पुणे-
शहरातील सदाशिव पेठेत मंगळवारी रात्री अॅसिड हल्ला आणि गोळीबाराचे थरारनाट्य रंगले. सर्वाधिक रहदारीच्या टिळक रस्त्यावर मैत्रिणीबरोबर गप्पा मारत थांबलेल्या एका युवकावर अज्ञाताने अॅसिड हल्ला केल्याची घटना मंगळवारी रात्री आठच्या सुमारास घडली. त्यानंतर सदाशिव पेठेतील ‘आनंदी निवास मारतीमध्ये लपलेल्या या हल्लेखोरास पकडण्यासाठी गेलेल्या पोलिसांवरही हल्लेखोराने गोळीबार केला. दरम्यान, या घडामोडीत हल्लेखोर इमारतीच्या ‘डक्ट’मध्ये पडून गंभीर जखमी झाला. पोलिस आणि अग्निशामक दलाच्या जवानांकडून रात्री उशिरा हल्लेखोराला बाहेर काढण्यात यश आले. त्यानंतर हल्लेखोराला पोलिसांनी ताब्यात घेतले.
टिळक रस्त्यावर बादशाही हॉटेलजवळ मंगळवारी सायंकाळी एक युवक मैत्रिणीबरोबर गप्पा मारत थांबला होता. त्या वेळी चालत आलेल्या युवकाने गप्पा मारत थांबलेल्या युवकाच्या चेहऱ्यावर अॅसिड टाकले. या वेळी पिस्तुलातून गोळीबार झाल्यासारखा आवाज आल्याचे काही प्रत्यक्षदर्शींनी सांगितले. त्यानंतर काही कळायच्या आत युवक पसार झाला. दरम्यान, या घटनेत जखमी झालेल्या युवकाच्या चेहऱ्याला इजा झाली होती. त्याला तातडीने खासगी रुग्णालयात दाखल करण्यात आले. या घटनेची माहिती रात्री पोलिसांना मिळाली. त्यानंतर विश्रामबाग पोलिस; तसेच गुन्हे शाखेतील पथक घटनास्थळी दाखल झाले. जखमी झालेल्या युवकाला बोलता येत नसल्याने पोलिसांना माहिती मिळवता आली नाही. युवकाबरोबर असलेल्या युवतीचे नाव, पत्ता समजला नसल्याने अॅसिड हल्ला नेमका कोणत्या कारणामुळे झाला, याबाबतची माहिती पोलिसांना मिळाली नाही. पोलिसांकडून मिळालेल्या माहितीनुसार जखमी झालेल्या युवकाचे नाव रोहित खरात असल्याचे समजते. दरम्यान, या घटनेनंतर विश्रामबाग पोलिसांचे पथक टिळक रस्त्यावरील ‘आनंदी निवास’ इमारतीत गेले. अॅसिड हल्ला करणारा युवक इमारतीत असलेल्या सदनिकेत थांबल्याची माहिती मिळाली. पोलिसांचे पथकाने युवकाला ताब्यात घेण्याचा प्रयत्न केला असता त्या युवकाने पिस्तुलातून पोलिसांवर दोन गोळ्या झाडल्या. त्यानंतर पोलिसंनी जादाची कुमक मागवून घेतली. पोलिसांनी इमारतीमध्ये प्रवेश करण्याचा प्रयत्न केला. मात्र, इमारतीमध्ये अंधार असल्याने अडचणी येत होत्या. त्यानंतर इमारतीच्या ‘डक्ट’मध्ये हा हल्लेखोर पडल्याचे पोलिसांच्या लक्षात आले. ‘डक्ट’मध्ये उतरण्यासाठी कोणताही मार्ग नसल्याने पोसिलांनी अग्निशामक दलाला पाचारण केले. पोलिस आणि अग्निशामक दलाने रात्री उशिरा या हल्लेखोरास बाहेर काढले. दरम्यान, हा हल्लेखोर गंभीर जखमी अवस्थेत होता; तसेच त्याने स्वत:वरही गोळी झाडून घेतल्याचे समजते.
