मुंबई
कौशल्य विकासाची आवश्यकता युवकांनी समजून घ्यायला हवी. मागणी आणि पुरवठा यानुसार तरुणाईने कौशल्य आत्मसात केली पाहिजेत. कौशल्य विकास ही काळाची गरज आहे. काळाप्रमाणे स्वत:ला बदलणं गरजेचं आहे. गरजेप्रमाणे स्वतःमध्ये बदल करा असे आवाहन भाजपा राष्ट्रीय अध्यक्ष जे. पी. नड्डा यांनी केले. गुरुवारी रविंद्र नाट्य मंदिर येथे त्यांनी युवा संवाद कार्यक्रमात मुंबईतील तरुणांशी संवाद साधला. जे. पी. नड्डा हे दोन दिवसांच्या महाराष्ट्र दौ-यावर आले आहेत. यावेळी मुख्यमंत्री एकनाथ शिंदे, विधानसभा अध्यक्ष राहुल नार्वेकर, कौशल्य विकास मंत्री मंगलप्रभात लोढा, मुंबई भाजपा अध्यक्ष आशिष शेलार प्रमुख उपस्थित होते. राज्य सरकारच्या कौशल्य विकास विभागाच्या वतीने ‘युवा संवाद’ कार्यक्रमाचे आयोजन करण्यात आले.
भाजपा राष्ट्रीय अध्यक्ष जे. पी. नड्डा म्हणाले, सध्याचे जग दररोज बदलणारे आहे. आज देश जिथून उभा आहे, त्या देशाच्या भविष्याची चिंता करणे हे आपल्या सर्वांचे काम आहे. प्रधानमंत्री कौशल्य विकास योजनेद्वारे आम्ही १ कोटी १० लाख तरुणांना प्रशिक्षण दिले आहे. स्टार्टअपबद्दल बोलायचे झाले तर आधी देशात चार युनिकॉर्न होते, आज १०० आहेत. हा आपल्या देशाचा आणि युवा शक्तीचा पुरावा आहे. तरुणांनो, कधीही लहान ध्येय ठेवू नका. मोठा विचार करा, तुमच्यासाठी अवकाश खुले आहे. त्याची पायाभरणी आज करूयात. त्याकरिता मोठा विचार करा, स्वतःचे मूल्यमापन करा आणि कालपेक्षा आजचा दिवस कसा चांगला बनवायचा याचा प्रयत्न करा असेही ते म्हणाले. तांत्रिक शिक्षणासाठी कौशल्य विकास महत्वाचा ठरतो. यासाठी आपण कल्पक असणे आवश्यक आहे. काळ बदलला आहे. तंत्रज्ञानाच्या जगात आज भारत प्रगत बनला आहे. डिजिटलायझेशन होत असताना युवक आघाडीवर असला पाहिजे. पंतप्रधान नरेंद्र मोदी यांनी यावर विशेष लक्ष वेधले आहे असेही ते म्हणाले. आज युवकांच्या कौशल्य विकासाला बळ मिळाले आहे. खूप अडथळ्यांना तोंड देत हे मिशन पुढे जात आहे. कौशल्य शिकणे, त्यात प्राविण्य मिळवणे आणि त्यात अद्ययावत राहणे महत्वाचे आहे. त्यासाठी युवकांनी पुढाकार घ्यावा असे आवाहन त्यांनी केले.
