नवी दिल्ली -ब्रिटनचे माजी परराष्ट्र मंत्री आणि लंडनचे माजी महापौर बोरिस जॉन्सन ब्रिटन यांनी पंतप्रधानपदाची शपथ घेतली. माजी पंतप्रधान थेरेसा मे यांनी राजीनामा दिल्यानंतर बोरिस जॉन्सन हे ब्रिटनच्या पंतप्रधानपदी विराजमान झाले आहेत. बोरिस यांच्या मंत्रीमंडळाचीही घोषणा झाली असून त्यामध्ये एका भारतीय वंशाच्या महिलेचा समावेश आहे. बोरिस यांच्या मंत्रीमंडळात प्रीती पटेल यांना गृहमंत्री पदावर नियुक्त करण्यात आले आहे. गृहमंत्री पदी विराजमान होणाऱ्या पटेल या भारतीय वंशाच्या पहिल्या व्यक्ती ठरल्या आहेत. विशेष म्हणजे पटेल यांच्या नियुक्तीमुळे ब्रिटनमध्ये पहिल्यांदाच एक गुजराती व्यक्ती गृहमंत्री झाली आहे.
ब्रेग्झिटवरुन ब्रिटन सरकारवर उघडपणे टिका करणाऱ्या पटेल या बोरिस यांच्या समर्थक आहेत. पटेल या कंझर्वेटीव्ह पक्षाच्या ‘बॅक बोरिस’ मोहिमेच्या प्रमुख सदस्यांपैकी एक होत्या. बोरिस यांना पाठिंबा देणाऱ्या पटेल यांच्याकडे मोठी जबाबदारी दिली जाण्याची शक्यता सुरुवातीपासूनच व्यक्त केली जात होती. ‘नवे मंत्रीमंडळ हे आधुनिक ब्रिटन आणि कंझर्वेटीव्ह पक्षाच्या आधुनिक धोरणांचा पुरस्कार करणारे असावे,’ असं मत पटेल यांनी मंत्रिमंडळाची घोषणा होण्याच्या काही तास आधी केली होती. मूळच्या गुजराती असणाऱ्या पटेल या ब्रिटनमधील भारतीयांमध्ये लोकप्रिय आहेत. भारतीयांनी आयोजित केलेल्या अनेक कार्यक्रमांना पटेल आवर्जून उपस्थित राहतात. पटेल या भारतीय पंतप्रधान नरेंद्र मोदींच्या मोठ्या समर्थक आहेत.
नियुक्तीनंतर प्रीति पटेल म्हणाल्या…
प्रीति यांनी गृहमंत्री पदी नियुक्ती झाल्यानंतर आनंद व्यक्त केला आहे. ‘मी ब्रिटनला, ब्रिटनमधील लोकांना सुरक्षित ठेवण्यासाठी आणि गुन्हेगारीविरुद्ध लढण्यासाठी मला शक्य होईल ते सर्व काही करेन. पुढील आव्हानांची मी वाट पाहत असून गृहमंत्री म्हणून काम करण्यास तयार आहे,’ असे मत प्रीति यांनी व्यक्त केले आहे.
४७ वर्षीय प्रीति यांनी पहिल्यांदा २०१० मध्ये एसेक्स मधील विथम येथून कंझर्वेटीव्ह पक्षाच्या तिकिटावर खासदार म्हणून निवडूण आल्या. त्या २०१४ साली पटेल यांनी ज्युनियर मिनिस्ट्रीयल आणि ट्रेजरी मंत्रीपदाची जबाबदारी स्वीकारली होती. २०१५ च्या सर्वाजनिक निवडणुकीनंतर पटेल यांच्या खांद्यावर कामगार मंत्री पदाची जबाबदारी देण्यात आली होती. त्यानंतर २०१६ साली त्यांना ‘डिपार्टमेंट ऑफ इंटरनॅशनल डेव्हलपमेंट’ विभागामध्ये राज्य सचिव पदावर नियुक्त करण्यात आले होते.
भारत आणि ब्रिटन संबंधांबद्दल म्हणाल्या…
पीटीआयने दिलेल्या वृत्तानुसार, ‘कंझर्वेटीव्ह पक्षाचे नेतृत्व करणारे नेते आणि ब्रिटनचे नवे पंतप्रधान बोरिस जॉन्सन यांचा ब्रिटनच्या सार्वभौमत्ववर विश्वास आहे. देशाच्या उज्वल भविष्यासाठी ते नक्कीच नवीन दृष्टीकोन देतील’ असे मत प्रीति यांनी व्यक्त केले आहे. भारत आणि ब्रिटनमधील संबंधांबद्दल बोलताना प्रिति यांनी ‘दोन्ही देशांमधील मैत्रिपूर्ण संबंधांना एका नवीन उंचीवर घेऊन जाण्याचा आमचा प्रयत्न असणार आहे’ असे मत व्यक्त केले.
