नवी दिल्ली- ज्येष्ठ अभिनेते नाना पाटेकर यांनी आज दिल्लीत जावून केंद्रीय गृहमंत्री अमित शहा यांची भेट घेतली. पाटेकर यांनी अमित शहा यांच्याबरोबर २० मिनिटे चर्चा केल्याची माहिती आहे. परंतु, नानांची ही भेट राजकीय होती की अन्य कामांसाठी याबाबतचा तपशील समजू शकला नाही. पाटेकर यांनी अमित शहा यांच्यासोबत बंद दाराआड चर्चा केली. यानंतर त्यांनी ही भेट खासगी होती, राजकीय नव्हती असे सांगितले आहे. शहा यांना भेटण्याआधी पाटेकर यांनी अंतर्गत सुरक्षा विशेष अधिकारी यांची भेट घेतली. नाना पाटेकर यांनी कशासाठी घेतली अमित शहा यांची भेट यावर अनेकांच्या भुवया ताणल्या चे दिसत होते .
अभिनेते नाना पाटेकर यांनी दिल्लीतील केंद्रीय गृह मंत्रालयाच्या कार्यालयात जाऊन अमित शहा यांची भेट घेतली. नाना आणि शहा यांच्यात कोणत्या विषयावर चर्चा झाली याची माहिती अद्याप उपलब्ध होऊ शकली नाही. परंतु, या दोघांत जवळपास २० मिनिटे चर्चा झाली आहे. महाराष्ट्रातील विधानसभा निवडणुका तोंडावर आल्या आहेत. काही दिवसांनंतर राज्यात आचारसंहिता लागू शकते. विधानसभा निवडणुकीच्या तोंडावर नाना पाटेकर यांनी अमित शहा यांची भेट घेतल्याने याकडे राजकीयदृष्ट्या पाहिले जात आहे. नाना पाटेकर यांनी याआधी मुख्यमंत्री देवेंद्र फडणवीस यांची उघडपणे स्तुती केली होती. त्यामुळे ते भाजपकडून लोकसभा निवडणूक लढवणार अशी चर्चा सुद्धा रंगली होती. परंतु, नाना पाटेकर यांनी सोशल मीडियावरून मी निवडणूक लढवणार नसल्याचे स्पष्टीकरण दिले होते.
दरम्यान, नाना पाटेकर हे अभिनेता मकरंद अनासपुरे यांच्या साथीने ‘नाम’ या सामाजिक संस्थेमार्फत दुष्काळग्रस्त शेतकऱ्यांना मदत करण्याचे काम करतात. त्यांच्या या संस्थेने राज्यातील अनेक गावे दत्तक सुद्धा घेतलेली आहेत.