मुख्यमंत्री एकनाथ शिंदे म्हणाले, येत्या काळात तब्बल तीन लाख तरुणांना रोजगार उपलब्ध करून देण्याचे आमचे लक्ष आहे. सध्याच्या काळात अनेक देशांची आर्थिक व्यवस्था ढासळत असताना आपण जी २० चे अध्यक्ष पद भूषवतो आहोत. देशाचे भविष्य याच युवा पिढीच्या हातात आहे. राज्यात आयोजित होणाऱ्या शिबिरांमधून जास्तीत जास्त तरुणांना रोजगार कसा मिळेल हेच सरकारचे लक्ष्य आहे. आतापर्यंत २ लाख ८० हजार विद्यार्थ्यांना नोकऱ्या देण्यात आल्या आहेत. तर एकाचवेळी ७५ हजार नोकऱ्या देण्याची प्रक्रिया सुरू आहे. विद्यार्थ्यांना उत्तम दर्जाचे शिक्षण कमी पैशात घेता यावे यासाठी आम्ही काम करत आहोत. शिक्षण देण्यासाठी सरकार कोट्यावधी रुपये खर्च करत आहे. पालिकेच्या शाळांमध्ये स्किल डेव्हलपमेंट सेंटर सुरू करण्यासाठी विविध पातळ्यांवर सामंजस्य करार करण्यात आले आहेत.
जेपी म्हणजे ‘जबान के पक्के’
मुख्यमंत्र्यांचा असाही हजरजबाबीपणा
मुख्यमंत्री श्री. शिंदे यांनी जे. पी. नड्डा यांच्याविषयी बोलताना सांगितले, तुमच्या नावात जे. पी. आहे म्हणजेच तुम्ही ‘जबान के पक्के’ आहात असे म्हणत श्री. शिंदे यांनी नड्डा यांच्याविषयी आदर व्यक्त केला. पंतप्रधान नरेंद्र मोदी यांनी देखील युवा पिढीची ताकद ओळखली आहे. युवा पिढीसाठी ते सातत्याने काम करत आहेत. भविष्यात हा देश युवकांवरच चालणार आहे असेही मुख्यमंत्र्यांनी अधोरेखित केले.
शिबिरात दहावी आणि बारावीच्या विद्यार्थ्यांना पुढील करिअरबाबत मार्गदर्शन करण्यात आले. त्याचप्रमाणे विविध स्टार्टअप तसेच व्यवसाय मार्गदर्शन विषयातील स्टॉल, शैक्षणिक कर्ज पुरविणाऱ्या बँकांचे स्टॉल, पुस्तकांचे आणि व्यवसाय मार्गदर्शन विषयावरील प्रदर्शनही मांडण्यात आले होते
सिद्धिविनायकचा घेतला आशीर्वाद
महाराष्ट्रात दोन दिवसीय दौर्यावर आलेल्या भाजपा राष्ट्रीय अध्यक्ष जे. पी. नड्डा यांनी गुरुवारी प्रभादेवी येथील सिद्धिविनायकाचे दर्शन घेतले.
स्वा. सावरकर सदनाला भेट
भाजपाचे राष्ट्रीय अध्यक्ष जे . पी. नड्डा यांनी गुरुवारी सकाळी दादर येथील सावरकर सदनास भेट दिली. सावरकरांशी संबंधित अनेक गोष्टींची यावेळी त्यांनी माहिती घेतली. श्री. नड्डा यांनी सर्वप्रथम सावरकर सदनातील स्वातंत्र्यवीरांच्या प्रतिमेस पुष्पहार अर्पण केला आणि अभिवादन केले. त्यानंतर वीर सावरकरांच्या सूनबाई सुंदर सावरकर यांची भेट घेत विचारपूस केली. सावरकरांशी संबंधित अनमोल ठेवा त्यांनी आस्थेने पाहिला, त्याबद्दल माहिती घेतली. स्वातंत्र्यवीरांचा दिनक्रम, त्यांच्या कामकाजाची पद्धत याविषयी वीर सावरकर यांची नातं असिलता सावरकर राजे यांनी श्री. नड्डा यांना माहिती दिली. सावरकरांचे वास्तव्य असलेल्या खोलीची पाहणी यावेळी त्यांनी केली. मुंबई भाजपा अध्यक्ष आशिष शेलार, माहिम विधानसभा प्रमुख अक्षता तेंडुलकर यांच्यासह भाजपाचे पदाधिकारी उपस्थित होते.
