून ज्या
कोठडीत ठेवले होते तेथे मुनीश्रींनी भेट दिली तसेच येरवडा तुरुंगात डॉ बाबासाहेब आंबेडकर आणि महात्मा गांधी
यांचा ऐतिहासिक "पुणे करार" झाला. तेथील वृक्षासही मुनीश्रींनी भेट दिली. याप्रसंगी तुरुंग अधीक्षक डीआयजी.यु.टी
पवार ,अन्यपोलीस अधिकारी उपस्थित होते ,मुनिश्रींसमवेत सकाल जैन वर्षायोग समितीच्या अध्यक्षा शोभा धारीवाल
,कार्याध्यक्ष मिलिंद फडे ,उपाध्यक्ष अरविंद जैन ,उपाध्यक्ष अजित पाटील, सचिव जितेंद्र शहा ,राजेंद्र शहा ,सुरेंद्र
गांधी ,अॅड लोहाडे , कैलास ठोले आदि. उपस्थित होते. यानंतर मुनीश्रींनी विमाननगरकडे प्रस्थान केले.
