पुणे-शहरातील कोरोना विषाणूचा वाढता प्रादुर्भाव लक्षात घेऊन, सामाजिक भान जपत शहरातील २०० गणेश मंडळांचे कार्यकर्ते महापालिका, पोलीस यांच्या मदतीसाठी पुढे आले आहेत. मंडळाच्या पदाधिकाऱ्यांसोबत झालेल्या बैठकीत सध्याची नेमकी गरज, कामाचे स्वरूप आणि सुरक्षिततेच्या उपायाबाबत चर्चा झाली.
शहराच्या पूर्व भागातील परिस्थिती दिवसेंदिवस चिंताजनक होत असताना पालिका आणि पोलिस प्रशासनावर ताण वाढला होता. यावेळी गणेश मंडळाचे कार्यकर्ते उत्स्फूर्तपणे पुढे येत कोरोनाविरुद्धच्या लढाईत प्रशासनाला मदत करण्यासाठी, रेडझोन परिसरातील संचारबंदी च्या अंमलबजावणीसाठी, रुग्णांना व त्यांच्या नातेवाईकांना मदत करण्यासाठी प्रत्यक्ष रस्त्यावर उतरत नागरिकांना विश्वासात घेऊन काम करणार आहेत. गणेश मंडळाच्या कार्यकर्त्यांना गरज असेल त्या ठिकाणी त्यांच्याकडून मदत घेतली जाणार आहे .
यावेळी स्थायी समितीचे अध्यक्ष हेमंत रासने, अप्पर पोलिस आयुक्त डॉ संजय शिंदे, पोलिस उपायुक्त स्वप्ना गोरे, मंडळाचे पदाधिकारी प्रताप परदेशी, सुनील रहाटणे, पुनीत बालन, शिरीष मोहिते, निखिल पंडित, डॉ मिलिंद भोई, उदय जगताप, राजाभाऊ तिकार, पीयूष शहा, प्रशांत पवार व इतर मान्यवर उपस्थित होते.
