पुणे-कात्रज-कोंढवा रस्त्याच्या कामांमध्ये कोणतीही गुपिते नसून लवकरच निविदा प्रक्रिया पूर्ण करून रस्त्याचे काम केले जाणार असल्याचे आश्वासन महापालिका आयुक्त सौरभ राव यांनी सर्वसाधारण सभेत दिले. कात्रज-कोंढवा रस्त्याचे काम बरेच दिवस होत नसून कात्रज कोंढवा रस्ता निविदा रद्द केल्यामुळ शिवसेनेच्या वतीने सभागृहात शिवसेनेच्या संगीता ठोसर , गटनेते संजय भोसले,विशाल धनवडे,पल्लवी जावळे अशा नगरसेवकांनी सभागृहात आंदोलन केले.
कात्रज-कोंढवा रस्त्यावर गेल्या काही वर्षात अनेक अपघात झाले आहेत. त्यामुळे नागरिकांना आपले प्राण गमवावे लागत आहे. या रस्त्याचे अनेक वेळा निविदा प्रक्रिया राबवून सुद्धा काम होत नसल्याचा आरोप शिवसेनेच्या संगीता ठोसर यांनी सभागृहात केला. याविषयी महापालिका आयुक्त सौरभ राव म्हणाले, कात्रज-कोंढवा रस्त्याच्या कामांमध्ये कोणतीही गुपित नाही, कायदेशीर प्रक्रिया पूर्ण करून हे काम केले जाणार आहे. मागील निविदा प्रक्रिया वेळेत पूर्ण होत नसल्याने ती रद्द करण्यात आली. कोणतेही काम सुरू करण्यापूर्वी 120 दिवसात वर्क ऑर्डर देणे अपेक्षित आहे. मात्र, हा कालावधी 180 दिवस झाल्याने ही निविदा प्रक्रिया रद्द करण्याचा निर्णय प्रशासनाने घेतला. या रस्त्याचे काम लवकर होण्यासाठी नवीन निविदा तयार करण्यात आले आहे. इस्टिमेट कमिटीने त्याला मान्यता दिली असून ऑगस्ट महिन्यात ही निविदा प्रक्रिया पूर्ण करण्यात येईल. सध्या या रस्त्याच्या कामासाठी 42 टक्के जागा संपादित करण्यात आल्या असून येत्या दोन महिन्यांमध्ये नगरसेवक आणि स्थानिक आमदार यांच्या माध्यमातून अधिक भूसंपादन केले जाणार असल्याचे महापालिका आयुक्त यांनी सांगितले.
