मिर्झापूर -जिल्हा प्रशासन आणि पोलिसांचा विरोध डावलून काँग्रेसच्या सरचिटणीस प्रियंका गांधी वड्रा यांनी अखेर आज (शनिवारी) सोनभद्र हत्यांकाडातील पीडित कुटुंबीयांची भेट घेतली. ‘प्रशासनाने पीडितांचे रक्षण करण्याची आवश्यकता असून, ही घटना घडत असतानाच त्यांना मदत करायला हवी होती. प्रशासनाची मानसिकता आकलनापलिकडे असून प्रसारमाध्यामांनी प्रशासनावर दबाव टाकायला हवा, अशा शब्दांत प्रियांका यांनी या भेटीनंतर आपले मत व्यक्त केले.
प्रियांका गांधी वड्रा रात्रीपासूनच मिर्झापूरमधील चुनार गेस्ट हाऊसवर थांबल्या होत्या. आज सकाळी वरिष्ठ पोलीस अधिकारी आणि जिल्हा प्रशासनाच्या अधिकाऱ्यांनी प्रियांका गांधींना भेटून पीडितांना भेटू नये अशी पुन्हा एकदा विनंती केली. मात्र, प्रियांकांनी पोलीस आणि अधिकाऱ्यांची विनंती फेटाळून लावली. जो पर्यंत मी पीडितांची भेट घेत नाही, तो पर्यंत इथून जाणार नाही. आणि जिल्हा प्रशासनाने मला भेट घेऊ दिली नाही, तर प्रशासनाला सोयीचे असेल अशा ठिकाणी आपण पीडितांची भेट घेऊ, असे प्रियांका यांनी स्पष्ट केले होते. मात्र, आज सकाळी बळींच्या कुटुंबांतील १५ जण मिर्झापूर गेस्ट हाऊसला पोहोचले आणि त्यांनी प्रियांकांची भेट घेतली.
प्रियांका यांच्या भेटीसाठी पीडित गेस्ट हाऊसला आल्याचे समजताच जिल्हा प्रशानाचाच्या अधिकाऱ्यांनी त्यांना प्रियांकाला भेटण्यास मनाई केली. हे समजताच प्रियांका यांनी पुन्हा धरणे आंदोलन केले आणि त्यांना आपल्याला भेटू देण्याची मागणी केली. त्यानंतर भेटीची परवानगी देण्यात आली.
पीडितांची प्रियांकांशी भेट झाल्यानंतर त्यांच्या डोळ्यांतून अश्रू वाहू लागल्याचे प्रत्यक्षदर्शींनी सांगितले. प्रियांका यांच्या डोळ्यांमधून देखील अश्रू वाहिल्याचे दिसले अशी माहिती काँग्रेस कार्यकर्ते विवेकानंद पाठक यांनी सांगितले.चुणार येथून निघाल्यावर प्रियांका यांनी वाराणसी येथील काळ भैरवनाथ मंदिरात पूजा केली .
