प्रियांका याच काँग्रेस अध्यक्षपदाच्या सर्वोत्तम उमेदवार: थरूर

नवी दिल्ली: काँग्रेसच्या सरचिटणीस प्रियांका गांधींमध्ये नैसर्गिक करिश्मा आहे. त्या काँग्रेसच्या अध्यक्षपदाच्या सर्वोत्तम उमेदवार ठरतील, असं मत काँग्रेसचे ज्येष्ठ नेते शशी थरुर यांनी व्यक्त केलं आहे. त्यामुळे काँग्रेसमध्ये आता प्रियांका गांधींकडे पक्षाची धुरा देण्याची चर्चा जोर धरण्याची शक्यता वर्तवण्यात येत आहे. शशी थरुर यांनी यावेळी तरुण चेहराच काँग्रेसचा अध्यक्ष असावा या पंजाबचे मुख्यमंत्री कॅप्टन अमरिंदर सिंह यांच्या मताशी सहमतीही दर्शवली आहे. काँग्रेस नेते राहुल गांधी यांनी अध्यक्षपद सोडल्यानंतर अध्यक्षपदाचा उमेदवार कोण हे अद्यापही ठरले नाही. ही परिस्थिती पक्षासाठी घातक आहे, असं थरूर यांनी स्पष्ट केलंय. काँग्रेसच्या अध्यक्षपदाच्या निवडणुकीची घोषणा होईल तेव्हा प्रियांका गांधी अध्यक्षपदासाठी त्यांचं नाव पुढे करतील, अशी आशाही त्यांनी व्यक्त केलीय. मात्र प्रियांका यांनी निवडणूक लढवावी वा लढवू नये हा निर्णय गांधी घराण्याने घ्यायचा आहे, असं सांगतानाच प्रियांका गांधी यांच्यात नैसर्गिक करिश्मा आहे. त्यामुळेच त्यांची तुलना इंदिरा गांधींसोबत केली जाते. त्या अध्यक्षा झाल्यास मतदार आणि पक्षाच्या कार्यकर्त्यांकडून त्यांचं स्वागत केलं जाईल आणि हे सर्वजण त्यांच्या नेतृत्वात काम करतील. प्रियांका गांधींना राजकीय अनुभव आहे, त्या प्रभावशाली व्यक्तीही आहेत आणि लोकसभा निवडणुकीत त्यांनी उत्तर प्रदेशात प्रत्यक्ष कामही केलं आहे, याकडेही थरूर यांनी लक्ष वेधलं. तसंच नव्या अध्यक्षांसमोर दुहेरी आव्हाने असतील असंही त्यांनी स्पष्ट केलं.