कोरोना विषाणूने आता बॉलिवूडमधील अनेक सेलिब्रेटींच्या घरातही शिरकाव केला आहे. महानायक अमिताभ बच्चन आणि अभिषेक बच्चन यांच्यानंतर अभिनेता अनुपम खेर यांच्या कुटुंबियांनाही कोरोनाचा संसर्ग झाला आहे. अनुपम खेर यांची आई दुलारी देवी कोरोना पॉझिटिव्ह आढळल्या. अनुपम खेर यांनी स्वतः सोशल मीडियावर एक व्हिडिओ शेअर करत ही माहिती दिली. सोबतच्या त्यांचा भाऊ, वहिणी आणि पुतणी यांच्यातही कोरोनाची सौम्य लक्षणे आढळली आहेत. यानंतर अनुपम यांनी स्वतःला क्वारंटाइन केले आहे.
अनुपम यांनी व्हिडिओ शेअर करत लिहिले की, “मी तुम्हाला सांगतो की, माझी आई दुलारी देवी कोरोना पॉझिटिव्ह (सौम्य लक्षणे) आढळली आहे. आम्ही त्यांना कोकिलाबेन रुग्णालयात दाखल केले आहे. माझा भाऊ, वहिणी आणि पुतणी यांच्यातही सावधगिरी बाळगल्यानंतरही सौम्य लक्षणे आढळली. मी स्वतःची चाचणी केली होती आणि माझी चाचणी निगेटीव्ह आली. मी याबाबत बीएमसीला सुचना दिली आहे.”