पुणे -स्टेशन परिसरातील फुटपाथवर आईसोबत झोपलेल्या अडीच वर्षाच्या मुलीला मंगळवारी पहाटे उचलून नेत तिच्यावर रेल्वेच्या बोगीत नेऊन बलात्कार केल्याचा धक्कादायक प्रकार समोर आला आहे. बेशुद्ध अवस्थेत सापडलेल्या या चिमुकलीला ससूनमध्ये उपचारासाठी दाखल करण्यात आले असता उपचारादरम्यान सायंकाळी मृत्यू झाला. याप्रकरणी बंडगार्डन पोलिस ठाण्यात गुन्हा दाखल करण्याचे काम रात्री उशीरापर्यंत सुरू होते. याप्रकरणी पोलिसांनी एका संशयिताला ताब्यात घेतलं असून त्याची चौकशी सुरू आहे. भाजपच्या नगरसेविका राजश्री काळे यांनी लक्ष घालून पाठपुरावा केल्याने या प्रकरणी पोलिसात गुन्हा दाखल होवून पुढील कारवाई सुरु झाली अन्यथा एका गरीब मुलीवरील अत्याचार दडपून जाईल आणि अकस्मात मयत नोंदवून बेवारस म्हणून प्रकरण रफादफा होईल अशी स्थिती निर्माण झाल्याचे चित्र होते
पुणे स्टेशन येथील मालधक्का चौकाजवळील रस्त्यावर पीडीत मुलीचे आई-वडील फुटपाथवर राहतात. ते लिंबू, मिरची, खेळणी विकून उदरनिर्वाह करतात. ते बारामतीमधून उदरनिर्वाहासाठी पुणे स्टेशन परिसरात आले होते. पीडीत मुलीची आई मुकबधिर आहे. तिचे दोन विवाह झालेले आहेत. ही मुलगी पहिल्या पतीपासून झालेली आहे. सोमवारी रात्री ती मालधक्का चौकातील फुटपाथवर मुलीसह झोपली होती. मंगळवारी पहाटे पाचच्या सुमारास अनोळखी व्यक्तीने मुलीला उचलून नेले. मुलीच्या आईला जाग आल्यानंतर त्यांनी शोध घेण्यास सुरुवात केली. पण, मुलगी सापडली नाही.
लोहमार्ग पोलिसांना पुणे रेल्वे स्थानक परिसरात गस्त घालत असताना रेल्वेच्या डब्यामध्ये मुलगी बेशुद्ध अवस्थेत आढळून आली. तिच्या अंगावर जखमा झाल्या होत्या. लोहमार्ग पोलिसांनी तिला उपचारासाठी तत्काळ रुग्णालयात दाखल करून तिच्या पालकांचा शोध घेतला. मालधक्का चौकात पोलिसांकडून चौकशी करताना मुलीच्या आई-वडिलांनी मुलीचे छायाचित्र ओळखले. पोलिसांनी त्यांना मुलीवर उपचार सुरू असल्याचं सांगितलं. मात्र उपचार सुरू असताना सायंकाळी साडे पाचच्या सुमारास या मुलीचा मृत्यू झाला. याप्रकरणी लोहमार्ग पोलिसांनी अकस्मात मृत्यूची नोंद करून हे प्रकरण बंडगार्डन पोलिसांकडे वर्ग केलं आहे. या घटनेची माहिती मिळताच बंडगार्डन पोलीस व वरिष्ठ अधिकाऱ्यांनी घटनास्थळी धाव घेतली. दरम्यान, याप्रकरणी लोहमार्ग पोलिसांनी एका संशयिताला ताब्यात घेतले आहे. त्याच्याकडे तपास सुरू आहे, अशी माहिती लोहमार्ग पोलिस ठाण्याचे वरिष्ठ निरीक्षक सुरेशसिंग गौड यांनी दिली.नेमके याप्रकरणी नगरसेविका राजश्री काळे यांनी काय म्हटले आहे ते त्यांच्याच श्बदात ऐका ….
