पुणे-विरोधकांना सातत्याने त्रास देण्याचा उद्योग सत्ताधारी भाजपकडून सुरू आहे. त्रासच द्यायला असेल तर आम्हाला द्या. ‘ईडी’ अथवा इतर प्रकारे त्रास द्यायचा असेल तर, तसेही करा..,पण स्थानिक नागरिकांना पाण्यापासून वंचित ठेवू नका. या प्रभागात विरोधी पक्षाचे नगरसेवक आहेत, म्हणून पाणी तोडायचे, असे विकृत राजकारण करू नका, अशी आळवनी करण्याची वेळ राष्ट्रवादी च्या नगरसेवकांवर आली आहे.
हडपसर येथील मगरपट्ट्यासारख्या ‘आयटी इंडस्ट्री’ असलेल्या भागात केवळ विरोधी पक्षाचे नगरसेवक असल्याने येथील पाणीपुरवठा सत्ताधारी भाजपच्या लोकप्रतिनिधींनी बंद केला आहे. या प्रभागातील चारही नगरसेवक विरोधी पक्षाचे असल्याने स्थानिक आमदार योगेश टिळेकर यांनी जाणीवपूर्वक पाणीपुरवठा बंद केला आहे. या बाबत पालिका अधिकाऱ्यांकडे तक्रार केली असता ‘या ठिकाणाहून आमची बदली करा; परंतु आम्ही पाणी देऊ शकत नाही,’ अशी उत्तरे मिळत असल्याची टीका राष्ट्रवादी काँग्रेसच्या नगरसेवकांनी केली आहे
राष्ट्रवादी काँग्रेसचे शहराध्यक्ष चेतन तुपे, हेमलता मगर, पूजा कोद्रे, सुनील गायकवाड प्रभाग क्रमांक २२मधून निवडून आले आहेत. या चारही नगरसेवकांनी सोमवारी पत्रकार परिषद घेऊन टिळेकर यांच्यावर टीका केली आहे. या प्रभागातील मुंढवा, मगरपट्टा, माळवाडी, भागीरथी नगर, लक्ष्मी कॉलनी आदी परिसरात पंधरा मिनिटेच पाणी सोडण्यात येते. उन्हाळ्यात परिसरात पाणीटंचाई जाणवली नाही. मात्र, विधानसभेची निवडणूक जवळ येऊन ठेपल्याने परिसरातील पाणीपुरवठा कमी करत राजकारण केले जात असल्याची टीकाही तुपे यांनी केली.
‘पालिका अधिकाऱ्यांकडे सुरुवातीला विचारणा केली असता पाणी सोडतो, अशी उत्तरे देण्यात आली. त्यामुळे पाणी कपातीमागे राजकारण असावे अशी शंका आली नाही. गेले दोन महिने सातत्याने पाण्याचा त्रास सुरू असल्याने या प्रकाराची माहिती घेतली असता, खरा प्रकार उघडकीस आला. त्यांच्याकडे पाण्याची मागणी केल्यानंतर, आमची बदली करा पण, आम्ही पाणी सोडू शकत नाही,’ अशी उत्तरे देण्यात आल्याचे चारही नगरसेवकांनी सांगितले. या प्रकारांमागे स्थानिक आमदार असल्याचा दावाही त्यांनी केला. या संदर्भात पाणीपुरवठा विभागाच्या अधिकाऱ्यांशी संपर्क केला असता, अन्य कामांमध्ये व्यग्र असल्याची उत्तरे देण्यात येतात. मात्र, त्याचवेळी ते स्थानिक आमदारांच्या वाहनांतून फिरत असल्याचे प्रकार दिसल्यानंतर या पाणी कपातीमागचे खरे कारण उजेडात आले. या प्रकरणी महापालिका आयुक्त सौरभ राव यांना निवेदन देण्यात आले आहे, असेही तुपे म्हणाले.
