पुणे : बिटकॉइन फसवणूक प्रकरणातील प्रमुख आरोपी अमित महेंद्रकुमार भारद्वाज आणि विवेककुमार महेंद्रकुमार भारद्वाज यांना काल रात्री दिल्ली विमानतळावर अटक केल्यानंतर आज न्यायालयाने १३ एप्रिलपर्यत पोलीस कोठडी सुनावली आहे.अशी माहिती येथे पोलीस आयुक्त रश्मी शुक्ला यांनी दिली.
या प्रकरणात यापूर्वी तिघांना अटक करण्यात आली आहे. तर पोलीस आणखी सहा आरोपींचा शोध घेत आहे. बिटकॉइन घोटाळा जून २०१७ ते जानेवारी २०१८ या कालावधीत घडला होता. या प्रकरणातील मुख्या आरोपी असलेले अमित महेंद्रकुमार भारद्वाज आणि विवेककुमार महेंद्रकुमार भारद्वाज या दोघांना आज न्यायालयात हजर करण्यात आले. यावेळी विशेष सरकारी वकील सुनील हांडे यांनी युक्तीवाद केला. ते म्हणाले, ही संबंधित कंपनी सिंगापूरची असून आरोपींनी काही आपल्याकडील माहिती डिलीट केली आहे. त्यामुळे सर्व माहिती तसेच लॉग इन आयडी आणि पासवर्ड घेण्यासाठी आरोपींना पोलीस कोठडी देण्याची मागणी केल्यावर न्यायालयाने १३ एप्रिल पर्यँत पोलीस कोठडी सुनावली आहे. सध्या बिटकॉइन फसवणूक प्रकरणी देशभरात तीन गुन्हे दाखल असून त्यातील दोन गुन्हे निगडी आणि दत्तवाडी पोलीस ठाण्यात दाखल असल्याची माहिती देण्यात आली.
