नवी दिल्ली :काँग्रेस अध्यक्ष राहुल गांधी यांनी आज राष्ट्रवादी काँग्रेसचे अध्यक्ष शरद पवार यांची त्यांच्या निवासस्थानी जावून भेट घेतली. या भेटीनंतर पवारांचा पक्ष काँग्रेसमध्ये विलीन होणार असल्याच्या चर्चांनी पुन्हा जोर धरला आहे. दरम्यान, राष्ट्रवादीकडून मात्र याबाबत मौन बाळगण्यात आलं आहे.
लोकसभा निवडणुकीतील दारूण पराभवानंतर काँग्रेस अध्यक्ष राहुल गांधी यांनी अध्यक्षपदी न राहण्याचा निर्णय घेतला आहे. राहुल यांनी सादर केलेला राजीनामा काँग्रेसच्या राष्ट्रीय कार्यकारिणीने फेटाळला असला तरी राहुल राजीनाम्यावर ठाम आहेत. पक्षातील ज्येष्ठ नेत्यांनी आग्रह केल्यानंतरही राहुल मानायला तयार नाहीत. त्यात नेत्यांची भेट टाळणाऱ्या राहुल यांनी आज अचानक पवारांचे निवासस्थान गाठल्याने सर्वांच्याच भुवया उंचावल्या आहेत. दोन्ही नेत्यांमध्ये साधारण ५० मिनिटं चर्चा झाली. या भेटीचे राजकीय वर्तुळात अनेक अर्थ काढले जाऊ लागले आहेत.
विलीनीकरण का होणार?
विलीनीकरण का होणार?
राहुल-पवार भेटीत राष्ट्रवादी पक्ष विसर्जीत करून काँग्रेसमध्ये विलीन करण्याबाबत खल झाल्याचे कळते. त्यातच दोन्ही पक्षांचं हित असल्याचंही अनेक नेत्यांचं म्हणणं आहे. काँग्रेसकडे लोकसभेत ५२ खासदारांचं बळ असणार आहे. हे संख्याबळ विरोधी पक्षनेतेपदासाठी पुरेसं नाही. राष्ट्रवादी पक्ष काँग्रेसमध्ये विलीन झाल्यास लोकसभेतील विरोधी पक्षनेतेपद काँग्रेसला मिळेल. पर्यायाने राहुल गांधींचा विरोधी पक्षनेते होण्याचा मार्ग मोकळा होईल. तसे झाल्यास राज्यसभेतील विरोधी पक्षनेतेपद शरद पवार यांच्याकडे सोपवण्यात यावं, असे काँग्रेसमधील वरिष्ठ नेत्यांचं मत आहे.
काँग्रेसमध्ये नेतृत्वाची कमतरता भासत असावी!
राहुल गांधी यांच्यासोबत महाराष्ट्रातील निवडणुकीवर चर्चा झाली. पक्ष विलीनीकरणावर कोणतीही चर्चा झाली नाही, असे शरद पवार यांनी बैठकीनंतर सांगितले. राज्यसभेतील विरोधी पक्षनेतेपदाची आपणास ऑफर आहे का, असे विचारले असता काँग्रेसमध्ये नेतृत्वाची कमतरता भासत असावी, असे सूचक वक्तव्य पवारांनी केले. राहुल यांच्या राजीनाम्यावर बोलताना, पर्याय नसताना मैदान सोडणे योग्य नाही, असे नमूद करत राहुल यांनीच अध्यक्षपदी राहावे, असा सल्ला पवार यांनी दिला.
मनमोहन होणार काँग्रेस अध्यक्ष?
शरद पवार यांच्या भेटीनंतर राहुल हे तडक माजी पंतप्रधान डॉ. मनमोहन सिंग यांच्या निवासस्थानी रवाना झाले आहेत. ही भेटही महत्त्वाची असून काँग्रेसचे भावी अध्यक्ष मनमोहन असणार का, या चर्चेला या निमित्ताने तोंड फुटले आहे.
काँग्रेसमध्ये नेतृत्वाची कमतरता भासत असावी!
राहुल गांधी यांच्यासोबत महाराष्ट्रातील निवडणुकीवर चर्चा झाली. पक्ष विलीनीकरणावर कोणतीही चर्चा झाली नाही, असे शरद पवार यांनी बैठकीनंतर सांगितले. राज्यसभेतील विरोधी पक्षनेतेपदाची आपणास ऑफर आहे का, असे विचारले असता काँग्रेसमध्ये नेतृत्वाची कमतरता भासत असावी, असे सूचक वक्तव्य पवारांनी केले. राहुल यांच्या राजीनाम्यावर बोलताना, पर्याय नसताना मैदान सोडणे योग्य नाही, असे नमूद करत राहुल यांनीच अध्यक्षपदी राहावे, असा सल्ला पवार यांनी दिला.
मनमोहन होणार काँग्रेस अध्यक्ष?
शरद पवार यांच्या भेटीनंतर राहुल हे तडक माजी पंतप्रधान डॉ. मनमोहन सिंग यांच्या निवासस्थानी रवाना झाले आहेत. ही भेटही महत्त्वाची असून काँग्रेसचे भावी अध्यक्ष मनमोहन असणार का, या चर्चेला या निमित्ताने तोंड फुटले आहे.
