पुणे: कोथरुड, शिवाजीनगर व पुणे कॅन्टोन्मेंट विधानसभा मतदार संघात झालेल्या पक्ष प्रवेशाने या तीनही मतदार संघातील भाजपाच्या उमेदवारांचे मताधिक्य पाहिल्यावर त्यांच्या विजयात खासदार संजय काकडे यांनी मोलाची भूमिका बजावल्याचे दिसून येते. पुणे महापालिका निवडणुकीप्रमाणेच या निवडणुकीतही मुख्यमंत्री देवेंद्र फडणवीस यांनी दिलेली जबाबदारी खासदार संजय काकडे यांनी चोखपणे पार पाडली आहे.
निवडणूक जाहीर झाल्यानंतर खासदार संजय काकडे यांनी कोथरुड, शिवाजीनगर व पुणे कॅन्टोन्मेंट विधानसभा मतदार संघातील काँग्रेस पक्षाचे माजी उपमहापौर मुकारी अलगुडे, स्थायी समितीचे माजी अध्यक्ष सदानंद शेट्टी, माजी नगरसेवक तुकाराम जाधव, माजी आमदार चंद्रकांत छाजेड यांचे सुपूत्र आनंद छाजेड, बाळासाहेब रानवडे, लहु बालवडकर, समाधान शिंदे, सुरेश कांबळे, कमलेश चासकर, अभय सावंत व दुर्योधन भापकर यांचा भाजपमध्ये मुख्यमंत्री देवेंद्र फडणवीस यांच्या उपस्थितीत प्रवेश घडवून आणला. यामुळे कोथरुड, शिवाजीनगर व पुणे कॅन्टोन्मेंट विधानसभा मतदार संघातील भाजपची ताकद वाढली. कोथरुडमध्ये चंद्रकांत पाटील 25 हजार 495 मताधिक्यानी निवडून आले, शिवाजीनगरमधून सिद्धार्थ शिरोळे 5 हजार 124 तर, पुणे कॅन्टोन्मेंट मधून सुनिल कांबळे 5 हजार 12 मतांनी विजयी झाले आहेत. खासदार संजय काकडे यांनी भाजपमध्ये आणलेल्या या नेत्यांमुळे तीनही मतदार संघातील मतदान वाढले आणि त्यामुळे भाजपचे उमेदवारांचा आजचा विजय सोपा झाला.
खासदार संजय काकडे यांनी प्रचार सुरु होताच कोथरुड, शिवाजीनगर व पुणे कॅन्टोन्मेंट विधानसभा मतदार संघातील त्यांना माननाऱ्या कार्यकर्त्यांना प्रचारात सक्रिय केले. तसेच, नव्याने प्रवेश केलेल्या स्थानिक नेत्यांमध्ये माजी उपमहापौर, स्थायी समितीचे माजी अध्यक्ष, माजी नगरसेवक आणि ताकदवर नेत्यांचा समावेश होता. त्यामुळे या तीनही मतदार संघातील भाजपाच्या उमेदवारांचा विजय सोपा झाला. याबरोबरच रॅली, सभा यांच्या माध्यमातून शेवटच्या माणसांपर्यंत भाजप, शिवसेना व महायुतीच्या सरकारने मुख्यमंत्री देवेंद्र फडणवीस यांच्या नेतृत्वाखाली महाराष्ट्रात व पंतप्रधान नरेंद्र मोदी यांच्या नेतृत्वाखाली देशात केलेली कामे पोहचविली.
पुणे महापालिका निवडणुकीतही मुख्यमंत्री देवेंद्र फडणवीस यांनी खासदार संजय काकडे यांच्याकडे विशेष जबाबदारी सोपविली होती. त्यावेळी खासदार संजय काकडे यांनी ताकदीचे स्थानिक नेते भाजपची ताकद नसलेल्या ठिकाणी आणले आणि दिलेली जबाबदारी यशस्वीपणे पार पाडली. त्यामुळे 2017 च्या महापालिका निवडणुकीत भाजपाला अभूतपूर्व यश मिळाले. तशीच पुनरावृत्ती या विधानसभा निवडणुकीत कोथरुड, शिवाजीनगर व पुणे कॅन्टोन्मेंट विधानसभा मतदार संघात पाहायला मिळाली असल्याची चर्चा राजकीय वर्तुळात सुरू आहे.
