लोकसभा निवडणूक लढविणार नाही – शरद पवार यांनी केले स्पष्ट

मुंबई-मी लोकसभा निवडणूक लढविणार नसल्याचे यापूर्वीच जाहीर केले आहे. त्यामुळे पुण्यातूनही निवडणूक लढविण्याचा प्रश्नच नाही, असे स्पष्ट करीत राष्ट्रवादी काँग्रेसचे अध्यक्ष शरद पवार यांनी पुण्यातून निवडणूक लढविण्याचा चर्चेला पूर्णविराम दिला. आगामी लोकसभा निवडणुकीच्या तयारीसाठी शरद पवार यांनी पुणे लोकसभा मतदार संघाची आढावा बैठक मुंबईत घेतली. या बैठकीला प्रदेशाध्यक्ष जयंत पाटील यांच्यासह माजी उपमुख्यमंत्री अजित पवार, विधान परिषदेचे विरोधी पक्षनेते धनंजय मुंडे, माजी मंत्री छगन भुजबळ असे सर्व महत्त्‍वाचे पदाधिकारी उपस्थित होते. या बैठकीत प्रदेशाध्यक्षांनी पुण्यातून निवडणूक लढविण्यासाठी कोण इच्छुक आहे का? अशी विचारणा केली. त्यावर उपस्थितांमधून कोणीच पुढे आली नाही. त्यानंतर प्रवक्ते अंकुश काकडे यांनी उभे राहून शरद पवारसाहेब तुम्हीच पुण्यातून निवडणूक लढवावी, तुम्ही उमेदवार असेल तर कोणाचाच विरोध राहणार नाही, टीव्‍ही चॅनलच्या माध्यमातून मागणी केली आहे, असेही त्यांनी सांगितले. मात्र, त्यावर पवार यांनी लगेच माईक हातात घेत मी या आधीच लोकसभा निवडणूक लढविणार नसल्याचे जाहीर केले आहे. त्यामुळे माझ्या उमेदवारीचा प्रश्न येत नाही. काकडे यांना वृत्त वाहिन्यांवर चर्चेची निमंत्रण येत असतात त्याचा त्यांनी आनंद घ्यावा असे सांगून या चर्चेला पूर्णविराम देण्याचा प्रयत्न केला.