पुणे-संभाजीनगर (औरंगाबाद) येथे दि.१४ जानेवारी, २०२३ रोजी महिलेशी मध्यरात्री अश्लील वर्तन करणारे सहाय्यक पोलीस आयुक्त विशाल ढुमे यांना पाठीशी घालणाऱ्या संभाजीनगर येथील उच्च पोलीस अधिकारी यांची चौकशी करून कारवाई करावी अशी मागणी करणारे पत्र विधानपरिषद उपसभापती डॉ.नीलम गोऱ्हे यांनी उपमुख्यमंत्री तथा गृहमंत्री देवेंद्र फडणवीस यांना दिले आहे.या प्रकरणी महिलांचा गुन्हा नोंद करण्यासाठी हलगर्जी करणारे सिटी चौकी पोलीस ठाण्याच्या अधिकाऱ्यांवर कडक कारवाई करावी अशीही मागणी या पत्रातून करण्यात आली आहे.
नीलम गोऱ्हे या प्रकरणी म्हणाल्या कि,’ महाराष्ट्र तसेच संभाजीनगर येथील कायदा – सुव्यवस्था अतिशय मोडकळीस आल्याचे चित्र सध्या निर्माण झाले आहे. मागील आठवड्यात संभाजीनगर (औरंगाबाद) येथील पोलीस सहाय्यक आयुक्त विशाल ढुमे यांनी महिलेशी दि.१४ जानेवारी, २०२३ रोजी अश्लील वर्तन केले तसेच घरात घुसून पीडित महिलेच्या पती व सासूला शिवीगाळ केली. यासंदर्भात त्यांनी मध्यरात्री १.३० वा पोलीस ठाण्यात बोलविण्यात आले.रात्री महिलांना पोलीस ठाण्यात बोलविण्यापेक्षा महिला पोलीस अधिकार्रांयांनी साध्या वेशात पिडीतांच्या धरून जबाब घेणे आवश्यक होते, असे झालेले नाही. याबाबत पोलीस आयुक्त यांनी व्यक्तिशः लक्ष घालणे आवश्यक होते परंतु असे होताना दिसले नाही. अशा परिस्थितीनंतर यासंदर्भात सिटीचौक, संभाजीनगर (औरंगाबाद) ठाण्यात गुन्हा दाखल करण्यात आला आहे. याबाबत विधानपरिषद उपसभापती डॉ.नीलम गोऱ्हे यांनी उपमुख्यमंत्री तथा गृहमंत्री देवेंद्र फडणवीस यांना दि.१८ जानेवारी, २०२२ रोजी निवेदन दिले होते. त्यानंतर ढुमे यांचे निलंबन शासनाने केले असल्याचे समोर आले होते. पण अद्याप त्यांच्यावर कारवाई झाली नसून ढुमे हे सध्या संभाजीनगर येथेच आहेत. त्यामुळे त्यांना हेडक्वार्टर सोडून दुसरीकडे पाठविण्यात यावे. सदरील घटनेत ढुमे हस्तक्षेप करत आहेत. त्यामुळे ढुमे यांच्यावर तात्काळ कारवाई करण्यात यावी असे डॉ.गोऱ्हे आज फडणवीस यांना दिलेल्या निवेदनात म्हंटले आहे.
◆ त्याचबरोबर सदरील महिला ज्यादिवशी पोलीस ठाण्यात गुन्हा नोंद करण्यासाठी गेली होती त्यावेळेस देखील स्थानिक पोलीस अधिकारी यांनी सदर तक्रारदार पिडीतेस सहकार्य केले नसल्याची देखील तक्रार या महिलेने माझ्याकडे केली आहे. संबंधित अधिकारी हे पोलीस असल्याने पोलीस स्टेशन मधील प्रभारी यांनी हलगर्जीपणा झाला असल्याचे दिसत आहे. अशा हलगर्जी करणाऱ्या अधिकाऱ्यांवर तात्काळ कारवाई करण्याची आवश्यता आहे. त्यामुळे संबंधित पोलिस स्टेशन प्रभारी यांचेवर कडक कारवाई करण्याच्या सूचना संबंधीत वरिष्ठ स्तरावरील पोलीस अधिकारी यांना करण्याची सूचना डॉ.गोऱ्हे यांनी गृहमंत्री यांना केली आहे.
◆ तसेच ढुमे यांच्यावर संभाजीनगर येथील पोलीस आयुक्त कार्यालयातील अधिकारी चांगलेच मेहेरबान असल्याचे देखील आता स्पष्ट होत आहे. ढुमे यांच्यापेक्षा वरिष्ठ अधिकारी असताना देखील ढुमे यांच्याकडे वेगवेगळ्या विभागाचा अतिरिक्त कार्यभार देण्यात आला होता. श्री ढुमे यांना पाठीशी घालणाऱ्या वरिष्ट अधिकारांची चौकशी करून त्यांच्यावर ही तात्काळ कारवाई करण्यात यावी.
◆ ढुमे यांचा हा पहिला प्रकार नसून अहमदनगर येथे देखील त्यांनी असेच प्रकार केले आहेत. यासंदर्भात तत्कालीन नगर पोलीस अधीक्षक यांनी त्यांची विभागीय चौकशी देखील लावली होती. याच दरम्यान ढुमे यांची बदली संभाजीनगर येथे झाली. अशा कार्यकारी पदावर बदली करणाऱ्या गृहविभागातील अधिकाऱ्यांवर देखील कार्यवाही होणे आवश्यक आहे.
◆ तसेच रात्री नियोजित वेळेनंतर उशिरापर्यंत सुरू असणाऱ्या हॉटेलवर अद्याप देखील कारवाई झालेली नाही. त्या हॉटेल मालकांचे वर देखील त्वरित कडक कारवाई करून परवाने रद्द करावेत, असे देखील डॉ.गोऱ्हे यांनी श्री फडणवीस यांना दिलेल्या निवेदनात म्हंटले आहे.